Югьан 6
6
Хьуд агъзур тухъ апӀуб
1Гьамдихъан Иса Галилей гьюлин тмуну гъирагъдихъ хъайи Тивериад шагьрин аьтрафарихъна гъягъюру. 2Исайихъди гизаф халкьра гъюри гъахьну, гьаз гъапиш дурариз Дугъу аьзарлуйириз гъапӀу аьламатар дяркънайи. 3Хъа Иса, дагъдиина за духьну, Чан ученикарин кьялаъ деъру. 4Жугьдарин Пасхайин машквар багахь шулайи. 5Исайи, улар за гъапӀиган, Чахьна хайлин халкь гъюради дябкъну, Филипдиз кӀуру:
– Мурариз ипӀуз ухьу гьамкьан уьлер наънан гъадагъухьайкӀан?
6Исайи му, Филип ахтармиш апӀузди гъапиб вуйи, фицики Дугъаз гьапӀруш улихьмиди аьгъяйи.
7– Дурариз варидариз уьлин саб кьацӀкьан ккубкьбан бадали, уьл гъадабгъуз кьюдварж динар пулра гьудрубкӀур, – жаваб туву Филипди.
8Исайин жара ученик Петрин чве Андрейи кӀуру:
9– Мушваъ сар балихь хьуб мухан уьлна кьюб балугъ хьа, хъа гьамукьан халкьдиз дурарикан фу шулухъа?
10– Дурарихьди деуз гъитай, – гъапи Исайи.
Думу йишвʼин гизаф укӀ алийи ва дурар гьадушвʼин деъру. Дурарин кьадар хьуд агъзуртӀан артухъ вуйи.
11Исайи Аллагьдиз баркаллагь дупну, уьлер гьудутӀну, деънайидариз тувру. Ва балугъарра гьаци дапӀну, гьардиз чаз ккунибкьан тувру.
12Адмийир ацӀбалан кьяляхъ, Исайи ученикариз кӀуру:
– Зяя дархьбан бадали, хъригъу кьацӀар уч апӀинай.
13Дурари ипӀуз хъюгъруган, хьуб уьл вуди, гьадрарихъан хъригъу кьацӀар уч гъапӀиган, йицӀикьюб тавра шулу. 14Исайи гъапӀу му аьламат гъябкъиган, адмийири пуз хъюгъю:
– Му Кас якьинди дюнʼяйиз дуфну ккуни Гьадму Пайгъамбар ву! – 15Адмийири Чакан гужниинди чпин паччагь апӀуз ккунди айиб аьгъяди, Иса хъана, ялгъузди гъузбан бадали, дагълариз гъягъюру.
Иса гьюлилантина гъягъюб
16Хябяхъ шулади, Исайин ученикар гьюлихъна ктучӀвуру. 17МучӀура шулайи, хъа Иса дурарихьна мегьел гъюри адайи. Дурар, люткейиъ эъну, гьюлин тмуну гъирагъдихъ хъайи Кафернагьумдиз рякъюъ учӀвру. 18Гужал микӀ хъивну, гьюлиин лепйир ягъал-ягъал хьуз хъюгъру. 19Гъирагъдихъан хьуб-йирхьуб километр манзилназ сирнав гъапӀган, дурариз гьюлин лепйириланмина люткейихьна ликри гъюрайи Иса рякъюру ва гизаф гучӀ шулу.
20– Му Узу вуза, гучӀ мапӀанай! – кӀуру Исайи.
21Дурариз Думу люткейиъ итуз ккун гъабхьнийи, аммаки, фу лигурва, дурар чпи гъярайи гъирагъдихъна хъуркьнади шулу.
Адмийир Исайихьна ахмиш шула
22Хъайигъан гьюлин тлихъан гъирагъдихъ гъузу халкьдин гьюлин гъирагъдихъ саб люткетӀан хътарди хьуб ва дидиъра ученикар эъну гъушуб, хъа Иса, кӀуруш, дидиъ эдреуб кӀваин шулу. 23Гьадмуган Тиверияйиан гъафи сякьюдар люткйир, Агъайи баркаллагь дупну, халкьди уьл гъипӀу йишвахьна гъюру. 24Мушваъ я Иса, я Дугъан ученикар адруб гъябкъиган, дурари люткейиъди, Иса агури, Кафернагьумдиз сирнав апӀуру.
Иса – уьмрин уьл
25Иса гьюлин тмуну гъирагъдихъ дагну, Дугъаз дурари кӀуру:
– Мялим! Уву мина фила гъафунва?
