Эвел 29
29
Якьуб Лавандихьна гъюб
1Якьубди рякъ давам апӀуру ва ригъ гьудубчӀвру терефнан халкьарихьна гъюру. 2Душван чӀуру хутӀлиъ дугъаз гъуйи рябкъюру. Дидин гъвалахъ шубуб лиж марччар хъайи, гьаз гъапиш думу гъуйдиан дурариз убхъуз шид адабгъуйи. Гъуйи аьхю гъванди элебкнайи. 3Марччлихънар уч гъахьиган, сатӀиди гъван илдипуйи, марччариз шид тувуйи ва хъана элебкуйи.
4– Наънан вучва, гъардшар? – гьерхру Якьубди дурарихьан.
– Харрандиан вуча, – гъапи дурари.
5– Учвуз Нагьорин хтул Лаван аьгъюр вуйчвуз? – гьерху дугъу.
– Аьгъячуз, – гъапи дурари.
6– Фици ву думу? – гьерху Якьубди.
– Ужуйи ву, – жаваб туву дурари. – Гьатмагьа, марччарра хъаъну, дугъан риш Рахилра гъюра мина.
7– Марччар уч апӀуз вахт дубхьнадар, – гъапи Якьубди марччлихънариз, – хъябяхъдиз гизаф вахт ими. Шид тувну, лиж чӀурдиина хъапӀай.
8– Вари лижар уч дархьиди учу гъван алдабгъури шулдарча. Вари уч гъахьиган гъван алдабгъидича ва марччариз шид тувдича, – гъапи дурари.
9Дурари гафар апӀури имиди, чпин адашдин марччарин лиж хъапӀну, Рахилра хъуркьу. Чпин марччарихъ хъайир гьадму риш вуйи. 10Якьубдиз, чан халуйин риш Рахил гъяркъган, гъуйдиин али гъван алдабгъну, марччариз шид тувру. 11Хъа, Рахилиз мак гъапӀури Якьубдихьан шадвалин ишбан гьарай тадабхъуру 12ва дугъаз, яв адашдин багахьлу, Ребекайин бай вуза кӀуру. Рахили, жаргъури душну, мидкан чпин адашдиз ктибтуру.
13Чан хтул, Якьуб гъафибдикан гъеебхьу Лаван, чӀатинди утӀурччвуру, думу хабаъ тӀаъру, мак апӀуру ва думу хулаз хъади гъюру. Якьубди дугъаз варибдикан ктибтиган, 14Лаванди дугъаз:
– Уву узусир вува, йиз йиккна ифи вува! – гъапи.
Якьубди швушв хуб
Саб ваз гъябгъбалан кьяляхъ, 15Лаванди дугъаз гъапи:
– Гьамус уву йиз багахьлу ву кӀури, уву узухъ чӀанади лихуз буржлу дарваки. Йип увуз фициб кьимат тувруш.
16Лавандихъ кьюр риш хъайи; аьхюриз – Лия, бицӀинуриз Рахил кӀуйи. 17Лия уччвудар улар айир дайи. Хъа Рахил успагьи юруш хъайи ва гюрчег маш гъяйи риш вуйи. 18Якьубдиз Рахил ккун духьнайи. Дугъу Лавандиз гъапи:
– Яв бицӀину риш Рахил узуз тувузди, узу увухъ ургуд йисан лихидиза.
19– ГьапӀхьа хъа, – кӀуру Лаванди, – жарариз тувайиз, хъана увуз тувуб ужу ву. Гъуз узухь.
20Рахил бадали Якьуб дугъахъ ургуд йисан лихуру. Хъа думу ургуд йис дугъаз сакьюдар йигъарситӀан гьугъужвундайи – гьаци дугъаз думу риш ккундийи. 21Хъасин Якьубди Лавандиз гъапи:
– Нашияв йиз хпир? Сарун вахт ву дугъан узухъди яшамиш хьуз.
22Думу йишван вари адмийириз дих дапӀну, Лаванди ипӀуб-убхъуб апӀуру. 23Швушв хулаъ тӀаъру вахт гъабхьиган, Лаванди Якьубдихъди хулаъ чан Лия кӀуру риш аъру. Думу дугъахъди шулу. 24Лаванди Лияйиз, дугъахъ лихуз, Зилфи кӀуру чан сар лукӀ-дишагьли тувнийи.
25ГвачӀин гъабшиган, фу лигурва, Якьубдин улихь хьайир Лия ву!
– Уву узкан гьапӀунва? – кӀуру Якьубди Лавандиз. – Узу увухъ Рахил бадали гъилихур дайин? Уву узуз кучӀлар гьаз гъапӀунва?
26– Ич йишвариъ аьхюну риш улихь хьмиди бицӀирнур швуваз туври аьдат дарич. 27Саб гьяфтайин сумчрин йигъар улдучӀвиган, увуз бицӀину ришра тувдихьа, хъа думу бадали уву узухъ ургуд йисансана дилихну ккунду.
28Якьуб рази шулу. Сумчрин гьяфта улдубчӀвиган, Лаванди дугъаз чан риш Рахилра дитру. 29Рахилихъ лихуз, Лаванди дугъаз Билха кӀуру сар лукӀ-дишагьли тувнийи. 30Якьуб Рахилихъдира шулу. Дугъаз думу ЛиятӀан гизаф ккундийи, гьаддиз, Рахил бадали, думу Лавандихъ ургуд йисансана лихуру.
Якьубдин бицӀидар
31РАББИЙИЗ, Лия чан жилириз даккнир вуди дябкъну, думу бицӀидар хуз бегьерлур апӀуру, хъа Рахилин – бегьерсуз. 32Лия гъагъдиъ шулу, дугъаз бай шулу ва дадайи дугъʼин Рувим («йиз дерд гъябкъну») кӀуру ччвур иливуру.
– РАББИЙИЗ йиз дерд гъябкъну, – гъапи Лияйи, – гьамус узу йиз жилириз ккун хьиди.
33Хъасин Лия сабансана гъагъдиъ шулу ва му ражарира дугъаз бай шулу.
– РАББИЙИЗ, узу йиз жилириз ккунир даруваликан гъеебхьну, – кӀуру дугъу, – гьаддиз сарсана бай багъиш гъапӀунзуз.
Лияйи дугъʼин Симеон («гъеебхьну») кӀуру ччвур иливуру.
34Лия сабансана гъагъдиъ шулу ва дугъаз хъана бай шулу.
– Ари гьамус йиз жилир узхьан ярхла хьидар, – кӀуру Лияйи, – фицики узу дугъаз шубурпи байра гъахунза!
Мугъʼин Левий («багахь хьиди») кӀуру ччвур иливуру.
35Лия хъана гъагъдиъ шулу ва дугъаз сарсана бай шулу.
– Гьамус РАББИЙИН тяриф апӀидиза! – гъапи дугъу, ва дадайи бализ Ягьуда («тяриф апӀуб») пну ччвур тувнийи.
Мидхъан Лияйиз бицӀидар шули гъахьундар.
Currently Selected:
Эвел 29: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
