Luka 22

KARMO-A CIDU-A ISAYE

Isaa roro njejoro mada

(Mat 26.1-5; Mar 14.1-2; Yah 11.45-57)

1Sala Burodi Yis Bawoaye tia sala Laya Njǝkkayiramben bowojaidǝ karǝnjǝna. 2Koro wurawa ɍimannaye-a malǝmba Attauraye-a jawal Isaa njejoye majai, amma jamadǝa rijana.

Yahusa Iskariyot Isaa sǝrǝttuwuma

(Mat 26.14-16; Mar 14.10-11)

3Daji Yiwulis Yahusa kam tiro Iskariyot cani mewun yindindǝye falnjaro kǝrgawo. 4Yahusa leje wurawa ɍimannaye-a wurawa Fado Alaye gureduwuye-a rokko jande kǝla jawal Isaa mukkonjaro sǝrǝttuwuyen keddo. 5Karwunja jauro kǝjije tiro wuɍi cadi yeranniya, 6Yahusa kasacce dama Isaa tayiro jama nojannilan sǝrǝttuwuye mada badiyeno.

Masǝna sala Laya Njǝkkayirambe

(Mat 26.17-25; Mar 14.12-21; Yah 13.21-30)

7Sala Burodi Yis Bawoayen, yim duwon ngǝlaro Laya Njǝkkayirambedǝa#22.7 ngǝlaro Laya Njǝkkayirambe - Ngǝlaro duwon bunju wowom karmoyero kadumadǝ. duwajaidǝ kidǝnniya, 8Isa Biturus-a Yahaya-aa cunode tayiro: «Lenowo, masǝna layayedǝa andiro dabbarsaganowo, buiyo!» yeno. 9Tiro: «Ndaran tia dabbarniyeya, raam?» cane tia keworo. 10Isaye tayiro: «Akko bǝrnidǝro ngawuwiya, kam laa bule ingia ngojǝna-a kǝla kǝlluwi. Fado ngayidǝro tia gaiwo ngawowo, 11kǝma fadoyedǝro wulgǝnowo: “Sayinnaye kusottoram na fuwurawanju-a rokko masǝna layayedǝa cadidǝ ndaran?” 12Nayiro soro sameye ngim kura curon karea fǝlenjagai. Nadǝn masǝnadǝa dabbarnowo!» yeno. 13Daji fuwurawadǝ lejane jiɍi Isa tayiro wuljǝgǝnadǝ gai awiso kewando. Adǝgaima masǝna layayedǝa dabbaryera.

Masǝna Kǝmaye

(Mat 26.26-30; Mar 14.22-26; 1Kor 11.23-25)

14Sa kidǝnniya, Isa kǝngayambanju-a rokko masǝnaro napkera. 15Isaye tayiro: «Caman masǝna Laya Njǝkkayirambe adǝa kawu bone yakkidǝro nayi-a rokko buiyeya, jaumaro raakkǝna. 16Nayiro wulnjagakki, na adǝn fuwun tia bukkiwawo, sai jiremaro nodo bargaa Alayelan maananju wakkajiya duwon,» yeno. 17Kǝnjaram curon dibenna ngoje Alaro ardiyenniya, tayiro: «Kǝnjaram adǝa taiwo, wundundo yaye ca! 18Nayiro wulnjagakki, na adǝn fuwun ingi inabbe#22.18 ingi inabbe - Diben. yakkiwawo, har nodo bargaa Alaye napciro,» yeno. 19Daji burodi ngoje Alaro ardiyenniya, fǝsakce tayiro ce: «Adǝ tiyini nayi nangaro tinadǝ. Wua takturo adǝa dewo!» yeno. 20Adǝgai koro ngawo masǝnayen kǝnjaram ngoje tayiro ce: «Kǝnjaram adǝ aman bǝɍin bunilan ndǝpkada,#22.20 aman bǝɍin bunilan ndǝpkada - Bu Isaye aman katte Ala-a adamgǝna-ayea tabbacciyidǝ. bu duwon nayi nangaro fidǝnadǝ.#NL 24.8; Iri 31.31-34 21Kam duwon wua mukko kǝladowaniyero sǝrǝnsiyidǝ, akkonju wu-a rokko masǝna diye. 22Tada Kambedǝ saptidǝma,#22.22 Tada Kambedǝ sapti - Isa nui. jiɍi Ala kadarjǝnadǝ gai, amma kam duwon tia sǝrǝcciyidǝ, kuttunju!» 23Daji kattenjan kǝla wundunja awo adǝa dioma woyen koro badiyera.

