Матфейица бицараб Рохалил хабар 23

23 бетӏер

Диниял гӏалимзабиги фарисеялги какараб вагӏза

1Гьебмехалъ халкъалдехунги жиндирго муридаздехунги Гӏисаца абуна:

2– Муса аварагасул михӏрабалде рахун кӏалъалел руго гьанже диниял гӏалимзабиги фарисеялги. 3Гьединлъидал гьезухъ гӏенекке ва гьез абурабщинаб гьабе нужеца. Амма гьез гьабураб гьабуге. Гьез абулебги гьабулебги данде кколарелъулха. 4Гьез раччи бакӏлъизабулеб буго ва гьеб гӏадамазул мугъзада лъолеб буго. Жидецагойин абуни гьелда биччун килищцин хъвалеб гьечӏо. 5Хириял рагӏаби тӏад хъварал чалуялги#23:5 Жугьутӏаз как балеб мехалда рукьалда рухьуна гьединал чалуял. гӏеблъизарун, гӏабаялъул гӏертелалги#23:5 Как балеб мехалда ретӏунеб гӏабаялда гӏертелал рукъун рукӏуна. халалъизарун, кинабго гьез гьабулеб буго гӏадамазда бихьизелъун. 6Гьезие бокьула гьоболлъухъ кванил тӏотӏода нахъа бищунго хӏурматияб бакӏ кквезе ва синагогабазда жанир киназдасаго церегӏан гӏодор чӏезе, 7базаркъотӏноб халкъалъ жидеего салам кьезе ва гӏадамаз жидеда мугӏалимзабийилан абизе. 8Амма нужедаго мугӏалимзабийилан абизе биччаге нужеца. Щайин абуни, Мугӏалим цо вуго нужер, нуж киналго вацал руго. 9Гьаб ракьалда лъиданиги эмениланги абуге, цо вуго нужер Эмен – зобалазда вугев Эмен. 10Нужедаго насихӏатчагӏийилан абизеги биччаге, гӏицӏго Масихӏ вуго нужер Насихӏатчи. 11Нужер бищунго кӏудияв нужее хъулухъалъе чӏа абе. 12Жинцаго живго тӏадегӏанлъизавурав гӏодовегӏанлъизе вуго, гӏодовегӏанлъизавурав тӏадегӏанлъизе вуго.

13Балагьги гӏазабги нужее, диниял гӏалимзаби ва фарисеял! Ххвелал гьаризе бокьула нужее! Зобалазул Парччахӏлъиялъул нуцӏа рахана нужеца гӏадамазда цебе: нужгоги лъугьунел гьечӏо гьенире, лъугьине бокьаралги риччалел гьечӏо.

14-15Балагьги гӏазабги нужее, диниял гӏалимзаби ва фарисеял! Ххвелал гьаризе бокьула нужее! Ралъадалги ракьалги тирула нужеца, цогӏаги чи диналде вуссинародайилан. Амма диналде вуссун хадув, нужеца гьев, нуж кӏигогӏан цӏикӏкӏараб даражаялда, жужахӏалъул агьлулъун лъугьинавула.

16Балагьги гӏазабги нужее, бецал чагӏи квер ккун хадур цӏалел бецукал! Нужеца абула: «Мукъадасаб Рукъалъул цӏар рехсон бараб гьа бихханиги бегьулилан, амма Мукъадасаб Рокъоб бугеб меседалхӏайин бараб гьа биххизе бегьуларилан». 17Бецал гӏабдалзаби руго нуж. Мукъадасаб Рукъищ хирияб бугеб, яги Мукъадасаб Рукъалъ жиб хиралъизабураб меседищ? 18Нужеца цоги абула: «Къурбаналъул гьан лъолеб бакӏалъул цӏар рехсон гьедараб гьа бихханиги бегьулилан, амма гьениб лъураб къурбаналхӏаян гьедараб гьа биххизе бегьуларилан». 19Бецукал руго нуж! Къурбаналъул гьан лъолеб бакӏищ хирияб, яги гьеб бакӏалъ хиралъизабураб къурбанищ? 20Хӏакъикъаталдаги къурбаналъул гьан лъолеб бакӏалъул цӏар рехсон гьедулаго, гьев чияс гьелдаго цадахъ гьениб лъун бугебщинабги рехсолеб бугогури. 21Мукъадасаб Рукъалъул цӏар рехсон гьедулаго, гьев чияс гьелдаго цадахъ гьеб рукъалъул Бетӏергьанасул цӏарги рехсолеб бугогури. 22Зобалхӏайилан гьедулаго, гьев чияс гьелдаго цадахъ зобалазда бугеб тахги тахида вугевги рехсолел ругогури.

