Чапарзабазул ишал 25

25 бетӏер

«Къайсар вукӏине виччай дие къадилъун»

1Гьеб вилаяталде сардарлъун тӏамун вачӏун лъабабилеб къоялъ Къайсарияталдаса Иерусалималде ана Фест. 2Гьесухъе рачӏун бищунго кӏудияв кашишасги ягьудиязул чӏухӏби-хӏакимзабазги Павелидасан гӏарз бахъана. 3Гьез гьарана, жидее лъикӏлъи гьабун, Павел Иерусалималде вачӏинавейилан. Гьезул къотӏи букӏана гьениве вачунаго нухда Павел чӏвазе. 4Фестица абуна Павел Къайсарияталда туснахъалъув вугилан, гьанже кватӏичӏого жинда гьениве ине ракӏалдаги бугилан. 5Нужер вакилзабиги рилълъине бегьилила жинда цадахъ, гьев Павелида гӏайиб бугеб батани, гьелъул хӏакъикъат баян гьабизе.

6Иерусалималда ичӏго-анцӏго къогицин бачӏого, Къайсарияталде тӏадвуссун ана Фест. Гьениве щун кӏиабилеб къоялъго, къадиясул тахида гӏодовги чӏун, гьес амру гьабуна Павел гьаниве вачейилан. 7Павел вачун вачӏана. Иерусалималдаса рачӏарал ягьудияз, гьевги сверун ккун, байбихьана гӏемерал чӏахӏиял гӏайибал гьесде гӏунтӏизаризе. Амма цониги гӏайиб тӏад чӏезабизе гӏураб хӏужжа гьезда батулеб букӏинчӏо. 8Живго витӏарав вукӏин чӏезабизе Павелица абуна я жугьутӏазул къануналда, я Мукъадасаб Рокъов, яги къайсарасда дандечӏун щибниги мунагь ккечӏин жиндихъайилан. 9Амма Фестие бокьун букӏана жугьутӏал рази гьаризе. Гьединлъидал гьес Павелида гьикъана:

– Дур ишалда хурхун дунги гӏахьаллъараб судалъ хӏукму гьабизе Иерусалималде витӏизе бокьилищ дуе?

10Павелица абуна:

– Жакъа дун гьанив къайсарасул судалда цеве чӏун вуго, гьединаб къайсарасулаб судалъ къотӏизе ккола дие хӏукмуги. Жугьутӏазе дица щибниги квешлъи гьабичӏо. Дудаги цӏакъ лъикӏ лъала гьеб. 11Дун такъсирчи ватани ва чӏвазе къотӏизе гӏураб гӏайибги дида ккун батани, хвезе разияв вуго дун. Амма гьаз диде гӏунтӏизабулеб бугеб гӏайиб тӏад чӏезабизе кӏвечӏони, лъилниги ихтияр гьечӏо дун гьезул кверде кьезе. Къайсар вукӏине виччай дие къадилъун!#25:11 Рималъул гражданасул ихтияр букӏана живго къайсарас гьабейин дие судилан чӏезе.

12Жиндирго мажлисалда дандги бан, Фестица Павелида абуна:

– Къайсар къадилъун вукӏине бокьун батани, къайсарасухъе витӏила дица мун.

Павел Агриппадаги Береникадаги цеве чӏезе ккола

13Чанго къоялдасан Къайсарияталде Фестие салам кьезе рачӏана Агриппа ханги гьесул чӏужу Береникаги. 14Гьез гьениб чанго къо бан хадуб, Фестица ханасе Павелил бицен гьабуна:

– Феликсица туснахъалъув тун цо чи вуго гьанив. 15Дун Иерусалималде щвараб мехалъ, ягьудиязул чӏухӏби-хӏакимзабазги чӏахӏиял кашишзабазги бицана дида гьасул хӏакъалъулъ, гьез гьарана гьасие тамихӏалъе хӏукму къотӏейилан. 16Амма дица гьезда абуна, жинде гӏайиб гӏунтӏизабулевги жинца гӏайиб гӏунтӏизабулевги данде ахӏун ва жинде гӏайиб гӏунтӏизабулесе живго цӏунизе ресги кьун, суд гьабичӏого чи тамихӏалде цӏалеб гӏадат гьечӏин Рималъул халкъалъулилан. 17Дида цадахъ гьел ягьудиял гьанире рачӏун нахъисеб къоялъго, нахъ бахъун течӏого, дун къадиясул тахида гӏодов чӏана ва гьев чи судалде вачейилан амру гьабуна. 18Амма ягьудияз бицараб жоялдасан дида бичӏчӏана – дун щаклъун вукӏараб цониги квешлъи гьев чияс гьабун гьечӏеблъи. 19Амма гьезул бугоан жидерго диналда хурхараб дагӏба-къец. Павелица чӏаго вугилан чӏезабулеб букӏарав, цо кидаялиго хварав кинавалиго Гӏисал хӏакъалъулъги букӏана гьезул дагӏба. 20Гьеб иш кин тӏубалебали лъачӏого, дица гьесда гьикъана, Иерусалималде витӏун, гьенив судалда цеве чӏезе бокьилищилан. 21Императорас суд гьабизегӏан гьанивго тейилан Павелица гьаридал, дица гьев Къайсарияталдаго тана, къайсарасухъе витӏизе рес ккезегӏан.

22Гьев чиясухъ гӏенеккизе диеги бокьилаанилан абуна Агриппаца Фестида. Фестица абуна метер рагӏилин дуда гьес щиб бицунаяли. 23Нахъисеб къоялъ чӏухӏараб къагӏидаялъ къачӏа-кӏатӏан Агриппаги, Береникаги, азарилбутӏрулги ва шагьаралъул чӏухӏби-хӏакимзабиги цадахъ рачун, суд гьабулеб рокъове лъугьун гӏодов чӏедал, Фестица амру гьабуна Павел вачун рачӏайилан. 24Цинги Фестица абуна:

– Я, Агриппа хан ва гьанир ругел цогидалги! Нужеда цеве вугев гьав чиясдасан гӏарз бачӏун буго Иерусалималда ругелги гьанир ругелги жугьутӏазул тӏолабго жамагӏаталъ. Гьав чӏаго тезе бегьуларилангицин ахӏулеб букӏана гьез. 25Дида ракӏалде ккола чӏвазе къотӏизе гӏураб гӏайиб гьасул гьечӏилан. Къайсарасул судалде витӏейилан гьарулеб бугелъул, дица хӏукму гьабуна гьав гьениве витӏизе. 26Амма гьасул хӏакъалъулъ щибилан бетӏерчӏахъаяв къайсарасухъе хъвалебали лъаларо. Гьединлъидал дица гьав гьаниве вачана нуж киназдаго цеве чӏезе, хасго дуда цеве чӏезе, Агриппа хан. Гьаниб цӏех-рехалдасан баянлъизеги бегьула къайсарасухъе щиб хъвалебали. 27Тӏад чӏезабураб гӏайиб бихьизабичӏого, туснахъ къайсарасухъе витӏизе рекъон букӏинарилан кколеб буго дида.

Currently Selected:

Чапарзабазул ишал 25: AvrNT

Highlight

Copy