Wundunja kura wo?

24Daji fuwurawadǝ kattenjan kambiwu kǝla wundunja kura woyen cadi duwon, 25Isaye tayiro: «Maiya dunia adǝye talaawanjaa raccagai, koro am tayiro serma canidǝ ye kǝnduwonja fǝlejai. 26Amma nayidǝ, ngai gǝni. Kuramandodǝ tǝngǝɍi gairo waljo, koro kam nayia njanodimadǝ wolodi gairo waljo! 27Wundu gǝle kura wo? Kam masǝnaro napcǝnamadǝ ra wolodinjudǝ? Kam masǝnaro napcǝnamadǝ, mare? Amma wudǝ curondon wolodindo gai.

28«Curo jaraptani sammayen nayima gǝrenin nammuw. 29Jiɍi Bawani wuro kǝrmai sinadǝ gai, wu ye nayiro njadǝkke 30curo kǝrmainiyen wu-a rokko buwe yawe, koro kǝla kuris kǝrmaiyen nammuwe jiɍiya mewun yindin Israyilawuyero shara yidduwi.

Isaye Biturus tia angǝrji wuldu

(Mat 26.31-35; Mar 14.27-31; Yah 13.36-38)

31«Siman, Siman, fane! Yiwulis jiɍi am argǝm lalajaidǝ gairo nayia laladuro Alaa cuworǝna,#22.31 nayia laladu - Yiwulis tayia rijapciya, cǝraana. 32amma bare kambǝrsenǝm kollǝmmiro Alaa ngikkorǝkko. Ni ye waldǝmiya, kǝramiyanǝmdǝa dunoagǝne!» 33Biturusse tiro: «Kǝma, koso bi karmoro dabbardǝkkǝna, ni-a rokko leniyo!» yenniya, 34tiye: «Biturus, niro wulnjǝgǝkki, gudowom ku kokkore cakkiwawo, sai yakkuro wua angǝrsǝmiya,» yeno.

35Koro Isa walde tayiro: «Sa nayia wuɍi bawoa, ngǝrwu bawoa, suno gade ye bawoa njanodǝkkǝnadǝn, awo laa maunjana wa?» cǝne tayia kiworǝnniya, «Mausanni,» yera. 36Daji tayiro: «To, amma kǝrma kam wuɍinjuadǝ ngojo, kam ngǝrwunjuadǝ ye ngai, koro kam kashagarnju bawoadǝ ye kalwunju gari cǝlado fal ciwo. 37Nayiro wulnjagakki, sai awo kitawulan ruwuwada adǝ wulan wakkajiya: “Amso tia biwumaro ngoyera.”#Ish 53.12 Aaa, awo kǝlanin ruwuwadadǝ wakkaji,» yeno. 38Tiro: «Kǝma, akko kashagar yindi,» yeranniya, tayiro: «Kollowo, cǝdǝna,» yeno.

Moduwa Isaye

(Mat 26.36-46; Mar 14.32-42)

39Isa bǝrnilan culuwe cayedǝ gairo Kau Jaitunnero leyeno, fuwurawanju ye tia geya. 40Nadǝro kadinniya, tayiro: «Bare jaraptuwwiro moduwa dewo!» yeno. 41Daji tayia kolje gana laa kuruwuje tungurumje moduwa dio badiyeno. 42Tiye: «Bawani, kasaddǝmmaa, kǝnjaram adǝa#22.42 kǝnjaram - Kǝnjaram bone njaye. wulan ngone! Adǝ yaye rawonidǝ gǝni, kaanǝmdǝma ti wo!» yeno. 43[Daji malaiya laa samelan ise tiro fǝlediye karwunju kibbayeyeno. 44Isa jǝktu dama baworo fanji duwon, cayea kojǝnaro tai daje moduwa kido, har kǝmuwunju bu cidiro fidiyi gairo tok tok fiyadan.] 45Ngai moduwa kidǝnniya, cije na fuwurawanjuyero walde ise tayia karwukuttaro casambarǝna kǝnǝm cadi najiye 46tayiro: «Awiro kǝnǝm diwidǝ? Cinowo, bare jaraptuwwiro moduwa dewo!» yeno.

