ᓭᐣᐟ ᓬᐅᐠ 7

1ᐃᐢᐱ ᒫᑲ ᑳ ᐳᓂᑖᐟ ᑲᐦᑭᔭᐤ ᐅ ᐱᑭᐢᑫᐧᐃᐧᓇ ᐁ ᓇᑐᑖᑯᐟ ᐊᔨᓯᔨᓂᐊᐧ, ᑭ ᐱᐦᑐᑫᐤ ᑫᐸᕒᓀᐊᒥᕽ.

2ᐯᔭᐠ ᒫᑲ ᓯᒫᑲᓂᓯᐃᐧᑭᒪᐤ ᐅᐟ ᐊᑐᐢᑫᔮᑲᓇ, ᐁ ᓴᑭᐋᐟ, ᑭ ᐋᑯᓯᔨᐊᐧ ᒥᓇ ᑫᑳᐟ ᐁ ᓂᐱᔨᐟ. 3ᐃᐢᐱ ᒫᑲ ᐱᔦᑕᕽ ᐁ ᐋᒋᒥᒥᐦᐟ ᒋᓴᓴ, ᑭ ᐃᓯᑎᓴᐦᐊᒪᐁᐧᐤ ᑳ ᓂᑳᓀᔨᑖᑯᓯᔨᐟ ᒍᐊᐧ, ᐁ ᑲᑫᐧᒋᒫᐟ ᑭᑕ ᐯ ᐃᑐᐦᑌᔨᐟ ᒥᓇ ᑭᑕ ᐱᒫᒋᐊᔨᐟ ᐅᐟ ᐊᑐᐢᑫᔮᑲᓇ. 4ᐁᑯᓯ ᐃᐧᔭᐋᐧᐤ, ᐃᐢᐱ ᐁ ᐯ ᐅᑎᑖᒋᐠ ᒋᓴᓴ, ᓭᒫᐠ ᑭ ᒪᐃᐧᒧᐢᑕᐁᐧᐊᐧᐠ ᐁ ᐃᑌᐧᒋᐠ, ᑌᐸᑫᔨᑖᑯᓯᐤ ᐅᒪ ᑭᑕ ᑭ ᑐᑕᒪᐊᐧᐟ: 5ᐃᐧᔭ ᐁ ᓵᑭᐦᐋᐟ ᑭᐟ ᐊᔨᓯᔨᓂᒥᓇᐊᐧ, ᒥᓇ ᐁ ᑭ ᐅᓯᑕᒫᑯᔭᕽ ᐊᔭᒥᐦᐁᐃᐧᑲᒥᐠ. 6ᒋᓴᐢ ᒫᑲ ᑭ ᐃᐧᒉᐁᐧᐤ. ᐃᐢᐱ ᒫᑲ ᐁᑳ ᐋᐧᔭᐤ ᐊᐧᐢᑲᐦᐃᑲᓂᕽ ᐅᐦᒋ ᐁᔮᐟ, ᐅᑐᑌᒪ ᓯᒫᑲᓂᓯᐃᐧᑭᒪᐤ ᑭ ᐃᓯᑎᓴᐦᐊᒪᐁᐧᐤ ᑭᑕ ᐃᑖᔨᐟ, ᑳ ᑎᐯᔨᐦᒋᑫᔭᐣ ᐁᑳᐃᐧᔭ ᐋᔨᒥᐃᓱ: ᒋᑫᒫ ᓇᒪᐃᐧᔭ ᓂᐟ ᐃᐢᐱᑌᔨᑖᑯᓯᐣ ᑭᑕ ᐯ ᐱᐦᑐᑫᔭᐣ ᓂᑭᕽ: 7ᐁᐊᐧᑯᒋ ᓇᒪᐃᐧᔭ ᓂ ᑭ ᐃᐢᐱᑌᔨᒥᓱᐣ ᑭᑕ ᓈᑎᑖᐣ; ᒫᑲ ᐃᑌᐧ ᐊᔭᒥᐃᐧᐣ, ᐁᑯᓯ ᓂᐟ ᐊᑐᐢᑫᔮᑲᐣ ᑭᑕ ᒥᔪ ᐊᔮᐤ, 8ᒋᑫᒫ ᓂᐢᑕ ᓂᐟ ᐊᔨᑲᐃᐧᐣ ᑎᐯᔨᒥᑯᐃᐧᓂᕽ, ᐁ ᑎᐯᔨᑕᒧᐃᑲᐃᐧᔮᐣ ᓯᒫᑲᓂᓴᐠ: ᐁᑯᓯ ᐊᐊᐧ ᓂᐟ ᐃᑖᐤ, ᓂᔮ, ᐁᑯᓯ ᓯᐯᐧᑌᐤ: ᒥᓇ ᑯᑕᐠ, ᐊᐢᑕᒼ, ᐁᑯᓯ ᐯ ᐃᑐᐦᑌᐤ: ᒥᓇ ᓂᐟ ᐊᑐᐢᑫᔮᑲᐣ, ᐅᒪ ᐃᑐᑕ, ᐁᑯᓯ ᐃᑐᑕᒼ. 9ᐃᐢᐱ ᒋᓴᐢ ᐅᒪ ᐱᔦᐦᑕᕽ, ᑭ ᒫᒪᐢᑲᑌᔨᒣᐤ, ᐁ ᑭ ᑫᐧᐢᑭᑳᐸᐃᐧᐟ ᐁ ᐃᑖᐟ ᑲᐦᑭᔭᐤ ᐊᔨᓯᔨᓂᐊᐧ ᑳ ᐱᒥᑎᓴᐦᐅᑯᐟ, ᑭᐟ ᐃᑎᓈᐋᐧᐤ, ᓇᒪᐃᐧᔭ ᓄᐦ ᒥᐢᑫᐣ ᑖᐯᐧᑕᒧᐃᐧᐣ ᐁ ᐃᓯ ᑭᐦᒐᔨᐊᐧᕽ, ᓇᒪ ᓇᒪᐃᐧᔭ ᐊᐦᐳ ᐃᐢᕒᐁᐃᓬᐃᕽ. 10ᐁᑯᓯ ᐊᓂᑭ ᑳ ᑭ ᐃᓯᑎᓴᐦᐅᐦᒋᐠ, ᐁ ᑭᐁᐧᒋᐠ ᐊᐧᐢᑲᐦᐃᑲᓂᕽ ᐃᓯ, ᑭ ᒥᐢᑲᐁᐧᐊᐧᐠ ᐊᑐᐢᑫᔮᑲᓇ ᐁ ᒥᔪ ᐊᔮᔨᐟ.

11ᑭ ᐊᔨᑭᐣ ᒫᑲ ᐁ ᐊᑎ ᐋᐧᐸᕽ, ᑭ ᐃᑐᐦᑌᐤ ᐅᑌᓈᕽ ᓀᐣ ᐁ ᐃᓯᔨᐦᑳᑌᔨᐠ; ᐁᑯᓯ ᐅ ᑭᐢᑭᓄᐦᐊᒪᐋᐧᑲᓇ ᑭ ᐃᐧᒉᐃᐧᐠ, ᐊᓯᒋ ᒥᓴᒋ ᐊᔨᓯᔨᓂᐊᐧ. 