Чапарзабазул ишал 7
7
7 бетӏер
Стефаница бицуна жиндирго иманалъул хӏакъалъулъ
1Бищунго кӏудияв кашишас Стефанида гьикъана гьеб битӏараб бугищилан. 2Гьес жаваб кьуна:
– Я, дир вацалги умумулги! Дихъ гӏенекке нуж. Харраналде гочиналдего, гьев жеги Месопотамиялдаго вугеб мехалъ, нилъер кӏудияв эмен Ибрагьимие загьирлъун, Къудратав Аллагьас абуна: 3«Дурго росу-ракьги рехун тун, гӏага-божаралги тун, мун а дица бихьизабизе бугеб ракьалде». 4Гьебмехалъ Ибрагьим, халдеязул ракьалдаса Харраналде гочун, гьенив чӏана. Цинги гьесул эмен хун хадув Аллагьас гьев гочинавуна гьаб нужеца яшав гьабун бугеб ракьалде. 5Гьаб ракьалъул цохӏо хӏетӏе чӏарабги бакӏалъул бетӏергьанлъун гьавичӏо Аллагьас Ибрагьим. Добмехалъ гьесул лъимер-бетӏер букӏинчӏониги, Бетӏергьанас Ибрагьимие къотӏи гьабуна гьесиеги гьесул наслу-тухумалъеги мулклъун кьелин гьаб ракьилан. 6Аллагьас цоги абуна гьесул наслуялъул гӏадамал чияр ракьалда апарагзабилъун рукӏине ругин, чияр лагълъиялда гъоркь гӏакъуба-къварилъиялда хутӏизе ругин ункънусго соналъ. 7Амма гьеб наслу лагълъиялде ккезабураб халкъалъе жинца жаза гьабизе бугиланги абуна Аллагьас. Гьелдаса хадуб доб ракьалдаса нахъе ун, гьаб ракьалде рачӏинин ва гьаниб жиндие гӏибадат гьабилиланги абуна.
8Цинги гьеб къотӏи тӏубазе букӏиналъул гӏаламатлъун сунат гьабизеги тӏадлъуна Аллагьас. Гьединлъидал, Ибрагьимие Исхӏакъ гьавураб мехалъ, гьавун микьабилеб къоялъ гьесие сунат гьабуна. Исхӏакъие Якъуб гьавуна, Якъубиеги гьавуна анцӏила кӏиго вас – анцӏила кӏиго наслуялъул бетӏер. 9Вацазул жахӏда бергьун гьез Юсуп Мисриялде лагълъун вичана. Амма Аллагьас гьев рехун течӏо, 10кинабго къварилъи-гӏазабалдаса ворчӏизавуна. Мисриялъул пиргӏавнасдаги бихьизабуна Юсупилъ баркатги гӏакъиллъиги букӏин. Пиргӏавнас гьесухъе кьуна тӏолабго Мисриялъулги жиндирго рукъалъулги кверщел. 11Мисриялда ва Кангӏаналда, кутакалда ракъи багъарун, кӏудияб къварилъи букӏана. Кваназе жо гьечӏого хутӏана нилъер умумулги. 12Мисриялда хӏалухъадул нахърател бугилан рагӏун, Якъубица васал – нилъер умумул – ритӏана гьенире. (Гьеб букӏана Мисриялде гьезул тӏоцебесеб сапар.) 13Кӏиабизеги вацал Мисриялде рачӏараб мехалъ Юсупица бицана гьезда жив щивали, гьедин пиргӏавнасдаги лъана лъил наслуялъул чи Юсуп вугевали. 14Цинги Юсупица, хадур чагӏиги ритӏун, эменги гьесул хъизан-агьлуги – кинавниги лъабкъоялда анцӏила щуго чи – жиндихъего ахӏана. 15Гьедин Якъуб Мисриялде гочана, гьевги цогидал нилъер умумулги гьенир хвана. 16Цӏидасан рукъизе гьезул жаназаби Сихемалде росана, гьениб Сихемалдаса Эмморил лъималазухъа Ибрагьимица гӏарцухъ бичун босун букӏараб хобалъур лъуна.