23Балагьги гӏазабги нужее, диниял гӏалимзаби ва фарисеял! Ххвелал гьаризе бокьула нужее! Нужеца садакъаде кьола сагӏаналъул, анисалъул ва мучариялъул анцӏил бутӏа#23:23 Гьаниб бицунеб буго закагӏат бахъиялъул. , амма Къануналъул бищунго аслиял ритӏухълъиги, рахӏму-хӏелмуги, Аллагьасде иман лъейги нужеца рехун тун руго. Гьебги гьабизе ккола, гьабцоябги рехун тезе бегьуларо. 24Бецал чагӏи квер ккун хадур цӏалел бецукал руго нуж! Кӏкӏара ургьибе ккелебилан хӏинкъун, лъим цӏцӏула нужеца, амма варанаби къулчӏулел руго.

25Балагьги гӏазабги нужее, диниял гӏалимзаби ва фарисеял! Ххвелал гьаризе бокьула нужее! Нужеца суркӏа-щуруналъул тӏасахун рахъ бацӏцӏад гьабун чураниги, гьелъул жаниса рахъ цӏун буго зулмуялдалъунги хъантӏиялдалъунги бакӏараралъул. 26Ле бецав фарисеяв, цин дуца суркӏа-щурун жаниса бацӏцӏад гьабе, гьелъул къватӏисахун рахъги бацӏцӏалъизе.

27Балагьги-гӏазабги нужее, диниял гӏалимзаби ва фарисеял! Ххвелал гьаризе бокьула нужее! Хъахӏаб лажбар бахараб хобалда релълъуна нуж. Къватӏисахун гьеб берцинго бихьула, амма гьелда жанибин абуни, хварасул ракьа-макъарги цогидаб хъублъиги букӏуна. 28Тӏасан ралагьун, гӏадамазда ккола нуж вализаби ратилилан, амма жаниса нуж ххвелазул ва пасалъиялъул цӏун руго.

29Балагьги гӏазабги нужее, диниял гӏалимзаби ва фарисеял! Ххвелал гьаризе бокьула нужее! Цересел аварагзабазул хобазда тӏад мазарал гьарулел руго нужеца, вализабазул хобазда занал чӏвалел руго. 30Нужеца абулеб буго, дол умумузул заманаялъ ниж рукӏаралани, аварагзабазул би гӏодобе тӏеялъулъ нижеца гӏахьаллъи гьабилароанилан. 31Гьелдалъун нужеца нугӏлъи гьабулеб бугогури дол аварагзаби чӏваразул васал нуж рукӏиналъе. 32Умумузул мунагьазул къолода тӏаде рикьиги балеб буго нужеца.

33Гьай, чӏегӏераб борхьил наслу! Жужахӏалъуре рехизе бугеб хӏукмуялдаса кире нуж рорчӏилел?! 34Гьале дица нужехъе ритӏулел руго аварагзабиги, гӏакъилзабиги, гӏалимзабиги. Гьезул цоял нужеца чӏвазе ва хъанчида разе руго. Цогидал нужерго синагогабазда жанир цӏалаца рухизе руго, цо шагьаралдаса цогидалде лъутизаризе руго. 35Дуниял бижаралдаса нахъе гӏодобе тӏураб тӏолабго бацӏцӏадаб бидул хӏакъ нужеда тӏаде ккезе буго. Вацӏцӏадав Гьабилидаса байбихьун, цинги Мукъадасаб Рукъалъул минаялдаги къурбан хъолеб бакӏалдаги гьоркьов шагьидлъарав Барахиял вас Закарияде щвезегӏан нужеца чӏварал аварагзабазул би буго гьеб. 36Хӏакълъун абулеб буго дица нужеда: гьаб умматалде тӏаде ккезе буго дозул бидул хӏакъ.

Гӏисаца бицунеб буго Иерусалималъул хӏакъалъулъ

37Вай Иерусалим, Иерусалим! Аварагзаби чӏвалеб ва духъе ритӏарал Аллагьасул илчизабазда ганчӏал речӏчӏулеб шагьар! Чан нухалъха дие бокьун букӏараб, къурщица тӏанчӏи гӏадин, дур гӏадамал дирго кваркьиялда гъоркье рачине, амма нужее гьеб бокьичӏо. 38Балагьея, нужер Хирияб Рукъ чӏобого хутӏила. 39«Бетӏергьанас витӏун вачӏунев вугесда баркат лъеги», – ян нужеца абизегӏан вихьиларо нужеда дун гьанжеялдаса хадув.

Currently Selected:

Матфейица бицараб Рохалил хабар 23: AvrNT

Highlight

Copy