Лукаца бицараб Рохалил хабар 9
9
9 бетӏер
Гӏисаца чапарзаби халкъалъухъе ритӏула
1Анцӏила кӏиявго чапарги ахӏун, унта-щокъалги жундуз ккуралги сахлъизаризе къуватги ихтиярги кьуна гьезие Гӏисаца. 2Цинги гьел чапарзаби ритӏана Аллагьасул Парччахӏлъиялъул хӏакъалъулъ лъазабизе ва гӏадамал сахлъизаризе. 3Гьес гьезда абуна:
– Я гӏанса, я таргьа-къвачӏа, я квен-тӏех, я гӏарац-месед, я хисизе ретӏел – щибниги босуге нужеца цадахъ. 4Цо лъилниги рокъоре лъугьани, гьеб ракьалдаса нахъе инегӏан, гьенир чӏа. 5Ваамма нуж къабул гьаричӏони, гьеб шагьаралдаса къватӏире рахъунаго, нужерго хьитаздаса хӏурги кӏутӏун те. Аллагьасда цебе гьез жаваб кьезе букӏине хутӏа абе гьеб.
6Рахъун гьел росабалъа росабалъе ана, Рохалил хабар бицунаго ва киса-кирго унтаралги сахлъизарулаго.
Гьерод щакдарулев вуго щивдай гьев Гӏисайилан
7Гьерод ханасдаги рагӏана Гӏисал гьел киналго ишазул хӏакъалъулъ, ва гьев малъкъосун хутӏана. Цо-цо гӏадамаз абулеб букӏиндалха хваралъуса вахъун Яхӏя вачӏун вугилан. 8Цогидаз абулеб букӏана Иляс авараг вачӏун вугилан, цо-цояцайин абуни, цебе заманаялъул аварагзабазул цояв чӏаголъун вугилан хабар биччан букӏана. 9Гьеродицани абулеб букӏана:
– Яхӏял дица бетӏер къотӏана; жиндир хӏакъалъулъ дида гьадинал харбал рагӏулел ругев чи щивха кколев?
Гьев вихьизе гъира букӏана Гьеродил.
Гӏисаца щуазарго чи гӏорцӏизавула
10Тӏадруссун рачӏун чапарзабаз Гӏисада бицана жидецаго гьабура-таралъул хӏакъалъулъ. Цинги, цохӏо гьелги рачун, гьев ана Байтсаида абулеб шагьаралде. 11Амма, гӏадамазда лъан, гьелги гьесда хадур ана. Гьес гьел тӏаде къабул гьаруна. Гьезие Аллагьасул Парччахӏлъиялъул хӏакъалъулъ бицана ва гьесул кумекалде хӏажалъарал сахлъизеги гьаруна.
12Гьале маркӏачӏумех щолеб букӏана. Аскӏове вачӏун анцӏила кӏиявго чапарас гьесда абуна:
– Сордо базеги жидеего квание гӏамал гьабизеги гӏагардаса гӏебеде ругел росабалъе ва кулабазде айилан абе гьал гӏадамазда, гӏадан-чиго гьечӏеб бакӏ бугин гьаб.
13Гӏисаца гьезда абуна:
– Нужеца кваназаре гьел.
Гьез абула:
– Щуго чедги кӏиго ччугӏаги гурони гьечӏо нижехъ, гьел киназего гӏураб кваназе жо босизе ани гурони.
14(Гьенив вукӏана щуазаргогӏанасев бихьинчи.) Жиндирго чапарзабазда гьес абуна:
– Нужеца гьел, гӏага-шагарго кӏикъоялда анцӏ-анцӏ чи кколедухъ, кьера-кьерал гьарун чӏезаре, – ян.
15Гьес абухъе гӏодор чӏезаруна гьез гьел киналго. 16Гӏисаца щуябго чедги кӏиябго ччугӏаги кодобе босана, зобалаздехун вуссун кванде дугӏа гьабуна ва бек-бекун муридазухъе кьуна халкъалъе бикьейилан. 17Киналго гӏорцӏизегӏан кванана, анцӏила кӏиго гьегь цӏураб нахъегицин хутӏана.
Пётрица иман лъуна Гӏиса Масихӏ вукӏиналде
18Цо нухалъ Гӏиса живго цохӏо вукӏана Аллагьасда гьарделев. Муридалги рукӏана гьесда цадахъ. Гьес гьезда гьикъана:
– Щивлъун дун гӏадамаз рикӏкӏунев? – абун.
19Гьез жаваб кьуна:
– Цояз мун Яхӏя авараг вугилан абулеб буго, цогидаз абулеб буго Иляс авараг вугилан, цо-цояз абулеб буго цебе заманаялъул аварагзабазул цояв вугин хваралъуса вахъун вачӏунилан.
20Гьес гьезда гьикъана:
– Нужеца щивлъунха дун рикӏкӏунев? – абун.
