Эвел 13
13
Ибрамна Лут жара хьуб
1Ибрам Египетдиан, чан хпирна чаз айиб вари хьади, кьяляхъ Негев чюлиз гъюру; дурарихъди – Лутра. 2Гьамус Ибрам гизаф девлетлур вуйи. Дугъаз мал-къара, арс, гъизил айи. 3Негевдиан думу чан чадур ади гъабхьи Бет-Элихьна гъюру. Бет-Элин ва Гайин арайиъ айи, 4чав сифте гъурбан апӀрушв тикмиш гъапӀу йишваъ Ибрамди РАББИЙИЗ хъана икрам апӀуру.
5Ибрамдихъди хъайи Лутдизра малар-марччарна чадрар айи. 6Жил сарун дурар кьюридигъна гьубкӀри имдайи. Дурарин мал-мутму гьадмукьан гизаф вуйики, сарун дурар саб йишвʼин улуршурадайи. 7Ибрамдинна Лутдин марччлихънарин арайиъ гьюжатар шуз хъюгънийи. Мидланра савайи, му жилариин ханаанарра, перизеярра яшамиш шулайи. 8Ибрамди Лутдиз гъапи:
– Гъач, явна йиз ва яв марччлихънаринна йиз марччлихънарин арайиъ гьюжатар даршлуганси апӀурхьа, ухьу багахьлуйир вухьа аьхир! 9Вари жил яв улихь хьаяв, гъач, жара шулхьа. Эгер уву гагул терефназди гъушиш, узу – арччул, эгер уву – арччул терефназди гъушиш, узу гагул терефназди гъягъидиза. 10Лутдиз Цуарихънакьан вуйи Иордан нирин дере, РАББИЙИН багъси ва Египет жилси, мублагъди гъябкъю. Мици, РАББИЙИ Содом ва Гоморра шагьрар терг апӀайиз, гъабхьиб вуйи. 11Лутди чаз Иордан нирин дере ктабгъуру ва ригъ гьудубчӀвру терефназди гъягъюру. Гьамци дурар жара шулу. 12Ибрам Ханаан жилиин яшамиш шули гъузру, хъа Лут дерейиъ айи шагьрарин гъирагъарихъ яшамиш хьуз хъюгъру. Лутди чан чадрар Содомдихъ гьатӀарццнийи. 13Содомдин агьлар писдар, РАББИЙИН улихь гизаф гунгьар апӀурайидар вуйи.
14Лут жара хьублан кьяляхъ, РАББИЙИ Ибрамдиз кӀуру:
– Юкьуб тереф ул илбиц! Кафари, кьибла, ригъ гьудубчӀвру ва ригъ алабхъру терефаризди лиг. 15Увуз рябкъюрайи гьадму вари жил Узу увуз ва яв наслариз гьаргандиз тувдиза. 16Яв насил гьюлин гъумкьан гизаф апӀидиза. Гъум гьисаб апӀуз даршлуси, гьаци яв насилра кьадар адрубкьан хьибди. 17Гъарах, му жилин ярхишназ ва яркьушназ лиг – му жил Узу увуз тувраза.
18Ибрам, йишвлан йишвʼина бина алдабгъури, Хеврондиъ айи Мамре кӀуру жвуван мяхъярин гьарарин багахьна яшамиш хьуз гъюру. Дугъу душваъ РАББИЙИЗ гъурбан апӀрушв тикмиш апӀуру.
Currently Selected:
Эвел 13: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
