Иоанница бицараб Рохалил хабар 15

15 бетӏер

Цӏолбол гъабуялъул мисал

1Гӏисаца абуна:

– Хӏакълъунго дун ккола цӏолбол гъабу. Дир Эменги ккола ахикь гьеб чӏарав ахихъан. 2Тӏад цӏибил бижуларел дир чӏорал гьес къунцӏун нахъе рехула. Цӏибил бижулел чӏорал гьес кӏурула, гьезда тӏад дагьабги цӏикӏкӏун цӏибил бижизе. 3Дица нужеда абураб рагӏудалъун нуж рацӏцӏалъун руго. 4Нуж дилъ рукӏа, дун нужелъги вукӏина. Гъабудаса къунцӏараб чӏоралда цӏибил бижулареб гӏадин, дилъ рукӏинчӏони, нужедасаги щибго пайда букӏинаро. 5Дун ккола цӏолбол гъабу, нуж ккола гьелъул чӏорал. Гьев чи дилъ вугони, дун гьесулъги вугони, гьеб чӏоралда тӏад гӏемераб цӏибил бижила. Дидаса ратӏалъун нужеда щибниги гьабизе кӏоларелъул. 6Амма гьев чи дилъ гьечӏони, цӏолбол гъабуялдаса къунцӏараб чӏор гӏадин, нахъе рехула гьев. Ахикьа ракӏарун цӏадаре ран рухӏула гьединал чӏорал. 7Нуж дилъ ругони, дир рагӏабиги нужелъ хутӏани, гьебмехалъ нужеца гьарарабщинаб лъугьина. 8Лъикӏаб гъабуда цӏибил цӏикӏкӏун бижулеб гӏадин, нужедаса пайдаги цӏикӏкӏани ва нуж дир унго-унгоял муридаллъунги ругони, дир Инсул машгьурлъи цӏикӏкӏина. 9Инсуе дун вокьулев гӏадин, дие нужги рокьула. Нужеде бугеб дир рокьи тӏезе биччаге нужеца. 10Дирго Инсул амру дица тӏубазабидал, гьесул рокьи дидаса тӏолеб гьечӏеб гӏадин, дир амру нужеца тӏубазабуни, дир рокьиги тӏезе гьечӏо нужедаса. 11Дица гьаб кинабго нужеда бицунеб буго, дир бугеб рохел кидаго нужераблъун хутӏизе ва нужер рохел киданиги тӏаса камунгутӏизе. 12Гьале нужее дир амру: дие нуж рокьулел гӏадин, рокье нуж цоцазеги. 13Гьудулзабазе гӏоло жиндирго рухӏ кьолев чиясулалдаса кӏудияб рокьи букӏунаро ракьалда. 14Дир амруял нужеца тӏуразаруни, нуж дир гьудулзаби руго. 15Дица тӏокӏаб нужеда лагъзалилан абиларо, лагъасда лъаларелъул гьесул бетӏергьанас щиб гьабулеб бугебали. Дица нужеда гьудулзабийилан абулеб буго, дир Инсудасан рагӏарабщинаб дица нужеда лъазабидал. 16Дун нужеца тӏаса вищичӏо, дица нуж тӏаса рищана ва ритӏана, гъабул чӏоралда тӏад цӏибил гӏадин, пайда цӏикӏкӏинабизеги, гьеб абадиялъго хутӏизеги, дир цӏар рехсон гьарарабщинаб дир Инсуца нужее кьезеги. 17Гьале нужее дир амру: цоцазе рокьа нуж.

Гӏисаги гьесул муридалги щай гӏаламалда рихун ругел?

18Гӏаламалда нуж рихани, нужеда ракӏалде щва нужедасаги цеве дун гьезда рихун вукӏаравлъи. 19Гьаб гӏаламалда релълъарал нуж рукӏаралани, нилъерго чагӏийин абун рокьилаан нужги гьезие. Гьезие нуж рокьуларо, гьезда релълъаралги гьечӏелъул ва дица нуж гьезда гъорлъа тӏаса рищунги ругелъул. 20Жиндирго бетӏергьанасдаса лагъ тӏадегӏанав вукӏунарилан дица абун букӏараб ракӏалда бугищ нужеда? Дие гӏазаб-гӏакъуба кьураб гӏадин, нужееги кьела. Дихъ гӏенеккарал гӏадин, нужехъги гӏенеккила. 21Гьеб кинабго гӏазаб-гӏакъуба дир цӏар сабаблъун гьабила нужее, гьезда лъалев гьечӏелъул дун витӏарав Аллагь. 22Вачӏун дица гьезда бицун букӏинчӏебани, гьезие мунагь букӏинароан, гьанже жидерго мунагь бахчизе гӏилла-сабаб батиларо гьезда. 23Дун рихарасда дир Эменги рихина. 24Цогидаздасан киданиги загьирлъичӏел мугӏжизатал дица гьезда рихьизарун рукӏинчӏелани, гьезие мунагь букӏинароан. Амма гьеб кинабго бихьаниги, рихун руго гьезда дунги дир Эменги. 25Гьаб кинабго лъугьунеб буго гьезул къануналда бугеб гьадинаб калима ритӏухълъизе: «Гӏиллаго гьечӏого рихана гьезда Дун». 26Нужер ракӏбатизабизе дир Инсудасан бачӏунеб Ритӏухълъиялъул Рухӏ Инсухъан дица нужее битӏараб мехалъ, гьелъги нугӏлъи гьабила дие. 27Нужецаги нугӏлъи гьабила дие, авалалдаса бахъарабго ругелъул нуж дида цадахъ.

Currently Selected:

Иоанница бицараб Рохалил хабар 15: AvrNT

Highlight

Copy