Эвел 24
24
Исакьдиз хпир агуб
1Ибрагьим сарун бегьем кьаби гъахьнайи. Вари ляхнариъ думу РАББИЙИ ужʼваликк ккаънийи.
2-4Сад йигъан Ибрагьимди чан хулаз ва мал-къарайиз лигурайи чан аьхюну гъаравашдиз гьамци кӀуру:
– Завар-жиларин Заанур вуйи РАББИЙИИНДИ, йиз бализ хананеярикан ваъ, хъа йиз ватандиз, йиз багахьлуйирихьна душну, гьадушвʼан Исакьдиз хпир хузди йиз бакьбакьикк#24:2-4 Думу вахтари гьамциб аьдатниинди ху апӀури шуйи. хил ккивнумиди ху апӀин.
5Гъаравашди гьерхру:
– Хъа, ктагъу шураз, гьаму ругариина гъюз ккун дархьиш гьапӀза? Гьаци гъабшиш, узу яв бай яв ватандиз гьаъну ккундийи?
6– Ваъ, магьаан! – жаваб туву дугъаз Ибрагьимди. – Йиз бай дина яшамиш хьуз дурушри! 7Гьаз гъапиш узу йиз адашдин хулʼан адау Аьршарин Заанур РАББИ узухъди гъулхунзухъди ва Дугъу гьаму жил йиз наслариз тувурза кӀури ху гъапӀунзуз. Дугъу Чав, уву йиз бализ хпир хпан бадали, Чан малайик яв улихьди гьаъди. 8Эгер шураз гъюз ккун дархьиш уву яв ху апӀбаккан азад шулава, вушра йиз бай дина яшамиш хьуз магьаан!
9Ибрагьимдин гъаравашди, чан агъайин жвукьнакк хил ккивну, ху гъапӀнийи. 10Хъасин думу гъараваш чан агъайин йицӀуб деве гъадагъну, дурариин ужударстар пешкешар иливну, Арам-Нахараимдиъ (Месопотамияйиъ) айи Нагьор яшамиш шулайи шагьриз рякъюъ учӀвру.
11Гъаравашди чан девйир шагьрин улихь гъуйдихъ дерккруган, сарун хябяхъ дубхьнайи. Думу вахт шубар штуз удучӀвру вахт вуйи. 12Ибрагьимдин гъаравашди гъапнийи:
– Йиз агъа Ибрагьимдин Заанур вуйи РАББИ! Гъи узуз йиз рякъ ягъурлу апӀин ва йиз агъа Ибрагьимдихьна вуйи Яв рягьимлувал улуп! 13Магьа узу шагьриан шубар штуз гъюру гъуйихъ дийигъназа. 14Дурарикан сариз: «Яв гварʼан узуз шид чава», – пидиза. Хъа эгер дугъу: «Ма убгъ! Яв девйиризра тувдиза», – гъапир, Яв лукӀ Исакьдиз хпирди Уву ктагъур хьиди. Гьадму ляхин Уву йиз агъайиз рягьимлувал улупбан лишан хьибди!
15Дугъу гьамци дупну ккудубкӀайизра гъюнихъ гвар хъади Ибрагьимдин чви Нагьоринна Милкайин бай Бетуэлин риш Ребека мина гъюру. 16Думу гизаф уччвур, жилижвувахъди духьну адру риш вуйи. Риш гъуйдихъна ктучӀвуру ва гвар абцӀру. Думу кьяляхъ хътакурайиган, 17Ибрагьимдин гъараваш дугъахьна гьялак шулу ва, яв гварʼан убхъуз узуз шид чава, кӀури тӀалаб апӀуру.
18– Ма убхъ, йиз агъа! – пну жаваб туву шуру. Гьадму гагьди дугъу гъюнихъан гвар хъадабгъну, Ибрагьимдин гъаравашдихьна тувру. 19Гъаравашди ккядярхъяйиз шид гъубхъиган, хъа шуру кӀуру:
– Гьамус яв девйиризра шид хибдиза, гъит дурар ацӀайизкьан убхъри.
20Риш, малари шид убхъру латазди тяди гварʼан шид убзну, хъана гъуйихъна жаргъуру. Гьамци дугъу девйир ацӀайизкьан шид гъабхнийи. 21Гъараваш, РАББИЙИ чан рякъ ягъурлу гъапӀуб аьгъю апӀуз ккунди, ккебехъну шурахьинди лигурайи. 22-23Девйири шид гъубхъиган, дугъу шураз, хъюхъникк ккибтӀру саб бека#24:22-23 Йирхьуб грамкьан гъизил. гъагъишан айи багьа гъизилин сиргъа ва йицӀуб шекел#24:22-23 Варжна йицӀихьуб грамкьан гъизил. гъагъишин айи гъизилин кьюб кулих тувру, ва гьерхру:
– Йипа, уву шлин риш вува? Яв адашдин хулаъ узуз йишв адапӀуз йишв бихъуйкӀан, яраб?
