aMatiyu 19

Ike̱ng aYeso tá fe̱ natoon kukam kuwe̱ne̱ng

(aMar 10.1-12; aLuk 16.18)

1Nizen aYeso tá fa gang ku fe̱ ike̱re̱ na, a dorok ni iben aGalili nong a tá be ni iben aYahuda i ta se nunyi Isho̱ng aUrdun. 2Ánerawe whe̱re̱ tú ku kuus, ne a sak áfe iro̱k tá te atser.

3Áner aFarisi ákak be̱ nufu nong á tú ku bo̱mo̱ng be kurip ye, “Ise gye̱r ánerawe ta kam be abining wu ke a tú ku nye ike̱ng ikak a?”

4aYeso fe̱ be ba ye, “Aser, yin kun fa yin ye, aner a ta nye kazatse, a nye ‘Aner amitek be aner abining ni ime̱se̱ng'e’ aꞌa? 5‘Kamok anong anerawe ta won ada be ango̱ wu nong a te azining be abining wu. Ne áner afa'me te kuro̱m kuzining.’ 6Ba ba se áner afa baba baꞌ, amma á te aner azining. Kamok anong, ike̱ng iya Adakunom tá gung sang aner akak ta kam baꞌ.”

7Iyong á tu ku rip ye, “To̱, akye̱ sak aMusa ti shim yir ra nye yir'e, aner a ta kam be abining wu ta no̱o̱k abining'e kufumung kukam kuwe̱ne̱ng'e ne a ku te niren e̱?”

8aYeso fe̱ be ba ye, “aMusa shim yin tá kam yin kuwe̱ne̱ng kamok kushonong yin. Amma i se anong kum ni ime̱se̱ng'e baꞌ. 9Won ta ka tak yin, koangan ne a kam be abining wu, sang ke ye kamok a nye rine̱n rikuna baꞌ, ke a sok abining akak a nye rine̱n kunye rikuna.”

10Iyong álimazhiri'me fe̱ be wu ye, “Ke i se anong, ko i nar aner tu sor dar kuwe̱ne̱ng ingya.”

11aYeso fe̱ be ba ye, “Sang koangan ne a ta shim kubo̱so̱p na baꞌ, ma aner aya Adakunom tu ku shim ba'me. 12Ákak ren ányining baꞌ, kamok á tu tes ba anong, ákak, ánerawe ne á tu ku sak ba á ta te anong. Ákak gaar kunye kuwe̱ne̱ng kamok rigwo̱m kaza. Aner a tana shan kubo̱so̱p na a ra shan.”

aYeso nye inoon aduwa

(aMar 10.13-16; aLuk 18.15-17)

13Ne a be̱s be inoon nazhizhe̱k'e nufe aYeso nong a tin saas ibo̱k niba ne a kunye ba aduwa. Amma álimazhiri wu zhe̱e̱r áya a tá be̱s be inoon'e.

14aYeso fe̱ ye, “Won yin inoon nazhizhe̱k'e tu be̱s nunaan; sang yin tú ku roon yin ba'me baꞌ, kamok rigwo̱m kaza nye rife̱ iri ba.” 15Nama a tin saas ibo̱k niba, a dorok azong a ta tseng.

Acam akak a tá nye arum

(aMar 10.17-31; aLuk 18.18-30)

16Ayong aner akak be̱ nufe aYeso nong a tá fe̱ be wu ye, “Aner kubo̱so̱p, akye̱ kuri ike̱ng itek ne mi ta nye nong ta ra se̱ kutser kufe izen izen e̱?”

17Ne aYeso fe̱ be wu ye, “Akye̱ sak wan ti rip natoon ike̱ng i ta nye itek e̱? Aner azining ne a nye aner atek tsek. Ke wan shim ta se̱ kutser kufe izen izen ne wan kuus Itsi Adakunom.”

18Ayong aner ame rip aYeso ye, “Itsi inyaka e̱?”

aYeso fe̱ be wu ye, “Sang wan tu fe̱r akak baꞌ, sang wan tu nye rikuna baꞌ, sang wan tu nye itsang baꞌ, sang wan tu kuus kama akak natoon abo̱o̱s baꞌ, 19no̱o̱k ada wan be ango̱ wan kuyiik, ne i shim afegbak wan kyo̱ndi rice wan.”

20Ayong acam ame fe̱ ye, “Mi n kuus ike̱re̱'ong cice̱r, akye̱ ne i rusek gbak e̱?”

21aYeso fe̱ be wu ye, “Ke wan shim tá raar ni ike̱ng ikak baꞌ, to̱, tseng ta se re̱e̱s ike̱re̱ wan nong tà no̱o̱k áfe rizor itso̱m'me, wan tà se̱ ishorong kaye̱e̱r kaza. Ne i be̱ tin kuus.”

22Nizen acam ame tá fok anong, a tú bun be riye̱ riwe, kamok wu tá nye arum'me.

23Ayong iya aYeso fe̱ be álimazhiri wu ye, “Won ta ka tak yin katsak'e, i ta ro̱ arum tana no̱ kaye̱e̱r rigwo̱m kaza. 24Mi bun i fe̱ be yin gbak ye, i ta se we̱e̱r we̱e̱r arakumi tana gor ni izobok kufe̱r be arum tana no̱ kaye̱e̱r rigwo̱m kaza.”

25Álimazhiri ame tá fa fok anong, á tu te ba zhing dide̱ng, iyong á fe̱ ye, “To̱, ke anong, iyong angan ne a ta se̱ kashesh e̱?”

26Amma aYeso tú ku ye̱re̱k ba a tá fe̱ ye, “Be anerawe, i ta kyem i se anong baꞌ, amma be Adakunom, koakye kyem i nye.”

27Ayong aBitrus fe̱ be wu ye, “Di, yir n won yir koakye nong i tá ka kuus yir, to̱, iyong yir tà se̱ yir akye̱?”

28aYeso fe̱ be ba ye, “Won ta ka tak yin katsak'e, izen saase ife Igon Anerawe tana sonong ni itsik rigwo̱m wu ife kuyiik, yin áfe i tin kuus yin, yin tà sosok yin mak be mi natoon ítsik rigwo̱m kuso̱k be afa. Yin tà to̱ yin, ízo̱ro̱k Isarela kuso̱k be afa amok. 29Koangan afe a tá won nasa wu ka áronyining wu ka ángasnyining ka atek wu ka ango̱ wu ka inoon wu ka ako̱ wu kamok riyerek'i, a ta se̱ ike̱ng iya i ta nar anong kuso̱k inyak ne a bun a se̱ kutser kufe izen izen. 30Amma whe̱re̱ áfe a ta nye áfe ime̱se̱ng'e tà te áfe igang'e, ne áfe a ta nye áfe igang'e tà te áfe ime̱se̱ng'e.

Currently Selected:

aMatiyu 19: izrNT

Highlight

Copy