12ᐁᑲᐧ ᒫᑲ ᐃᐢᐱ ᒋᑭ ᐁ ᐊᑎ ᐅᑎᑕᕽ ᐁ ᐃᓯ ᐃᐢᑲᐧᑌᒥᐊᐧᕽ ᐅᑌᓇᐤ, ᒋᐢᐟ, ᐁᑯᑕ ᑭ ᐅᐦᒋ ᐊᐧᔭᐃᐧᑕᐋᐤ ᐯᔭᐠ ᐁ ᓂᐱᐟ, ᐁ ᐯᔭᐠ ᐅᑯᓯᓯᒥᑯᐟ ᐅᑳᐃᐧᔭ, ᑭ ᓯᑲᐃᐧ ᐃᐢᑫᐧᐃᐧᔨᐊᐧ ᒫᑲ: ᐁᑯᓯ ᒥᐦᒉᐟ ᐊᔨᓯᔨᓂᐊᐧ ᐅᑌᓈᕽ ᐅᐦᒋ ᑭ ᐃᐧᒉᐃᐧᐠ. 13ᐃᐢᐱ ᒫᑲ ᑳ ᑎᐯᔨᐦᒋᑫᐟ ᐃᐧᔮᐸᒫᐟ, ᑭ ᑭᑎᒫᑭᓇᐁᐧᐤ, ᐁ ᑭ ᐃᑖᐟ ᒫᑲ, ᐁᑳᐃᐧᔭ ᒫᑐ. 14ᐁᑯᓯ ᑭᓯᐊᐧᐠ ᑭ ᐯ ᐃᑐᐦᑌᐤ ᐁ ᑭ ᓵᒥᓇᕽ ᑌᑎᓂᑲᐣ: ᑳ ᐱᒥᐃᐧᑖᒋᐠ ᒫᑲ ᑭ ᑭᐱᒋᑲᐸᐃᐧᐊᐧᐠ. ᐁᑯᓯ ᑭ ᐃᑌᐧᐤ, ᐅᐢᑭᓂᑭᐤ, ᐊᐧᓂᐢᑳ, ᑭᐟ ᐃᑎᐣ. 15ᐊᓇ ᒫᑲ ᑳ ᓂᐱᐟ ᑭ ᓴᒪᑕᐱᐤ, ᐁᑯᓯ ᐁ ᑭ ᒫᒋ ᐱᑭᐢᑫᐧᐟ. ᑭ ᐸᑭᑎᓇᒪᐁᐧᐤ ᒫᑲ ᐅᑲᐃᐧᔨᐊᐧ. 16ᐁᑯᓯ ᓭᑭᓯᐃᐧᐣ ᑲᐦᑭᔭᐤ ᑭ ᐅᑎᑎᓂᑲᐧᐠ: ᐁ ᑭᐢᑕᑭᒫᒋᐠ ᑭᓭᒪᓂᑐᐊᐧ, ᐁ ᐃᑌᐧᒋᐠ, ᑭᐦᒋ ᐅᑭᐢᑭᐁᐧᐦᐃᑫᐤ ᓄᑯᓯᐤ ᐃᑕ ᐁ ᐊᔮᔭᕽ: ᒥᓇ, ᑭᓭᒪᓂᑐ ᑭ ᑭᐅᑲᐁᐧᐤ ᐅᐟ ᐃᔨᓂᒪ. 17ᐁᑯᓯ ᐅᒪ ᐊᒋᒧᐃᐧᐣ ᐃᐧᔭ ᐅᐦᒋ ᑭ ᒥᓯᑌᐸᔨᐤ ᒥᓯᐁᐧ ᒍᑎᔭᐃᕽ, ᒥᓇ ᒥᓯᐁᐧ ᐊᐧᐢᑳ ᐊᐢᑭᕽ. 18ᐁᑯᓯ ᒑᐣ ᐅ ᑭᐢᑭᓄᐦᐊᒪᐋᐧᑲᓇ ᑭ ᐋᒋᒧᐢᑕᐠ ᑲᐦᑭᔭᐤ ᐅᐦᐃ ᑫᑲᐧᔭ.

