Чапарзабазул ишал 23
23
23 бетӏер
1Кӏудияб судалъул гӏадамазда берги речӏчӏизабун, Павелица абуна:
– Я, дир вацал! Жакъа къоялде щвезегӏан дица Аллагьасда цебе ракӏбацӏцӏадго гӏумру гьабуна ва кидаго гьабичӏо ритӏухъаб гурони иш.
2Гьеб рагӏидал кӏудияв кашиш Ананияца аскӏор рукӏаразе амру гьабуна гьесул кӏал бухейилан. 3Павелица гьесда абуна:
– Аллагьас вухила мун, хъахӏракьалъ бохьараб къед! Мун гьанив гӏодов чӏун вуго къануналда рекъон дие суд гьабизе. Дуцайин абуни, къанунги хвезабун, буюрухъ кьолеб буго дун вухейилан.
4Аскӏор рукӏараз гьесда абуна Аллагьасул кӏудияв кашиш къабихӏ гьавулев вугин дуцайилан. 5Гьебмехалъ Павелица абуна:
– Я, вацал! Гьав чи кӏудияв кашиш вукӏин лъачӏо дида, Илагьиял Тӏухьдузда хъван бугелъул: «Дурго халкъалъул бетӏерасул хӏакъалъулъ квешаб рагӏи абуге», – ян.
6Гьенир ругезда гьоркьор саддукеялги фарисеялги рукӏин лъараб мехалъ, ахӏунго-ахӏун абуна Павелица:
– Я, вацал! Дун вуго фарисеясул вас фарисеяв. Судалдеги дун вачун вуго къиямасеб къоялъ хварал тӏаде рахъинаризе рукӏиналде хьул лъурав чи вугелъул.
7Гьес гьедин абидал, саддукеяздаги фарисеяздаги гьоркьоб дагӏба ккун, цоцалъ рана судиял. 8(Саддукеял божулароан я къиямасеб къоялъ хварал тӏаде рахъинаризе рукӏиналда, я малаикзабазда, я жундузда. Фарисеялин абуни гьеб киналдаго божулаан.) 9Кӏудияб ахӏи-хӏур багъарана гьениб. Тӏаде рахъун фарисеязул цо-цо диниял гӏалимзаби чӏчӏичӏчӏидизе лъугьана:
– Гьав чиясулъ щибниги квешлъи бихьулеб гьечӏо нижеда. Щиб лъалеб, рухӏ яги малаик батила гьесда кӏалъан?
10Гьезул дагӏба-рагӏи гӏорхъулъа индал, гьез Павел тӏутӏун вазе гурилан хӏинкъун, азарилбетӏерас рагъухъабазе буюрухъ кьуна гъоркье рачӏун гьев нахъе вачейилан ва хъалаялъуве щвезавейилан.
11Нахъисеб сордоялъ вачӏун, Тӏадегӏанав Гӏисаца Павелида абуна:
– Мун къуркьуге! Иерусалималдаго гӏадин, Рималдаги гьабизе ккезе буго дуца дие нугӏлъи.
Жугьутӏаз къотӏи гьабула Павел чӏвазе
12Нахъисеб къоялъ цо-цо жугьутӏаз гьедун къотӏи гьабуна Павел чӏвазегӏан жал я кваналарин, я гьекъеларин. 13Гьедин Павелида дандечӏаразул вукӏана кӏикъогоялдаса цӏикӏкӏарав чи. 14Чӏахӏиял кашишзабазда ва чӏухӏби-хӏакимзабазда аскӏоре ун, гьез абуна:
– Павел чӏвазегӏан я кваналарилан, я гьекъеларилан гьедун руго ниж. 15Нужецаги нужер судалъги азарилбетӏерасда лъазабе гьеб ишалъул мухӏканаб цӏех-рех гьабизе бокьун бугин, Павел нужехъе вачейилан. Цинги гьаниве вачунаго нухда чӏвала нижеца гьев.
