Luka 20

Kǝnduwo Isaye ndaran isi?

(Mat 21.23-27; Mar 11.27-33)

1Yim laa Isa Fado Alayen jamaa alamje tayiro kawuɍi kǝji Alayedǝa wuljiyi duwon, wurawa ɍimannaye-a malǝmba Attauraye-a amwurawa-a nanjuro isane 2tiro: «Andiro wulsagane, kǝnduwo filan awo ania dimi? Wundu niro kǝnduwo adǝa njo?» cane tia keworo. 3Isaye tayiro: «Wu ye nayiro koro fal njaddǝkki, wulsǝgǝnowo! 4Kasala Yahaya jamaro cǝddǝnadǝ, sameyen kadio ra kamben?» cǝne tayia kiworo. 5Daji kattenjan sawardane: «“Sameyen” wulliyea, andiro: “To, awiro gǝle tia kasadduwwidǝ?” cǝne sawori. 6Amma “Kamben” wulliyea, jama samma andiro kau gǝgǝmsagane seyesi, dalilnjudǝ Yahayaa nawiro ngojana nangaro.» 7Daji Isaro ndaran kadiomaro nojanni yera. 8Isaye tayiro: «Wu ye kǝnduwo filan awo ania dikkidǝa wulnjagakkiwawo,» yeno.

Misal jǝrwu agǝriduwu kǝladowaye

(Mat 21.33-46; Mar 12.1-12)

9Daji Isa misal adǝa jamaro manaduwu badiyeno. Tayiro: «Kam laa jǝrwu inabbe cǝde jǝrwuwu laaro agǝrijiye bǝlawuro kawu kadayero sapkada. 10Sa fǝrdoye kidǝnniya, nuwanju cuwandoro kaɍeanju laaa na jǝrwuwudǝyero kinodo. Amma jǝrwuwudǝ tia cadane bakcane mukko dea duyera. 11Koro walde kaɍea gade kinodo. Ti yea cadane bakcane basarjane mukko dea duyera. 12Koro walde kaɍea yakkuye kinodǝnniya, caye gai ti yea larujane duyera. 13Daji kǝma jǝrwudǝye: “Awi gǝle dikki? Tadani raakkǝnadǝmaa nodǝkki. Waneye tiro daraja cadi,” yeno. 14Amma jǝrwuwudǝ tadanjudǝa kerunniya, kattenjan: “Adǝma warasamadǝ wo! Tia yejiyo, warasadǝ kaandero waljo!” yera. 15Daji tia cadane jǝrwudǝlan cattuluwe roro keyeso.

«To, kǝma jǝrwuyedǝ awi cǝdi? 16Ise jǝrwuwu ania roro ceje am gadero jǝrwunjudǝa ci,» yeno. Jamadǝ adǝa fangeranniya, tayiye: «Suwana! Bare ngairo waljǝnni!» 17Amma Isa tayia ninije: «To, awi maana awo kitawulan ruwuwada adǝye?

“Kau duwon fado tandomaso wajanamadǝ,

tima kau tandoye sammaro faidaaro waljǝnadǝ wo.”#Jaw 118.22

18Nonowo, kam kǝla kau adǝyero cukkurǝnamadǝ nanamdi,

koro kaudǝ kambo cukkuriya, kǝluwuro kalakci,»#Ish 8.14; Dan 2.34-35 yeno.

19Malǝmba Attauraye-a wurawa ɍimannaye-a jawal tia taye majai duwon, jamadǝa riyera, dalilnjudǝ kǝlanjaman misaldǝa kidoro asujana nangaro.

Kambiwu kǝla akki njoyen

(Mat 22.15-22; Mar 12.13-17)

20Daji wurawa adinwuye ani Isaa mǝlastu badijane curo mananjuyen cada mukko gomnayero casakkoro am laa jirewu gairo kǝlanja kalakcanaa nanjuro kenodo. 21Tiro: «Sayinna, mana wuldunǝm-a jamaa alamdunǝm-a samma jirero noniyena, koro wundumaa gayirnǝmbawo ye, jawal Alaye kalkallo yikkǝrami ye. 22To, Kaisarro#20.22 Kaisar - Gomna kura Rombe akki njodǝ, andiro halal ra haram?» cane tia keworo. 23Amma Isa niadiwinjadǝa asuje tayiro: 24«Wuro dinariyus#20.24 dinariyus - Dinariyus faldǝ alwasi kida kawu falle. fǝlesǝgǝnowo rukke! Cu-a kǝla-a wunduye tilan dasaa?» cǝne tayia kiworǝnniya, tiro «Kaisarre,» yera. 25Daji Isaye tayiro: «Ngaimaa, awo Kaisarredǝa Kaisarro yowo, koro awo Alayedǝa Alaro yowo!» yeno. 26Adǝgaima rakcane fuwu jamayen Isaa curo mananjuyen cadanni. Jaawunjudǝa jauro ajapcane mǝdǝk napkera.

