aMatiyu 22

Kumaas natoon riye̱ rikan kuwe̱ne̱ng

(aLuk 14.15-24)

1aYeso bun a tú tak ba rife̱ rikak kaye̱e̱r kumaas gbak ye, 2“A ta kyem a maas rigwo̱m kaza be agwo̱m akak a tá nye igon wu kanye̱k riye̱ rikan kuwe̱ne̱ng. 3A tom ásam wu ákak ye, á ra se yis áya a tu ku tak ba riye̱ rikan'e ye, á ra be̱ amma áner'e raba ku be̱.

4“Iyong á bun á tom ásam ákak gbak ye, á ra se yis áya wu tu ku tak ba riye̱ rikan'e ye, wu nye naya, an tsek inyak be izha, koakye n te, á ra be̱ riye̱ rikan kuwe̱ne̱ng'e.

5“Amma ko á ti tar kuto baꞌ. Á tseng ako̱o̱n ba, akak be riko̱ wu ne akak be naro̱ rizhik wu. 6Ribir'e yising ásam'me nong á tu ku no̱o̱k ba risam ne á ku fe̱s ba. 7Riye̱ agwo̱m'me beseng dide̱ng. Ayong a tom ásozha wu nong á ta se fe̱s áner á ta fe̱s ásam wu ame ne á shosh kuwo̱p'e.

8“Ne a fe̱ be ásam wu ye, ‘An gang kunye kanye̱k riye̱ rikan kuwe̱ne̱ng'e, amma áner mi tú ku yis'e kyem a be̱s baꞌ. 9Kamok anong, tseng yin ni nanu íren ta se yis yin koangan afe yin tu ku se̱ yin ye, a ra be̱.’ 10Iyong ásam ame tseng ni nanu íren ame á ta se tusung áner ba ta se̱ cice̱r, áya a ta be kuse kutek be ámaan'e ma kutu kunye riye̱ rikan'e shining be átsen.

11“Nizen iya agwo̱m ame tá fa no̱ nong a ta di átsen'e, a di aner akak aya a tá se dar ares kunye riye̱ rikan'e. 12Ayong a fe̱ be aner'e ye, ‘Are̱, wan nye ane̱ i ta no̱ aze dar ares kunye riye̱ rikan kuwe̱ne̱ng'e e̱?’ Aner ame dun ike̱ng kufe̱.

13“Ayong agwo̱m'me fe̱ be ásam wu'me ye, ‘Rosom yin ibo̱k'e be atak'e nong tu ku barak yin nufang na awhi. Azong ne a tà tos ne a ya anyi.’

14“Kamok ánerawe whe̱re̱ ne a yis amma cie̱k ne a kasa.”

Kurip natoon kukarang aKaisar itso̱m iben

(aMar 12.13-17; aLuk 20.20-26)

15A sen sor ne áner aFarisi se nye ibo̱ro̱ng nong á ta di ka aYeso tá taam kaye̱e̱r rife̱ wu. 16Iyong á tom álimazhiri ba ákak ne áner aHiridus ákak nong á tá fe̱ be ye, “Aner kubo̱so̱p, yir ren yir ye, wan nye aner katsak, wan bo̱so̱p ánerawe katsak natoon Adakunom, ánerawe se kuri kuzining nufuan sang wan kasa ka angan nye angan'e baꞌ. 17Ko ni tak yir, wan di ise gye̱r nong yir ta karang yir aKaisar itso̱m iben a?”

18Amma aYeso tá ren amaan kuto̱ro̱ng ba iyong a fe̱ be ba ye, “Yin ákardak áner, akye̱ sak yin shim tin bo̱mo̱ng yin e̱? 19Ni tonong yin ica itso̱m a tin karang itso̱m iben'e.” Iyong á tú ku be̱e̱n ica itso̱m a tá yis ye aDinari. 20Ne a ku rip ba ye, “Nawu be riyerek angan na e̱?”

21Á tú ku shim'e ye, “Nafe aKaisar.”

Ayong aYeso fe̱ be ba ye, “To̱, no̱o̱k yin aKaisar ike̱ng iya i ta nye ife aKaisar ne i no̱o̱k yin Adakunom ike̱ng iya i ta nye ife Adakunom.”

22Nizen ba tá fa fok anong, á te zhing, ne á won aYeso á ta tseng.