– Мун Аллагьасул Масихӏ вуго, – ян жаваб кьуна Пётрица.
21Гьес гьезда кьварун лъазабуна лъиданиги гьелъул хӏакъалъулъ бицунгейилан.
Гӏисае букӏине бугеб гӏазаб-гӏакъуба
22Гӏисаца бицана Гӏадамил Лъимаца гӏемераб гӏазаб-гӏакъуба хӏехьезе ккезе бугин, чӏухӏби-хӏакимзабазги, чӏахӏиял кашишзабазги, диниял гӏалимзабазги гьесдаса инкар гьабизе бугин, чӏвазе вугин ва лъабабилеб къоялъ Аллагьас чӏаголъизавизеги вугин.
23Цинги гьес киназдаго абуна:
– Дида цадахъ вилълъине бокьарав чи ватани, гьес жиндирго напсалдаса инкар гьабе, жиндаго тӏаде ккараб хъанчил гӏазабги щибаб къоялъ бачче ва дида хадув вачӏа. 24Щаян абуни, жиндирго гӏумру цӏунизе бокьулев чи гьелдаса махӏрумлъила, дие гӏоло гӏумруялдаса махӏрумлъизе разилъарас гьеб хвасар гьабила. 25Живго рецӏалие кьун яги тӏагӏун хадуб, тӏолабго дуниялалъул кверщел хъатикье щвеялъул щиб пайда бугеб инсанасе? 26Дунги дир рагӏабиги сан гьаричӏев чи Гӏадамил Лъимацаги сан гьавизе гьечӏо, жиндиргоги, Инсулги, мукъадасал малаикзабазулги нуралъ гвангъун гьев вачӏунеб мехалъ. 27Хӏакълъун абулеб буго дица нужеда: Аллагьасул Парччахӏлъи бихьичӏого жидеца хвалил лълъар гьекъезе гьечӏел гӏадамалги ругелха гьанир эхетаразда гьоркьор.
Гӏиса хиса-басун лъугьуна
28Гьес гьедин абуралдаса микьгогӏанасеб къо индал, Пётрги, Иоаннги, Якъубги цадахъ рачун, Аллагьасе гьари-дугӏаялъе магӏарде вахана Гӏиса. 29Гьари-дугӏаялда Гӏиса вукӏаго, гьесул гьурмал куц хисана, ретӏелги хъахӏлъана, кенчӏезе лъугьана. 30Гьале кӏиго чи Гӏисада гаргадула. Гьел рукӏана Мусаги Илясги. 31Тӏад нур чӏун букӏана Гӏисадаги гьездаги. Гьез бицунеб букӏана Иерусалималда цӏезабизе бугин Гӏисал къадаралъул лълъар. 32Ригьунаредухъ кьижун рукӏана Пётрги цадахъ ругелги. Ригьараб мехалъ гьезда бихьана Гӏисада тӏад чӏараб нур, кӏиго чиги вугоан аскӏов эхетун. 33Гьев кӏиявго чи Гӏисада аскӏоса нахъе унеб мехалъ, Пётрица гьесда абуна:
– Я, Насихӏатчи! Лъикӏ буго гьаниб нилъее. Рачӏа лъабго хъощ базин: цо дуе, цо Мусае, цо Илясие.
(Гьедин абуна Пётрица щиб абилебали лъаларого хутӏидал.) 34Гьев кӏалъан вахъиналдего, цо хъахӏаб накӏкӏул парча бачӏун рахчизаруна гьел, ва, гьеб накӏкӏукье ккедал, хӏинкъана муридал. 35Цинги накӏкӏуда гьоркьосан бахъана цо гьаракь:
– Гьав ккола дица витӏизе тӏаса вищарав дир Вас. Гьасухъ гӏенекке нуж!
36Гьеб гьаракь къотӏараб мехалъ, Гӏиса нахъеги живго хутӏун вугоан. Муридаз гьеб балъго гьабуна ва жидедаго бихьаралъул хӏакъалъулъ доб мехалъ лъиданиги бицинчӏо.
Гӏисаца сахлъизавула жундуз ккурав цо вас
37Нахъисеб къоялъ, магӏардаса гъоркье рещтӏиндал, Гӏисада данде гӏемераб халкъ бачӏана. 38Гьале халкъалъул руккелалда гьоркьосан цо чияс ахӏана:
– Я, Мугӏалим! Дир цохӏо вугев васасухъ валагьеян гьарула дица дуда. 39Женалъ ккола гьев ва тохлъукьего чӏчӏичӏчӏидизе лъугьуна, цинги, кӏалдиб полопги бан, тӏеркӏезавула. Гӏемераб гӏазаб-гӏакъуба кьун хадув гурони виччан толаро. 40Дур муридазда гьарана дица гьеб жен бачахъеян, амма гьезухъа бажаричӏо.
