aMatiyu 28

Kudorok aYeso nure̱k

(aMar 16.1-8; aLuk 24.1-12; aYoh 20.1-10)

1Nama kunom Asabar, nadiding bop katuk ime̱se̱ng'e, aMarya aMagadaliya ne aMarya afe afa'me tseng nong á ta se di kure̱k'e.

2Iyong kaben wor ka zuur kamok amaleka Adakunom akak ne naza nong á tá be̱ tomong kuta'me ne á ni sonong natoon'e. 3Ne a sam kyo̱ndi akanang, ne ares wu kare̱p pes kyo̱ndi kufe̱n. 4Áfe a tá tor kure̱k'e fok inyim dide̱ng ma á koor, ne a kpas kyo̱ndi a kus.

5Amaleka'me fe̱ be anyining'e ye, “Sang yin tu fok yin inyim baꞌ. Mi ren yin sen tse̱r yin aYeso, aya a tú ku tigak. 6A kuse baꞌ. An dorok kyo̱ndi wu tá fe̱. Be̱ ta di yin karo̱ a tú ku sak ko. 7Tseng yin gbasak ta se tak yin álimazhiri wu ye, ‘An dorok nure̱k, a ta ka tsang yin na aGalili. Yin tu ku se̱ yin azong.’ ike̱ng mi ta shim ta ka tak yin'ong.”

8Iyong ányining ame wor á won kure̱k'e gbashak nong á ta be nufe álimazhiri ame be inyim amma be riye̱ rikan. Á tseng á teng ba nong á se tak álimazhiri'me. 9Ayong aYeso be rice wu wor nyim be ba, ne a fe̱ be ba ye, “Dazha yin.” Ne ányining'e be̱ bubarak be wu, ne á kpa natak wu nong á tu ku ya iben. 10Ne aYeso fe̱ be ba ye, “Sang yin tu fok yin inyim baꞌ. Tseng yin tà se tak yin ároneng ye á ra tseng na aGalili. Ba tin di azong.”

Ike̱ng áner kutor kure̱k'e tá fe̱

11Ányining'e ta rusek niren, yong ákak kaye̱e̱r áfe kutor kure̱k'e tseng kaye̱e̱r agbang kuwo̱p'e nong á ta se tak ágbang atsi ike̱ng iya i ta nye cei. 12Nama ágbang atsi'me tá nyim be ásho̱n, ne á nye ibo̱ro̱ng nong á ta no̱o̱k ásozha'me itso̱m whe̱re̱. 13Á ta fe̱ be ba ye, “Fe̱ yin ye, ‘Álimazhiri wu ne á be̱ natuk á ta be̱ á sok kukom'e nizen iya yir ta se yir be ida.’ 14Ke itak'e no̱ nato aBilatus, yir tu ku tak yir, nong yin ta so̱ yin risam baꞌ.” 15Iyong ásozha'me shan itso̱m'e ne á nye ike̱ng á tá fe̱ be ba. Itak na tsang tseng koake̱ niben áner aYahuda ma kyo̱o̱rna.

Itomong aYeso tá no̱o̱k álimazhiri wu

(aMar 16.14-18; aLuk 24.36-49; aYoh 20.19-23)

16To̱, álimazhiri kuso̱k be azining'e tseng na aGalili, natoon kawhanang naro̱ aYeso tá tsang a fe̱ be ba ye á ra tseng. 17Nizen á tú ku di, á kpas kaben á tu ku ya iben, amma aye̱ ákak ba se gak. 18Ayong aYeso be̱ bubarak be ba, a tá fe̱ ye, “A min no̱o̱k kukyem kaye̱e̱r kaza be kaye̱e̱r kazatse cice̱r. 19Kamok anong, tseng yin kaye̱e̱r kazatse cice̱r ta se sak yin ánerawe ta te álimazhiri mi, ne i ku nye yin ba abatisma kaye̱e̱r riyerek Ada, ne kaye̱e̱r riyerek Igon'e, ne kaye̱e̱r riyerek Kabik Kazhe̱l'e. 20Ne i ku bo̱so̱p yin ba iren á tana kuus koakye mi tá ka tak yin. Yiring yin ye mi se mak be yin koakye izen ma ni igang izen.”

Currently Selected:

aMatiyu 28: izrNT

Highlight

Copy