19ᒑᐣ ᒫᑲ ᓂᓱ ᐅ ᑭᐢᑭᓄᐦᐊᒪᐋᐧᑲᓇ ᐁ ᑭ ᓇᑐᒫᐟ ᑭ ᐃᓯᑎᓴᐦᐊᒪᐁᐧᐤ ᑳ ᑎᐯᔨᐦᒋᑫᔨᐟ, ᐁ ᐃᑌᐧᐟ, ᑭᔭ ᒋ ᑳ ᐃᐧ ᑕᑯᓯᑭᐸᐣ, ᐊᐁᐧᑳ ᒋ ᑯᑕᐠ ᓂ ᑲ ᐊᓴᐋᐧᐸᒫᓈᐣ? 20ᐃᐢᐱ ᒫᑲ ᐊᓂᐦᐃ ᓈᐯᐊᐧ ᑳ ᐯ ᐅᑎᐦᑎᑯᐟ, ᑭ ᐃᑎᐠ, ᒑᐣ ᐸᑊᑎᐢᐟ ᓂ ᑭ ᐃᓯᑎᓴᐦᐅᑯᓈᐤ, ᐁ ᐃᑌᐧᐟ, ᑭᔭ ᒋ ᐊᓇ ᑳ ᐃᐧ ᑕᑯᓯᑭᐸᐣ, ᐊᐁᐧᑳ ᒋ ᑯᑕᐠ ᓂ ᑲ ᐊᓴᐋᐧᐸᒫᓈᐣ? 21ᐁᐊᐧᑯ ᒫᑲ ᑎᐸᐃᑲᐣ ᑭ ᐃᔨᓂᑲᐦᐁᐤ ᒥᐦᒉᐟ ᐅᐟ ᐋᑯᓯᐃᐧᓂᔨᐊᐧ ᒥᓇ ᐅᐟ ᐃᑖᐢᐱᓀᐃᐧᓂᔨᐊᐧ ᒥᓇ ᒪᒋ ᐊᒐᐦᑲᐧ ᐅᐦᒋ; ᒥᐦᒉᐟ ᒫᑲ ᐁᑳ ᐁ ᐋᐧᐱᔨᐟ ᑭ ᒥᔦᐤ ᑭᑕ ᐋᐧᐸᐦᑕᒥᔨᐟ. 22#ᐊᐩᓵᔭ 35:5,6; ᐊᐩᓵᔭ 61:1ᐁᑯᓯ ᑭ ᓇᐢᑫᐧᐊᐧᓯᒣᐤ ᒥᓇ ᑭ ᐃᑌᐤ ᓯᐯᐧᑌᐠ, ᒥᓇ ᐃᐧᐦᑕᒫᕽ ᒑᐣ ᑫᑲᐧᐩ ᑳ ᑭ ᐋᐧᐸᐦᑕᒣᐠ ᒥᓇ ᑳ ᑭ ᐯᐦᑕᒣᐠ; ᐁᑳ ᑳ ᐋᐧᐱᒋᐠ ᐊᔮᐊᐧᐠ ᐋᐧᐱᐃᐧᐣ, ᑳ ᒪᐢᑭᐸᔨᒋᐠ ᐱᒧᐦᑌᐊᐧᐠ, ᐅᒪᒑᐢᐱᓀᐊᐧᐠ ᐯᑭᐋᐊᐧᐠ, ᒥᓇ ᑳ ᑲᑫᐱᑌᒋᐠ ᐯᑕᒪᐧᐠ, ᑳ ᓂᐱᒋᐠ ᐊᐧᓂᐢᑳᓈᐊᐧᐠ, ᑳ ᑭᑎᒫᑭᓯᒋᐠ ᒥᔪ ᐋᒋᒧᐃᐧᐣ ᐃᐧᐦᑕᒪᐋᐧᐊᐧᐠ. 23ᒥᔪ ᐃᑕᑭᒥᑯᐃᐧᓯᐤ ᒫᑲ, ᐊᓇ ᐁᑳ ᑫ ᓇᐢᐸᑌᔨᒥᑫᐧ.