24– Узу, – гъапи дугъу, – Нагьоринна Милкайин бай вуйи Бетуэлин риш вуза. 25Учуз, – давам апӀуру дугъу, – девйириз тувуз гизаф ярмара, сахъвра, учвуз дахърушвра ачуз.
26Гъаравашди ис алахъну РАББИЙИЗ икрам апӀуру, 27хъа кӀуру:
– Йиз агъайиз рягьимлувал ва вафалувал улупу, йиз агъа Ибрагьимдин Заанур вуйи РАББИЙИЗ шюкюр ибшри! РАББИЙИ узу диш дапӀну йиз агъайин багахьлуйирин хулаз гъахунзу.
28Ребека дадайин хулаз, гъабхьибдикан ктибтуз, гъажаргънийи. 29-30Ребекайихъ Лаван кӀуру гъардаш хъайи. Лаван чан чуччун хъюхъникк сиргъана хиларихъ кулхар гъяркъган ва Ребекайи хялижвуву чаз гъапибдикан хабар дебккган, гъуйдихъна гьялакди гъушнийи. Лаван думу касдин багахьна гъюру. Ибрагьимдин гъараваш девйирихъди гьамусра гъуйихъ дийигъну имийи. 31Гъафи Лаванди дугъаз кӀуру:
– РАББИЙИ ужувлакк ккаънайир, гъач учухьна! Мушвахь гьаз дийигънава? Узу халра ккабалгназа ва яв девйириз йишвра гьязур дапӀназа.
32Дугъу хялижв хулаз хъади гъягъюру. Девйир дурчуру, дурариз сахъвра ярма хуру, хъа хялижвувазна дугъан юлдшариз ликар жикӀуз шид тувру. 33ИпӀрубра хуру. Амма думу адмийи:
– Узу мина гьаз гьаънайир вуш дарпиди сабан уьл ипӀидарза, – гъапнийи.
– Йип, – пну ккун гъапӀу Лаванди.
34Хъа дугъу ктибтуз хъюгъру:
– Узу Ибрагьимдин гъараваш вуза. 35РАББИЙИ йиз агъа гизаф ужувларикк ккаъну ва думу девлетлу гъахьну. Заанури дугъаз гизаф мал-марчч, арсна-гъизил, лукӀарди жиларна хпар, девйирна дажйир тувну. 36Йиз агъайин хпир Сарайи кьабишнаъди дугъаз бай гъапӀну ва чаз айиб вари йиз агъайи чан бализ тувну. 37-38Йиз агъайи узухьди ху апӀуз гъитунзухьди ва гъапунзуз: «Йиз бализ, узу айи йишван хананей шубарикан ваъ, хъа, йиз ватандиз душну, йиз багахьлуйирикан хпир аькъин». 39Узу агъайихьан: «Хъа шураз гъюз ккун дархьиш гьапӀза?» – кӀури гьерхунза. 40Дугъу узуз гьамциб жаваб тувнийи: «Вари йиз уьмур Чан улихь гъубшу РАББИЙИ Чав, уву дугъаз хпир йиз тухмиан, йиз хизандиан хпан бадали, Чан малайик увухъди гьаъди ва яв рякъ ягъурлу апӀиди. 41Уву йиз багахьлуйирихьна душну дурари увуз риш тутрувишра, уву яв ху апӀбаккан азад шулава», – гъапунзуз. 42Гъи узу, гъуйихьна гъафири гьамци гъапунза: «Йиз агъа Ибрагьимдин Заанур вуйи РАББИ, Уву йиз рякъ ягъурлу гъапӀнийиш хуб ужу шуйи, гьаци апӀинава, 43ва магьа узу гъуйихъ дийигъунза. Мина штуз риш гъафиш дугъаз: „Яв гварʼан узуз шид чава“, – пидиза гъапунза. 44Хъа эгер дугъу: „Ма убгъ! Яв девйиризра тувдиза“, – гъапиш, ари гьадму йиз агъайин бализ хпирди РАББИЙИ ктагъур хьиди» гъапунза.