26Исайи дурарин суалназ кӀуру:
– Гьякьлу вуйи гьякь кӀуразачвуз: Йиз аьламатнан лишнарин учву гъавриъ а кӀури, Узу агурадарчва, хъа Узу туву уьли учву тухъ апӀбаз лигну агурачва! 27Ухди пуч шлу му дюнʼяйин хураг бадали ваъ, хъа гьаргандин уьмур тувру ва зат пуч даршлу хураг бадали чалишмиш йихьай. Гьациб уьмур учвуз Инсаниятдин Бали тувра, фицики ихь Адаш Аллагьди Инсаниятдин Бай Чан кьудратниинди, печать йивну, лишанламиш дапӀна.
28– Аллагьдиз хуш шлу ляхин апӀбан бадали, учу гьапӀну ккун? – пну, гьерху дурари.
29Исайи жаваб туву:
– Магьа Аллагьдиз ккуниб: Дугъу Гьаурихъ хъугъай.
30– Уву Дугъу Гьаур вуш, учу Увухъ хъугъбан бадали, Уву учуз фициб аьламат улупидива? – гьерхру дурари. – Уву гьапӀдива? 31Ич ата-бабйири ичӀи чюлиъ манна ипӀуйи. Мидкан Гирами китабариъра гьамци дибикӀна: «Дугъу дурариз ипӀуз уьл аьршариан гьапӀну».
32Исайи жаваб туву:
– Гьякьлу вуйи гьякь кӀуразачвуз: учвуз аьршариан уьл гьапӀур Муса дар. Учвуз гьякь уьл аьршариан туврайир Йиз Адаш ву. 33Фицики Аллагьдин уьл – аьршариан дуфну, му дюнʼяйиз уьмур бахиш апӀурайи Гьадму Кас ву.
34– Я ич аьхюр, – кӀуру дурари, – учуз гьациб уьл гьамусдихъантина гьаргандиз чава!
35Исайи дурариз кӀуру:
– Узу вуза уьмур хурайи уьл. Фуж узухьна гъюруш, затра гашди гъузидар. Узухъ хъугънайир гьич затра харгидар. 36Хъа Узу учвуз улихьнасира дупнайзачвуз, учвуз Узу рякъюрачвуз кӀури, хъа учву хъугъри гъахьундарчва. 37Йиз Адашди Узʼина аманат гъапӀу гьарсар кас Узухьна гъиди ва, Узухьна гъафир, Узу гьич затра хътӀурккидарза. 38Фицики Узу аьршариан, Узуз ккуниб апӀуз ваъ, хъа Узу Гьаурин ният тамам апӀуз дуфнайир вуза. 39Хъа магьа Узу Гьаурин ният – Чав Узʼина аманат гъапӀдарикан гьич саркьан Узу дургуз гъидритуб, хъа гъияматдин йигъан дурар вари уьмрихьна кьяляхъ апӀуб. 40Даршуз магьа Йиз Адашдиз ккундайиб: Чан Бай рякъруриз ва Дугъахъ хъугъру гьарсар касдиз гьаргандин уьмур хьуб. Узу думу гъиямат йигъан гьаргандин уьмрихьна хътаидиза.
41Исайи: «Узу уьл вуза, аьршариан дуфнайи», – гъапну, кӀури, жугьдарик иц кабхъру.
42– Му Юсуфдин бай Иса даринхъа? – кӀуйи дурари. – Ухьуз Мугъан адашна дада аьгъдарди айинхъа? Гьаз Мугъу мици: аьршариан гъафир Вуза, кӀурахъа?
43– Иц макабхъанай, – кӀуру дурариз Исайи, – 44Узухьна, Узу гьау Адашди гъюз гъидритиш, сарихьанра гъюз хьибдар, хъа гъафир, Узу гъиямат йигъан учв уьмрихьна хътаидиза. 45Пайгъамбрарин Гирами китабарик дибикӀна: «Аллагьди дурариз варидариз улупиди». Гьарсар Адашдихъ хъпехъур ва Гьадгъухъан аьгъю гъапӀур Узухьна гъюру. 46Анжагъ Аллагьдихьан ГъафиризтӀан гъайри, гьеле гьич саризра Адаш гъяркъюндар. 47Гьякьлу вуйи гьякь кӀуразачвуз: фуж хъугъраш, гьадгъу гьаргандин уьмур гъазанмиш дапӀна. 48Узу уьмрин уьл вуза. 49Ичв ата-бабйири ичӀи чюлиъ чпиз Аллагьди гьапӀу манна ипӀури гъахьну ва имбударси дурарра гъийихну. 50Хъа аьршариан гъафи Уьл дициб дар: шли Думу гъипӀиш, дицир затра йикӀидар. 51Узу вуза аьршариан гъафи чӀиви уьл. Шли думу Уьл гъипӀиш, гьадму зат ккудудубкӀрубкьан яшамиш хьиди. Узу туврайи уьл – му йиз беден вуйиз. Узу думу, дюнʼяйин уьмур бадали, тувраза.
