aMatiyu 18

Angan nar yiik e̱?

(aMar 9.33-37; aLuk 9.46-48)

1Nizen iyong, álimazhiri'me be̱ nufe aYeso nong á tú ku rip ye, “Angan nar yiik cice̱r kaye̱e̱r rigwo̱m kaza e̱?”

2Ayong aYeso yis igon kakak kahiir'e nong a tú ku sak a tá nyeseng natite ba. 3Ne a fe̱ be ba ye, “Won ta ka tak yin katsak'e, sang ke yin shishing yin kuse yin nong i tà te yin kyo̱ndi inoon nazhizhe̱k'e baꞌ, yin tà no̱ yin kaye̱e̱r rigwo̱m kaza baꞌ. 4Koangan afe a ta sok rice wu kyo̱ndi igon na, wu ne a nar yiik kaye̱e̱r rigwo̱m kaza. 5Koangan afa a ta shan igon kahiir'e kyo̱ndi kayu na kaye̱e̱r riyerek mi, mi ne ti shan.

Ike̱re̱ iya i ta sak aner ta nye rine̱n

(aMar 9.42-48; aLuk 17.1-2)

6“Ke aner akak sak azining kaye̱e̱r azhizhe̱k'e na, aya a tá min no̱o̱k katsak natoon'i, ta nye rine̱n, i tu ku nar a tu ku roos agbang kuta ako̱ nong a tu ku barak kaye̱e̱r agbang kudung tsik.

7“Awo̱ be kazatse kamok ike̱re̱ i ta sak ánerawe ta nye rine̱n. Ike̱re̱'me tà be̱s dim, amma awo̱ be aner aya a tana sak akak ta nye rine̱n. 8Ke kubo̱k wan ka kutak wan tà sak wan ta nye rine̱n ne i te̱n nong ta barak. I ta ka nar wan tà se̱ kutser kufe izen izen dar kubo̱k ka kutak be wan tana no̱ nuro̱ng kufe izen izen be ibo̱k ifa ka be atak afa ayi. 9Ke rinyisi wan tà sak wan tà nye rine̱n, ne i tun ta barak. I ta ka nar wan ta se̱ kutser izen izen be rinyisi rizining be a tana ka barak kaye̱e̱r kuro̱ng kufe izen izen be anyisi afa.

Kumaas natoon itsamang i tá wei

(aLuk 15.3-7)

10“Sak yin riye̱ sang yin tu zhe̱e̱sh yin azining kaye̱e̱r azhizhe̱k'e na baꞌ, kamok mi kun ka tak yin ye, ámaleka ba kaye̱e̱r kaza yiir iye̱re̱k kanyisi Ada mi a ta se kaye̱e̱r kaza. 11[Kamok Igon Anerawe be̱ nong a ta shesh ike̱ng iya i tá wei.]

12“To̱, yin di yin ane̱ e̱? Ke aner akak be itsamang kuso̱k inyak ne izining wei. A ta won iso̱k katonbo̱k be katonbo̱k'e nong a ta tseng ni itse̱r izining i ta wei'e aꞌa? 13Won ta ka tak yin katsak'e, izen iya ne a se̱, a ta nye riye̱ rikan kamok izining'ong ne a nar iso̱k katonbo̱k be katonbo̱k'e i ta rusek. 14Anong ne Ada yin aya a ta se kaye̱e̱r kaza shim, azining kaye̱e̱r inoon nazhizhe̱k'e na ta wei baꞌ.

Ke aronyining wan tá ka nye rine̱n

(aLuk 17.3)

15“Ke aronyining wan ta ka nye rine̱n, ne wan tseng nufu awan yin afa nong ta su ku tak rine̱n wu. Ke a fok rife̱ wan, i nye ye, wan tu bun be aronyining wan niren. 16Amma ke a ta fok baꞌ, ne wan tseng be aner azining ka afa ayi, nong a ta sor asheda áner afa ka ataar ayi. 17Ke a gaar ku ka fok ba ne wan tak áfikuus; ke a bun a gaar rife̱ áfikuus'e gbak ne a ku sok kyo̱ndi afurin, aya a ta gaar kushishing kuse wu.

