Чапарзабазул ишал 21

21 бетӏер

Павел Иерусалималде уна

1Гьезулгун къолъикӏги гьабун, гамида рекӏун ниж битӏун Кос чӏинкӏиллъиялдехун ралагьун ана. Нахъисеб къоялъ щвана Родосалде, гьениса Патараялде ана. 2Гьениб батана Финикиялдасахун ралъад къотӏун унеб гама. Гьелде рахана ниж. 3Кипр чӏинкӏиллъи бихьараб мехалъ, гьебги квегӏаб рахъалдехун тун, Сириялде ана ва Тиралда рещтӏана. Гамидаса юк бахъизе кколеб букӏана гьениб. 4Гьенир муридал ратун, гьезда аскӏоб цо анкь рехана. Илагьияб Рухӏалъ малъун, гьез Павелида абулеб букӏана Иерусалималде унгейилан. 5Гьеб нижер анкь индал, къватӏире рахъана ниж. Жидерго лъудбигун, лъималгун шагьаралдаса къватӏире ниж тӏоритӏизе рачӏана муридал, ва ралъдал рагӏалде щведал, нижеца суждаялда чӏун дугӏа гьабуна. 6Цоцазе къолъикӏги гьабун, нижги гамиде рахана, гьелги тӏадруссун ана.

7Тиралдаса рахъун арал нижер сапар Птолемаидаялда лъугӏана. Вацазе саламги кьун, гьезда цадахъ цо къо гьениб бана. 8Нахъисеб къоялъ лъелго сапаралде рахъун, Къайсарияталде щвана. Иерусалималда тӏаса вищун вукӏарав анкьгоясдасан цояв – Филипп – гьенив ватун, гьесда рещтӏана. Гьев вукӏана Рохалил хабар лъазабулев чи. 9Рос-рукъалде яхъинчӏей ункъо яс йигоан гьесул, ункъалъего Аллагьас кашпу-карамалъиги кьун бугоан. 10Гӏезегӏанго къоял рана гьенир нижеца.

Гьеб заманаялда Ягьудиялдаса Птолемаидаялде вачӏана кашпу-карамалъи бугев цо Агаб абулев чи. 11Нижехъе вачӏун Павелил рачелги босун, жиндирго бохдулги квералги рухьана гьес. Цинги абуна:

– Илагьияб Рухӏалъ абулеб буго гьаб рачелалъул бетӏергьан Иерусалималъул жугьутӏаз гьадин вухь-вухьун рехилин ва гьев мажусиязул квердеги кьелин абун.

12Гьеб рагӏидал нижги гьеб ракьалъул гӏадамалги Павелида гьардезе лъугьана Иерусалималде унгейилан. 13Гьебмехалъ Павелица нижеда абуна:

– Щай нуж гӏодулел? Щай нужеца дирги ракӏ бакъвазабулеб? Вухь-вухьун рехияли щиб гурин, Тӏадегӏанав Гӏисае гӏоло Иерусалималда хвезеги разияв вуго дун.

14Гьев мукӏур гьавизе кӏвечӏелъул, руцӏцӏун чӏана ниж Бетӏергьанас хъвараб лъугьинилан.

15Цо чанго къоялдасан къайи-цӏаги къачӏан, ниж Иерусалималде ине къватӏире рахъана. 16Къайсарияталдаса цо-цо муридалги рилълъана нижеда цадахъ. Гьез ниж щвезаруна тӏоцересел муридаздасан цоявлъун кколев Кипралдаса Мнасонил бакӏалде ва гьесда рещтӏана.

Павел Якъубгун дандчӏвала

17Иерусалималде щведал, вацал рохана ниж рачӏиналдаса. 18Нахъисеб къоялъ Павел, нижги рачун, Якъубил бакӏалде вилълъана. Гьенире рачӏана киналго диниял бутӏрул. 19Павелица гьезие салам кьуна ва жиндир ишалдалъун Аллагьас цогидал халкъазда гьоркьоб гьабунщиналъул хӏакъалъулъ щибго гьоркьоб течӏого мухӏканго бицана. 20Гьеб рагӏидал, киназго Аллагьасе рецц гьабуна. Цинги гьез Павелида абуна:

– Балагье, вац, гьанир жугьутӏазда гьоркьоса Гӏисаде иман лъурав аза-азар чи дудаго вихьизе. Гьез киназго кьуричӏого цӏунула Мусал къанунал. 21Дур хӏакъалъулъ гьазда бицун буго дуцадила, цогидал халкъазул ракьалда ругел жугьутӏазда абунги малъунги бугила Мусал диналъе хилиплъизе бегьулин, васазе сунат гьабичӏониги гӏолин ва нилъер гӏадатал цӏунизе кколарин. 22Гьанже щибха нилъеца гьабизе кколеб? Гьазда лъачӏого хутӏиларо мун вачӏун вугевлъи. 23Гьединлъидал цо нижеца малъараб жо гьабе дуца: гьанив нижеда гьоркьов вуго Аллагьасе назруялъул гӏадат цӏунун чӏарав ункъо чи. 24Гьелги цадахъ рачун ун, дуцаги тӏубазабе ботӏрол рас къунцӏизе гьезие изну щолеб рацӏцӏалъизариялъул гӏадат. Гьезие гӏологи гӏарац дуцаго кье. Гьебмехалъ киназдаго лъала дур хӏакъалъулъ бицунеб бугебщинаб мекъи букӏин, мунги Мусал къануналда рекъон хьвадулев чи вукӏин. 25Иманалде руссарал цогидал халкъазул рахъалъин абуни, нижеца хӏукмуги гьабун, гьезухъе кагъат битӏун инчӏищ гьересиаллагьзабазе къурбан гьабураб квенги кунгеян, биги гьекъогеян, гъанкъун хвезабураб хӏайваналъул гьанги кунгеян ва хъахӏбалъиги гьабугеян.