16Гьеб хиянаталъул хабар лъан, Павелил яцалъул вас хъалаялъуве ана ва кинабго Павелида бицана. 17Гьебмехалъ аскӏове ахӏун гьес цо нусилбетӏерасда абуна гьав гӏолохъанчи азарилбетӏерасухъе вачейилан, досда бицине цо хабар бугин гьасулилан. 18Гьев гӏолохъанчиги азарилбетӏерасухъе щвезавун, гьес досда абуна:
– Туснахъалъув вугев Павелица аскӏове ахӏун гьарана дида гьав гӏолохъанчи духъе щвезавейилан, дуда бицине цо хабар бугин гьасулилан.
19Кверги ккун довегӏан вачун, азарилбетӏерас гьев гӏолохъанчиясда гьикъана дида щиб бицине дуе бокьун бугебилан. 20Гьес бицана:
– Жугьутӏаз къотӏи гьабун буго, мухӏканаб цӏех-рехалъе къваригӏун вугиланги абун, метер Павел кӏудияб судалде вачине виччайилан дуда гьаризе. 21Дуца гьезул гьариялъухъ гӏин тӏамуге. Кӏикъогоялдаса цӏикӏкӏарав чи къачӏан чӏун вуго гьев чӏвазе гъоркьчӏелги гьабун. Гьев чӏвачӏого я кваналарин, я гьекъеларин гьедун руго гьел. Гьел ралагьун чӏун руго дуца Павел судалде витӏиялъухъ.
22Гьелъул хӏакъалъулъ лъиданиги хӏухь бахъугейиланги лъазабун, азарилбетӏерас нахъе витӏана гьев гӏолохъанчи.
Павел витӏула Феликс сардарасухъе
23Цинги кӏиго нусилбетӏерги аскӏове ахӏун, азарилбетӏерас гьезда абуна:
– Кӏинусго рагъухъангун, гьединго лъабкъоялда анцӏго рекӏаравгун ва хеч кодоб бугев кӏинусго аскариявгун цадахъ Къайсарияталде ине къачӏай. Нуж къватӏире рахъине ккола къаси сагӏат ичӏго тӏубарабго. 24Павел рекӏине чуялги къачӏай. Нухда щибго зарал-зиян ккезе течӏого, Феликс сардарасухъе щвезаве гьев.
25Цинги гьес гьадинаб кагъат хъвана: 26«Хӏурмат тӏадегӏанав сардар Феликсиде салам буго Клавдий Лисийил рахъалдасан. 27Гьав чи жугьутӏаз, ккун вачун, чӏвазехъин вукӏана. Рималъул гражданин вукӏин лъайдал, рагъухъабиги рачун ун, дица гьав хвалдаса хвасар гьавуна. 28Гьасда бугеб гӏайиб-хатӏа лъазе гӏоло дица гьав гьезул кӏудияб судалде вачана. 29Гьениб дие баянлъана гьасде гьез гӏунтӏизабулеб тӏолабго гӏайиб гьезул жидерго къануналда хурхараб букӏин, амма я чӏвазе, яги туснахъалъув тӏамизе гӏураб гӏайиб гьасда тӏад чӏечӏо. 30Гьанже гьав чи чӏвазе гьез гъоркьчӏел гьабун бугилан абидал, дица гьав духъе витӏулев вуго ва гьасда дандечӏаразеги амру гьабуна гьасдасан бугеб гӏарзалъ духъе айилан».
31Буюрухъ тӏубазабун, рагъухъабаз Павел гьеб сордоялъго Антипатридаялде вачана. 32Нахъисеб къоялъ рекӏарал ана Павелги вачун Къайсарияталде, цогидал рагъухъаби хъалаялъуре тӏадруссана.
33Къайсарияталде щведал, Павел вачун рачӏарал рагъухъабаз Павелги гьесул хӏакъалъулъ хъвараб кагъатги сардарасухъе кьуна. 34Кагъат цӏалун бахъарабго, Феликсица гьикъана Павел щиб вилаяталъул чийилан. Гьев Киликиялдаса вукӏин лъайдал, 35Феликсица абуна:
– Дуде гӏайиб гӏунтӏизабурал гӏадамал тӏаде щвараб мехалъ гӏенеккила дун духъ, – абун.
Цинги гьес буюрухъ кьуна, хъаравуллъиги чӏезабун, Павел Гьеродил кӏалгӏаялъув тейилан.
Currently Selected:
Чапарзабазул ишал 23: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008
