Ляхнар 5
5
Ананайин ва Сапфирайин кучӀал
1Ананай кӀуру сар касдина дугъан шив Сапфирайи чпин мулк масу тувру. 2Хъасин гъадабгъу пуликан, хпиризра аьгъяди, саб пай гьитӀибкӀуру ва имбуб дубхну вакиларихьна тувру. 3Гьадмуган Петри дугъаз кӀуру:
– Ананай, гьаз яв кӀван аьхювал апӀуз иблисдихьди гъитунва, гьаз, Гирами Рюгьназ кучӀал дапӀну, жилихъ туву пуликан гьитӀибкӀунва? 4Масу тувайиз думу жил явуб дайинхъа? Ва гъадабгъу пулра яв ихтиярнаъ адайинхъа? Мициб ляхин фици фикриз гъафнияв?! Уву адмийириз ваъ, хъа Аллагьдиз кучӀал гъапӀунва.
5-6Гьаму гафар гъеерхьу Ананай алдакуру ва алишвʼин йикӀуру. Хъа дуфну жигьилари, думу кивуз гьязур апӀуру, хъасин кивуз адагъуру. Ва мидкан гъеебхьдарин гучӀбаан зегьле гъябгъюру.
7Мина шубуб сяаьтналан гъабшибдикан хабар адру Ананайин шив гъюру. 8Петри дугъхьан гьерхру:
– Йип узуз, учву хутӀил гьаму кьиматнахъ масу тувинчвахъа?
Дугъу: «Ав, гьадмукьандиз тувунча» пну, жаваб тувру.
9Гьадмуган Петри дугъаз кӀуру:
– Учвʼан Агъайин Рюгь ахтармиш апӀуз фици удубкьунчвуан?! Гьатмагьа яв жилир кивдар, кьяляхъ хъадакну, урчӀарихъна дуфна. Дурари яв майитра гъабхиди.
10Му дишагьли сабпну Петрин ликариккинди алдакуру ва йикӀуру. Хулаъ учӀву жигьилариз думура дукӀну рякъюру ва, духну, жилирин гъвалахъ кивру. 11Вари хъугънайидарик ва мидкан гъеебхьдарик зарбди гучӀ кабхънийи.
Аллагьдин лишнар
12Вакилари халкьдин арайиъ гизаф аьламатарна аьжайиб лишнар гъапӀнийи. Дурар гьарган вари сатӀиди Сулеймандин айвандихъ хъади шуйи. 13Жарадарикан гьич сарихьанна вакиларин багахь хьуз шули гъабхьундар. Халкьди дурарин ад апӀуйи. 14Агъайихъ хъугънайи халкьдин – гьам жиларин, гьам дишагьлийирин – кьадар артухътӀан артухъ шулайи. 15Аьзарлуйирра кмиди, кючейиз адагъуйи, ахнар-леъфариин дитуйи, дилинтина гъягъруган, Петрин сиринкьан кубкӀри кӀури. Фицики дурар сагъ хьпан бадали гьадмура чӀяаьн шул пну, дурари миж кивуйи. 16Ерусалимдин аьтрафарихъ хъайи шагьрариан аьзарлуйир ва жинар кучӀвнайидар хури, инсанарин аьхю дестйир гъюз хъюгъюйи, ва вари сагъ шулира гъахьну.
Вакилар дисуб
17Гьадмуган маллйирин аьхюр ва дугъахъ хъайи саддукйир гъанихвалиан тӀуркӀури гъахьну ва 18дурари вакилар, дидисну, жямяаьтлугъ дустагъдиъ итру. 19Хъа Агъайин Малайикди, йишвну дустагъдин урчӀар арццру ва, дурар адаъну, кӀуру:
20– Душну Аллагьдин хулаъ халкьдиз цӀийи уьмрикан вари кидибтай.
21Му гафар деерхьну, дурар акв мялум шулайи вахтна Аллагьдин хулаъ учӀвру ва халкьдиз аьгъювалар улупуз хъюгъру. Маллйирин аьхюри ва дугъахъди хъайидари, вари диванбегйирна Израилин сихларин вари кавхйир суддиз уч апӀуру, хъасин суддин гъаравлар дустагъдиз вакилар хуз гьаъру.
