Югьан 19

«Думу дариз зиг»

1Гьадмуган Пилатди, Иса хъади душну, Думу урччвуз гъитру. 2Эскрарира, зазарикан таж дапӀну, Дугъан кӀулʼин улубкӀуру ва гъюнарихъ аку-уьру халат хъипру. 3Дурар Дугъахьна гъюйи ва кӀуйи:

– Яшамиш ишри «жугьдарин Паччагь!» – ва гьамци кӀури, Дугъан машнягъян йивуйи.

4Хъана Пилат удучӀвуру.

– Мугъак узуз гьич саб тахсирра бихъурадарзуз, учвуз аьгъю хьпан бадали, магьа узу Думу ичв улихьна адаураза, – гъапи Пилатди.

5Ва гьадмуган, зазарикан гъапӀу таж ва аку-элвен халат хъади, дурарихьна Иса удучӀвуру.

– Магьа Думу Адми! – гъапи дурариз Пилатди.

6Хъа кавхйирина гъаравлари, Иса гъяркъюбси, чӀигъар апӀуру:

– Хачриина Думу! Хачриина!

– Думу учву гъадагъну, дариз зигай! – кӀуру дурариз Пилатди. – Узуз Мугъак саб тахсирра бихъурадарзуз.

7– Учуз закон ачуз, – гъапи жугьдари, – закондиинди Думу дукӀну ккунду, гьаз гъапиш Дугъу, Учв Аллагьдин Бай вуза, гъапну.

8Му гафар гъеерхьиган, Пилатдиз хъана артухъди гучӀ шулу. 9Думу хъана дараматдиз хътакуру ва Исайихьан гьерхру:

– Уву наънан вува?

Амма Исайи фукӀара гъапундар.

10– Гафар апӀуз ккундарнуз? – кӀуру Пилатди гьадмуган. – Увуз аьгъдарнузхъа, Уву деетувал йиз гьюкмиъ айиб ва Уву хачриин дариз зигувалра йиз гьюкмиъ айиб?

11Исайи жаваб туву:

– Йиз зиин яв гьич саб гьюкумра даршлийи, эгер увуз думу зиълан тувнадайиш. Ва гьаддиз Узу яв хилиз масу тувурин гунагь хъана зурбабуб ву.

12Гьаму гафарин кьяляхъ Пилат Иса азад апӀуз чарйир агбахъ шулу. Хъа жугьдари чӀигъар апӀуру:

– Эгер уву Думу деетиш, уву Цезар-паччагьдин дуст дарва! Фуж учв паччагь вуза кӀурайир, думу Цезар-паччагьдиз къаршу гъедергурайир ву!

13Гьамцдар гафар гъеерхьу Пилат, Исара адаъну, суд апӀрушвʼин деъру. Думу йишваз «Гъвандин тахт» кӀуру, жугьуд чӀалниинди: «Гаввафа».

14Му ляхнар Пасхайин машквар ккебгъайиз улихьна, жвуми йигъан лисунган шулайидар вуйи.

– Лигай, магьа ичв паччагь! – гъапи Пилатди.

15– ЖвартӀ апӀин Думу! ЖвартӀ! Хачриина! – гьарйир гъапӀу дурари.

– Гьаци вуйин? Ичв паччагь узу дариз зигну ккундунчвуз? – кӀуру Пилатди.

Цезарилан гъайри, учуз жара паччагь адарчуз! – жаваб туву дурари.

16Ва гьадмуган Пилатди, аьхирки, Иса дариз зигбан бадали жугьдарихьна тувру. Эскрарира, Иса дидисну, хъади гъахуру.

Хачриин Исайин аьжал

17Дугъу «УнтӀаъ» (жугьуд чӀалниинди «Голгофа») кӀуру йишвахьнакьан Чаинди Чав карсру хачра дубхну ккундийи. 18Гьадушвʼин Думу кьумарихьди хачрак карсру, хъа Дугъахъди кьюрсана – сар арччул, гьатмунурсана гагул терефнахъанди карсру, хъа Иса – дурарин кьялаъ.

19Пилатди хачрак дибикӀнайи табличкара кебхуз буйругъ тувру. Душвак дибикӀнайи: «Назаретдиан вуйи Иса, жугьдарин паччагь».

20Му бикӀуб гизаф жугьдари гъурхнийи, Иса дариз дизигнайишв шагьрихьан ярхлаъ адайи: ва душвак жугьуд, латин ва грек чӀалариинди дибикӀнура айи. Жугьдарин кавхйири Пилатдиз гъапи:

21– «Жугьдарин паччагь» кӀури мибикӀан. «Гьаму адмийи учв жугьдарин паччагь вуза кӀура», – пну, бикӀ.

