Лука 9
9
ЙицӀикьюр ученик Аллагьдин Паччагьлугъдикан хабар рабгъуз гьауб
1Чан йицӀикьюр ученикдиз дих дапӀну, Исайи дурариз, вари жинарин зиин гьюкум ва уьзрар сагъ апӀбан бадали, кьувват тувру. 2Дугъу дурар Аллагьдин Паччагьлугъдикан хабар рабгъуз ва иццрудар сагъ апӀуз гьаъру. 3Исайи дурариз кӀуру: «Рякъюз фукӀа магъадабгъанай: я чамах, я тавра, я уьл, я пул, ва кьюб жар палатра хьади дарибшри. 4Фуну хулаъ учӀвишра, гьадушваъ дергай ва гьадлин рякъюъ учӀвай. 5Хъа эгер учву наанкӀа кьабул дарапӀиш, думу шагьриан удучӀвруган, ичв ликарик кайи бишируг гьадрарихьинди кадабхьай. Гъит му дурариз чпиин улубкьрубдин улихьмиди дебккрайи лишан ибшри».
6Аллагьдин Паччагьлугъдикан Ужувлан хабар рабгъури ва аьзарлуйир сагъ апӀури, дурар гъулариъ лицуз рякъюъ учӀву.
Гьироддин гъалабулугъ
7Исайи апӀурайи гьаму вари ляхнарикан гьякимдар Гьироддиз ебхьуру. Думу мюгьтал шули гъахьну, гьаз гъапиш садари му гъачӀихъан чӀиви гъаши Ягьʼя ву кӀури, 8тмундари, Илʼяс пайгъамбар гъафну кӀури, имбударира дегьзаманйирин пайгъамбрарикан сар чӀиви гъахьну кӀури, аваза ипнийи. 9Хъа Гьиродди кӀури гъахьну:
– Ягьʼяйин кӀул узу алдабтӀунза, хъа узуз Мугъкан гьамкьан ебхьурайи му Кас фуж вуйкӀан?
Гьаддиз Гьиродди Иса рякъюз чарйир зигурайи.
Хьуд агъзур кас тухъ апӀуб
10Хъадакну гъафи вакилари, чпи фу гъапӀнуш, Исайиз ктибтуру. Хъасин Иса, вакиларра гъадагъну, Вифсайда кӀуру шагьриз гъягъюру. 11Амма мидкан хабар гъабхьи халкь Исайин кьяляхъ хъахъру. Дугъура, кьабул дапӀну, дурариз Аллагьдин Паччагьлугъдикан сюгьбат гъабхуру, хъа сагъ духьну ккунидар уьзрарихьан марцц апӀуру.
12Йигъ хябяхъ хьуз хъюбгъю. ЙицӀикьюриддира Исайин багахьна дуфну, кӀуру:
– Халкь деет, гъит багахь хьайи гъулариъ ва ятгъариъ йишв адапӀри ва ипӀруб абгри, гьаз гъапиш ухьу фукӀа адрушваъ ахьа.
13Исайи: «Дурариз ипӀруб учву тувай», – кӀуру. Ученикарира: «Учухь хьуб уьлна кьюб балугътӀан хьадарчухь, гьамус учу, душну, му халкьдиз ипӀруб гъадабгъну ккундинхъа?» – кӀуру.
14Дурар хьуд агъзур касдихьнакьан вуйи. Исайи дурариз: «Дурар дестйириъ хьу-хьуцӀуркьан ади дитай», – гъапи. 15Ученикари гьаци дапӀну дурар дитру.
16Исайи, хьуб уьлна кьюб балугъ гъадагъну, завузди дилигну, Аллагьдин ужувлакк ккахьри, дупну, гьудутӀну, ученикарихьна халкьдиз пай апӀуз тувру. 17Вари халкьди ипӀуру, тухъ шулу ва хъиригъу кьацӀари йицӀикьюб тавра ацӀру.
Исайи Чаин улубкьрубдикан кӀура
18Сабан, Чан ученикарра хъади, саб халват йишваъ ккарагурайиган, Исайи дурарихьан гьерхру:
– Халкьди, Узу фуж ву пну, гьисаб апӀура?
19Дурари жаваб вуди кӀуру:
– Садари Уву штуан апӀру Ягьʼя, тмундари Илʼяс, шубурпидари кюгьне пайгъамбрарикан сар чӀиви гъахьну кӀури, гьисаб апӀура.
20Исайи дурарихьан хъана гьерхру:
– Хъа учву, Узу фуж ву кӀури, гьисаб апӀурачва?