41Гӏисаца абуна:
– Гӏай, нуж иман гьечӏеб ва пасатаб уммат! Кидалъагӏан дун нужеда цадахъ вукӏинев ва кидалъагӏан нуж хӏехьезе кколел? Ваче гьаниве дурго вас.
42Вачун вачӏунаго, жен васасде тӏаделъана, тӏамун гӏодовгун, тӏеркӏезавуна. Амма Гӏисаца гьеб хъубаб жен чӏезабуна ва сахлъизавун васги инсухъе кьуна. 43Киналго хӏикмалъун хутӏана, Аллагьасул хӏалкӏолъи бихьуларищан.
Гӏисаца нахъеги бицуна жиндиего ккезе бугелъул
Кинабго халкъ Гӏисал мугӏжизаталъ гӏажаиблъизабун бугеб мехалъ, жиндирго муридазда гьес абуна:
44– Гьал дир рагӏаби гӏинзунир лъе нужеца: Гӏадамил Лъимер кьезе вуго гӏадамазда кодове.
45Амма гьезда бичӏчӏичӏо гьел рагӏабазул магӏна. Бичӏчӏичӏого букӏинелъун, гьездаса бахчун букӏана гьеб. Гьелъул хӏакъалъулъ гьикъизеги хӏинкъана гьел.
«Бищун кӏудияв щив?»
46Гьезул дагӏба ккана жидеда гъорлъ щивдай бищунго кӏудиявлъун вугевилан. 47Гьезул рекӏелъ бугеб пикруги бичӏчӏун, кодобе босун, жиндаго аскӏоб лъуна Гӏисаца цо лъимер. 48Гьес гьезда абуна:
– Цо гьадинаб лъимер лъицаниги, дие гӏоло, къабул гьабуни, гьеб бащалъизе буго дун къабул гьавиялда. Дун лъицаниги къабул гьавуни, гьеб бащалъизе буго дун нужехъе витӏарав Аллагьги къабул гьавиялда. Гьединлъидал нужеда гъорлъги бищунго гьитӏинав ккола бищунго кӏудиявлъун.
«Нужеда дандечӏоларев чи ккола нужер рахъалда вугев чи»
49Гьебмехалъ Иоанница абуна:
– Я, Насихӏатчи! Нижеда ватана цо чи дур цӏаралдалъун жундул рачахъулев. Нилъеда нахъвилълъунев гьечӏелъул, нижеца гьукъана досие гьеб иш гьабизе.
50Гӏисаца гьесда абуна:
– Гьукъуге гьесие гьеб. Нужеда дандечӏоларев чи ккола нужер рахъалда вугев чи.
Самариялъул цо росдаца Гӏисае гьоболлъи гьабичӏо
51Зобалазде живго вачунеб заман гӏагарлъидал, Иерусалималде ине таваккал тӏамуна Гӏисаца.
52Жиндасаго цере муридал ритӏана гьес сапаралде. Самариялъул цо росулъ чӏана гьел, Гӏиса вачӏиналде хӏадурлъи гьабун. 53Амма гьениб Гӏисае гьоболлъи гьабичӏо, гьев Иерусалималде унев вукӏин лъан. 54Гьебмехалъ гьесул муридал Якъубица ва Иоанница абуна:
– Я, Бетӏерчӏахъад! Дуе бокьилаанищ зодисан цӏадул балагь рещтӏун гьал хвезареян нилъеца абизе.
55Гьелъие изну гьечӏилан абуна Гӏисаца, гьездехунги вуссун. 56Цинги гьел цоги росулъе ана.
«Аллагьасул Парччахӏлъиялъе щив ярагьунарев?»
57Нухда унаго цо чияс Гӏисада абуна:
– Мун киве аниги, дуда цадахъ вилълъина дунги.
58Гӏисаца гьесда абуна:
– Царал жиндирго рукӏун буго, хӏанчӏил бусен буго, амма Гӏадамил Лъимадул бетӏер бегьизе бакӏ гьечӏо, – ян.
59Цоги чиясдани Гӏисаца абуна:
– Дида цадахъ вилълъа, – ян.
Амма дос абуна:
– Дир хварав эмен вукъизе ине изну кье дие.
60Гӏисаца гьесда абуна:
– Хвараца рукъизе те хварал чагӏи. Мунин абуни Аллагьасул Парччахӏлъи тӏаде гӏунтӏун букӏин лъазабизе а.
61Цогиги чиясги гьесда абуна:
– Дун дуда цадахъ вилълъина, Бетӏерчӏахъад! Амма агьлу-хъизаналъулгун къолъикӏ гьабизе ине изну кье.
62Гӏисаца гьесда абуна:
– Хур бекьизе пурцил гӏоркьги ккун, нахъ-нахъ валагьулев чи Аллагьасул Парччахӏлъиялъе ярагьунаро.
Currently Selected:
Лукаца бицараб Рохалил хабар 9: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008