24ᐃᐢᐱ ᒫᑲ ᒑᐣ ᐅᐟ ᐃᓯᑎᓴᐋᐧᑲᓇ ᑳ ᓯᐯᐧᑌᔨᐟ, ᑭ ᐊᑎ ᐃᑌᐤ ᑳ ᐅᓴᒣᔭᑎᔨᐟ ᐊᔨᓯᔨᓂᐊᐧ ᒑᓇ ᐅᐦᒋ, ᑫᑲᐧᐩ ᑳ ᑭ ᓇᑕᐃᐧ ᐋᐧᐸᐦᑕᒣᐠ ᐱᑲᐧᑕᐢᑭᕽ? ᐋᓂᐢᑲᐊᐧᐢᐠ ᒋ ᐁ ᑯᐢᑯᐢᑳᐧᐢᑕᕽ? 25ᑫᑲᐧᐩ ᒫᑲ ᑳ ᓇᑕᐃᐧ ᐋᐧᐸᐦᑕᒣᐠ? ᓈᐯᐤ ᒋ ᐁ ᐃᐧᔮᑕᕽ ᐁ ᔪᐢᑳᔨᐠ ᑭᑭᐢᑭᑲᐣ? ᒫᑎᑲ, ᐊᓂᑭ ᑳ ᐅᓴᒥ ᒥᔪ ᐃᐧᔭᒋᑫᒋᐠ, ᒥᓇ ᑳ ᒥᔪ ᒥᒋᓱᒋᐠ, ᐊᔮᐊᐧᐠ ᐃᐧᑭᔨᕽ ᑭᐦᒋ ᐅᑭᒫᐊᐧ. 26ᒫᑲ ᑫᑲᐧᐩ ᑳ ᓇᑕᐃᐧ ᐋᐧᐸᐦᑕᒣᐠ? ᐅᑭᐢᑭᐁᐧᐦᐃᑫᐤ ᒋ? ᑖᐯᐧ, ᑭᐟ ᐃᑎᓈᐋᐧᐤ, ᒥᐢᑕᐦᐃ ᓇᐊᐧᐨ ᐋᐊᐧᓯᒣ ᐃᐢᐱᐨ ᐅᑭᐢᑭᐁᐧᐦᐃᑫᐤ. 27#ᒫᓬᐊᑲᐩ 3:1ᐁᐊᐧᑯ ᐊᐊᐧ ᑳ ᐅᐦᒋ ᐃᑕᓯᓇᐃᑲᑌᔨᐠ, ᒋᐢᐟ, ᓂ ᓂᑲᓂ ᐃᓯᑎᓴᐋᐧᐤ ᓂᐟ ᐊᑐᐢᑫᔮᑲᐣ, ᐃᐧᔭ ᑭ ᑲ ᓂᑲᓂ ᑲᐧᔮᒋᑕᒪᐠ ᑭ ᒣᐢᑲᓇᐤ. 28ᑭᐟ ᐃᑎᓈᐋᐧᐤ, ᑕᐦᑐ ᐊᓂᑭ ᐃᐢᑫᐧᐊᐧ ᑳ ᐅᐦᒋ ᓂᐦᑖᐃᐧᑭᒋᐠ ᓇᒪ ᐊᐃᐧᔭᐠ ᐊᐊᐧᓯᒣ ᐃᑌᔨᑖᑯᓯᐤ ᐃᐢᐱᐨ ᒑᐣ: ᒫᑲ ᐊᓇ ᒫᐊᐧᒋ ᓄᑕᐤ ᑳ ᐃᑌᔨᑖᑯᓯᐟ ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᕽ ᐊᐊᐧᓯᒣ ᐃᑌᔨᑖᑯᓯᐤ ᐃᐢᐱ ᐃᐧᔭ. 29#ᒫᐟᔪ 21:32; ᓬᐅᐠ 3:12ᑲᐦᑭᔭᐤ ᐊᔨᓯᔨᓂᐊᐧ ᒫᑲ ᑳ ᐯᑖᑯᐟ, ᐊᓯᒋ ᒪᓯᓇᐦᐃᑫᐃᐧᔨᓂᐊᐧ, ᑭ ᑲᐧᔭᐢᑭᓯᒋᑫᐊᐧᑫᔨᒣᐊᐧᐠ ᑭᓭᒪᓂᑐᐊᐧ, ᐁ ᑭ ᐸᑊᑖᓯᐃᐧᐃᒋᐠ ᒑᐣ ᐅ ᐸᑊᑖᓯᐃᐧᑫᐃᐧᓂᔨᐤ. 30ᒫᑲ ᐸᕒᐊᓯᐊᐧᐠ ᐊᓯᒋ ᐅᔭᓱᐁᐧᐃᐧᔨᓂᐊᐧᐠ ᑭ ᐋᑕᐁᐧᔨᑕᒫᓱᐊᐧᐠ ᐅ ᑲᑫᐢᑭᒥᐁᐧᐃᐧᓂᔨᐤ ᑭᓭᒪᓂᑐᐊᐧ ᐁᑳ ᐁ ᑭ ᐸᑊᑖᓯᐃᐧᐦᐃᑯᒋᐠ.