Петри жаваб тувру:
– Аллагьдин Месигь ву кӀури.
21Хъа Дугъу, мидкан гьич саризра дарпуб ижмишнаан гъадагъа дапӀну, 22хъа давам апӀуру:
– Инсаниятдин Балʼин гизаф аьзабар улукьиди, аьхюдари, маллйири ва къанунчйири Думу нигь апӀиди ва йикӀиди, хъа шубудпи йигъан чӀиви хьиди.
«Узухъди гъюз ккунири чав учв нигь апӀри»
23Вардарихьинди илдицну, Исайи кӀуру:
– Шлиз Узухъди гъягъюз ккундуш, думу чан тямягьяр дирчну, гьар йигъандин хач гъадабгъну#9:23 Исайи му гафариинди Чан уьмур хачриин фици аьзабариккна тувнуш, гьаци чан уьмур гьяйиф дарди тувуз шлуриз кӀурайиб ву. Узухъди гъюри. 24Фицики, шлиз чан уьмур уьбхюз ккундуш, дугъан думу дубгди, хъа шли чан уьмур Узу бадали пуч гъапӀиш, дугъу думу уьбхиди. 25Чав учв пуч, ясана чав чаз зарар гъапӀхъантина, вари дюнʼя чаз гъабшишра, инсандиз фу хайир ахъа? 26Шли Узхьан ва Йиз гафарихьан нач гъапӀиш, Адашдин, Чан ва марцци малайикарин гьяйбатлувалиъди гъафиган, дугъхьан Инсаниятдин Балира нач апӀиди. 27Гьякьди кӀуразачвуз: мушвʼин дийигънайидарикан сакьюдариз, чпин аьжал хъубкьайиз, Аллагьдин Паччагьлугъ рябкъиди.
Муса ва Илʼяс пайгъамбрарихъди гъабхьи гюрюш
28Гьаму гафар дупну миржид йигъланси Иса Петр, Югьан ва Якьуб хъади дагъдиина ккарагуз удучӀвуру. 29Ккарагурайиган, Исайин машнан рябкъювал дигиш шулу ва Дугъан палтарра лизи шулу, вацӀрацӀар апӀури, нур туври шулу. 30Ва магьа, Дугъахъди кьюр жвуву сюгьбат апӀура: мурар Муса ва Илʼяс вуйи. 31Гьяйбатлу аднаъди дуфнайидари, Ерусалимдиъ улубкьру Исайин аьжаликан улхури айи. 32Петрна дугъахъ хъайидар му арайиъ нивкӀуз душнайи, хъа нивкӀʼан хъиргиган, дурариз Исайин гьяйбатлувал ва Дугъан багахь хьайи гьадму кьюр кас рякъюру. 33Дурар Исайихьан гьудучӀвурайиган, Петри, чав фу кӀурашра аьгъдарди, Исайиз кӀуру:
– Я Мялим! Учуз мушвахь ужуди вучуз! Гъач учу шубуб паж апӀуча: саб Увуз, саб Мусайиз ва саб Илʼясдиз (Петриз, чав фу кӀураш, аьгъдайи).
34Дугъу гьаци кӀурайи вахтна, диф арайиз гъюру ва дурар ккаъру. Дурар дифру ккаъган, ученикарик гучӀ кабхъру. 35Хъа дифрагъян сес шулу:
– Му Йиз кадагънайи Бай вуйиз, Гьамгъахъ хъебехъай!
36Му сеснахъан, Иса сарди гъузру. Ученикар гьадму йигъари чпиз гъябкъюбдикан саризра чӀалкьан дарпиди гъузнийи.
Жин кубчӀври шлу бай сагъ апӀуб
37Хъайигъан дурар дагъдилан улдучӀвган, Иса гизаф халкьди къаршуламиш апӀуру. 38Сабпну халкьдин арайигъян сари гьарай гъапӀну:
– Мялим! Миннат вуйиз Увуз, дуфну йиз бализ лига, узухъ хъайир думу сар вуйиз! 39Жинди думу чӀюркьюри шулу, хъа сабпну чӀигъар утӀурччвуру ва чӀиргуру, ушвниан каф утӀубччвуру, хъасин, бегьемди аьзабар тувбалан кьяляхъ, цӀиб яваш шулу. 40Узу Яв ученикарикан думу ктӀубккуб тӀалаб гъапӀнийза, хъа дурарихьан гъабхьундар.
