Эвел 35
35
Бет-Элиз Якьуб хътаркуб
1Заанури Якьубдиз гъапи:
– Гъудужвну Бет-Элиз гъарах. Гьадушваъ бина ккебгъ ва яв гъардаш Исавдихьан гьерграйи вахтна увуз ачмиш гъаши Заануриз – Узуз – гъурбан апӀрушв тикмиш апӀин.
2Якьубди чан хизандиз ва чан адмийириз гъапи:
– Учвуз айи ичв вари бутар уларихьан терг апӀинай, жанар дижикӀну марццидар йихьай ва ичв палат гьюдюхяй. 3Ухьу Бет-Элиз удучӀвну гъягъюрахьа. Узу душваъ Заануриз гъурбан апӀрушв тикмиш апӀидиза, фицики Заанур узу бедбахтвалиъ ахънайиган узуз кюмекназ гъафну. Думу узухъди узу наан ади гъашишра шуйи.
4Дурари Якьубдихьна вари чпин бутар туву. Чпин ибарикк ккайи сиргъйирра тувру. Мурар вари Якьубди Шехемдиъ айи мяхъюн гьарин кӀанакк ккивру.
5Дурар рякъюъ учӀву. Заанури багахь хьайи шагьрарин агьалйириз яманди гучӀ хьуз гъитнийи, гьаддиз дурар Якьубдин баярихъ хъергундайи. 6Чан адмийирра хъади Якьуб Ханаан жилариин али Луз (гьамусдин Бет-Эл) шагьрин гъваларихъна гъафи. 7Ва гьадушваъ гъурбан апӀрушв тикмиш гъапӀу. Му йишваз дугъу «Эл-Бет-Эл» («Бет-Элин Заанур») гъапи, фицики дугъаз душваъ, учв чан гъардшихьан гьерграйиган, Заанур ачмиш гъахьи йишв вуйи.
8Ребекайиз мухрилан никк туври гъахьи дишагьли Дебера магьа гъачӀи. Думу Бет-Элин багахь хьайи мяхъюн гьарикк ккиву ва думу мяхъюн гьариз Аллон-Бахут («ишлин мяхъв») кӀуру ччвур туву.
9Якьуб Паддан-Арамдиан гъюбан кьяляхъ, дугъаз Заанур хъана ачмиш гъахьнийи ва думу ужувлакк ккаънийи. 10Заанури гьамци гъапнийи: «Увуз Якьуб кӀура, сарун увуз Якьуб кӀури хьибдар. Гьамусдихъантина яв ччвур Израил хьибди!»
Гьамци Дугъу Якьубдиз Израил кӀуру ччвур тувнийи. 11Дугъаз Заанури гьамцира гъапнийи:
– Узу Кьудратлу Заанур вуза. Яв тухум бегьерлу ва артухъ хьиди: увкан халкь арайиз гъиди, аьхю чӀвеъ халкьар арайиз гъиди! Увкан паччгьар арайиз гъиди! 12Узу Ибрагьимдизна Исакьдиз тувурза гъапи жил увузна яв наслариз тувдиза.
13Заанур Якьубдихьан за гъашиган, 14Якьубди Заанур чахъди гъулху йишвʼин гирамиб вуди гъван дубсру ва думу гъвандиин чяхирна оливкйирин ччим улубзуру. 15Думу йишваз дугъу Бет-Эл («Заанурин хал») дупну ччвур тувнийи.
Рахилин аьжал
16Дурар, Бет-Эл гъибтну, Эфратайихьна хъуркьайиз, Рахил бицӀириз ктӀерццуру. Дугъу аьзиятниинди бицӀир хуру. 17Рахили гизаф аьзаб гъизигнийи.
– ГучӀ мапӀан, – гъапи дугъаз ганабабу. – Мура бай вуяв!
18Аьжаликк ккайи Рахили чан бализ Бен-Они («йиз дерднан бай») кӀуру ччвур туву. Аммаки адашди дугъʼин Вениамин («йиз арччул хилин бай») кӀуру ччвур иливнийи.
19Гьамци Рахил гъакӀнийи. Думу Эфратайиз, яни Вифлеемдиз, гъябгъюрайи рякъюхъ кивнийи. 20Якьубди дугъан накьвдихъ гирамиб вуди гъван хъубсу. Рахилин накьвдихъ думу гирами гъван гьамусра хъими.
21Израили чан рякъ давам гъапӀнийи ва Мигдал-Эдер кӀуру чӀвурдан кьяляхъ чан бина дивнийи. 22Гьадушваъ яшамиш шулайи вахтна Рувим, чан адашдин лукӀ-хпир Билхайихъди гъахьнийи. Дидкан дугъан адашдиз аьгъю гъабхьнийи.
Якьубдин баяр
Якьубдихъ йицӀикьюр бай хъайи.
23Лияйин баяр: Якьубдин сарпир – Рувим, Симеон, Левий, Ягьуда, Иссахар ва Забулун. 24Рахилин баяр: Юсуф ва Вениамин. 25Рахилин лукӀ дишагьли Билхайин баяр: Дан ва Нефталим. 26Лияйин лукӀ дишагьли Зилфийин баяр: Гад ва Ашер.
Гьамрар вари Паддан-Арамдиъ бабкан гъахьи Якьубдин баяр вуйи.
Исакьдин аьжал
27Якьуб чан адаш Исакьдихьна гъюру. Исакь Кирьят-Арбайиъ (яни Хеврон) айи Мамрейиъ яшамиш шулайи. Саб вахтна душваъ Ибрагьим яшамиш гъахьнийи, хъасин – Исакь. 28Исакь варжна миржцӀур йисан яшамиш гъахьну. 29Думу лап кьабишнаъди, уьмрихъди ацӀну гъакӀну ва чан абйирихьна гъушну. Исакь чан баяр вуйи Исавдина Якьубди кивнийи.
Currently Selected:
Эвел 35: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