18“Won ta ka tak yin katsak'e, koakye ike̱ng ne yin roos yin aze nazatse i ta se nurosom kaye̱e̱r kaza. Koakye ike̱ng ne yin bisik yin nazatse i ta se nubisik kaye̱e̱r kaza.

19“Mi bun i fe̱ be yin gbak ye, ke áner áfa kaye̱e̱r yin áya kuto̱ro̱ng ba ta se kuzining rip ike̱ng ikak, Ada mi afe a ta se kaye̱e̱r kaza ta ka nye ba'me. 20Kamok karo̱ afe áner afa ka ataar tu ku nyim kaye̱e̱r riyerek'i, mi se azong mak be ba.”

Kumaas natoon aner afe sang a ta re̱ng afudang rine̱n wu baꞌ

21Ayong aBitrus be̱ nufe aYeso a tú ku rip ye, “Atekasa, kutak kumang ne mi ta nye aronyining mi igaas e̱? Kutak kanataar a?”

22aYeso fe̱ be wu ye, “Won ta ka tak, kutak kanataar tsek baꞌ, amma iso̱k kanataar be kanataar. #18.22: Amma kanataar kutak isok kanataar: Izibir ikak ife agbugbang fe̱ ye, kutak “isok kanataar be kanataar” i ta sor ye, sang i be ifa baꞌ.

23“Kamok anong a kyem a maas rigwo̱m kaza be agwo̱m akak a tá shim ásam wu tu ku karang ike̱ng ife wu tú ku kuus ba. 24Nizen iya a ta san kufa'me a tu be̱e̱n aner akak wu tú ku kuus itso̱m atalen izungu kuso̱k (10,000). 25Kamok asam'me ta kyem a karang kuta a tu ku kuus'e baꞌ, yong atekasa'me fe̱ ye, a ra re̱p asam'me be abining wu ne inoon wu be ike̱re̱ wu cice̱r nong a tin karang kuta'me.

26“Ayong asam'me kpa nasho̱o̱n atekasa wu ame a tá fe̱ be wu ye, ‘Mi ta ka nye izong. Te kuta riye̱, mi ta ka karang cice̱r ike̱ng wan tin kuus.’ 27Atekasa wu'me fok kuro̱ riye̱ wu, yong a tú won kuta'me ne a ku won a ta tseng.

28“Amma nizen asam ame tá wuruk a sen tseng iyong a nyim be afudang wu asam akak wu tú ku kuus kuta itso̱m aDinari kuso̱k inyak. A tu ku yiir kpa ne a fe̱ be wu ye, ‘Ni karang kuta itso̱m'i.’

29“Asam afudang wu ame kpa kaben nong a tá fe̱ be wu ye, ‘Mi ta ka nye izong. Te kuta riye̱, mi ta ka karang.’

30“Amma asam ame rawu tanka, yong a tseng be wu nitso̱m ma nizen a tu ku karang kuta wu ame. 31Nizen iya ásam ákak tá di anong, riye̱ ba beseng dide̱ng yong á se tak agwo̱m ba ike̱re̱'me cei.

32“Ayong atekasa ame yis asam ame kaye̱e̱r'e a tá fe̱ be wu ye, ‘Wan amaan asam, mi tá ka won kuta mi tá ka kuus cei kamok wan tin nye izong. 33Aser, i se gye̱r wan ta ro̱ riye̱ afudang wan kyo̱ndi mi tá ro̱ riye̱ wan aꞌa?’ 34Riye̱ agwo̱m ba'me beseng dide̱ng yong a sak a tu ku te nitso̱m ma a karang kuta a tú ku kuus.

35“Anong ne Ada mi a ta se kaye̱e̱r kaza ta nye be koangan afe a ta nye áfudang wu igaas be riye̱ rizining.”

Currently Selected:

aMatiyu 18: izrNT

Highlight

Copy