52Гьадмуган жугьдари:
– Дугъхьан ухьуз ипӀуз Чан беден фици тувуз хьибди?! – кӀуйи, ва дурарин арайиъ яман гьюжат абхъру.
53Исайи дурариз жаваб тувру:
– Гьякьлу вуйи гьякь кӀуразачвуз: эгер учву Инсаниятдин Балин беден дирипӀиш ва Дугъан ифи дурубхъиш, учвуз уьмур рубкьидар. 54Йиз беден ипӀруриз ва Йиз ифи убхъруриз гьаргандин уьмур хьибди, ва Узу дицир гъиямат йигъан уьмрихьна чӀиви апӀидиза. 55Йиз беден – магьа гьякьди вуйи хураг, Йиз ифи гьякьди вуйи убхъруб ву. 56Шли Йиз беден ипӀураш ва Йиз ифи убхъураш, гьадму Узуъ яшамиш хьиди, хъа Узу дугъаъ яшамиш хьидиза. 57Узу гьау чӀиви Адашдиантина Узу фици яшамиш шулаш, гьаци Йиз беден ипӀурайидарра Узʼантина яшамиш хьиди. 58Аьршариан гъафи Уьл магьа гьамциб ву. Хъа думу ичӀи чюлиъ ичв ата-бабйири гъипӀу завариан гъафи маннасиб дар – хъасин, гьар чан аьжалниинди, дурарра гъийихнийи. Хъа шли аьршариан вуйи гьаму Уьл ипӀураш, гьадгъу зат ккудудубкӀру уьмур хъапӀди.
59Гьамци аьгъювалар улупуйи Исайи Кафернагьумдин жугьдарин мистаъ.
Гьаргандин уьмрикан улупуб
60Дугъан ученикарикан гизафдари, му гафар гъеерхьиган, кӀури гъахьну:
– Мурар фу аьжайиб гафар ву? Мурар шлихьан аннамиш апӀуз шул!
61Хъа Исайи, Чан ученикар нарази вуйиб аьгъяди, дурариз гъапи:
– Йиз гафари учвук гучӀ капӀрайин? 62Хъа учву, Инсаниятдин Бай Учв наънан гъафнуш, гьадина за шули рякъруган гьапӀдичва? 63Беден фукӀа дар, анжагъ Рюгь ву уьмур хурайир. Узу учвуз кӀурайи гафариъ уьмрин Рюгь а. 64Аммаки ичв арайиъ хътругърударра а.
ИкибаштӀан, Исайиз гьеле дюнʼя ккебгъайиз аьгъяйи: фужар Чахъ хъугъдайиш ва Учв шли масу тувуйиш. 65Дугъу давам апӀуру:
– Гьаддиз учвуз гъапнийза Узу: анжагъ шлиз Адашди улупнаш, гьадму Узухьна гъиди. 66Гьаддихъан Исайин ученикарикан гизафдар Дугъхъан хътакнийи ва Дугъахъди шули гъахьундайи. 67Гьадмуган Исайи Чан йицӀикьюрид ученикарихьан гьерхру:
– Белки учвузра Узхъан хътакуз ккунди ашулчвуз?
68– Агъа, – жаваб туву Симон Петри, – учу шлихьна гъягъидихъа? Зат ккудудубкӀру уьмур тувру гафар Увухь хьавухь. 69Гьамус учу хъугърача ва аьгъячуз, Уву Аллагьдин Гирамир вуйиб.
70– Узу дайкӀана учву йицӀикьюридра ктагъур? – гъапи дугъаз жаваб вуди Исайи. – Хъа учвкан сар иблис ву.
71Исайи му Искариотдиан вуйи Симондин бай Ягьудайикан кӀурайиб вуйи. Дугъу, учв йицӀикьюрикан сар вуйири, хъасин Иса масу тувнийи.
Currently Selected:
Югьан 6: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