Диванбегйирин улихь
22Вакилар хуз гъафидариз дустагъдиъ фужкӀара дихъурдар ва, хъадакну, гъафидари кӀуру:
23– Учуз дустагъ мюгькамди хъябкьну ва гъаравларра урчӀарихъ дийигънади гъяркъюнчуз, амма раккнар арцциган, учуз душваъ касра гъидихъундарчуз.
24Му гафар гъеерхьиган, аьхюну маллйир ва Аллагьдин хулан гъаравларин аьхюр, му фу хабар вуйкӀан кӀури, мюгьтал духьну гъузнийи. 25Хъасин сари дуфну кӀуру:
– Учву дустагъдиъ иту адмийир Аллагьдин хулаъ а ва халкьдиз дурари аьгъювалар улупура!
26Гьадмуган гъаравларин аьхюри, чан эскрарихъди душну, вакилар хъади гъюру. Вакилариз гуж апӀуз эскрариз гучӀуйи, фицики халкьди дурариин гъван уьлюбхюб мумкин вуйи.
27Дурари вакилар диванбегйирин улихь дерккру. Гьадмуган маллйирин аьхюри дурарихьан гьерхру:
28– Учу учвуз Гьадму Касдин гьякьнаан аьгъювалар улупуб ижмишнаан къадагъа гъапӀундайинхъа? Хъа магьа, учву Ерусалим вуйиси Дугъкан аьгъювалар рагъурачва ва Думу йикӀбан тахсир учʼин илипуз ккунди ачвуз.
29Петри ва вакилари жаваб тувру:
– Учу адмийиризтӀан Аллагьдиз артухъди мютӀюгъ духьну ккунду. 30Учву Иса, дариз дизигну, гъакӀунчва, амма ихь абйирин Аллагьди Думу, гъачӀихъан, чӀиви гъапӀну. 31Аллагьди, Израилин халкьди чпин тахсрар гардандиъ дидисну гунгьарилан хил алдабгъуз гъитбан бадали, Иса Чан арччул хилихъна Аьхюрди ва ухьу Уьрхрюрди за гъапӀну. 32Мидин шагьидар Чаз мютӀюгъ шлудариз Аллагьди тувнайи Гирами Рюгь ва учу вуча.
33Му гафар гъеерхьиган, диванбегйирик яманди хъял кубчӀвру, ва дурариз вакилар йихуз ккун шулу.
Гамалиилин насигьят
34Къанунчийизси гьюрмат айи, диванбегйирикан Гамалиил кӀуру сар фарисейи, али йишвлан за духьну, вакилар саб геренди суддиан адауз буйругъ тувру. 35Хъасин дугъу кӀуру:
– Израилин агьалйир! Учву мурарикан гьапӀруш, ужуди фикир апӀинай! 36Ичв кӀваин илмиш, сацӀиб улихьнаси, учв зурба кас вуза кӀури, Февда кӀурур гъядяхънийи ва юкьудваржкьан адми дугъахъди гъахьнийи. Хъа думу йивну гъакӀнийи, дугъан терефкрар гъадаргънийи ва жвартӀ гъахьнийи. 37Дугъан кьяляхъ, агьалйир гьисаб апӀру вахтна, Галилейиан Ягьуда гъядяхъну, дугъура чахъди хайлин халкь жалб гъапӀну. Думура йивну гъакӀну, хъа дугъахъди гъушдарра вари гьубкьушвахъинди гъарагъну. 38Гьаддиз лигну, гьамус кӀуразачвуз: гьадму касарихьан гьудучӀвай ва дурар сикинди гъитай. Фицики эгер му ляхин инсанарин терефнаан вуйиб вуш, думу кӀулиз удубчӀвидар. 39Хъа эгер Аллагьдин терефнаан шулайиб вуш, учвхьан думу дебккузра хьибдарчвухьан, учву Аллагьдиз къаршудира хьуз мумкин ву.
40Диванбегари дугъан насигьят кьабул апӀуру. Хъасин вакилариз дих дапӀну, дурар дурччвну, сарун Исайикан аьгъювалар улупуз гъадагъа дапӀну, деетуру. 41Вакилар кӀуруш, чпи Иса себеб вуди жазайикк ккуркьуз лайикьлу хьубʼин шад духьну, суддиан удучӀвну гъягъюру. 42Гьар йигъан Аллагьдин хулаъ ва адмийирин хулариъ халкьдиз Иса Месигьдикан аьгъювалар улупури, дурари Ужувлан хабар рабгъуру.
Currently Selected:
Ляхнар 5: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
