Лука 18

АчӀни дишагьлийикан ва диванбегийикан тахалус

1Хъасин Исайи ученикариз, чпи гьарган ккарагури ва юкӀв дар дарапӀди духьну ккун кӀури, дурариз саб тахалус ктибтуру:

2– Саб шагьриъ Аллагьдихьан гучӀ ва инсанарихьан нач адру диванбеги ади гъахьну. 3Гьадму шагьриъ сар ачӀни дишагьли ади ва дугъу, диванбегийихьна гъюри, учв душмнихьан уьрх, кӀури гъахьну. 4Амма диванбегийи хайлин вахтна дугъаз иб дириври гъахьну. Хъа аьхирки дугъу чав-чакди кӀуру: узуз я Аллагьдихьан гучӀударшра, я адмийирихьан нач кадаршра, 5гьаму ачӀни дишагьлийи узу сикинди гъидритди хьпаз лигну, гьарган гъюри, узу инжик дарапӀбан бадали, думу уьрхидиза.

6Агъайи хъа кӀуру:

– Ебхьуранчвуз, гьякьсуз диванбегийи фу кӀураш? 7Аллагьди уьрхидаринхъа, Чаз йигъ-йишвди ккарагурайи, Чав ктагъдар, гьеле дурар уьрхюз кьан апӀурушра? 8КӀуразачвузки, Дугъу дишлади дурар уьрхюз кюмек тувди. Амма Инсаниятдин Бализ, жилʼина гъафиган, хъугъувал бихъуйкӀан яраб?

Фарисейиканна налук уч апӀрурикан тахалус

9Исайи гьацира чпин дугъривалиин шак алдарди, имбудар асккан апӀурайидаризра гьамциб тахалус хуру:

10– Кьюр кас Аллагьдин хулаъ ккарагуз учӀвну: сар – фарисей, тмунурра – налукар гъадагърур. 11Фарисейи, ккарагруган, чакна гьамци кӀуру: «Я Аллагь! Увуз чухсагъул кӀураза, узу миди вуйи пис инсанарсир, тӀарашчйирсир, алдатмиш апӀрударсир, кьяппйирсир вая гьаму налукар уч апӀрурсир дарапӀбаз. 12Гьяфтайиъ кьюб ражари ушв бисури шулза, вари гъазанмиш гъапӀубдин йицӀубпи пай тувраза». 13Налукар гъадагърурихьан, ярхласи дийигъну, завузди улар за апӀузкьана гъабхундайи, хъа чан мухур убччвури, кӀури гъахьну: «Я Аллагь! Язухъ апӀина йиз, гунагькрин!» 14КӀуразачвуз, думу чан хулаз фарисейтӀан артухъди марцц духьну гъушну, фицики чав учв заан апӀурайи гьарсар кас асккан апӀиди ва чав учв аскканди дисурайир заан хьиди.

Исана бицӀидар

15Исайихьна, дурарилан хил алдатри кӀури, набалугъ бицӀидарра хури шуйи; ученикари, кӀуруш, му гъябкъиган, гъадагъа апӀуру. 16Хъа Исайи, бицӀидариз чахьна дих дапӀну, кӀуру:

– БицӀидар узухьна гъюз гъитай, гъадагъа мапӀанай, Аллагьдин Паччагьлугъ гьацдаринуб ву. 17Гьякь кӀуразачвуз, Аллагьдин Паччагьлугъ бицӀириси кьабул дарапӀур дидиъ учӀвидар.

18Гьюкумдрарикан сари Исайихьан гьерхру:

– Я гъяни Мялим! КкудудубкӀру уьмур рубкьбан бадали, узу фу дапӀну ккунду?

19Исайи дугъаз гъапи:

– Гьаз Узуз гъянир кӀурава? Сар Аллагьдилан гъайри саркьан гъянир дар. 20Хъа гьамцдар Аллагьдин табшуругъар аьгъявузки: «кьяппавал мапӀан», «адми миликӀан», «мигьитӀибкӀан», «кучӀлин шагьидвал мапӀан», «адашдизна дадайиз гьюрмат апӀин».

