Югьан 13
13
Исайи Чан ученикарин ликар жикӀуб
1Жугьдарин Пасхайин машквар багахь шулайи. Исайиз, Чав му дюнʼя дипну, Адашдихьна хътакру вахт улубкьнайиб аьгъяйи. Му дюнʼяйиъ Чандар вуйидар Дугъаз ккундийи, ва гьамус Дугъу дурарихьна вуйи Чан масанвалин кьувват улупуз гьял гъапӀнийи.
2Иблисди Искариотдиан вуйи Симондин бай Ягьудайин кӀваъ Иса масу тувбан ният гьамустӀанра ивнайи. 3Хябяхъдин уьл ипӀру вахтна Исайи, Адашди вари Чан хилиъ ивнайиб аьгъяди ва Учв Аллагьдихьан дуфнайиб, Аллагьдихьна хътакурайиб аьгъяди, 4гъудужвну, Чан зиълан палат илдибтуру ва, дастамал гъадабгъну, Чан кьялʼан идибтӀуру. 5Хъасин легниъ шид убзну, Иса ученикарин ликар жикӀуз хъюгъру ва кьялʼан идибтӀнайи дастамлихьди кжикуру. 6Гьамци Иса Петрихьнакьан хъуркьру. Ва Петри Дугъаз кӀуру:
– Я Агъа! Увуз йиз ликар жикӀуз ккунди айвуз?!
7– Узу гьапӀраш, уву сабан гъавриъ адарва, – жаваб туву Исайи. – Кьанди аннамиш апӀидива.
8– Йиз ликар жикӀуб?! Гьич хьибдар! – кӀуру Петри.
– Эгер Узу дижрикӀиш, сарун уву Йизур дарва! – гъапи Исайи.
9– Агъа! Дици вуш, неинки ликар, гьацира – хилар, кӀулра! – гьевеслуди кӀуру Петри.
10– Вари жан дижибкӀнайидарин анжагъ ликар жикӀубтӀан лазим дар, дицир марцциди ву аьхир. Учвура марцциди вучва. Аммаки учвкан вари марццидар дар, – гъапи Исайи.
11Исайиз Учв масу туврур аьгъяйи, гьаддиз Дугъу: «Учвкан вари марццидар дар», гъапнийи. 12Хъа дурарин ликар гъижикӀган, алабхьну палат, хъана гъюн йивну суфрайихъ дахъиган, Дугъу кӀуру:
– Узу учвуз гьапӀнуш, гьаддин гъавриъ гъахьунчва? 13Учву Узуз «Агъа», «Мялим» кӀуручва ва гьякьди кӀурира ачва, гьаз гъапиш Узу якьинди гьадму хьузра вуза. 14Гьаци вуйиган, эгер Узу – Агъайи ва Мялимди – ичв ликар гъижикӀнуш, учвура чиб-чпин ликар жикӀури ккунду. 15Узу гъапӀиганси, гьаци учвура апӀбан бадали, Узу учвуз мисал улупунза.
16Гьякьлу вуйи гьякь кӀуразачвуз: гъуллугъчи чан аьхюртӀан артухъ дар ва Гьаънайирра Учв ГьауртӀан артухъ дар. 17Ва гьамус учвуз му аьгъю дубхьнайиган, эгер гьаци апӀури гъашиш, бахтаврар хьидичва. 18Узу учвкан варидарикан кӀурадарза: Узуз аьгъязуз Узу кадагънайидар. Саки Гирами китабариъ дидикӀнайи му гафар кӀулиз удучӀври: «Узухъди уьл гъипӀур Узуз къаршу удучӀвну». 19Му хьайиз, мидиз улихьна Узу учвуз кӀураза. Гьаци вуйиган, му ляхин улубкьиган, учву Узу Гьадму – Гьарган Айир – вуйибдихъ хъугъдичва. 20Гьякьлу вуйи гьякь кӀуразачвуз: Узу Гьаърайир шли кьабул апӀураш, гьацири Узу кьабул апӀура, хъа шли Узу кьабул апӀураш, гьацири Узу му дюнʼяйиз Гьаур кьабул апӀура.
Учв масу туврур Исайи ашкар апӀуб
21Гьамци дупну, Иса яман гъалабулугъназ гъюру.
– Гьякьлу вуйи гьякь кӀуразачвузки, – гъапи Дугъу, – учвкан сари Узу масу тувди.
22Думуган ученикар, Думу шликан улхурайкӀан кӀури, гъавриъ адарди, сар-сарихьинди лигури гъузру. 23Исайин юкӀв али ученикарикан сар Чан гъвалахъ гъюн йивну дахънайи. 24Симон Петри дугъаз, Мялим шликан улхураш Дугъхьан гьерх кӀури, ишарат апӀуру. 25Ва ученик Исайихьнаси хъиркӀну, гьерхру:
– Я Агъа! Думу фуж ву?
26– Узу уьл кубсну шлихьна тувиш, гьадму ву, – гъапи Исайи.
Дугъу уьлин кьацӀ гъабраъ хурагнак кубсну, Искариотдиан вуйи Симондин бай Ягьудайихьна тувру. 27Гьаму кьацӀ хилиз гъадабгъубси Ягьудайиъ шейтӀан убчӀвру.
– Яв апӀуз ккайиб ухди апӀин, – кӀуру дугъаз Исайи.
28Суфрайихъ хъайидар саркьан, Исайи дици гьаз гъапнуш, гъавриъ ахъундайи. 29Хъа Ягьудайихь чпин уртахъ пул хьайиган, дурарикан сякьюдари: Исайи дугъаз: «ухьуз машквраз фукӀа гъадабгъ» вая «касибариз фукӀа тув», кӀурайиси фикир апӀуру. 30Уьл гъибису Ягьуда дишла хулʼан удучӀвуру.
Йишв вуйи.
ЦӀийи табшуругъ
31Думу удучӀвиган Исайи гъапи:
– Магьа гьамус Инсаниятдин Бализ Чан ад гъабхьну. Дугъан ад – Аллагьдин ад ву. 32Эгер Дугъан ад Аллагьдин ад вуш, Аллагьдира Думу Чан адназ гъадагъиди ва зат хъугъужвидар. 33Эй Йиз лижан веледар! Узуз учвухъди хьуз дицикьан вахт имдар. Учву Узу агури хьидичва – му жарадариз гъапиб Узу учвузра кӀураза: «Узу гъярушваз учвхьан гъюз хьибдар». 34Узу учвуз цӀийи табшуругъ тувраза: сари-сар ккун апӀинай, Узу учву ккун гъапӀиганси, гьаци учвура сари-сар ккун апӀинай. 35Эгер ичв арайиъ масанвал ади гъабшиш, Учву Йиз ученикар вуйиб вардариз аьгъю хьибди.
36– Агъа, Уву наана гъягъюрава? – гьерху Дугъхьан Симон Петрийи.
– Узу гъягъюрайишваз сабан увхьан Узухъди гъюз хьибдарвухьан, – жаваб туву Исайи. – Хъа хъасин гъидива.
37– Я Агъа! – кӀуру Петри. – Узхьан Увухъди гьамус гъюз гьаз шулдар? Увхъанди йикӀузра узу гьязур вуза!
38Исайи гъапи:
– Узхъанди йикӀузра?! Гьякьлу вуйи гьякь кӀуразавуз: даттли уьъйир дапӀну ккудубкӀайиз, шубуб ражари Узу аьгъюр дарзуз пидива!
Currently Selected:
Югьан 13: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