31ᑖᓂᓯ ᑫ ᐃᑖᐸᒥᓇᑯᐊᑭᐠ ᒫᑲ ᐅᑭ ᐊᔨᓯᔨᓂᐊᐧᐠ ᑳ ᐊᓂᐢᑫ ᓂᐦᑖᐃᐧᑭᐃᑐᒋᐠ, ᒥᓇ ᑖᓂᓯ ᐁᑕᐸᒥᓇᑯᓯᒋᐠ? 32ᓇᓈᐢᐱᑕᐁᐧᐊᐧᐠ ᐊᐊᐧᓯᓴ ᐁ ᐊᐱᔨᐟ ᐊᑖᑐᐃᐧᓂᕽ, ᐁᑯᓯ ᐁ ᑕᑌᐸᐧᑎᑐᒋᐠ; ᐁ ᐃᑌᐧᒋᐠ, ᑭ ᑭ ᑭᑐᒋᑫᐢᑕᒫᑎᓇᐣ, ᐁᑯᓯ ᓇᒪᐃᐧᔭ ᑭ ᑭ ᓂᒥᐃᑐᓈᐋᐧᐤ; ᓂ ᑭ ᒫᑕᓇᐣ, ᒫᑲ ᓇᒪᐃᐧᔭ ᑭ ᑭ ᒫᑐᓈᐋᐧᐤ. 33ᒋᑫᒫ ᒑᐣ ᐸᑊᑎᐢᐟ ᑭ ᐯ ᐃᑐᐦᑌᐤ ᐁᑳ ᐸᑫᐧᓯᑲᓇ ᐁ ᒧᐋᐧᐟ ᐊᐦᐳ ᓱᒥᓈᐳᔨᐤ ᐁ ᒥᓂᑫᐧᐟ; ᐁᑯᓯ ᑭᐟ ᐃᑖᐧᓈᐋᐧᐤ, ᐊᔭᐁᐧᐤ ᒪᒋ ᐊᐦᒑᐦᑲᐧ. 34ᐃᔨᓂᐃᐧᑯᓯᓵᐣ ᑭ ᐯ ᒪᒥᒋᓱ ᒥᓇ ᑭ ᒥᓂᑫᐧᐤ; ᐁᑯᓯ ᑭᐟ ᐃᑖᐧᓈᐋᐧᐤ, ᒫᑎᑲ, ᑳᓴᑫᐃᐧᔨᓂᐤ, ᒥᓇ ᑳ ᓂᑕ ᒥᓂᑫᐧᐟ ᓱᒥᓈᐳᔨᐤ, ᐅᑐᑌᒥᐋᐧᐊᐧ ᐸᑊᓬᐃᑲᓇᐠ ᒥᓇ ᐅᒪᒋᐃᑎᐢᑲᐠ! 35ᒫᑲ ᐃᔨᓂᓯᐃᐧᐣ ᑲᐧᔭᐢᑳᐧᑎᓯᐊᐧᑫᔨᒥᐠ ᑲᐦᑭᔭᐤ ᐅᐟ ᐊᐋᐧᓯᒥᓴ.

36ᐯᔭᐠ ᒫᑲ ᐹᕒᐊᓯᐊᐧ ᑭ ᐃᐧᑯᒥᐠ ᑭᑕ ᐃᐧᒋᒥᒋᓱᒫᐟ. ᐁᑯᓯ ᐸᕒᐊᓯᐊᐧ ᐃᐧᑭᔨᐠ ᑭ ᐱᐦᑐᑫᐤ, ᐁ ᑭ ᓇᐦᐊᐱᐟ ᒫᑲ ᑭᑕ ᒥᒋᓱᐟ. 37#ᒫᐟᔪ 26:7; ᒫᕒᐠ 14:3; ᒑᐣ 12:3ᒫᑎᑲ ᒫᑲ, ᐃᐢᑫᐧᐤ ᐁ ᑭ ᐊᔮᐟ ᐅᑌᓈᕽ, ᐁ ᑭ ᒪᒋᑎᐢᑭᐟ; ᐃᐢᐱ ᐁ ᑭᐢᑫᔨᑕᕽ ᐁ ᒥᒋᓱᔨᐟ ᐸᕒᐊᓯᐊᐧ ᐃᐧᑭᔨᕽ, ᑭ ᐯᑕᐤ ᑕᒪᐢᑯᐃᐧᐣ ᐋᓬᐊᐹᐢᑕᕒ ᐊᓯᐊᐧᒋᑲᓂᕽ, 38ᐁ ᑭ ᓂᐸᐃᐧᐟ ᒫᑲ ᐅᐢᐱᐢᑲᐧᓂᔨᕽ ᐅᓯᑎᔨᕽ, ᐁ ᒪᒫᑐᐟ, ᑭ ᒫᒋ ᓵᐳᐸᑖᐤ ᐅᓯᑎᔨᐊᐧ ᐅᐟ ᐅᒋᑲᐋᐧᐱᐃᐧᓇ ᐅᐦᒋ, ᒥᓇ ᐁ ᑭ ᐸᑲᐧᐊᕽ ᐁᐧᐢᑕᑲᔭ ᐅᐢᑎᑳᐧᓂᕽ ᐅᐦᒋ, ᐁᑯᓯ ᐁ ᑭ ᐅᒉᑕᒫᐧᐟ ᐅᓯᑎᔨᐊᐧ, ᐁ ᑐᒥᓇᒫᐧᐟ ᐊᓂᒪ ᑕᒪᐢᑯᐃᐧᐣ ᐅᐦᒋ. 39ᐁᑲᐧ ᐃᐢᐱ ᐊᐊᐧ ᐸᕒᐊᓯ ᑳ ᑭ ᓇᑐᒫᐟ ᐃᐧᔮᐸᐦᑕᕽ, ᑭ ᑭᒧᒋ ᐃᑎᓱᐤ, ᐁ ᐃᑌᐧᐟ, ᐊᐊᐧ ᓈᐯᐤ, ᑭᐢᐱᐣ ᐅᑭᐢᑭᐁᐧᐦᐃᑫᐃᐧᐟ, ᐅ ᑳ ᑭ ᓂᓯᑕᐁᐧᔨᒪ ᐊᐁᐧᓂᐦᐃ ᒥᓇ ᐁ ᑐᐃᐧᑲᓂᐃᐧᔨᐟ ᐅᐦᐃ ᐃᐢᑫᐧᐊᐧ ᑳ ᓵᒥᓂᑯᐟ, ᐃᐧᔭ ᐁ ᒪᒋᐦᑎᐢᑭᔨᐟ. 40ᐁᑯᓯ ᒋᓴᐢ ᐁ ᓇᐢᑫᐧᐊᐧᓯᒫᐟ ᑭ ᐃᑌᐤ, ᓴᐃᒪᐣ, ᑫᑲᐧᐩ ᓂᐟ ᐊᔮᐣ ᑭᑕ ᐃᑎᑖᐣ. ᐁᑯᓯ ᑭ ᐃᑌᐤ, ᐅᑭᐢᑭᓄᐦᐊᒫᑫᐤ, ᑭᔮᒼ ᐃᑌᐧ. 41ᐯᔭᐠ ᐅᐟ ᐊᐃᐧᐃᐁᐧᐤ ᑭ ᐊᔮᐁᐧᐤ ᓂᓱ ᐁ ᒪᓯᓇᐦᐊᒫᑯᐟ: ᐯᔭᐠ ᑭ ᒪᓯᓇᐦᐊᒫᐠ ᓂᔭᓇᓈᐧᐤ ᒥᑖᑕᐦᑐᒥᑕᓇᐤ ᓱᓂᔮᓴ, ᐁᑯᓯ ᑯᑕᑲ ᓂᔮᓇᓄᒥᑕᓇᐤ. 42ᐃᐢᐱ ᒫᑲ ᐁᑳ ᐁ ᐊᔭᔨᐟ ᑭᑕ ᐅᐦᒋ ᑎᐸᐦᐃᑫᔨᐟ, ᐁᓯ ᓂᓯᔨᐟ ᑭ ᐳᓀᔨᑕᒪᐁᐧᐤ. ᑖᓈᓂᐃ ᒫᑲ ᐊᐊᐧᓯᒣ ᑫ ᓵᑭᐦᐃᑯᐟ? 43ᓴᐃᒪᐣ ᑭ ᓇᐢᑫᐧᐊᐧᓯᒣᐤ ᒥᓇ ᑭ ᐃᑌᐧᐤ, ᐊᓂᐦᐃ ᐁᑐᑫ, ᓇᐊᐧᐨ ᒥᐢᑕᐦᐃ ᑳ ᑭ ᐳᓀᔨᑕᒪᐋᐧᐟ, ᐁᑯᓯ ᐅᒥᓯ ᑭ ᐃᑌᐤ, ᑲᐧᔭᐢᐠ ᑳ ᐃᑌᔨᑕᒪᐣ. 