Лука 6

«Инсаниятдин Бай султ йигъʼинра Агъа ву»

1Султ йигъан Иса дяхин дубзнайи хутӀлариан гъягъбакк ккуркьну, ва Дугъахъ хъайи ученикари, дяхнин кӀулар ктутӀури, хиларигъ ктӀиршури, итӀури шулу. 2Фарисйирикан бязидари дурариз кӀуру:

– Учву султ йигъан Къанунди гъадагъа дапӀнайи ляхин апӀуранчва?

3-4Исайи дурариз жаваб туву:

– Мегер учвуз Давудри, чаз ва чахъ хъайидариз гаш гъабшиган, гьапӀнуш, фици дугъу, Аллагьдин хулаъ учӀвиган, маллйирилан гъайри шликӀан итӀуз ихтияр адру Аллагьдиз бахш дапӀнайи уьлер гъадагъну гъитӀнуш ва чахъди хъайидаризра тувнуш, Гирами китабариъ гъурхунданчва?

5Хъасин гъапи:

– Инсаниятдин Бай султ йигъʼинра Агъа ву.

Гъеебццу хил хъайи кас

6Жара саб султ йигъан Иса мистаз гъягъбакк ва душваъ аьгъювалар тувбакк ккуркьру. Душваъ арччул хил деебццнайи сар кас ади шулу. 7Къанунчйирна фарисйир, Исайик тахсир кипбан бадали, Дугъу султ йигъан думу сагъ апӀидайкӀан кӀури, ул хъипнайи. 8Амма Исайи, дурарин ниятар аьгъяди, хил дебццнайи касдиз кӀуру:

– Гъудужвну гъач, варидарин улихь дийигъ.

Думу гъудужвну, улихьна гъюру. 9Гьадмуган Исайи дурариз гъапи:

– Узу учвхьан гьерхраза: султ йигъан фу апӀуз ихтияр а? Ужʼвал, даршиш писвал? Уьмур уьбхюз, дарш пуч апӀуз?

Дурар чӀалкьан даркӀури гъузру. 10Вардарилан ул илбицну, Исайи гьадму касдиз кӀуру:

– Яв хил гьачӀабкк.

Дугъу гьаци гъапӀумитӀла, дугъан хил сагъ шулу. 11Фарисйирна аьлимар хъюлʼан деллу шулу ва, чпин арайиъ улхури, Исайикан гьапӀруш, аьжуз духьну гъузру.

Исайин вакилар

12Гьадму йигъари Иса, ккарагбан бадали, дагъдиз удучӀвуру ва ярхи йишвди Аллагьдиз ккарагури шулу.

13Йигъ улубкьиган, Чан ученикариз дих дапӀну, дурарикан йицӀикьюр кас ктагъуру ва дурариз Чан вакилар кӀуру ччвур тувуру. 14Дурар: Петр кӀуру лакӀам хъайи Симонна дугъан чве Андрей, Якьубна Югьанна, Филипна Варфоломей, 15Маттана Фома, Алфейин Якьубна Зилот кӀуру лакӀам хъайи Шимон, 16Якьубдин Ягьуда ва хъасин душман гъаши Искариот Ягьуда – гьамрар вуйи.

Рази хьубан гафар ва агьрар

17Иса, дурарихъди дагъдилан гъафир, дюз майдандиина гъюру. Дугъахъди аьхючӀвеъ Чан ученикарра, вари Ягьудияйианна Ерусалимдиан, хъа гьацира гьюлин гъирагъдихъ хъайи Тир ва Сидон шагьрариан дуфну, 18Исайихъ хъпехъуз ва чпи аьзарарихьан сагъ апӀуз гъафидарра, гьацира жинари гъаркӀ апӀурайидарра хъади гъахьну. Хъа, дурар вари сагъ шулира гъахьну. 19Вари халкьдиз Исайик кучуз ккунди гъабхьну, фицики Дугъхьан кьувват рабгъури ва диди вари сагъ апӀури гъахьну. 20Хъа Дугъу, Чан ученикарилан ул илбицури, гъапи:

– Бахтаврар вучва, касиб вуйидар,

фицики Аллагьдин Паччагьлугъ учвусдаринуб ву.

21Бахтаврар вучва, му вахтари гашлудар,

фицики тухъ хьидичва.

Бахтаврар вучва, му вахтари ишурайидар,

фицики аьлхъидичва.

22Учву инсанариз даккун гъахьиган,

учву дурари утӀурккган

ва беябур апӀруган,

ичв ччвур нянайикк ккипруган

Инсаниятдин Бай бадали,

бахтаврар вучва.

23Гьадму йигъан рази йихьай

ва шадвал ачмиш апӀинай,

фицики аьршариъ учвуз айи пешкеш зурба ву.

Учву даккнидарин абйирира

пайгъамбрарихъди гьаци апӀури гъахьну.

24Мураризси дарди, пис гьял хьибди ичв,

девлетлуйир,

фицики учвуз сарун ужувлар дяркъначвуз.

25Пис гьял хьибди ичв, му вахтари уьлдюгъну гъярайидар,

гьаз гъапиш гаш хьибдичвуз.

Пис гьял хьибди ичв, му вахтари аьлхъюрайидар,

фицики, гьяйиф дизигну, ишидичва.

26Учвкан жарадар ужуди улхруганра,

пис гьял хьибди ичв,

фицики дурарин абйири

кучӀлин пайгъамбрариканра гьаци апӀури гъахьну.

Душмнарра ккун апӀинай

27Хъа вари Узухъ хъебехънайидариз кӀураза: ичв душмнар ккун апӀинай, учву даккнидариз ужʼвал апӀинай. 28Учву нянатлу апӀурайидариз гьюрматлу гафар апӀинай ва учвуз гиран ктапӀрударихъанди ккарагай. 29Яв саб гарцӀликкан бачӀ ккадатуриз тмунубра ккив ва яв зиълан палат илдибтруриз кӀанакк ккайи ккурттра чаз гъадабгъуз манигъʼвал мапӀан. 30Увкан тӀалаб апӀурайириз тув ва явуб гъадабгъуриз «кьяляхъ ча» макӀан. 31Учвуз учвухъди адмийир фици духьну ккундуш, гьадрарихъди учвура гьаци йихьай. 32Хъа эгер учву ккунидартӀан учвуз ккундарш, мидкан фу чухсагъул ачвуз? Фицики гунагькраризра чиб ккунидар ккунди шулу. 33Учвуз ужʼвал апӀрудариз учвура ужʼвал апӀураш, мидкан фу чухсагъул ачвуз? Фицики гунагькрарира гьаци апӀуру. 34Хъа эгер учву бурж кьяляхъ апӀуз удукьрурихьна миж кади тувраш, мидкан фу чухсагъул ачвуз? Фицики гунагькрарира чпи буржназ тувкьануб кьяляхъ гъадабгъуз ният ади туври шулу. 35Хъа учву ичв душмнар ккун апӀинай, ужувлар апӀинай, кьяляхъ бисуб миж ктарди, буржназра тувай, ва учвуз зурба пешкеш хьибди, ва учву ВаритӀанзаанурин баяр хьидичва. Фицики чпиз гъапӀу ужʼвал аьгъю даршлударизра, пис касаризра Аллагь гъянир ву. 36Гьаци учвура, ичв Адашси, мани юкӀвар ади йихьай.

Жарарин диван мапӀанай, Аллагьди ичвра апӀидар

37Жарарин диван мапӀанай, Аллагьди ичвра апӀидар; жарар тахсир мапӀанай, учвура тахсир апӀидар. Хил алдабгъай, учвланра алдабгъиди. 38Хил ачухъ апӀинай, учвузра тувди: убжнайи ва кӀакӀ алди абцӀнайи уьлчмейиинди ичв танхлиъ абхьди, фицики учву фициб уьлчмейиинди ебцураш, учвузра гьацибдиинди ебциди.

39Дурариз Исайи тахалусарра ктитуру:

– Курихьан кур хъади гъягъюз шулинхъа? Дурар кьюридра ичӀаъ ахьидаринхъа? 40Ученик чан мялимтӀан заан дар, амма зегьмет зигури, дубгъури гъабхьиш, гьарсар чан мялимдихъ хъуркьди.

41Увуз яв чвуччвун улиъ айи чӀюрх гьаз рябкъюрвуз, яв улиъ айи хамхар дярябкърайи вахтна? 42Ваяки яв гъардшиз: «Яв улиъ айи чӀюрх адабгъуза», – фици пидива, увуз яв улиъ айи хамхар дярябкърайиган? Эй, кьюб маш гъяйир! Сифте яв улиъ айи хамхар адабгъ, хъа гьадмуган увуз, яв гъардшин улʼан чӀюрх фици адабгъуруш, рябкъидивуз.

Гьар йимишдиз лигну аьгъю шулу

43Гъяни гьари чӀуру бегьер, чӀуру гьари гъяни бегьер хурдар, 44фицики гьарсаб гьар чан йимишдиз лигну аьгъю шулу. Гьаддиз зазарилан инжир, чӀуру хутарилан тӀумутӀ уч апӀури шулдар. 45Ужур касди чан кӀван хазнайиан ужуб, хъа чӀурури чан кӀван хазнайиан чӀуруб адабгъуру, фицики инсандин мелз, дугъан юкӀв фти абцӀнаш, гьаддикан улхури шулу.

Кьюб шибритӀ

46Учву Узуз: «Я Агъа, я Агъа!» гьаз кӀуручва, Узу учвуз гъапиб дарапӀрайиган? 47Узухьна дуфну, Узухъ хъебехъну, Йиз гафар тамам апӀру гьарсар кас шлиз ухшар вуш, кӀарзачвуз: 48Думу, хулар дивруган, жил дериндиз дирибккну, шибритӀар гъвандиин диву касдиз ухшар ву, фицики, селлер дуфну, шид улубчӀвиган, думу хулар ришвуз гъахьундар, гьаз гъапиш дурар гъвандиин дивнайидар вуди гъахьну.

49Хъа Йиз гафар ерхьури, дурар тамам дарапӀрайи кас шибритӀар ккадру хулар диву касдиз ухшар ву, фицики шид улубчӀвиган, дурар дишлади ахьну, дармадагъин хьиди.

Currently Selected:

Лука 6: ТабГК

Highlight

Copy