Лука 15
15
Дудубгну гъибихъу агълижикан тахалус
1Исайихьна, Дугъахъ хъпехъбан бадали, вари налук гъюдюбхрудар ва гунагькрар гъюри гъахьну. 2Фарисйирина аьлимари, Дугъу гунагькрар кьабул апӀура ва дурарихъди уьл ипӀури шула кӀури, наразивал улупури гъахьну. 3Гьадмуган Исайи дурариз гьамциб тахалус ктибтуру:
4– Учвкан, чаз варж марчч ади, дурарикан саб гъудубгиган, урчӀвцӀурна урчӀвуб чюлиъ гъитну, гъудубгуб бихъайизкьан дарабгрур фуж шул? 5Хъа дибихъну, думу гъюнариина шадди за апӀидарин? 6Ва хулаз дуфну, дустарна гъуншйир уч дапӀну, дурариз «Узухъди шадвал апӀинай, гъудубгу чарва гъибихъунзуз», – пидарин? 7КӀуразачвузки, гьамци аьршариъра чан тахсрар гардандиъ гъидису гунагькрикан, урчӀвцӀурна урчӀвур гунгьар ктарзук кӀурайи марцци касарикантӀан, артухъ шад хьиди.
Гъудубгу арсран кепкикан тахалус
8Ясана фуну дишагьлийи, чаз йицӀуб арсран кепек ади, дурарикан саб гъудубгиган, чирагъ кабхьну, хал ичӀибкури, думу бихъайизкьан дарабгди гъибтур? 9Хъа му гъибихъган, чан дуст хпар ва гъуншйир уч дапӀну, дугъу: «Узухъди шад йихьай, узуз гъудубгу арсран кепек гъибихъунзуз» дарпиди гъитрин? 10Гьамци Аллагьдин малайикарра чан тахсрар гардандиъ гъидису сар гунагькриканра шад хьиди.
ЧӀуру рякъюъ ади дудургну, хъасин швумал духьну гъафи балкан
11Исайи хъана кӀуру:
– Сар касдиз кьюр бай ади гъахьну. 12Дурарикан бицӀинури адашдиз гъапну: «Я адаш! Ихь девлетнан узуз рубкьру пай ча». Адашдира баяриз девлет пай апӀуру. 13Сакьюдар йигъарилан бицӀину чве, чаз ккубкьуб вари уч дапӀну, ярхла юрдариз гъягъюру ва, душвариъ кефниинди яшамиш шули, чаз айи девлет вари хътипӀуру. 14Хъа вари хътипӀган, гьадму юрдариъ зурбади гаш абхъру, ва думу дарвалиъ ахъру. 15Думу гьадму юрднан сар агьалийихь яшамиш хьпакк ккуркьру. Эйсийира думу чан силар уьрхюз чюллериз гьаъру. 16Думу силари ипӀурайи бужвам дипӀнура чан фун абцӀуз рази вуди шуйи, амма гьадмура дугъаз туври шулдайи. 17Чан фагьмихъна гъафиган, дугъу гьамци гъапну: «Йиз адашдин хулʼин лихурайидариз фукьан булди уьл ади шуйи, хъа узу мушваъ гашу йикӀури азу! 18Душну йиз адашдиз пидиза: „Я адаш, узу, аьршариз ва увуз къаршу духьну, гунагьвалар гъапӀунза. 19Ва сарун яв бай ву пуз лайикьлур дарза. Узу увухъ лихурайидарин жергейиз кьабул апӀин“».
20Гьамци дупну, думу чан адашдихьна хътакуру. Думу ярхлаъ имиди дяркъну, адашдиз дугъан язухъ шулу ва, жаргъну душну, дугъан гардандиъ архьру ва макар апӀуру. 21Бали дугъаз кӀуруки: «Я адаш! Узу, аьршариз ва увуз къаршу духьну, гунагьвалар гъапӀунза ва сарун яв бай ву пуз лайикьлу дарза». 22Хъа адашди чан лукӀариз кӀуру: «Ужубсиб палат дубхну дугъахъ хъабхьай, хилихъ тӀубланра хъапӀай ва ликариинра алахьай. 23Хъасин гваназ дюбхнайи кӀари дубхну, убккай. ИпӀури ва убхъури шадвал апӀидихьа. 24Фицики му йиз бай дукӀну айи ва чӀиви гъахьну, дудургну айи ва гъидихъну». Гьамци вари шадвал апӀуз хъюгъну.
25Аьхюну бай думуган хутӀлиъ ади гъахьну. ХутӀлиан гъюрайириз, хуларихьна багахь гъашиган, ялхъвнин мукьмар ерхьуру. 26Дугъу гъаравшарикан сарихьан гьерхру: «Му фу хабар ву?» 27Дугъура мугъаз: «Яв чве дуфна; яв адашди, думу сагъ-саламатди хътакбан сагълугънаан ганаз дюбхнайи кӀари дубккна» кӀуру.
28Аьхюну чве, хъял дуфну, хулаъ учӀвуз даккунди гъахьну. Адашди, удучӀвну, дугъаз хулаз дих апӀуру.
29Хъа дугъу адашдиз жаваб вуди кӀуру: «Магьа швнуд йисан увуз гъуллугъ апӀури аза ва сабанра яв гаф ликрикк ккивундарза. Хъа уву узуз йиз дустарихъди шадвал апӀуз мегьел саб мудуркьан тувундарва. 30Хъа чан пай улдугнайидарихъди дипӀну, яв гьамуну бай гъафиган, уву дугъаз дюбхнайи кӀари гъубккунва». 31Адашди дугъаз кӀуру: «Я жан бай! Уву гьарган узухъди хъава ва вари йизуб явуб ву, 32хъа яв му чве дукӀну айи ва чӀиви гъахьну, дудургну айи, гъидихъну, ва гьаддиин шад хьуб ва гешт хъапӀуб лазим вуйи».
Currently Selected:
Лука 15: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