21Дугъу жаваб туву:

– Вари гьамрар йиз жигьил вахтарихъанмина тамам апӀураза.

22Гьаму деебхьну, Исайи дугъаз гъапи:

– Сабсан увуз гьубкӀрадар: увуз айи-адру девлет масу тувну, касибариз пай апӀин, гьадмуган аьршариъ увуз девлет хьибдивуз. Хъасин Узухъди гъач. 23Му гафар гъеерхьиган, му кас пашман шулу, гьаз гъапиш думу гизаф девлетлу вуйи.

24Дугъан пашманвал гъябкъю Исайи кӀуру:

– Девлетлуйириз фукьан читин дарин Аллагьдин Паччагьлугъдиъ учӀвуз! 25Девлетлуйиз Аьршарин Паччагьлугъдиъ учӀвубтӀан, девейиз рубдин гъюнʼан удубчӀвуб рягьят ву.

26Му гафар гъеерхьдари гьерхру:

– Шилхьан учв уьрхюз хьиди?

27Исайи кӀуру:

– Инсанарихьан даршлуб Аллагьдихьан шулу.

28Петри Дугъаз кӀуруки:

– Магьа учу, вари учуз айиб гъибтну, Увухъди хъачаки.

29Исайи дурариз кӀуру:

– Дугъриди кӀуразачвуз: Аллагьдин Паччагьлугъ бадали чан хал вая шив, ваяки чвйирна чйир, ясана абйир-бабар ва веледар дирчну, фуж Узухъди гъафиш, 30гьадгъаз му вахтари мурартӀан швнубсабан артухъ хьибди ва гъюзимбу вахтарира ккудудубкӀру уьмур хьибди.

31Хъа йицӀикьюр Чан ученикар гъирагъдиз гьадаъну, дурариз кӀуру:

– Магьа ухьу Ерусалимдиз гъягъюрахьа ва Инсаниятдин Балкан пайгъамбрарилантина дибикӀнайиб вари тамам хьибди:

32«Ав, Думу аллагьсузарин хилиз тувди, Дугъʼина аьрвалар хиди, Думу алчагъ апӀиди, Дугъʼин тутйир алатӀиди. 33Думу гъирмажарихьди урччвиди ва, аьхирки, йикӀиди, хъа шубудпи йигъан Думу чӀиви хьиди».

34Амма ученикар фтинкӀа гъаври ахъундайи; му гафарин сир дурарихьна гъурубкьундайи ва дурарихьан Исайи гъапиб аннамиш апӀуз шуладайи.

35Иса Ерихон шагьрихьна гъюрайиган, сар кур кас, садакьа ккун апӀури, рякъюхъ деънайи. 36Дугъу, чан гъвалхъантина халкь гъягъюрайиб деебхьну, гьерхру:

– Му фу хабар ву?

37Дугъаз: «Назаретдиан вуйи Иса гъюра», – гъапнийи. 38Гьадмуган дугъу чӀигъ апӀуру:

– Я Давудгъярин Бай Иса! Йиз язухъ апӀина!

39Улихьди гъягъюрайидари куриз ккебехъ кӀуйи, амма дугъу айибтӀан артухъ чӀигъ гъапӀу:

– Давудгъярин Бай! Йиз язухъ апӀин!

40Исайи, хъугъужвну, думу Чахьна хуз амур апӀуру. Ва думу гъафиган, дугъхьан гьерхру:

41– Узкан фу ккундувуз?

Дугъу кӀуру:

– Агъа! Узуз рябкъюз ккундузуз.

42Исайи дугъаз гъапи: «Рябкъ! Яв хъугъвали уву гъюрхну». 43Дугъаз дишлади рябкъюри шулу, ва думу, Аллагьдин ад за апӀури, Исайихъди гъушу. Вари халкьди, му дябкъну, Аллагьдин тяриф апӀури гъаши.

Currently Selected:

Лука 18: ТабГК

Highlight

Copy