22– Узу, фу дибикӀнаш, дибикӀназа, – жаваб туву Пилатди.

Тупут ипуб

23Иса дариз гъизигхъан, эскрари, Дугъан халат гъадабгъну, юкьубишваз пай апӀуру – гьарсар эскриз саб. Дурари Исайин балахунра (кӀанккан алабхьру ккуртт) гъадабгъуру. Думу гъибирхушв ктарди заълансина дубхнайиб вуйи.

24– Му чӀябгъидархьа, шлиз удубчӀвуруш, тупут ипиш ужу шул, – гъапи дурари чиб-чпин арайиъ. Гьамци, Гирами китабариъ дидикӀнайи му гафар тамам гъахьнийи: «Йиз палтар дурари чпин арайиъ пай гъапӀнийи, Узу алабхьнайибдин тупут ипнийи». Чан гьаци эскрари апӀузра гъапӀнийи.

Исайи Чан жан тувуб

25Иса керхнайи хачран багахь Дугъан дада, дадайин чи, Клеопдин шив Марʼям ва Магдалайиан вуйи Марʼям дийигънайи. 26Чан дада ва душвахь хьайи Чан юкӀв али сар ученик дяркъну, Исайи дадайиз кӀуру:

– Дишагьли, магьа яв бай. – 27Хъасин ученикдизра кӀуру:

– Магьа яв дада.

Гьаддихъанмина ученикди Исайин дада чахьна гъадагъуру.

28Исайи, вари ляхнар Гирами китабариъ дидикӀнайиси духьнайиб аьгъяди, кӀуру:

– Дахаргназу!

29Душвахь чяхрин сиркейихьди абцӀнайи гажин хьайи. Иссоп рукнан кюлигъ чяхрин сирке дизибгнайи мачалкасиб гъивну, эскрари Дугъан кӀвантӀарихьна хуру.

30Исайи, сиркейикан дубхъну, кӀуру:

– Тамам гъабхьну!

Ва, кӀул кибхну, Дугъу рюгь туву (Аллагьдиз).

Гирами китабариъ дибикӀнайиб тамам хьуб

31Му жвуми йигъан гъабхьиб вуйи, ва жугьдарин гьякимариз дариз дизигнайидарин майтар султ йигъаз хачарик керхну гъитуз ккунди адайи, фицики гьаму султ йигъан дурарин аьхю вуйи Пасхайин машквар ккебгърайи. Гьаддиз дурари Пилатдикан, керхнайидарин ликар дюргъну, дурар хачракан ктагъуб тӀалаб гъапӀнийи. 32Гьадмуган эскрар дуфну, Исайихъди дариз гъизигдарикан сарпирин ликар уьргъюру, хъасин – кьюрпирин. 33Хъа Исайихьна гъафиган, лигуруш, Думу дукӀнайи, ва гьаддиз Дугъан ликар дюрюргъди гъитру.

34ДукӀну ашра, эскрарикан сари Дугъан гъвалаъ жида убччвру, ва дишла ифина шид удубчӀвуру.

35Му вари чан хусуси улариинди гъябкъю адмийи, учвура хъугъбан бадали ктибтура. Дугъан шагьидвал гьякьлуб ву, чав гьякь кӀурайивал дугъаз аьгъя. 36Гьамци Гирами китабариъ дибикӀнайибра тамам гъабхьнийи:

«Дугъан гьич саб кӀурабра дюбгъну хьибдар». 37Гирами китабарин жара йишваъра кӀура: «Шлиъ жида убччвнуш, Гьадгъаз лигури хьиди».

Исайин беден накьвдиъ ивуб

38Мидин кьяляхъ, жугьдарин гьякимарихьан гучӀури жиниди, Исайин ученик гъаши Аримафеяйиан вуйи Юсуф кӀурури Пилатдикан, Исайин беден ктабгъуз ихтияр тӀалаб апӀуру. Пилатди ихтияр тувиган, дугъу, душну, беден хачракан ктабгъуру. 39Мина, саб фулан йишвну жиниди Исайихьна гафар апӀуз гъафи девлету кас Никодимра гъюру. Дугъу варж литр ицци ниъ хъайи ягъарна, мирра рукнанна алоэ укӀан кибикьнайи ччим хуру. 40Жугьдарин накьвдик кивруган, аьдат вуйиси, дурари Исайин беден гьадму ягъар дизигнайи ирин кафнигъян гъибиржуру. 41Иса дариз гъизигу йишвахь багъ хьайи, хъа багъдиъ саркьан мегьел кивнадру накьв айи. 42Султ йигъан улихь хьайи йигъ вуди хьпаз ва накьв багахь хьайивализ дилигну, душваъ Иса кивру.

Currently Selected:

Югьан 19: ТабГК

Highlight

Copy