Марк 3
3
Гъеебццу хил хъайир сагъ апӀуб
1Иса хъа ражарира мистаз гъюру. Душваъ хил деебццнайи сар кас айи. 2Сакьюдар адмийири, чпиз рябкъюри сар фужкӀа гьаму султ йигъан сагъ апӀидайкӀан, кӀури, ва гьаддилантина тахсир кипуз, Исайихъ ул хъипнайи. 3Дугъу хил дебццнайи касдиз кӀуру:
– Варидарин улихь дийигъ.
4Хъа Исайи гьатмундариз кӀуру:
– Султ йигъан гьапӀну ккунду: ужʼвал ясана писвал? Уьмур уьбхну ккундин, дарш пуч дапӀну?
Хъа дурар ккебехъну гъузнийи. 5Исайи хъял кади ул дурарилан илбицуру ва, дурарин инсафсуз юкӀвар вуйивалин хажалат зигури, гьадму адмийиз кӀуру:
– Яв хил гьачӀабкк.
Дугъу хил гьачӀабккуру, ва му хилра гьатмунубси сагъ шулу. 6Хъа фарисйири, удучӀвну, гьадму сяаьт Гьироддин терефкрарихъди, Иса фици пуч апӀуруш, йикьрар йитӀуру.
Ученикар Исайилан илтӀишуб
7Иса Чан ученикарра хъади гьюлихъна гъюру. Дугъахъди гизаф кьадар халкьар Галилей ва Ягьудия уьлкйириан хъайи. 8Дугъу гъапӀкьандарикан деебхьну Ерусалимдиан, Идумея уьлкейиан, Ярдан нирин гьатмуну патариан, Тир ва Сидон шагьраринишвариан гъатар-гъатарди адмийир Дугъахьна ахмиш шуйи. 9Гизаф халкь уч духьнайивализ дилигну, дурарикк Учв ккадрахъбан бадали, Дугъу Чан ученикариз лютке гьязурди гъитуб табшурмиш апӀуру. 10Дугъу гизафдар сагъ гъапӀнийи, гьаддиз иццурайидар Гьадгъак кучузкьан шулуш кӀури, Исайилан илтӀишуйи. 11Гьар ражари жинариз Думу рякърубкьан, дурар Дугъан улихь машнахъди икрамназ дахьуйи ва гьамци кӀури чӀигъар апӀуйи: «Уву Аллагьдин Бай вува!» 12Хъа Дугъу ижмишнаан дурариз, Учв фуж вуш, ашкар апӀуб гъадагъа апӀуйи.
ЙицӀикьюр вакил ктагъуб
13Иса, Чав дих дапӀну ктагъдарра, хъади дагъдиина улдучӀвуру. 14Дурар йицӀикьюр кас вуйи, Дугъу дурариз Чан вакилар кӀуйи. Дурар Дугъахъди гьаммишан духьну ккундийи. Дугъу дурар Ужувлан хабар рабгъуз гьаъди, 15ва дурариз жинар утӀурккуз шлу гьюкум тувди. 16Магьа Дугъу ктагъу йицӀикьюр: Симон (Дугъу мугъаз Петр кӀуру ччвур тувнийи), 17Зеведейин бай Якьуб ва Якьубдин чве Югьан (Дугъу мурариз «Воанергес», яна «Кьюркьлин цӀин баяр» кӀуру ччвур тувнийи), 18Андрей, Филип, Варфоломей, Матта, Фома, Алфейин бай Якьуб, Фадей, Кананит кӀуру лакӀам хъайи Шимон, 19ва хъасин Иса масу туву Искариот кӀуру лакӀам хъайи Ягьуда.
Жугьдарин аьхюдари, Исайик жин ка, пуб
20Мурар хулаз хътакуру. Хъана халкь уч шулу, Исана Чан ученикар ушв гьибтузкьан хъуркьнадайи. 21Дугъан багахьлуйириз мидкан гъеебхьган, дурар дуфну, Иса гужназ мушвʼан хъади гъягъюз ккун шулу, фицики дурари, Думу абдал духьна, кӀуйи.
22Ерусалимдиан гъафи къанунчйири кӀуйи:
– Мугъаъ Велзевул убчӀвна! Мугъу жинар дурарин аьхюрихьан вуйи кьувватниинди ктаура.
23Гьадмуган Исайи дурариз Чахьнаси дих дапӀну, тахалусариинди кӀуру:
– ШейтӀнихьан шейтӀан фици утӀубккуз шулу? 24Эгер паччагьлугъдин айитӀ дявйир аш, дициб паччагьлугъ сагъди гъубзидар. 25Эгер хизандин айитӀ дявйир аш, дициб хизан сагъди гъубзидар. 26Эгер шейтӀан учв чаина гъедебгнуш, диди чав чахъди дяви гъубхнуш, дидхьан чан-учвди гъубзуз хьибдар – дидин аьхир хьибди. 27Сарихьанра, гуж кайирин хулаз дуфну, душв тӀараш апӀуз хьибдар – эгер эйси йитӀну адарш; гъийитӀган, хал тӀараш апӀуз шул. 28Гьякь кӀуразачвуз: адмийири Аллагьдиз фициб къаршу гаф гъапишра, варибдилан хил алдабгъиди, 29хъа Гирами Рюгьназ къаршу гаф гъапирилан гьич зат, саб вахтнара хил алдабгъидар, дугъан гунагь гьаммишандиз гъубзди!
30Адмийири: «Мугъаъ жин убчӀвна» кӀурайиган, Исайи гьаци гъапнийи.
Исайин хизан – чан ученикар
31Хъасин Дугъан дадана чвйир гъюру; чӀатинди дугъужвнамиди, дурари Дугъаз гъач пуз гьаъру. 32Дугълан халкь илтӀибшнайи, ва Дугъаз гъапнийи:
– ЧӀат, кючейиъ Яв дада, чвйир ва чйир дугъужвна, Уву гьерхра.
33Исайи дурариз жаваб туву:
– Йиз дадана чвйир фужар ву? – 34Чалан илтӀишнайидарилан ул илбицну, Дугъу кӀуру:
– Магьа Йиз дада ва чвйир! 35Аллагьдин гаф тамам апӀрур Йиз чвера, чира, дадара вуйиз.
Currently Selected:
Марк 3: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