26Гьедин нахъисеб къоялъго гьев ункъавго чиги вачун ун, Павелица рацӏцӏалъизариялъул гӏадат тӏубазабуна. Цинги Мукъадасаб Рокъове лъугьун, гьес лъазабуна рацӏцӏалъиялъул болжал кида лъугӏизе бугебали. Гьеб болжал лъугӏараб къоялъ гьезул щивасдаса къурбан хъвезе кколаан.

Павел Мукъадасаб Рокъоса ккун вачун уна

27Гьеб иш лъугӏулеб бугеб мехалъ, Мукъадасаб Рокъов гьев вихьана Асиялдаса рачӏарал жугьутӏазда. Гьез халкъалда гьоркьоб багъа-бачари лъугьинабуна ва тӏад речӏчӏун Павелги ккуна.

28– Я, вацал жугьутӏал! – ан ахӏулеб букӏана гьез. – Кумек гьабе нижее. Гьас киса-кирего гӏадамал тӏамулел руго нилъер халкъалдаги, нилъер къануналдаги, нилъер хирияб гьаб рукъалдаги дандечӏезе. Хӏатта гьес, грекалги жанире рачун, нилъер гьаб хирияб бакӏ хъублъизабуна.

29Гьедин абиялъе гӏиллаги букӏана: Эфесалдаса Трофим вихьун вукӏун вуго гьезда дагьав цевегӏан шагьаралъул къотӏносан Павелида цадахъ унев. Гьев Трофим жиндаго цадахъ Мукъадасаб Рокъовеги вачун вукӏун ватилилан ккун буго гьезда.

30Тӏолабго шагьаралда багъа-бачари лъугьана. Кисанго рекерун рачӏун гӏадамазул кӏудияб руккел лъугьана. Кквезеги ккун, гьез Павел Мукъадасаб Рокъоса къватӏиве вехъерхъана, ва гьебсагӏат кавуги рахана.

31Гьез Павел чӏвазехъин вугеб мехалъ, рагъухъабазул азарилбетӏерасда рагӏана тӏолабго Иерусалималда гъалмагъир ккун бугилан. 32Гьебсагӏат гьев, рагъухъабиги нусилбутӏрулги рачун, гьениве вортана. Азарилбетӏерги рагъухъабиги рачӏунел рихьун, Павел вухулел рукӏарал гӏадамаз гьев живго тана. 33Гьебмехалъ аскӏове ун, азарилбетӏерас Павел нахъе вачана, кӏиго рахасги бан вухьейилан буюрухъ кьуна. Цинги гьел гӏадамазда гьикъана гьав щивилан, гьас гьабураб щибилан. 34Гьеб халкъалъул руккалилъ цояс гьадин ахӏун, цояс додин ахӏун, гьезул хъуй-хъаялъ щиб-кин ккарабали бичӏчӏизе кӏвечӏеб мехалъ, азарилбетӏерас буюрухъ кьуна Павел хъалаялъуве вачейилан. 35Болъодухъа тӏаде Павел вачунаго, тӏаде гурун бачӏараб халкъалъул руккелалдаса цӏунизе, рагъухъабаз кодов ккун восизе ккана гьев. 36Хадур лъугьун гӏемерал гӏадамаз ахӏулеб букӏана гьев тӏагӏинавизе кколилан.

Павелица жиндаго гӏайиб гьечӏолъи чӏезабула

37Хъалаялъул кавудухъе щведал, Павелица азарилбетӏерасда абуна цо кӏалъазе бегьилищилан.

– Дуда греказул мацӏищ лъалеб? – ан гьикъана гьес. 38– Дагьаб цебегӏан гъалмагъирги багъаризабун, ункъазарго хъачагъгун авлахъалде лъутун арав Мисриялдаса чи гуревищха мун?

39Павелица абуна:

– Дун вуго Киликиялъул Тарсалдаса жугьутӏав, гьеб машгьураб шагьаралъул гражданин. Гьаб халкъалдехун хитӏаб гьабун, цо кӏалъазе изну кьейилан гьарулеб буго дица дуда.

40Гьебмехалъ изну кьедал, болъодул хӏокӏида чӏун, кверги борхун, халкъалдехун вуссана Павел. Киналго гӏадамал сихӏкъотӏун чӏараб мехалъ, жугьутӏ мацӏалда кӏалъазе байбихьана гьес.

Currently Selected:

Чапарзабазул ишал 21: AvrNT

Highlight

Copy