44ᐁᑯᓯ ᐁ ᑫᐧᐢᑭᐢᑕᐋᐧᐟ ᐃᐢᑫᐧᐊᐧ, ᑭ ᐃᑌᐤ ᓴᐃᒪᓇ, ᑭ ᐋᐧᐸᒫᐤ ᒋ ᐊᐊᐧ ᐃᐢᑫᐧᐤ? ᓂ ᑭ ᐱᑐᑲᐣ ᑭᑭᕽ, ᓇᒪᐃᐧᔭ ᑭ ᑭ ᒥᔨᐣ ᓂᐱ ᓂᓯᑕ ᐅᐦᒋ: ᒫᑲ ᐃᐧᔭ ᑭ ᓵᐳᐸᑖᐤ ᓂᓯᑕ ᐅᐢᑭᓯᑳᐧᐳ ᐅᐦᒋ, ᐁᑯᓯ ᐁ ᑭ ᐹᑲᐧᐊᕽ ᐁᐧᐢᑕᑲᔭ ᐅᐦᒋ. 45ᓇᒪ ᑫᑲᐧᐩ ᐅᒉᑐᐃᐧᐣ ᑭ ᑭ ᒥᔨᐣ: ᒫᑲ ᐃᐧᔭ, ᐊᐢᐱᐣ ᑳ ᐯ ᐱᐦᑐᑫᔮᐣ, ᓇᒪᐃᐧᔭ ᐅᐦᒋ ᐳᓂ ᐅᒉᑕᒼ ᓂᓯᑕ. 46ᓂᐢᑎᑲᐧᐣ ᓇᒪᐃᐧᔭ ᐱᒥ ᑭ ᑭ ᐅᐦᒋ ᑐᒥᓀᐣ: ᒫᑲ ᐃᐧᔭ ᑭ ᑐᒥᓇᒼ ᓂᓯᑕ ᑕᒪᐢᑯᐃᐧᐣ ᐅᐦᒋ. 47ᐁᐊᐧᑯ ᐅᐦᒋ ᒫᑲ ᑭᐟ ᐃᑎᐣ, ᐅ ᒪᒋᐃᑎᐃᐧᓇ, ᑳ ᒥᐦᒉᑎᓂᔨᑭ, ᐳᓀᔨᑕᒪᐋᐧᐤ; ᐃᐧᔭ ᒥᐢᑕᐦᐃ ᐁ ᓵᑭᐦᐃᐁᐧᐟ: ᒫᑲ ᐊᓇ ᐊᐱᓯᐢ ᑳ ᐳᓀᔨᑕᒫᐟ, ᐊᐱᓯᐢ ᓵᑭᐦᐃᐁᐧᐤ. 48ᐁᑯᓯ ᑭ ᐃᑌᐤ, ᑭ ᒪᒋᐃᑎᐃᐧᓇ ᑭ ᐳᓀᔨᑕᒪᑲᐃᐧᐣ. 49ᐁᑯᓯ ᐊᓂᐦᐃ ᑳ ᐃᐧᒋ ᒥᒋᓱᒥᑯᐟ ᑭ ᒫᒋ ᐃᑌᐧᐊᐧᐠ, ᐊᐁᐧᓈᐊᐧ ᐊᐦᐳ ᑳ ᐳᓀᔨᑕᒫᑫᐟ ᒪᒋᐃᑎᐃᐧᓇ? 50ᑭ ᐃᑌᐤ ᒫᑲ ᐊᓂᐦᐃ ᐃᐢᑫᐧᐊᐧ, ᑭ ᑖᐯᐧᑕᒧᐃᐧᐣ ᑭ ᑭ ᐱᒫᒋᐃᑯᐣ; ᐯᔭᑕᑫᔨᒧᐃᐧᓂᕽ ᓯᐯᐧᐦᑌ.

Currently Selected:

ᓭᐣᐟ ᓬᐅᐠ 7: KKMs

Highlight

Copy