Иоанница бицараб Рохалил хабар 5

5 бетӏер

Гӏисаца сахлъизавула 38 соналъ унтун вукӏарав чи

1Гьелдаса хадуб жугьутӏазул цо байрамалде Иерусалималде вачӏана Гӏиса. 2Иерусалималъул «Гӏиял кавудахъ» буго жугьутӏазул мацӏалда Бетцата абулеб цо хӏавуз. Чӏахӏиял хӏубалги чӏван гьабураб щуго рагъиги буго гьеб хӏавузалда сверун. 3Гьел рагъабазда регун рукӏунаан унтаралги, бецалги, рекъалги, палижалъ ккуралги гӏемерал гӏадамал. 4#5:4-5 Гьаб бакӏалда Инжилалъул цо-цо хъвай-хъвагӏаязда ратула гьадинал калимабиги: Хӏавузалъуб лъим гьелчезе лъугьинегӏан ралагьун чӏун рукӏунаан. Бичасул малаикас, зама-заманаялдасан хӏавузалъуве лъугьун, лъим гьелчезе гьабулаан, ва гьелчезе байбихьарабго тӏоцеве гьеб лъадалъе лъугьарав чиясда тӏаса унаан гьесул чорхолъ бугеб кинабгоги унти. Гьенив вукӏана лъебералда микьго соналъ унтарав цо чи. 6Гӏисадаги вихьана гьев. Халат заманаялъ унтарав чи гьев вукӏин лъайдал, Гӏисаца гьесда гьикъана сахлъизе бокьилищилан. 7Унтарас жаваб кьуна:

– Я, бетӏерчӏахъад! Лъим гьелчараб мехалъ, дун хӏавузалъуве вегьизе чи гьечӏо дида цадахъ. Дунго гьениве лъугьинилан кида тӏаде ворханиги, цогидав ккун ватула дидаса цеве.

8Гӏисаца гьесда абуна:

– Тӏаде вахъа! Дурго турутги босун, рокъове а, – ян.

9Гьебсагӏатго сахлъана гьев чи. Жиндирго турутги босун унев вукӏана. Гьеб букӏана шамат къо. 10Гьединлъидал ягьудияз гьесда абуна жакъа шамат къоялъ дуца турут кодоб ккун баччизе бегьуларилан. 11Жив сахлъизавурав чияс турутги босун айилан абунин жиндайилан жаваб кьуна гьес.

12– Турутги босун айилан лъица дуда абураб? – ан гьикъидал, 13жаваб кьун бажаричӏо гьесухъа. Гьесда лъалеб букӏинчӏо дов щивали. Гьенир рукӏарал гӏадамазул руккалилъе лъугьун ун вукӏана Гӏиса гьебмехалъ. 14Цинги Гӏисада гьев чи Мукъадасаб Рокъов ватана.

– Гьелеха, сахлъун вуго мун гьанже, – ян абуна гьесда Гӏисаца. – Мунагьалдаса цӏунун чӏа гьанжеялдаса нахъе, дагьабги квешаб ккезе гурин дуе.

15Инеги ун ягьудиязда бицана гьес Гӏисаца сахлъизавунин живилан. 16Гьелдаса хадуб, шамат къоялъ гьединаб иш гьабунилан, Гӏисае рахӏат толеб букӏинчӏо ягьудияз. 17Гӏисаца гьезда абуна:

– Дир Инсулги гьечӏо чӏараб сагӏат, дунги гьесда релълъун вуго.

18Шамат къоялъул къанун хвезабураб гӏечӏого, гьес Аллагь жиндирго эменлъун рикӏкӏунев вугилан, Аллагьасда живго ващалъизавулевги вугилан, гьез гьанже дагьабги цӏикӏкӏун хӏаракат бахъулеб букӏана Гӏиса чӏвазе.

Инсуца гьабураб гьабула Васасги

19Гьелда дандеги Гӏисаца абуна:

– Хӏакълъун абулеб буго дица нужеда: живго лъикӏав лъугьун Васасда щибниги гьабизе кӏоларо, Инсуца гьеб иш гьабулеб гьесда бихьулеб гьечӏони. Инсуца гьабураб гьабула Васасги. 20Инсуе вас вокьула, ва Инсуца гьесдаги рихьун гьарула жиндирго киналго ишал. Дагьалги кӏудиял ишал рихьизарила Инсуца гьесда, гьебмехалъги гӏажаиблъила нуж. 21Инсуца гӏадамал хваралъуса рахъинарун, чӏаголъизарулел гӏадин, Васасги чӏаголъизарула жиндиего чӏаголъизаризе бокьарал чагӏи. 22Инсуца лъиениги суд гьабулеб гьечӏо, суд гьабизе ихтияр гьес Васасухъе кьун буго. 23Инсуе бокьун бугелъул Жиндирго гӏадаб къадру-къимат гӏадамаз васасулги гьабизе. Васасул къадру-къимат гьабуларев чияс гӏаламалъухъе гьев витӏарав Инсулги къадру-къимат гьабизе гьечӏо.

