aMarkus 16

Kudorok aYeso nure̱k

(aMat 28.1-10; aLuk 24.1-12; aYoh 20.1-10)

1Kunom Asabar tá fa gor, aMarya aMagadaliya, be aMarya anyining aYusufu ne aSalomi, shan ike̱re̱ iko̱o̱n itek, nong á tá sen kon natoon kukom aYeso. 2Bop nadiding katuk ime̱se̱ng'e na asate, kum ne kunom rusek ku ta ra wuruk ne ba shan iren nong á tá be nure̱k'e. 3Á tá se ba niren ne á fe̱ ba ye, “Angan tà sen tomong yir kuta kuya ku ta se nanu kure̱k e̱?”

4Amma á tá fa tseng ba azong naro̱'me ne á sok anyisi naza ne á di an tomong kugbang kuta ame nanu kure̱k'e. 5Á tá fa no̱ kaye̱e̱r kure̱k'e, ne á di acam akak a tan te ares akan nusonong nabas kubo̱k riya, ne azhing tu yiir ba.

6Ayong a fe̱ be ba ye, “Sang tu te yin zhing baꞌ, yin tse̱r yin aYeso afu aNazaret aya a tú ku tigak aꞌa? An dorok! A kuse aze na baꞌ. Di yin karo̱ a tú ku mees. 7Amma tseng yin, ta se tak yin álimazhiri wu be aBitrus ye, ‘A ta ka tseng ba na aGalili. Azong ne ba tú ku di kyo̱ndi a tá fe̱ be ba.’ ”

8Ányining ame wuruk be itsi, án te titak ma á tsang tiim. Á fe̱ ike̱ng ikak be akak baꞌ, kamok inyim tú ku ro̱ ba.

aYeso ti wuruk na aMarya aMagadaliya

(aMat 28.9-10; aYoh 20.11-18)

[ 9Nizen iya aYeso tá dorok nure̱k nadiding bop katuk ime̱se̱ng'e na asate, a san i tonong rice wu nufe aMarya aMagadaliya, aya aYeso'me tú ku turung ítseng kanataar ame. 10Ayong aMarya'me tseng nong á tá tak áner aya a tá tsang a se mak be aYeso'me ne áya a tá ta se be riye̱ riwe ne kanak. 11Amma ba tá fa fok ye, aYeso'me ru nye atser, ye wu tú ku di, ba ti no̱o̱k katsak baꞌ.

aYeso ti wuruk na álimazhiri wu afa

(aLuk 24.13-35)

12Nama anong aYeso ti wuruk na álimazhiri ákak ba afa nizen iya á tá se be kutsang kutseng, a wuruk kuri kuwuruk kukak ze̱e̱r nong a tá se nyim be ba. 13Álimazhiri afa ame tú bun nong á tá se tak ribir afudang ba, amma ko áfudang ba'me bun á ti no̱o̱k katsak baꞌ.

aYeso tom álimazhiri wu kuso̱k be azining

(aMat 28.16-20; aLuk 24.36-49; aYoh 20.19-23)

14Nama aYeso tin wuruk na álimazhiri wu kuso̱k be azining nizen á ta sen ya naya. A tú zhe̱e̱r ba, kamok ku won dar kuno̱o̱k katsak ba ne kushonong ba á tá gaar ku nino̱o̱k katsak rife̱ áya a tú ku di nama wu tá dorok baꞌ.

15A fe̱ be ba ye, “Tseng yin koake̱ kaye̱e̱r kazatse, se taas yin ánerawe cice̱r Rife̱ Ritek'e. 16Aner aya ne a ti no̱o̱k katsak, a tu ku nye abatisma a ta se̱ kashesh. Amma aner aya ne a gaar ku ni no̱o̱k katsak, a tù ku to̱ amok. 17Áya a tin no̱o̱k katsak ni mi tà nye ike̱re̱ na: Kaye̱e̱r riyerek'i, á tà turung ámaan nabik ne á fe̱ kanu kaye̱e̱r irem ifas. 18Á tà yising íwhen be ibo̱k ba. Ke á so̱ amaan nado̱m, na tú ku nye ba ike̱ng ikak baꞌ. Á tin saas ibo̱k ba natoon áya a ta nye atser baꞌ, ne á tà te atser.”

A sok aYeso nong a tá be naza

(aLuk 24.50-53; aMat 1.9-11)

19Nama aYeso tá fe̱ anong be ba, a tú sok a tá tseng'e kaye̱e̱r kaza nong a ta se sonong nubo̱k riya Adakunom. 20Álimazhiri wu ame tseng nong á ta se taas Rife̱ Ritek koake̱. Agwo̱m Ágwo̱m ti nye itomong be ba dide̱ng. A tonong ye rife̱ ba be katsak be ike̱re̱ azhing iya ba tá nye mak be rife̱'me.]

Currently Selected:

aMarkus 16: izrNT

Highlight

Copy