Matiyu 5

Jawawi Isaye kǝla kau kuruwu laayen

(Luk 6.17-49)

1Isa jama kada kadami captairo kirunniya, kǝla kau kuruwu laayero juwane napkeno. Fuwurawanju ye nanjuro kadira. 2Daji tayia alamdu badiyeno.

Am bargaasodǝ

(Luk 6.20-26)

3«Barganja am karwulan talaawadǝ,#5.3 am karwulan talaawadǝ - Am duwon kǝlanjaa awimaro ngojǝnni Alaa mǝrsajanadǝ.

nodo bargaa Mai Samemayedǝ nuwanjadǝro.

4Barganja am kǝrma cesiridǝ,

fuwun simalonja bawodǝro.

5Barganja am rokura bawoadǝ,

fuwun dunia warasajaidǝro.

6Barganja am kǝrma kǝna-a ngudu-aaro jire dioro ngǝnǝptaimadǝ,#5.6 am kǝna-a ngudu-aaro jire dioro ngǝnǝptaimadǝ - Am duwon kowoɍi cade awo Ala cǝraanaa dioro majaidǝ.

fuwun kuljaidǝro.

7Barganja am kanjimaɍimasodǝ,

tayi ye fuwun kanjimaɍi cawandidǝro.

8Barganja am karwu bulladǝ,

fuwun Alaa caruidǝro.

9Barganja am kǝrma nanlewa cawudidǝ,

fuwun tayia tadawa Alayelan#5.9 tadawa Alaye - Alaa mǝrsajane awo ti cǝraanaa dioro majana nangaro, tayi am hal ngǝlaa Alaye gairo waljai. bowodaidǝro.

10Barganja am kǝla jire dionjayen tayia basarjaidǝ,

nodo bargaa Mai Samemayedǝ nuwanjadǝro.

11«Am wu nangaro nayia raranjane basarnjane diwindo jiɍi jiɍi wuljaiya, bargando! 12Kǝji dama baworo fanowo, dalilnjudǝ samelan mukowando jauro ngǝwu nangaro. Nonowo, adǝgaiman nawiya kureye burwonjanadǝa basaryera.

Manda-a nur-a

13«Nayima manda duniaye wo. Amma mandadǝ kǝlambo walyenoa, jiɍi fin gǝle cayenju gairo walji? Awimaro faidajiwawo, tia deyan yirjane am guguwaccai. 14Nayima nur duniaye wo. Bǝrni kǝla kau kuruwuyen dǝganadǝ gǝradiwawo. 15Wunduma fatǝla wasse kǝmon tǝmjiwawo. Kam fatǝla wassiya, kǝla gǝnaduramnjuyen gǝnaje fadodǝn wundusoro nur ci. 16Adǝgaima nayi ye kollowo nurndo fuwu amben wasso, awo ngǝla diwidǝa caro Bawando Mai Samemaro daraja cadoro!

Kǝla Attaurayen

17«Bare awo Attaura-a kitawuwa nawiyaye-alan ruwuwadadǝa baworo dioro kadikkoro tǝmanuwwi. A’a, tayia baworo dioro gǝni, tayi samma wakkajaro kadikko. 18Jiremaro nayiro wulnjagakki, kawu same-a cidi-a baworo waljaimaro, arawu bi sǝkkal falma Attauralan baworo waljiwawo, sai tayi samma wakkajaiya duwon. 19Wundu duwon wadawa aniye gananjaa ga waje am gade yea ngai alamjidǝ, curo am nodo bargaa Mai Samemayen tia kam daraja jauro ganaalan bowojai. Amma wundu duwon wadawa ania jǝgane am gade yea jaaro alamjidǝ, curo am nodo bargaa Mai Samemayen tia kam daraja kuraalan bowojai. 20Adǝ nangaro nayiro wulnjagakki, malǝmba Attauraye-a Farisawa-aa jire diolan konuwwawoa, tǝmmaro nodo bargaa Mai Samemayero ngawuwwawo.

Kǝla gǝrgaduyen

21«Amwurawande jaman kureyero: “Bare kam yejǝmmi, wundu duwon kamba cejǝnadǝa shararo caadi,”#NL 20.13; SK 5.17 cane wuljaanadǝa fanuwwa. 22Amma wu nayiro wulnjagakki, kam kamanjuro gǝrgajǝgǝnadǝa shararo caadi. Koro kam kamanjuro “Kam bowuye!” cǝne rajǝnadǝa majilis adinwuyero caadi. Koro kam duwon kamanjua waje tiro: “Batti!” cǝnnadǝa kannu jaanamayero koljagai.

23«Adǝ nangaro na laya duwaduramben sadaa njǝddoro isǝmma duwon, awo kuttu laa kamanǝmbo yiddǝmmaa tangǝmia, 24fuwu laya duwaduramdǝyen sadaanǝmdǝa kolle lene ni-a kamanǝm-a solodǝnowo duwon, daji walde are sadaanǝm yidde.

