Yohana 7

Yesu ti Ameinja-wu

1Isim ti ira yine wur ru pu yi, Yesu kyang ikyin-wu uwae uten ti Galili. Awu ku sha-wu ti wu na u kyang ikyin uwae uten ti Yawudiya be, ikyaen ti, ande ndufu Yawudiya atang ku pwen ti a na u wen wu wen. 2Kiye kyang yaen ku pu yi ti Mbayawuda ku nde ukwab-ba, Ukwab na Afug. 3Ameinja Yesu ba ri te wu baa, “Ya uwog wune ta ti ru yi Yawudiya ikyaen ti ande ti ku putsa-fu ā nung wande ti kuko ti afu ku nde. 4Unde ti a ku sha ti ande na nung wu, awu ku tam-wu wande-wu tam be. Itso wande tiyang ti afu ku nde ne, ya ta ti ande meme ā nung fu.” 5Aba ri ira yine ikyaen ti, ko ti aba si ameinja-wu, aba ti risu-ba ru-ba uwae kinjo uwog-wu be. 6Yesu ri te ba baa, “Kiye ti pang atang ti ame u ru yi atang, ba-yi khika be. Ana-ni ani u nde tu ti ni ru-ni yi atang ko kiye titini. 7Ande ti utense u pyir-ba ira-ni be. Aba u pyir ira-m ikyaen ti, ame tsi kunn ti ku ri te ba baa, aba na ku nde ikentitibi. 8Ni ru-ni uwog ukwab wu. Ame u ka-m atang be, ikyaen ti, kiye ti ame u ru ka atang ru ba-yi khika be.” 9Kiye ti awu ri mam fe ira yine te ba awu som iken-wu ti uten ti Galili atang.

Yesu Ru Ka Uwog Ukwab Afug

10Isim ti ameinja-wu ru mam pu ba yi uwog ukwab, Yesu ru ka atang ama. Awu ru-wu farang be, awu ru ka atang ti uwae kitam. 11Uwog ukwab atang, ande ndufu uten ti Yawudiya ku sha rifab-wu. Aba ku rang ande baa, “Yesu ta aka?”

12Ande ti funn atang meme ku pwen asae risu-wu. Ariki ku ri baa, “Awu si unde ti tinyang.” Ariki ama ku ri baa, “Iyee, awu ku kyaefa ande.” 13Ama unde iki ta-wu ti wu ri tso ise ira risu Yesu wurr atang be, ikyaen ti, aba ku kyen ikyenricwu ande ndufu Mbayawuda.

Yesu Kwen Na Ande Iken Uwae Kusog Rimam Tiyang

14A ka fob kutampwa kiye ukwab wu, Yesu ru yi kusog Rimam tiyang, ru ka bag iken ti kwen atang. 15Ande ndufu Mbayawuda fxen ira yi ayi fur ba ayib. Aba ku rang ira baa, “Unde wune ti ka ji-wu makanta usir iki be, awu kyang rimang u nung iken timambe?”

16Yesu ri te ba baa, “Iken ti ame ku kwen si-yi iken ti kwen-m be, ayi ru uwog Rimam ba, awu ti tom me ru ba. 17Unde titini ti ku sha ti wu na u nde iken ti Rimam ku sha, awu u nungye baa, iken ti ame ku kwen ru uwog Rimam ba re, re ayi si ana-m ti risu-m amam ra. 18Unde ti a ku ri nyáng ira ti risu-wu, awu ku sha kuko ti risu-wu. Amaa, unde ti a ku sha kuko awu ti tom wu, si unde ti kubenti. Ira tikong ta-yi unju-wu be. 19Unde ti nda ni Icwe si-wu Musa be a. Amaa, ani putsa-ni ayi be, ko unde kinjo uwae-ni. Ama imi ti nde ani ku sha ti ni na u wen m?”#7:19 Kinjo uwae icwe Musa si “Wen-fu unde be.” Ande ndufu Mbayawuda ku nyatsa icwe Musa, ikyaen ti, aba ku sha ti a wen Yesu.

20Ande ti funn atang ri te wu baa, “Rijwen titibi ta risu-fu! Aye wu ti ku sha ti wu na u wen fu wen?”

21Yesu ri te ba baa, “Ayib fur ni risu ikyaen wande kinjo ti ame nde usir bikyinn. 22Ani ku putsa icwe Musa u ku tsen na anyisu ti urom kutxin usir ikyinn (ko ti ayi si abitse-ni ti ye icwe yi tsi, si-yi Musa ti nde be). 23Ani ku nde wande ayine ikyaen na Icwe Musa, ama imi ti nde ani ku tso rinae te m kiye ti ame nwangru unde ti kicaeb usir bikyinn? 24Ame ku ri te ni baa, ni sae-ni unde yi rimenn ijwe be. Ni sae wu yi fengo kubenti.”

A ku Rang baa, Yesu Si Unde wu ti Rimam Tsab Tsi a

25Ama ande iki ti ta uwae uten Urushelima atang rang atso baa, “Awune si-wu unde wu ti a ku sha ti a u wen wu wen be a? 26Ni nung awu ku ri ira uwe ande ike wurr, ama a byang kyi-ba wu be. Ko iki be ande ti uwe abane nung pu ba ti awu si Unde wu ti Rimam Tsab Tsi ahoo? 27Ama ayi u ndetu-yi ahan be, ikyaen ti, ati nung pu ti unde wu, ti uwog ti awu ru atang ba meme. Kiye ti Unde wu ti Rimam Tsab Tsi a ru ba, unde iki u nung-wu uwog ti awu ru atang ba be.”

