Лукаца бицараб Рохалил хабар 7
7
7 бетӏер
Гӏисаца сахлъизавула нусилбетӏерасул рагьтӏател
1Гӏенеккун букӏараб халкъалъе гьабулеб вагӏзаги лъугӏизабун, гьениса вахъун Гӏиса Капернаумалде вачӏана. 2Гьенив Рималъул рагъухъабазул цо нусилбетӏерасул гьесие цӏакъ хирияв рагьтӏател вукӏана кутакаб унтиялъ хвалил боснов лъун. 3Гӏиса вуссун вугин рагӏидал, гьес жугьутӏазул чӏахӏиял чагӏи ритӏана жиндир рагьтӏател сахлъизавизе вачӏаян гьесда гьаризе. 4Гӏисахъе рачӏун кутакалда гьардезе лъугьана гьел, дуца кумек гьабизе мустахӏикъав чи вугин гьевиланги абуна. 5Гьесие нилъер халкъ цӏакъ бокьулила, нижер гьаниб синагогагицин гьес бараб бугила. 6Гӏиса гьезда цадахъ ана. Досул бакӏалде щолел рукӏаго, нусилбетӏерас данде жиндирго гьудулзаби ритӏун рачӏана вачӏинчӏониги кӏваричӏилан Гӏисада лъазабизе, Тӏадегӏанав Гӏиса къавулъе лъугьинегӏанасеб къадруялъул чи гурин живилан абизе. 7Духъе вачӏине мустахӏикъав чиги гурин жив, жиндир рагьтӏател сахлъизе кӏолеб къуваталъул цо рагӏи абеян гьаризе ритӏун ругоан гьес гьел. 8Живги вугила тӏадехун ругезул амру тӏубазабулев, жиндир ихтияралда ругел рагъухъабазе рагӏудалъун амру-буюрухъ гьабулев чи. Айилан цоясда абуни, гьев унила. Вачӏайилан цогидасда абуни, гьев вачӏунила. Пуланаб иш тӏубазабейилан рагьтӏателасда абуни, гьес тӏубазабулила.
9Гьединал рагӏабаз гӏажаиблъизавуна Гӏиса. Жиндаго хадуб бачӏунеб букӏараб халкъалдехун вуссун, гьес абуна:
– Гьале дица нужеда абулеб буго: Исраилил халкъалда гьоркьобгицин лъилниги дандчӏвачӏо дида гьединаб божи-иман.
10Нусилбетӏерас Гӏисахъе ритӏарал гӏадамал тӏадруссун рачӏиналде, рагьтӏател сахлъун ватана.
Наин шагьаралдаса цо къоролалъул вас чӏаголъизавула Гӏисаца
11Кватӏичӏого Гӏиса ана Наин абулеб шагьаралде. Муридалги рукӏана цадахъ. Халкъалъул руккалабиги рачӏана гьесда хадур. 12Шагьаралъул кавудахъе щолеб мехалъ, гьале къватӏибе босун бачӏунеб батана цо хварав чиясул мали. Гьев вукӏана эбелалъул цохӏо вугев вас, гьей эбелги къоролай йикӏана. Гӏезегӏанго халкъ букӏана хвел букъизе унеб. 13Гьей эбел йихьидал, ракӏ гурхӏун, Тӏадегӏанав Гӏисаца:
– Гӏодуге! – ян абуна гьелда.
14Цинги аскӏове ун, хварасул молода квер хъвана. Мали босун унел рукӏарал гӏадамал лъалхъана. Гӏисаца гьебмехалъ абуна:
– Ле, гӏолохъанчи! Дица дуда тӏаде вахъаян абулеб буго.
15Хварав чи тӏаде ворхана ва кӏалъазе лъугьана. Гьедин чӏаголъизавун, Гӏисаца гьев гӏолохъанчи гьесул эбелалъухъе кьуна. 16Кутакаб хӏинкъиялъ къвал бан рукӏана гьел киналго, Аллагьасе рецц гьабулаго, гьез абулеб букӏана:
– Кӏудияв авараг рещтӏун вуго нилъехъе, жиндирго халкъалъе кумекалъе лъугьун вуго Аллагь.