24Хӏакълъун абулеб буго дица нужеда: дир рагӏухъ гӏенеккарав ва дун витӏарав Аллагьасда божарав чиясе абадияб гӏумру насиблъула, суд гьабичӏого, тамихӏ гьечӏого ворчӏана гьев хваразулъа чӏагоязулъе – абадияб гӏумруялъулъе. 25Хӏакълъун абулеб буго дица нужеда: Аллагьасул Васасул гьаракь хвараздаги рагӏулеб ва гьеб рагӏараб мехалъ гьел тӏаде рахъунеб заман бачӏина, бачӏунго буго гьединаб заман. 26Инсухъ буго инсанасда рухӏ лъезабиялъул кверщел. Гьес Васасухъеги кьун буго инсанасда рухӏ лъезабизе кверщел. 27Суд гьабизеги ихтияр кьун буго Васасе – гьев Гӏадамил Лъимер вугелъул. 28Нуж хӏикмалъуге гьелда, киналго хабалъ ругезда Аллагьасул Васасул гьаракь рагӏулеб заман бачӏине буго: 29лъикӏлъиялда хьвадаразе, хваралъуса рахъиндал, гӏумру насиблъила, квешлъиялда хьвадаразе, хваралъуса рахъиндал, тамихӏ насиблъила.

Инсуца Васасе нугӏлъи гьабулеб буго

30Дунго лъикӏав лъугьун дида щибниги гьабизе кӏоларо. Аллагьасухъ гӏенеккун гьабулеб буго дица суд. Дир судги ритӏухъаб буго, – диего бокьухъе гурелъул дица суд гьабулеб бугеб, дун витӏарав Аллагьасе бокьухъелъидал. 31Дицаго диего гьабулеб нугӏлъи – гьеб кьучӏаб букӏинаро. 32Амма вуго дир хӏакъалъулъ бицунев цоги Нугӏ. Дида лъала дир хӏакъалъулъ Гьесул нугӏлъи кьучӏаб бугеблъи.

33Дир хӏакъалъулъ цӏехезе нужеца Яхӏяхъе гӏадамал ритӏун рукӏанагури. Ритӏухъаб нугӏлъи гьабуна гьесги. 34Гӏадамазул нугӏлъи къваригӏарав чи гуро дун. Нуж хвасарлъизе гӏоло бицунеб буго дица гьелъул. 35Яхӏя вукӏана гӏадамазе бакараб ва канлъи кьолеб чирахъ гӏадинав чи. Цо дагьабго заманаялъ гьелъул канлъиялдаса рохизе бокьун букӏана нужее. 36Яхӏяца гьабураб нугӏлъиялдасаги кӏудияб нугӏлъи буго дихъ, нуж божизаризе кӏолеб. Дица тӏуразареян Инсуца дида тӏадкъарал ва гьанже дица тӏуразарулел ругел ишаз жидецаго нугӏлъи гьабула дир хӏакъалъулъ. Дун Инсуца витӏун вукӏиналъе нугӏлъи гьабула гьез. 37Дун витӏарав дир Инсуцаги нугӏлъи гьабулеб буго дие пайдаялъе. Нужеда лъиданиги я рагӏичӏо, я вихьичӏо гьев киданиги. 38Гьесул рагӏиги нужер рекӏелъ хутӏуларо, гьес витӏарасда божулел гьечӏелъул. 39Нужеца Тӏухьдул цӏалула, гьелдалъун нужее абадияб гӏумру насиблъилилан ракӏчӏун бугелъул. Гьеле гьел Тӏухьдузги нугӏлъи гьабула дир хӏакъалъулъ. 40Абадияб гӏумру насиблъизе букӏине дихъе рачӏине кинго бокьулеб гьечӏо нужее.

41Гӏадамазул рецц-бакъ къваригӏарав чиги гуро дун. 42Амма дида нуж лъала ва нужер рекӏелъ Аллагьасде рокьи гьечӏеблъиги лъала. 43Дир Инсуца витӏун вачӏарав дун нужеца къабул гьавулев гьечӏо. Живго вахъун цо пуланав чи вачӏани, нужеца гьев къабул гьавила. 44Цоцазул рецц бокьулел нуж гӏадинал гӏадамаз иман лъелищ, цохӏо Аллагьасдасан щолеб баркат тӏалаб гьабулеб гьечӏелъул нужеца. 45Амма нужеда ракӏалде ккоге Инсуда цере дица нужеда гӏайиб чӏвалилан. Сундулго рахъалъ нужеца хьул гьабулев Мусацагицин гӏайиб чӏвала нужеда. 46Хӏакълъун нуж Мусада божулел рукӏаралани, дидаги божилаан нуж. Гьесги хъван тун букӏиндалха нужее дир хӏакъалъулъ. 47Гьес хъваралда божуларел нуж, дица бицаралда божилищ?

Currently Selected:

Иоанница бицараб Рохалил хабар 5: AvrNT

Highlight

Copy