28Ikyaen ira ti aba ku ri ne, kiye ti Yesu ku kwen iken uwae kusog Rimam tiyang, awu ri ira ti ribom-wu baa, “Ani nung m ben ben u nung uwog ti ame ru atang ba ama njaa? Ame ru ba-m ti risu-m amam be. Unde iki ti tom m ba, awu si kubenti, ama ani nung-ni awu be. 29Ame nung wu ikyaen ti, ame ru uwog-wu ba, awu ti tom m ba.” 30Isim ira yine aba ku sha ti a na u ye wu ye, amaa unde iki ta-wu ti sa kujwo tekunn wu be, ikyaen ti, kiye ti Rimam sa tsi na wu ru ba-wu khika be. 31Ande ti funn atang yang akwen ru uwae kinjo uwog-wu u ku rang baa, “Kiye ti Unde wu ti Rimam Tsab Tsi a ru ba, awu u nde kyi wande ti u skeb wande ti unde wune nde ne njwaa?”

Ande Ndufu Tom Ande Ka Ye Yesu

32Ti ande ti kumbub Farisi fxen itso ira yi ti ande ku pwen asae risu Yesu, aba ti ande ndufu ti ku fen Rimam tom ande ti ku nungkyi kusog Rimam tiyang ti a na ru ka u ye Yesu ru ba. 33Yesu ri te ba baa, “Usom ti som-m te ni ko-yi ko cwucwo be. Isim-yi, ame u nwunn ru ka tu unde ti tom me ru ba. 34Kiye ti ame a ru, ani u ru ba ku sha rifab-m, ani u tu-ni ame be, ikyaen ti, uwog ti ame u ru ka som atang ani u ru ka fob-ni atang be.”

35Ande ndufu aba ri ira ti unghae u ku rang atso baa, “Aka ti awu ku ru ti ati u ru ka fob-ti atang be? Ko awu ku sha ti wu na u ru yi uten na ande ti Helene uwog ande-ti ti shag ru ka atang ti wu na u kwen na ba ira-wu ayi ahoo? 36Awu ri baa, ati na u sha rifab-wu, ama ati na u tu-ti awu be. Awu ri kyi cwucwo baa, ati na u ka fob-ti uwog ti awu na ku ru yi atang be. Imbyi ira yine baa imi?”

Ambyi ti ku Nda Ande Unyang

37Usir ti ricwunnkyi na Ukwab Mbayawuda ti si usir tiyang, Yesu nwunn ritsen u ri ira tso ti ribom-wu baa, “Unde titini ti a ku fxen ti unwaen ambyi, awu ā ba ti awu ā ngwa uwog-m. 38Unde titini ti a ru uwae kinjo uwog-m, ayi u si pangma ti a bae uwae kutsingken Rimam baa, ‘Ukab ambyi ti ku nda unyang u pang ruye riyaen utob-wu.’ ” 39Ira yine, Yesu ri yi risu Kusung Rimam ti Rimam na u nda ande ti ru uwae kinjo uwog-wu. Kiye yi ti awu ri ira yine Rimam sa Kusung-wu na-wu aba khika be, ikyaen ti, Yesu nwunn-wu ti kuko ukwe-wu khika be.

Ande ti ku Fxen Yesu Kata Ambub Ifaen

40Ande yang akwen uwae ande ti funn atang fxen wu ti awu ri ira yine, ama aba ri baa, “Kubenti! Unde wune si kang unde wu ti ku ya iskin ira Rimam ti a bae ira risu-wu kute.” 41Ariki ku ri baa, “Awu ti si Unde ti Rimam Tsab Tsi.” Amaa ariki pyir baa, “Kristi u ru Galili ba njaa? 42A bae uwae Kutsingken Rimam baa, Unde wu ti Rimam Tsab Tsi wu, na u ruye ushi kununn Dawuda ba. Aba na u umbae wu uten ti Betilami, uten ti Dawuda nae atang kucang.” 43Ande ba ku shaen ishaen te atso risu Yesu u kata kumbub ifaen. 44Ariki ku sha ti a na u ye wu, amaa unde ta-wu ti awu sa kujwo tekunn wu be.

Ande ti Uwe Uten Pyir Yesu

45Ti akyirten ba kafe ka tu ande ti uwe ba, ti aba ande ti kumbub Farisi ti tom ba ba, aba ande ti uwe rang ba baa, “Imi ti nde ani cwong-ni awu ru ba te wu be?” 46Aba ande ti ku yir imbyi ba ri baa, “Ati fxen ji-ti unde iki ti ri ira ti kuko pangma unde wune be!” 47Ande ti kumbub Farisi aba rang ba baa, “A! A! Awu kyaefa pu wu ni ama a? 48Ani nung ji pu ni unde iki uwae kumbub Farisi ko unde iki uwae-ti ande ti uwe ti ru uwae kinjo uwog-wu a? 49Ande ti ukaen bane ti funn ike, a nung-ba Icwe na Musa be. Kufwag Rimam ta risu-ba!” 50Ama unde kinjo uwae ande ti uwe bane, rinyi-wu si Nikodemu, awu si unde wu ti ru ka uwog Yesu kucang, awu ri baa, 51“A bae uwae Icwe-ti baa, ati na fxen ira unju unde tawe ati u pwen wu rikwen, be a?” 52Ama aba ri te wu baa, “A! A! Afu si urae Galili ama a? Nung kutsingken Rimam nyinyang, afu u nungye baa, unde ti ku ya iskin ira Rimam na u ru Galili ba be.”

Unda ti A Ye wu Uwog Iyag ti nae#7:52 Ira ti putsa ike ne ta-yi uwae kutsingken Girik be. Aba sa yi sang atang isim.

53Isim ira yine unde titini ru yi uwae kununn-wu.

Currently Selected:

Yohana 7: kubNT

Highlight

Copy