17Гӏисал хӏакъалъулъ хабар тӏибитӏана тӏолабго Ягьудиялдаги сверухъ ругел бакӏаздаги.
Яхӏя аварагас Гӏисахъе муридзаби ритӏун рачӏуна
18Яхӏяда жиндирго муридаз бицана гьеб киналъулго хӏакъалъулъ. 19Кӏиго муридги тӏаде ахӏун, Яхӏяца гьел Тӏадегӏанав Гӏисахъе ритӏана: «Мунищ дов нижехъе вачӏине кколев чи, яги цогидав вачӏинегӏанищ ниж ралагьун чӏезе кколел?» – абун гьикъизе. 20Гӏисахъе рачӏун, гьез абуна:
– Яхӏя аварагас ниж ритӏана: «Мунищ дов нижехъе вачӏине кколев чи, яги цогидав вачӏинегӏанищ ниж ралагьун чӏезе кколел?» – абун гьикъизе.
21(Гьеб заманаялде щвезегӏан Гӏисаца гӏемерал гӏадамал сахлъизарун рукӏана унта-щокълъиялдаса, хъубал жундуздаса ва гӏемерал бецал чагӏазда канлъиги бихьизабун букӏана.)
22Гӏисаца гьезие жавабалъе абуна:
– Инеги ун, нужеца Яхӏяда бице нужеда рагӏарабги бихьарабги: бецазда канлъи бихьулеб бугин, бохдулъа ракъварал рилълъанхъулел ругин, барасалъ унтарал рацӏцӏалъулел ругин, гӏинкъазда рагӏи рагӏулеб бугин, хварал чӏаголъулел ругин, мискинзабазда Рохалил хабар бицунеб бугин. 23Дир рахъалъ щакдаричӏев чи талихӏав вугиланги абе.
Гӏисаца Яхӏя аварагасул хӏакъалъулъ бицуна
24Гьел Яхӏял чапарзаби нахъе араб мехалъ, Гӏисаца гӏадамазда бицана Яхӏял хӏакъалъулъ:
– Щиб бихьизе нуж добмехалъ гӏицӏаб авлахъалде ун рукӏарал? Гьороца хьвагӏезабулеб муцӏи бихьизейищ? 25Щив вихьизе ун рукӏарал? Беричаб ратӏлилъ вугев чи вихьизейищ? Чӏухӏараб ретӏел ретӏарал ва бечедаб яшавалда ругел гӏадамал парччахӏзабазул кӏалгӏабазухъ руго.
26Щив вихьизеха ун рукӏарал? Авараг вихьизейищ? Аварагасдасагицин кӏудияв чи вихьизе ун рукӏанилан абулеб буго дица нужеда! 27Гьесул хӏакъалъулъин Тӏухьдузда хъван бугеб: «Гьале, мун вачӏиналде дуе нух къачӏазе дирго илчи вуго дица цеве витӏулев».
28Дица нужеда абулеб буго: эбелалъ чехь къинлъун гьаруразда гьоркьов Яхӏя аварагасдаса кӏудияв чи гьечӏо. Амма Аллагьасул Парччахӏлъиялда ругезул бищун гьитӏинавгицин гьесдаса кӏудияв вуго. (29Яхӏял вагӏза рагӏарал киналго гӏадамаз, хӏатта магъало бакӏарулел чагӏазги, лъадалъ ччун рахъизарун, Аллагьасул Нух ритӏухъ гьабуна. 30Амма фарисеязги диниял гӏалимзабазги лъадалъ ччун рахъизе инкар ккуна ва жидее бугеб Аллагьасул амру къабул гьабичӏо.)
31Сунда данде кквелел дица гьаб заманаялъул гӏадамал, лъида релълъун гьел ругел?
32«Нижеца зурма пуна –
Нуж кьурдизе рахъинчӏо!
Магӏил бакънал рачана –
Нуж гӏодизе лъугьинчӏо!»