Isaa Ta

(Mat 26.47-56; Mar 14.43-52; Yah 18.1-11)

47Isa mana cǝdi ngai duwon, jama kada kam tiro Yahusa cani mewun yindindǝye falnja fuwu gǝrjiaro kadira. Yahusadǝ Isaro lewa darajaye njǝddoro tia karǝngenniya, 48Isaye tiro: «Yahusa, lewa darajayelan wa Tada Kambedǝa sǝrǝtkǝgǝmi?» yeno. 49Am nanjuyedǝ awo wakkajidǝa kerunniya, tiro: «Kǝma, kashagarlan tayia cacalliyea, nda!» cane 50falnja wolodi ɍiman kurayea bakce sǝmonju kǝmboramdǝa tǝn kamgeno. 51Amma Isaye tayiro: «Danowo! Cǝdǝna!» yenniya, sǝmonju leje isangayeyeno. 52Daji Isaye wurawa ɍimannaye-a wurawa Fado Alaye gureduwuye-a amwurawa jamaye-a tia taro isanadǝro: «A! Nayi kashagar so, ka so mukkonna wua gǝndema gai taro kadiw? 53Yim nguson nayi-a rokko Fado Alayen dǝgaiye duwon, wua sǝdawwi. Amma adǝma sando wo, sa duwon duwu kǝrmainju cunodidǝ.»

Biturusse Isaa angǝrdu

(Mat 26.69-75; Mar 14.66-72; Yah 18.25-27)

54Daji Isaa cadane balballa fado ɍiman kurayedǝro kesado. Biturus ye katte kaskadaaro tayia giya. 55Dawu balballayen kannu fujane napkeranniya, Biturus ye dawunjan napkeno. 56Daji kir laa Biturussa nur kannuyedǝn napkada kirunniya, tia ngǝlaro ninije: «Kam adǝ ye Isa-a rokko,» yeno. 57Amma Biturus angǝrje: «Feroma, wu tia nokkǝni!» yeno. 58Gana sam kidǝnniya, kam laa ye tia cure: «Ni ye falnja!» yeno. Biturusse: «Kai! Wu gǝni!» yeno. 59Alama sa fal gai cǝde kam laa gade: «Fagatto kam adǝ ye Isa-a rokko, ti ye kam lardu Galileye nangaro!» yenniya, 60Biturusse tiro: «Kaiya! Awo wullǝmidǝa nokkǝni!» yeno. Sadǝman manaji ngai duwon, gudowom kokkore kekko. 61Daji Kǝmadǝ suworde Biturussa niniyeno. Biturus ye awo Kǝma tiro wuljǝgǝnadǝa takkeno. Kǝmaye: «Ku kawu gudowom kokkore cakkidǝro, wua yakkuro angǝrsǝmi,» cǝnna. 62Takkenniya, deyaro culuwe tai daje so ngoyeno.

63Adǝgai duwon am Isaa gurejaidǝ tia rurujane babaktu badiyera. 64Simnju jakcane tiro: «Nawinawi de! Wundu nia bannjo?» yera. 65Koro radu kada tiro keddo.

Isa fuwu majilis kura adinwuyen

(Mat 26.57-68; Mar 14.53-65; Yah 18.12-24)

66Dunia wayenniya, amwurawa jamaye-a wurawa ɍimannaye-a malǝmba Attauraye-a majilislan captane casakke Isaa fuwunjaro kewudo. 67Tiro: «Nima wa Almasiwudǝ wo? Andiro wulsagane!» cane tia keworo. Amma Isaye tayiro: «Wulnjagakkia, kasadduwwawo. 68Koro njaddǝkkia, jaawu siwwawo. 69Amma kua adǝn fuwun Tada Kambedǝ mukko kǝmboram Ala Kǝnduwomayen napkada dǝgai,»#Jaw 110.1; Dan 7.13-14 yeno. 70Daji tayi sammaye tiro: «Nima gǝle Tada Alayedǝ wo?» yeranniya, tayiro: «Nayima wulluw, wuma!» yeno. 71Daji tayiye: «A! Sheda jiɍi fi gǝle gade maniye? Andi kǝlande mana cinjulan culuwuna adǝa faniyena,» yera.

Currently Selected:

Luka 22: kby

Highlight

Copy