Лукаца бицараб Рохалил хабар 15

15 бетӏер

Билараб чахъдал мисал

1Гӏемерал магъало бакӏарулел чагӏиги цогидаб мунагь-хӏакъалъул агьлуги рачӏунаан Гӏисахъ гӏенеккизе. 2Фарисеялги диниял гӏалимзабиги Гӏисаде гӏайиб-гъвелалда рукӏана мунагьазул цӏурал гӏадамал къабул гьарулел ругилан, гьелгун цадахъ квана-гьекъолев вугилан. 3Гьебмехалъ Гӏисаца гьезие гьадинаб мисал бачана:

4– Нусго чахъу бугеб рехъалъа цо чахъу камун батани, доб ункъоялда анцӏила ичӏабгоги букӏаралъуб тун, гьеб тӏагӏараб чахъу батизегӏан мегӏер-гӏалах тируларев чи вугищ нужеда гъорлъ? 5Батараб мехалъ вохуца холаго гъежда лъун баччула гьес гьеб рокъобе. 6Цинги гьес, гьудулзабиги мадугьалзабиги ахӏун, гьезда абула: «Дида цадахъ роха нужги, дирго билараб чахъу батана дида жакъа», – ян. 7Дица нужеда абулеб буго: гьединго зобалаздаги Аллагьасде вуссарав цо мунапикъ сабаблъун рохел цӏикӏкӏун букӏуна тавбу гьабизе кколарев ункъоялда анцӏила ичӏго муъминчи сабаблъуналдаса.

Билараб диргьамалъул мисал

8Яги жиндирго анцӏго диргьамалъул цояб тӏагӏун бугони, чирахъги бакун, рокъоб киса-кибего гьеб балагьичӏого толей чӏужугӏадан йикӏунищ? 9Батараб мехалъ, жиндирго гьудулзабиги мадугьалзабиги ахӏун, гьелъ абила: «Дида цадахъ роха нужги, дир билараб диргьам батун буго», – ян. 10Дица нужеда абулеб буго: гьединго Аллагьасул малаикзабиги рохула Аллагьасде вуссарав цо мунапикъасдаса.

Тӏагӏун вукӏарав васасул мисал

11Хадубги Гӏисаца бицана:

– Цо пуланав чиясул вукӏун вуго кӏиго вас. 12Гьитӏинав васас инсуда абун буго дур ирсалъул жиндие кколеб бутӏа кьейилан. Инсуца гьебмехалъ кӏиявго васасе ирс бикьун буго. 13Чанго къоялдасан гьитӏинав вас, жиндирго бутӏаги босун, вахъун ун вуго рикӏкӏадаб улкаялде. Дова гьев цӏакъ пучго, саяхъго хьвадун вуго, кодоб букӏанщинаб гӏарацги хвезабун буго.

14Гьесухъа кинабго гӏарац лъугӏараб заманаялда, доб улкаялда кутакаб ракъи тӏибитӏун буго. Гьав васги кутакалда язихълъун вуго. 15Ахирги доб улкаялъул цо чиясда цеве хӏалтӏизе лъугьун вуго. Досги гьев болъонал хьихьизе гӏалахалде витӏун вуго. 16Болъоназе базе кьураб квен кванангӏаги чехь цӏезабизе хӏаракат бахъулеб букӏун буго гьес, амма гьебгицин биччалеб букӏун гьечӏо. 17Гӏакълуялде вачӏун, гьес пикру гьабун буго: «Дир инсул къавулъги гӏемер ругогури хӏалтӏухъаби? Гӏунги тӏокӏаб чед буго гьезул. Дун гьанив вакъуца холев вуго. 18Вахъун дирго инсуда аскӏове ина ва гьесда абила: „Аллагьасда цебеги дуда цебеги дир мунагь ккана, дир эмен. 19Тӏокӏав дур васлъун рикӏкӏине мустахӏикъав гьечӏо дун, дур хӏалтӏухъанлъун восе“».

20Вахъун ун вуго гьев жиндирго инсухъе. Рикӏкӏадасанго вихьун вуго инсуда гьев вачӏунев, гьесда гурхӏун вуго эмен. Векерун данде ун, горбода къвал бан, къочарун вуго. 21Васас гьесда абун буго:

– Аллагьасда цебеги дуда цебеги дир мунагь ккана, тӏокӏав дур васлъун рикӏкӏине мустахӏикъав гьечӏо дун.

22Инсуцайин абуни, жиндирго рагьтӏателазда абун буго:

– Бищунго лъикӏаб ретӏел босун рачӏа хехго ва гьасда тӏад ретӏе, гьасул килщида баргъичги ххе, хӏатӏазда хьиталги ретӏе. 23Мачӏадалъе хьихьараб бечеги хъве: рохалил тӏутӏ лъезе бокьун бугин. 24Щайгурелъул гьав дир вас хун вукӏана, гьанже чӏаголъун вуго, гьав вилун-тӏагӏун вукӏана, гьанже ватун вуго.

Кутакаб рохел-ихтилат гьабизе байбихьун буго гьез.

25Гьев чиясул кӏудияв вас хурив вукӏун вуго гьебмехалъ. Рокъове вачӏунаго, гьесда рагӏун руго кочӏолги кьурдулги бакънал. 26Аскӏове ахӏун цо рагьтӏателасда гьикъун буго гьес гьалъул магӏна щибилан. 27Дур вац вачӏун вугин, гьев сах-саламат ватиялдаса вохун, дур инсуца мачӏадалъе хьихьараб бечеги хъвезабунин бицун буго. 28Гьесул ццин бахъун буго, рокъове жаниве лъугьине къабуллъуларого вукӏун вуго. Къватӏиве вачӏун, гьесие лъикӏаб бицине лъугьун вуго эмен. 29Инсуе жавабалъе гьес абун буго:

– Гьалщинал соназ гьале дуе лагълъи гьабулев вуго дун, дуца хъвараб хӏуччдаса таричӏого. Дуца дие цо бурутӏцин кьечӏо, ахӏун гьудулзабигун квана-гьекъей гьабизе. 30Амма дур букӏараб бечелъиги хъахӏбабазда цадахъ квана-гьекъон лъугӏизабун вачӏарав гьав дур васасе дуца мачӏадалъе хьихьараб бече хъвезабун буго.

31Инсуца гьесда абун буго:

– Я, дир вас! Мун кидаго дида цадахъ вуго, кинабго дир бугебщинабги дур буго. 32Амма нилъеца рохалил бертин-той гьабизе ккола, гьав дур вац хун вукӏун, гьанже чӏаголъун вугелъул, вилун-тӏагӏун вукӏун, гьанже ватун вугелъул.

Currently Selected:

Лукаца бицараб Рохалил хабар 15: AvrNT

Highlight

Copy