Kurip natoon kudorok ikom

(aMar 12.18-27; aLuk 20.27-40)

23Katuk kayong, áner aSadusi be̱ nufe aYeso. Ba ne á fe̱ ye, sang kudorok ikom kuse baꞌ. Á rip aYeso ye, 24“Aner kubo̱so̱p, aMusa fe̱ ye, ‘Ke anerawe ku a won akumung, aronyining ta kyem a sok akumung'e nong a tu ku tes mo inoon.’ 25To̱, áner ákak kuse kaye̱e̱r yir ba kanataar áner be aronyining. Afe ime̱se̱ng nye kuwe̱ne̱ng, a ku dar kutes a won aronyining akumung'e. 26Anong ne i bun ise be afe afa, be afe ataar ma i be̱ natoon afe kanataar'e. 27Ni igang'e cice̱r ne akumung'e ku. 28To̱, katuk kudorok ikom, akumung'e tà nye afe angan kaye̱e̱r áner kanataar'ong e̱? Kamok cice̱r ba'ong á tsang á nye kuwe̱ne̱ng wu.”

29aYeso fe̱ be ba ye, “Kuto̱ro̱ng yin se gye̱r baꞌ, kamok yin ren yin rife̱ Adakunom ka kukyem wu baꞌ. 30Katuk kudorok ikom, ánerawe tà nye iwe̱ne̱ng, ka á ta sok nyesek angas ba nong á tà nye iwe̱ne̱ng baꞌ, amma a tá se kyo̱ndi ámaleka ta se naza. 31Natoon kudorok ikom, yin i kun fa yin ike̱ng iya Adakunom tá fe̱ be yin kaye̱e̱r izibir ye, 32‘Mi ne i nye Adakunom Ibrahim be Ishaku ne aYakub’ aꞌa? A nye Adakunom atser sang áfe ikom baꞌ.”

33Anerawe tá fa fok anong, iyong a te azhing be kuri kubo̱so̱p wu.

Itsi iya i ta nar be kuyiik

(aMar 12.28-34; aLuk 10.25-28)

34Nizen iya áner aFarisi tá di áner aSadusi ame ba be ike̱ng kufe̱ baꞌ, iyong a naka tusung karo̱ kazining. 35Akak kaye̱e̱r ba a tá ren Itsi dide̱ng a shim a tá bo̱mo̱ng aYeso, iyong a tú ku rip ye,

36“Aner kubo̱so̱p, Itsi inyaka ne i nar'e be kuyiik'e e̱?” 37aYeso fe̱ be wu ye, “ ‘Shim Agwo̱m Ágwo̱m wan Adakunom wan be riye̱ wan cei, ne kutser wan cei, be kuto̱ro̱ng wan cei.’ 38Iyong ne i nye Itsi ife ime̱se̱ng'e ne i nye iyiik'e. 39Ife afa bun ise kyo̱ndi iyong, ‘Shim afegbak wan kyo̱ndi rice wan.’ 40Itsi cice̱r be kubo̱so̱p áner kuzarap cei nyeseng natoon Itsi ifa na.”

Kurip natoon aKiristi

(aMar 12.35-37; aLuk 20.41-44)

41Áner aFarisi tá fa nyim naro̱ kazining, iyong aYeso fe̱ be ba ye, 42“Kuto̱ro̱ng yin se ane̱ natoon aKiristi'me e̱? A nye Igon angan e̱?”

Iyong ba fe̱ be wu ye, “A nye Igon aDauda.”

43Ayong aYeso fe̱ be ba ye, “To̱, akye̱ sak aDauda, Kabik Kazhe̱l'e ta se be wu, tú ku yis ye ‘Agwo̱m Ágwo̱m e̱,’ kamok aDauda fe̱ ye,

44“ ‘Agwo̱m Ágwo̱m fe̱ be Agwo̱m Ágwo̱m mi ye,

“Sonong nabas kubo̱k riya mi,

ma izen iya mi sak ámudo̱n wan

kpa natak wan.” ’

45“Ke aDauda tú ku yis aKiristi ye, ‘Agwo̱m Ágwo̱m,’ to̱, a nye ane̱ aKiristi'me tá bun a te igon wu e̱?” 46Ko ákak kyem a fe̱ ike̱ng ikak be aYeso baꞌ. Igang'e be katuk'ong akak raba bo̱mo̱ng aYeso baꞌ.

Currently Selected:

aMatiyu 22: izrNT

Highlight

Copy