45Гьамци дупну узу фикир апӀайизра гъюнихъ гвар хъади гъуйихьинди Ребека гъюру ва дугъу душвʼан чан гвараъ шид убзру. Узу дугъхьан шид ккун гъапӀунза. 46Дугъу гьадмусяаьт гъюнихъан гвар тувунзухьна ва: «Ма убхъ. Яв девйиризра тувдиза» гъапунзуз. Узу бегьемди гъубхъунза, хъа дугъу девйиризра шид гъабхнийиз. 47Узу: «Шлин риш вува?» пну гьерхунза. Хъа дугъу: «Узу Нагьоринна Милкайин бай вуйи Бетуэлин риш вуза», – гъапунзуз. Гьадмуган узу дугъаз сиргъана хилихъ хъаъру кулхар тувунза. 48Хъа узу ис алахъну РАББИЙИЗ икрам гъапӀунза ва йиз агъа Ибрагьимдин Заанур вуйи РАББИ, диш дапӀну узу мина хъади гъюбаз ва йиз агъайин бализ йиз агъайин тухмиан риш улупбаз, адлу гъапӀунза. 49Гьамус гаф ичвуб ву: йиз агъайиз ичв рягьимлувал ва вафалувал улупуз рази вуйчва? Узу гьапӀруш узуз аьгъю хьпан бадали жаваб чавай.
50Лавандина Бетуэли жаваб тувру:
– Му ляхин РАББИЙИЛАН асиллу ву. Мушваъ учу ав вая ваъ пуб рубкьурайинхъа? 51Магьа Ребека – гъайих увухъди. Гъит РАББИЙИН ният тамам ибшри ва яв агъайин бали му чаз хпирди гъадагъри!
52Му гъеебхьу Ибрагьимдин гъаравашди жилииннакьан алахъну РАББИЙИЗ икрам гъапӀу, 53хъасин Ребекайиз базарлугъар дирчу. Дугъу уччву палтар, арсранна гъизилин шейʼар адагъну Ребекайиз, гьацира багьа пешкешар дугъан гъардшизна дадайиз тувру. 54Мидхъан Ибрагьимдин гъаравашра дугъахъди хъайи жара касар чпиз дипӀну, дубхъну ахуз дахъру. ГвачӀинган дурар гъудужвуру ва Ибрагьимдин гъаравашди кӀуру:
– Узуз йиз агъайихьна кьяляхъ хътакуз ихтияр тувай.
55Хъа Ребекайин гъардшина дадайи кӀуру:
– Гъит думу учухъди йицӀуд йигъансана гъузри!
56– Узу сарун энгел хьуз мигъитанайчва, – гъапи Ибрагьимдин гъаравашди. – Узуз, РАББИЙИ йиз рякъ ягъурлу дапӀнайиган, йиз агъайихьна кьяляхъ хътакуз ихтияр тувай!
57– Гъачай шураз дих дапӀну, – гъапи дурари, – чанхьан гьерхурхьа. 58Дурари Ребекайиз дих апӀуру ва гьерхру:
– Гьаму адмийихъди гъягъюрива?
– Гъягъюрза. – Гъапи дугъу.
59Хъа дурари Ребекара, дугъаз нана туври гъахьи дишагьлира, Ибрагьимдин гъаравашра дугъан адмийирра рякъʼин апӀуру. 60Хуландари, Ребекайиз РАББИЙИКАН берекет хьуб ккун дапӀну, дугъаз кӀуру:
Гъит яв наслар, чи, агъзрариинди агъзрар ишрияв!
Гъит яв веледарин хилиъ душмнарин шагьрар ахьри.
61Ребекана дугъан гъараваш дишагьлийир девйириин элеуру ва гьадму адмийихъди гъягъюру. Гьамци Ибрагьимдин гъараваш, Ребекара хъади, хъадакну гъягъюз рякъюъ учӀвру.
62Хъа Исакь Беэр-Лахай-Руийиан дуфну имийи. Думуган думу Негевдиъ яшамиш шулайи. 63Хябяхъган фикрарикк ккайи Исакь гъулан гъирагъдиз удучӀвуру ва магьа дугъаз багахь шулайи девйирин сюри рябкъюру. 64Улар улихьинди гатӀахьу Ребекайизра, ярхлаъ сар адми рякъюру. Риш девейилан элдеуру 65ва Ибрагьимдин гъаравашдихьан:
– Гьатму хутӀлиъди ихь гъаншаризди гъюрайи адми фуж ву? – кӀури гьерхру.
– Тму йиз агъа ву, – гъапи гъаравашди.
Хъа гьадмуган Ребекайи чаин илипруб адабгъуру ва машниин илипуру.
66Ибрагьимдин гъаравашди Исакьдиз чаин улубкьубдикан варибдикан ктибтнийи. 67Хъасин Исакьди Ребека чан дадайин чадриккна гъухнийи. Думу чаз хпирди гъадагънийи. Гьаци Исакьдиз Ребека ккун гъахьнийи, ва Исакьдин чан дадайин дерд кӀваълан гъубшнийи.
Currently Selected:
Эвел 24: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
