Лука 13
13
Гунгьар гардандиъ дисай
1Гьадму арайиъ сакьюдари, гьадина дуфну, Аллагьдиз икрам апӀурайиган, Пилатди Галилей уьлкейин гъийиху агьларикан, Исайиз кӀуру.
2Исайи дурариз ктибтуру:
– Дурариз мициб инсафсуз жаза тувуз, дурар миди вуйи Галилей уьлкейин агьлартӀан артухъди гунагькрар ву, пну, фикир апӀуранчвахъа? 3Ваъ, кӀуразачвуз: эгер учву ичв гунгьар гардандиъ дидрисиш, тахсрар апӀури гъашиш, учвура вари гьаци йихидичву. 4Ясана учву, Силамдин чӀвурд абхъиган, гъийиху йицӀимиржир кас Ерусалимдин миди вуйи агьлартӀан артухъди тахсиркрар ву кӀури, гьисаб апӀуранчва? 5Ваъ, кӀуразачвуз: эгер учву ичв гунгьар гардандиъ дидрисди, тахсрар апӀури гъашиш, учвура вари гьаци йихидичву.
Бегьерсуз инжирикан тахалус
6Хъа Исайи гьамциб тахалус ктибтуру:
– Сари чан багъдиъ инжирин гьар кивнади гъабхьну. Сабан, думу гьаригъ йимишар гъяш лигуз гъюру, амма гъядарди рябкъюру. 7Дугъу багъбанчийиз кӀуру: «Магьа, шубуд кӀуру йисан мина йимишар гъяш лигуз гъюраза ва гъядарди шула; думу алдабтӀ, диди давди йишв бисура». 8Хъа багъбанчийи дугъаз: «Эй агъа! Гьаму йисансана гъибт, узу, дидин кьаблихъишв дирибккну, пейин хъабхьдиза. 9Диди бегьер хуруш лигухьа, нагагь дархиш, гъюру йисан думу алдабтӀархьа».
Султ йигъан жинар кайи дишагьли сагъ апӀуб
10Султ йигъан Исайи саб жугьдарин мистаъ аьгъювалар улупурайи. 11Душваъ йицӀимиржид йисан уьзрин жин кайи сар дишагьли айи. Думу, дацӀаркну, беден хъцӀабкуз даршули гъахьну. 12Исайи, думу дяркъну, дих апӀуру ва дугъаз кӀуру:
– Дишагьли! Уву яв уьзрихьан азад шулава.
13Хъа Исайи дугъʼин хилар иливуру, дишагьли дишлади хъцӀакуру ва Аллагьдин ад за апӀуз хъюгъру. 14Мистан аьхюри гьадмуган, Исайи султ йигъан адми сагъ гъапӀну кӀури, хъял кубчӀвну, халкьдиз кӀуру:
– Му ляхин апӀуз йирхьуд йигъ а, гьаддиз сагъ апӀбан бадали султ йигъан ваъ, хъа миди вуйи йирхьуд йигъари гъачай.
15Агъайи дугъаз жаваб вуди гъапи:
– Эй кьюб маш гъяйидар! Ухькан гьарури султ йигъан чан йиц вая дажи, тӀунхъан хъудубчну, шид тувуз хъапӀри шулдаринхъа? 16Хъа магьа йицӀимиржид йисан иблисди йитӀнайи му Ибрагьимдин риш султ йигъан азад апӀуз хай шулдаринхъа?
17Исайи гьамци кӀуруган, Дугъаз къаршу удучӀвнайи вардариз нач шулу, ва вари халкь Исайин адлу ляхнариин шад гъахьнийи.
Дилкан ва дуникан
18Дугъу хъана гъапи:
– Аллагьдин Паччагьлугъ фтихъна гъубшуб ву ва думу фтихь тевза? 19Думу, инсанди бистниъ киву дилиз ухшар ву: ктубчӀвиган, дидкан бегьем гьар шулу ва завун ничхрари дидин циркларигъ мукьар апӀуру.
20Исайи хъанара гъапи:
– Аллагьдин Паччагьлугъ сарун фтихь тевза? 21Думу дишагьлийи гъадабгъну, шубуб сеъ хюйик капӀну, хамир вари утуз гъибту дуниз ухшар ву.
Ккуру урнарикан
22Хъасин, гьамци аьгъювалар улупури, шагьриан шагьриз, гъулʼан гъулаз гъягъюри, Иса Ерусалимдиз рякъюъ учӀвру. 23Рякъюъ сари Дугъхьан гьерхру:
– Я Агъа! Яраб уьрхрюдар цӀибтӀан хьидайкӀан?
Исайи дугъаз кӀуру:
24– Ккуру урнариантина учӀвуз гьялак йихьай, фицики гизафдариз учӀвуз ккунди, хъа учӀвуз хьибдар. 25Гьадмуган эйсийи, гъудужвну, урчӀар хъяркьди, хъа учву чӀатан гьамци кӀури урчӀарик кучри гъуздичва: «Я Агъа! Учуз урчӀар арццава». Хъа Дугъу учвуз пиди: «Учву фужар ва наънан вушра, аьгъдарзуз». 26Гьадмуган пидичва: «Учу Яв улихь ипӀури-убхъури гъахьунча ва кючйириъ Уву учуз аьгъювалар улупуйва». 27Хъа Дугъу пиди: «Учву фужар ва наънан вушра, аьгъдарзуз; Узхьан дург йихьай, вари нягьякьвалар апӀрудар!» 28Учвуз Ибрагьим, Исакь, Якьуб ва вари пайгъамбрар Аллагьдин Паччагьлугъдиъ гъяркъиган, хъа учву дилин утӀурккруган, зурба ишубна суза зигидичва. 29Хъа ригъгьудубчӀвруна алабхъру, кафарина кьибла терефарихъанди дуфнайидар Аллагьдин Паччагьлугъдиъ гъюн йивну дахьди. 30Ва магьа, аьхиримжидар сарпидарди, сарпидар аьхиримжидарди хьиди.
Ерусалимдин гьякьнаан Исайин дердлувал
31Думу йигъан фарисйирикан бязидари, дуфну, Исайиз гъапи:
– УдучӀвну, гьамлин гъарах, дарш Гьироддиз Уву йикӀуз ккунди а.
32Дугъу дурариз гъапи:
– Душну, гьадму аьмалдар сулаз йипай: магьа гъира, закурра Исайи инсанарикан жинар ктаиди ва инсанар сагъ апӀиди, хъа саритӀ Чан ляхин ккудубкӀиди. 33Дупну ккундуки, Узуз гъина, закурна саритӀтӀан лицуз вахт имдарзуз, фицики пайгъамбрар, ЕрусалимдиътӀан дарди, жара йишваъ йикӀбакк ккуркьри шулдар.
34Эй, пайгъамбрар йивну йихру ва чахьна гьау илчйириин гъван уьлюбхру Ерусалим! Швнубан Узуз, пеъли чан хлинццариккна шюхъярси, яв халкь уч апӀуз ккун гъабхьунзуз, хъа учву кӀул ккивундарчва! 35Лигай, магьа ичв хал ичӀиди гъубзна. Магьа кӀуразачвуз: «Агъайин ччвурнахъ Гъюрайир ужувлакк ишри», кӀури, учву дих дарапӀкьан гагьди, Узу сарун рякъидарчвуз.
Currently Selected:
Лука 13: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
