Эвел 21
21
Исакь бабкан хьуб
1РАББИЙИ Чав, гаф тувганси, Сара кӀваин гъапӀнийи ва Чав туву гаф кӀулиз адабгънийи. 2Сара гъагъдиъ шулу ва, Заанури гаф тувну дебккнайи вахтназ, Сарайи кьаби Ибрагьимдиз бай хуру. 3Сарайикан гъаши чан бализ Ибрагьимди Исакь кӀуру ччвур тувру. 4БицӀирин миржид йигъ гъабхьиган, Заанури амур гъапӀганси, дугъан суннатра апӀуру. 5Ибрагьимдин, чан бай Исакь бабкан шлуган, варж йис вуйи. 6Сарайи кӀуру:
– Заанури узухьди аьлхъюз гъитну: мидкан гъеебхьдар вари узухъди аьлхъиди,
7ва, гьамци кӀури, давам апӀуру:
– Ибрагьимдиз, чан Сарайи бицӀириз нана тувур кӀури, шилхьан пуз хьибдийи? Хъа магьа чан кьабишнаъди узу дугъаз байра гъахунза.
8БицӀир аьхю шулу. Исакь нанайихъан хътатӀу йигъан Ибрагьимди зурба машквар гъапӀнийи.
Гьажарна Ибрагьимдин бай Исмаил утӀурккуб
9Египетшив Гьажарикан духьнайи бали Исакьдихъди тамашйир апӀурайиб дябкъну 10Сарайи Ибрагьимдиз кӀуру:
– Гьадму лукӀ чан байра хъади утӀуркк! Йиз балихъди сабси дугъан бай яв ирсчи духьну ккундар!
11Ибрагьимдиз, чан балкан мициб гъеебхьган, иццру апӀуру. 12Амма Заанури дугъаз кӀуру:
– Балинна лукӀ дишагьлийин дердер мапӀан. Сарайи увуз кӀурубси апӀин, гьаз гъапиш яв тухум Исакьдилантина давам хьибди. 13Хъа лукӀ дишагьлийин баллантинара Узу саб халкь арайиз хибдиза, фицики думура яв велед вуяв.
14Хъайигъан гвачӀнин ухди Ибрагьимди, Гьажарин гъюниин уьл айи турбана шид айи ирж иливну, бицӀирра хъади удучӀвну гъягъюз, рякъʼин апӀуру. Гьажар рякъюъ учӀвру ва Беэр-Шева къуру чюллериъ уьргъру. 15Дугъан иржаъ айи шид ккудубкӀган, бицӀир рукчарикк гъитну, 16учв, чан бай фици йикӀураш дярябкъри дупну, гъиву чӀимир тӀибхру манзилназ гьудучӀвну, гьарай ипну ишури деъру. 17БицӀир фици ишураш Заануриз гъеебхьнийи ва завун аьршариан Заанурин малайикди#21:17 Мушваъ малайикди РАББИЙИН ччвурнахъан кӀура. Гьажариз дих гъапӀнийи ва гъапнийи:
– Я Гьажар, фу гъабхьну? ГучӀ мапӀан! Уву дитнайи яв бицӀир фици ишураш Заануриз деебхьна. 18Гъудужв, веледдихьна гъарах, дугъан хил бис. Узу дугъкан зурба халкь ктаидиза.
19Заанури думу дишагьлийин улар арццру ва дугъаз шид айи гъуйи рябкъюру. Дишагьли гъуйихьна багахь шулу, ирж штухьди абцӀну, бицӀириз шид тувру. 20Гьаддихъанмина Заанур гьаммишан Исмаилихъди шулу. Исмаил аьхю шулу, дугъу чюлиъ бина ккебгъру ва дугъкан чӀимрариан йиврур ктучӀвуру. 21Исмаил Паран кӀуру чюлиъ яшамиш шулу ва дадайи дугъаз хпирра Египет уьлкейиан хуру.
Ибрагьимдинна Авимелехдин йикьрар
22Думу саб вахтна Авимелех чан кьушмарин аьхюр вуйи Пихулихъди Ибрагьимдихьна гъюру ва кӀуру:
– Уву фу апӀурашра варибдиз увуз Заанури кюмек апӀура. 23Гьаму йиз улихь я узу, я йиз бицӀидар, я йиз худлар, уву алдатмиш апӀдарза дупну, Заануриинди ху апӀин. Узу увухъди фици ужуйи гъахьнуш, гьаци увура узухъди, уву кьабул гъапӀу гьюкуматдихъди ужуйи йихь!
24Ибрагьимди сифте ху апӀуру 25ва хъасин, Авимелехдин адмийири чахьан шид айи гъуйи тадабгъунзухьан кӀури, аьрзра апӀуру.
26– Думу дици шли гъапӀнуш узуз аьгъдарзуз, – жаваб тувру Авимелехди. – Уву узуз чӀалкьан гъапундарва. Узуз сабпи ражари дидкан ебхьуразуз.
27Ибрагьимди Авимелехдиз малар-марччар пешкеш тувру ва дугъахъди йикьрар йитӀуру. 28Ибрагьимди лижгъян ургуб агълиж жаради гъядяъну дерккру, 29му гъябкъю Авимелехди Ибрагьимдихьан гьерхру:
– Хъа гьаму ургуб агълиж гьаз жаради гъядягъну дерккнава?
30– Мурар, йиз гъуйи узу гъийибккуб вуза кӀуру, лишан вуди гъядягънайидар вуйиз, – гъапи Ибрагьимди. – Мурар узхьан увуз кьабул апӀин.
31Ибрагьимдина Авимелехди чиб-чпиз ху гъапӀу вахтнахъанмина думу йишваз Беэр-Шева («ху гъапӀу йишван гъуйи») кӀура.
32Беэр-Шевайиъ Ибрагьимдихъди йикьрар йитӀну Авимелех чан къушмарин аьхюр вуйи Пихулра хъади филистим жилариинна хътакуру. 33Ибрагьимди Беэр-Шевайиъ хьаднура-кьюрднура чруди гъубзру тамариск кӀуру гьар кивру ва гьадушваъ РАББИЙИЗ, Гьаргандиз вуйи Заануриз, икрам апӀуру.
34Дидхъанмина Ибрагьим филистим жилариин кьаназ яшамиш шулн гъузру.
Currently Selected:
Эвел 21: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