– ян къотӏноре рахъун цоцазде ахӏдолел лъималазда релълъуна гьел. 33Витӏун вачӏана я чед кунарев, я чагъир гьекъоларев Яхӏя авараг. Нужеца абуна гьев шайтӏабаз ккурав чи вугилан. 34Вачӏана кваназеги кваналев, гьекъезеги гьекъолев Гӏадамил Лъимер. Нужеца абулеб буго: «Гьале чехьквеш, гьекъолдухъан, магъало бакӏарулел чагӏазулги мунагь-хӏакъалъул агьлуялъулги гьудул», – абун. 35Амма Аллагьасул Гӏакъиллъиялда рекъон хьвадулел гӏадамаз бихьизабула Аллагьасул Гӏакъиллъиялъул ритӏухълъи.
Симон абулев фарисеясул бакӏалде уна Гӏиса
36Цо фарисеяс гьоболлъухъ ахӏун, гьенив кваналев вукӏана Гӏиса. 37Гьале гьеб шагьаралдаса цо мунагьал гӏемерай гӏадан, Гӏиса гьев фарисеясул бакӏалда вукӏинги лъан, махӏгьуинаб нахул цӏун щагӏил сурахӏигун, ячӏана. 38Гьесда нахъехунги чӏун, гӏодулаго магӏица гьесул хӏатӏал риччизаруна гьелъ, жиндирго ботӏрол расуца рацӏцӏана гьел, убачал гьарулаго доб махӏгьуинаб нахги бахана гьесул хӏатӏазда. 39Гьеб бихьидал, Гӏиса кванде ахӏарав фарисеясда ракӏалде ккана, гьав чи авараг вукӏаравани, гьасда лъалаанин кинай гӏаданалъ жинда квер хъвалеб бугебали. Мунагьазул цӏурай гӏаданлъидалха гьей йигей. 40Гьебмехалъ Гӏисаца гьесда абуна:
– Симон! Цо дуда бицине жо буго дир.
– Бице, дир Мугӏалим, – ан абуна Симоница.
41Гӏисаца бицана:
– Къарзалъ гӏадамазухъе гӏарац кьолев цо чиясул вукӏун вуго кӏиго налъулав. Цояс гьесие кьезе букӏун буго щунусго динар, цогидас – кӏикъоялда анцӏго динар. 42Налъи бецӏизе гьезул рес гьечӏолъи бихьун, кӏиясего хӏалал гьабун тун буго гьес. Гьанже дуца бице дида: кинасе гьев цӏикӏкӏун вокьилев?
43Симоница жаваб гьабуна:
– Дида ракӏалде ккола, цӏикӏкӏун гӏарац нахъе кьезе букӏарасе цӏикӏкӏун вокьилин абун.
Гӏисаца абуна:
– Битӏун ракӏалде ккун буго дуда.
44Цинги гъой чӏужугӏаданалдехун вуссун, гьес Симонида гьикъана:
– Дуда йихьулищ гьай гӏадан? Дун дур рокъове лъугьараб мехалъ дир хӏатӏал чуризе лъим кьечӏо дуца. Гьалъ жиндирго магӏица чурана дир хӏатӏал, жиндирго ботӏрол расуца ракъвазеги гьаруна гьел. 45Саламалъул убач гьабичӏо дуца дида, гьалъин абуни дун гьаниве вачӏаралдаса нахъего убачазул цӏезарулел руго дир хӏатӏал. 46Салам гьабун нах бахинчӏо дуца дир бетӏералда, гьалъин абуни дир хӏатӏазда бахунеб буго бищунго махӏгьуинаб нах. 47Гьединлъидал дица дуда абулеб буго: гьелъул мунагьал цӏикӏкӏун чуридалин гьелъие дун цӏикӏкӏун вокьулев вугев. Мунагьал дагь чурулесе дагь гурони вокьуларо.
48Дой гӏадамалда гьес абуна:
– Мун мунагьаздаса яцӏцӏалъана, – ян.
49Цадахъ кваналел рукӏаразда ракӏалде ккана:
– Гьавго щив, гӏадамал мунагьаздасацин рацӏцӏад гьаризе кӏолев, чи?
50Гӏисаца дой гӏадамалда абуна:
– Дурго божи-иманалъ хвасар гьаюна мун. Гьанже а дурго.
Currently Selected:
Лукаца бицараб Рохалил хабар 7: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008