25«Shararambo lawalamanǝm-a rokko ledu diwi duwon, kǝla jawallen doiro kowoɍi de tawaktǝne, bare nia alkaliro sǝrǝnjǝgǝnniro. Adǝ gǝnia, alkali nia mukko sojiyero njakke, soji ye nia kosolan jannjiyi. 26Jiremaro niro wulnjǝgǝkki, nadǝn wuɍi njǝgaidǝa cotto rǝmbǝmmia, tǝmmaro luwumbawo!

Kǝla kǝnjǝnayen

27«Koro tayiro: “Bare kǝnjǝna dimmi,”#NL 20.14; SK 5.18 cane wuljaanadǝa fanuwwa. 28Amma wu nayiro wulnjagakki, wundu duwon kamua cure mangarjǝnadǝ, karwunjun kǝnjǝna cǝdǝna. 29Simmǝm kǝmboramdǝ njakke biwu dimia, tia kulaine gǝmme. Tiyinǝm samma kannuro fidiyidǝroa, sim fal fuddǝmmadǝma niro ngalwo. 30Koro mukkonǝm kǝmboramdǝ njakke biwu dimia, tia kamme gǝmme. Tiyinǝm samma kannuro fidiyidǝroa, mukko fal fuddǝmmadǝma niro ngalwo.

Kǝla kamu dǝptayen

31«Koro waldane tayiro: “Kam kamunjua dǝpcidǝ tiro kakkadu kamu dǝptaye co,”#SK 24.1-4 cane wuljana. 32Amma wu nayiro wulnjagakki, wundu duwon kamunjua kǝla kǝnjǝnayen gǝni dǝpcǝnadǝ tia kǝnjǝnamaro cǝdǝna. Koro wundu duwon kamu dǝpkadaa niyajǝnadǝ, ti ye kǝnjǝna cǝdǝna.

Kǝla kansi boyen

33«Koro amwurawande jaman kureyero: “Bare bowuro kansi bummi, kansi Kǝmandero yibbummadǝa de!”#Lew 19.12; KI 30.2; SK 23.21 cane wuljaanadǝa fanuwwa. 34Amma wu nayiro wulnjagakki, bare tǝmmaro kansi buwwi! Bare sameyen kansi buwwi, Alaye kurisnju kǝrmaiye nangaro, 35bi cidiyen, sinju gǝnaduram nangaro, bi Jerujalemben, bǝrni Mai Kuraye nangaro. 36Koro bare kǝlandoyen kansi buwwi, ranguwe kanduɍi kǝlandoye falmaa bul bi cǝlǝmbo diwwawo nangaro. 37Ngǝlanjudǝ “Aaa,” bi “A’a,” wullowo. Awi yaye adǝa kojǝnadǝ na ti Kǝladoyen#5.37 Kǝlado - Yiwulis. kadio.

Kǝla rǝmboyen

38«Koro tayiro: “Kam laa sim bi timi kamanjuye fal kittuluwoa, simnju bi timinju fal ye cattuluwo!”#NL 21.24; Lew 24.20; SK 19.21 cane wuljaanadǝa fanuwwa. 39Amma wu nayiro wulnjagakki, bare kam kǝlado wanuwwi. Kam laa feɍinǝm kǝmboram maɍin bakcia, wailadǝ yea tiro kalakkǝgǝne. 40Koro kam laa gǝmajenǝm moworo nia shararo njadi cǝnia, kolle garinǝmdǝ yea ngojo. 41Kam laa dunodunon njakke na kilometǝr fallaro lenǝmia, na kilometǝr yindiaro ti-a rokko lenowo. 42Kam njuworǝnamadǝro ye, koro kam nanǝmnin tagari cǝraanadǝro bare dapkǝgǝmmi.

Kǝla kǝlado rawoyen

(Luk 6.27-36)

43«Koro tayiro: “Kǝmaskinǝmba raye,#Lew 19.18 kǝladonǝmba wane,” cane wuljaanadǝa fanuwwa. 44Amma wu nayiro wulnjagakki, kǝladowandoa rawowo, koro am nayia basarnjanadǝ yero Alaa yukkorowo, 45tadawa Bawando Mai Samemayero walloworo. Dalilnjudǝ Ala cakke kǝngal am ngǝla-a diwi-aa wassi, koro ingi sameye ye jirewu-a jirenambuwu-aro cuduriyi nangaro. 46Am nayia njaraanaa raawia, awi mukowaye diw? Akki mowomaso ye ngai gǝna cadi? 47Koro kǝramiyando runjaa lewanuwia, awi gǝle am gadesoyea kojǝna diw? Kǝrdiya ye ngai gǝna cadi? 48Adǝ nangaro Bawando Mai Samemadǝ kalkallo diomadǝ gai, nayi ye kalkallo diowuro wallowo!

Currently Selected:

Matiyu 5: kby

Highlight

Copy