41Исайи жаваб тувру:
– Агь хътругъру ва аьрбатан дубхьнайи насил! Узу филадиз учвухъди хьиди ва учву аьх апӀури гъузди! Хъади гъач мина яв бай.
42Исайихьна гъюрайиган, бай жинди ккитӀикӀуру ва чӀиргуру. Исайи чиркин рюгьназ буйругъ тувру ва жигьил, сагъ дапӀну, чан адашдихьна тувру.
Ученикар Чан аьжаликан гъапи Исайин гъаври ахъундар
43Вари Аллагьдин кьудратниин мюгьтал шуйи. Исайи гъапӀкьандариин вари мюгьталди имиди, Дугъу Чан ученикариз кӀуру:
44– Гьаму гафар ужуди ичв кӀваин гъитай: Инсаниятдин Бай багарихьди инсанарин хилиз тувди.
45Амма дурар му гафарин гъаври ахъундар ва дурарин мяна ученикарихьан гьебкнади гъабхьну, гьаддиз дурари думу аннамиш гъапӀундайи. Хъа мидкан Исайихьан гьерхуз дурариз гучӀуйи.
Фуж аьхюр ву
46Хъасин ученикарин арайиъ, дурарикан аьхюр фуж вуйкӀан кӀури, гьюжат абхъру. 47Исайи, дурарин юкӀвариъ айиб аьгъяди, сар бицӀир гъадагъну, думу Чан улихь дерккру, 48ва ученикариз Дугъу гьамци кӀуру:
– Шли му бицӀир Йиз ччвурнахъ кьабул гъапӀиш, гьадгъу Узу кьабул апӀура. Хъа шли Узу кьабул гъапӀиш, гьадгъу Узу Гьаур кьабул апӀура, фицики учвкан вартӀан цӀиб вуйир фуж вуш, гьадму зурба ву.
49Гьадмуган Югьанди гьерхру:
– Мялим! Учуз Яв ччвурнахъан жинар ктаурайи сар кас гъяркъюнчуз ва дугъаз гъадагъа гъапӀунча, гьаз гъапиш думу ухьухъди лицури шлур дар.
50Исайи дугъаз кӀуру:
– Гъадагъа мапӀанай, фицики фуж учвуз къаршу дарш, думу учвхъанди ву.
Самария уьлкейин саб гъулаъ Иса кьабул гъапӀундар
51Иса жиларилан аьршариз гъадагъру йигъар багахь гъахьиган, Дугъаз Ерусалимдиз гъягъюз ккун шулу. 52Ва Дугъу Чан улихьди чархачйир гьаъру. Дурарра душну, Думу гъюбаз гьязурвал апӀбан бадали, Самария уьлкейиъ айи саб гъулаъ учӀвру. 53Амма душваъ Иса кьабул гъапӀундайи, гьаз гъапиш дурариз Думу Ерусалимдиз гъягъюрайир вуйиб аьгъю гъабхьнийи. 54Му ляхин дябкъну, Дугъан ученикар вуйи Якьубдина Югьанди кӀуру:
– Я Агъа! Учу, завариан цӀа убгъ, дупну, диди дурар тӀанкь дапӀну ккундунуз?
55Хъа Дугъу, дурарихьинди илдицну, гъадагъа апӀуру. 56Хъасин дурар саб жара шагьриз гъягъюру.
Аллагьдин Паччагьлугьдиъ учӀвуз лайикьлуваликан
57Дурар рякъюъ айиган сари Исайиз:
– Уву наана гъушишра, узу Увухъди гъидиза, – кӀуру.
58Исайи дугъаз гъапи:
– Сулариз – мугъарйир, завун ничхрариз мукьар а, хъа Инсаниятдин Бализ кӀул дивну дахъру йишв адар.
59Хъа сар жарариз Исайи: «Узухъди гъач!» – кӀуру. Хъа дугъу: «Агъа! Узухьди сифте, душну, дукӀнайи йиз адаш кивуз гъит», – кӀуру.
60Хъа Исайи дугъаз гъапи:
– Гъит дийихнайидари чпин гъийихдар киври, хъа уву душну Аллагьдин Паччагьлугъдикан Ужувлан хабар рабгъ.
61Хъана сари гъапи:
– Узура Увухъди гъягъидиза, Агъа, амма сифте, душну, йиз хуландариз баркаллагь пуз гъит.
62Исайи дугъазра гьамци гъапи:
– Дурциин чан хил иливхъан, кьяляхъинди илдицру кас Аллагьдин Паччагьлугъдиз ярамиш дар.
Currently Selected:
Лука 9: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