17Аллагьас Ибрагьимие къотӏи гьабун букӏараб болжал гӏагарлъанагӏан Мисриялда нилъер халкъ цӏикӏкӏана, гӏемерлъана. 18Гьеб заманаялда Мисриялъул парччахӏлъун ккана Юсуп жинда лъаларев чи. 19Гьес нилъер халкъ сихӏру-хӏиллаялдалъун къварид гьабизе байбихьана, нилъер умумузе гӏакъуба кьуна, гьарурал лъимал, тӏалабго гьабичӏого, хвезе теян лъазабуна. 20Гьебмехалъ гьавуна Муса. Аллагьас берцинлъи кьун букӏана гьесие. Лъабго моцӏалъ эбел-инсуца тӏалаб гьабуна гьесул. 21Цинги нахъе рехидал, пиргӏавнасул ясалъ гьев жиндиего вачана, вас гӏадин хьихьана. 22Мисриялъул халкъалъул гӏелму-гӏакълу босарав чилъун лъугьана Муса, бицунеб рагӏулъги гьабулеб ишалъулъги къудрат бугев вукӏана. 23Кӏикъого соналде вахараб мехалъ гьесда ракӏалде ккана жиндирго вацал – жугьутӏал кин ругелали ваккизе ине. 24Къибтӏияс цо жугьутӏав вухулев ватун, гьесие хӏалае вахъана Муса. Кьабураб жоялъ Мусаца чӏвана гьев къибтӏияв. 25Гьесда ккун букӏана жугьутӏазда бичӏчӏилин жив гьел хвасар гьаризе Аллагьас витӏарав чи вукӏин. Амма гьезда бичӏчӏичӏо.
26Нахъисеб къоялъ Мусада кӏиго жугьутӏав ватана цоцалъ вагъулев. «Нужни вацал ругин, щай цоцалъ рагъулел ругел?» – ан абуна гьес гьезда. 27-28«Нижее ханлъи гьабизеги суд гьабизеги мун лъица тарав чи? Сон къибтӏияв чӏварав гӏадин, жакъа дунги чӏвазе бокьунищ бугеб?» – ан нахъе тункана Муса рагъулел рукӏаразул цояс. 29Гьел рагӏаби сабаблъун Муса Мисриялдаса лъутун ана ва Мадгӏаналъул ракьалда апараглъун чӏана. Гьенив кӏиго васасул эменлъун вахъана гьев.
30Кӏикъого соналдасан Синай магӏарда аскӏоб бугеб цо гӏицӏаб авлахъалда бухӏулеб бугеб хъархъил цӏадулъан Аллагьасул малаик рещтӏана гьесухъе. 31Гӏажаиблъун валагьун хутӏана Муса. Лъикӏго хал-шал гьабизе гьеб хъархъида аскӏове индал, Мусада рагӏана Бетӏергьанасул гьаракь: 32«Дун вуго дур умумузул: Ибрагьимилги, Исхӏакъилги, Якъубилги Аллагь». Нусабго лага сорон, гьеб хъарахъалъухъ валагьизе хӏинкъана Муса. 33Бетӏергьанас гьесда абуна: «Дуца хьитал рахъе. Цӏакъ хирияб ракьалда хӏетӏе чӏолеб буго дуца. 34Дида якъинго бихьана Мисриялда дир халкъ къварилъиялда букӏин. Дида рагӏана гьезул угьди-зигарди. Гьел хвасар гьаризе рещтӏана дун. Гьанже а дурго, дица Мисриялде витӏизе вугин мун!» 35Нижее ханлъи гьабизеги суд гьабизеги мун лъица тарав чийилан абун жугьутӏаз жиндаса инкар гьабурав гьев Муса, хъархъилъан гьесухъе рещтӏарав малаикасдалъун Аллагьас витӏана гьезие ханлъи гьабизеги, гьел хвасар гьаризеги.
36Мисриялъул ракьалдаса къватӏиреги лъугьинарун, Багӏараб ралъдал рагӏалдаги гӏицӏаб авлахъалдаги гӏаламаталги мугӏжизаталги рихьизарун, гьев Мусаца жугьутӏал кӏикъого соналъ жиндаго хадур рачана. 37Гьев Мусацайин Исраилил наслуялда гьадин абун букӏараб: «Аллагьас нужее дун гӏадинав авараглъун вахъинавила нужер вацазда гьоркьоса чи». 38Гьев Мусайин вукӏарав гӏицӏаб авлахъалде данделъараб Исраилил халкъалда цадахъ. Гьенир Мусада цадахъ рукӏана нилъер умумулги ва Синай магӏарда гьесда кӏалъарав малаикги. Нилъее кьезелъун Аллагьас гьесде рещтӏана жакъаги цере ругел амруял. 39Амма нилъер умумузе бокьичӏо гьел амруял тӏуразаризе. Мусаги нахъе цун, гьезул ракӏал Мисриялдехун руссана. 40Гьез Гьарунида абуна: «Нилъ гьаниса нахъе рачине кӏолел аллагьзаби гьаре дуца нилъее. Нилъ Мисриялдаса гьанире рачарав гьадав Мусалги щиб ккарабали лъалеб гьечӏо нижеда». 41Гьебмехалъ, бачил сурат гьабун, гьелъие къурбанал хъуна. Жидерго квералъ гьавурав гьев «аллагьасдаса» рохун рукӏана.