Kambiwu kǝla cinowo duniayen

(Mat 22.23-33; Mar 12.18-27)

27Sadusiya laa, tayi cinowo duniayea kasaccannidǝ, na Isayero isane 28tiro koro cadde: «Sayinna, Nawi Musaye: “Kam laa yanjugǝna tada bawo bawoje kamu koljia, kamu yanjugǝna faccǝgǝnayedǝa niyajo yanjugǝnaro kaduwu majuwo!”#SK 25.5 ruwujǝna. 29Akko yaana tulur mbeji. Burwoyedǝ kamu ngoje tada cuwandǝnnin bawoyeno. 30Yindiyedǝ ye kamudǝa niyayenniya, ngai. 31Yakkuyedǝ ye ngai. Adǝgaima tayi tulurso tada cawandǝnnin bawoyera. 32Ngawo adǝyen kamudǝ ye bawoyeno. 33To, tayi tulurso tia camowonadǝ, cinowo duniayen kamu wundunjayero walji?» cane tia keworo.

34Isaye tayiro: «Am jaman adǝye larusa so, niya so cadi, 35amma am duwon leira-a karmon cidu-aa cawandǝnadǝ larusa so, niya so cadiwawo. 36Karmon cidudǝn nuwanjaa nangaro, tayidǝ tadawa Alaye, malaiyawa gai rakcane gadero sanuiwawo.#20.36 malaiyawa gai - Sawisoro na Alayen roa dasayi, gadero sanuiwawo. Adǝma nangaro samelan kaduwu mada bawo. 37Koro Nawi Musa kǝlanjuma kitawulan na kannu dawu kǝska cambiyedǝn am bawojana cijaidǝa tabbaccǝgǝna. Tidǝ Kǝmandea Ala Ibrahimbe-a Ala Isakuye-a Ala Yakubaye-alan bowoyeno.#NL 3.6 38Kǝmandedǝ Ala am nunaye gǝni, am roaye, nanjun tayi samma ronjaa nangaro,» yeno. 39Daji malǝmba Attauraye laaye tiro: «Sayinna, jaawunǝmdǝ kalkal!» yera, 40Adǝgaima wunduma cinju mudu kaje tiro koro gade cǝddǝnni.

Almasiwudǝ Tada Mai Daudaye

(Mat 22.41-46; Mar 12.35-37)

41Daji Isaye tayiro: «Ndayilan Almasiwudǝ Tada Mai Daudaye#20.41 Tada Mai Daudaye - Kaduwu Mai Daudaye, kaala Almasiwu Alaye. canidǝ? 42Mai Dauda kǝlanjuma kitawu Jawurayelan manaje: “Kǝmandeye Kǝmaniro: ‘Namme kǝmborammilan duwon, 43kǝladowanǝmba cidiya sinǝmbero yakkǝkko!’ cǝnna.”#Jaw 110.1 44Mai Daudaye tia Kǝmalan bowojǝnadǝ, ndayilan gǝle Almasiwudǝ tadanjuro walji?» yeno.

Hal malǝmba Attauraye

(Mat 23.1-36; Mar 12.38-40)

45Jama samma tia kǝrǝnjai duwon, Isaye fuwurawanjuro: 46«Malǝmba Attaurayero hangal gǝnanowo! Kalwu kuruwua dadadu caraana, koro kasuwulan lewa darajaa-a dandallan bi masǝna kuralan na darajaa-a jaumaro caraana. 47Kamu kwa faccǝgǝnaasoye kǝndanja sammaa jawui ye, halnja gǝraduro fuwu jamayen moduwa kuruwuro gǝrjai ye. Am aniye ajawunja leiran jauro kura!» yeno.

Currently Selected:

Luka 20: kby

Highlight

Copy