42Аллагьас гьездехун мугъ рехана, цӏвабзазе лагълъи гьабизе тана, Аварагзабазул Тӏехьалда бугелъулха гьадинаб калима: «Я, Исраилил наслу! Гӏицӏаб авлахъалда кӏикъого соналъ дие гуро нужеца къурбанал хъурал! 43Нужеца цадахъ босана Молех-аллагьасул чадир ва нужер Рефан-цӏва абулев „аллагь“ – сужда-тӏагӏаталъе нужецаго гьарурал суратал. Гьединлъидал дица нуж Вавилоналъул гӏорхъи бахун нахъе гочинарила». 44Добмехалъ гӏицӏаб авлахъалда нилъер умумузул букӏана Аллагь жидеда цадахъ вукӏиналъул магӏна жиндилъ бугеб чадир. Гьеб гьабун букӏана Мусада кӏалъарав малаикас гьесда бихьизабуралъул сураталда. 45Гьеб чадир нилъер умумузе ирсалъе щвана Навин Гӏисал бетӏерлъиялда гочунаго, гьез гьеб цадахъ босана, гьел тӏаде щолаго Аллагьас нахъе лъутизарурал къавмазул ракьалдеги. Гьеб кинабго лъугьана Давуд вахъиналде.
46Давудида Аллагьасул цӏоб лъуна. Гьес Бетӏергьанасда гьарана Якъубил Аллагьасе рукъ базе бегьиларищилан. 47Гьеб рукъ барав чи Сулайман аварагин кколев. 48Амма инсанасул квералъ рарал рукъзабахъ Тӏадегӏанав Аллагьас яшав гьабуларо. Гьелъул хӏакъалъулъ цо аварагас гьадин абун буго: 49«Дир тах зобалазда буго. Ракь Дир хӏатӏазукь буго. Кинаб рукъ нужеца Дие балеб? – ан абуна Бетӏергьанас. – Яги Дие рахӏат-хӏалхьиялъе кинаб бакӏ нужеца балеб? 50Гьеб кинабго Дица бижараб гурищ?»
51Хъабаналъгӏанги габур кьуризабуларел нужеца сунат гьабуни щиб, ракӏги гӏундулги рукӏухъего хутӏун ругелъул? Нужер умумулго гӏадин, нужги кидаго Илагьияб Рухӏалда дандечӏун руго. 52Нужер умумуз гӏазаб-гӏакъуба кьечӏев цониги авараг хутӏаравищ? Гьез чӏвана Аллагьасул вакил вачӏине вугилан цебеккунго жидеца лъазабуралги. Гьанже нужгоги лъугьана гьев вакиласе хиянат гьабурал ва гьев чӏварал чагӏилъун. 53Малаикзабазул кумекалдалъун нужехъе бачӏана Аллагьасул къанун, амма нужеца гьеб цӏуничӏо!
Стефанида ганчӏал речӏчӏула
54Гьеб калам рагӏидал гьезул рекӏелъ ццин гьалаглъана ва гьесде цаби къерщезаризе лъугьана. 55Илагьияб Рухӏалъ цӏурав Стефаница берал зобалазде руссинаруна. Гьесда бихьана Аллагьасул нурги ва гьесул кваранаб рахъалда чӏун Гӏисаги. 56Гьес абуна:
– Гьале дида зобал ричӏун рихьулел руго ва гьенив Аллагьасул кваранаб рахъалда чӏун Гӏадамил Лъимерги вихьулев вуго! – ян.
57Гьебмехалъ гьел чӏчӏичӏчӏидизе лъугьана ва гӏинзунир килщал къазаруна. Цинги цадахъго тӏадречӏчӏун гьев гӏодов ккезавуна, 58шагьаралдаса къватӏивеги рехун, ганчӏал речӏчӏун чӏвана.
Гьенир рукӏарал гӏадамаз жидерго гӏабаби Шаул абун цӏар бугев цо гӏолохъанчиясда цере лъун тана. 59Гьез ганчӏал речӏчӏун чӏвалеб мехалъ, Аллагьасул цӏар рехсон, Стефаница гьарана:
– Я, Тӏадегӏанав Гӏиса! Дир рухӏ къабул гьабе! – ян.
60Цинги, кӏиябго накуги гӏодоб чӏван, гьес ахӏана:
– Я, Бетӏергьан! Гьазие мунагьлъун хъваге гьаб иш! – абун.
Гьебмехалъ Стефанил рухӏ босун ана.
Currently Selected:
Чапарзабазул ишал 7: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008
