Матфейица бицараб Рохалил хабар 27
27
27 бетӏер
Гӏиса Пилатида цеве чӏезавула
1Дуниял рогьарабго, чӏахӏиял кашишзабазги халкъалъул чӏухӏби-хӏакимзабазги – киназго Гӏисада дандечӏараб хӏукму гьабуна гьев чӏвазе къотӏизе. 2Вухь-вухьун вачун Гӏиса кьуна Пилат сардарасухъе.
3Гӏисае хилиплъарав Ягьудаца, гьев чӏвазе хӏукму гьабун букӏин лъайдал, жинцаго гьабуралдаса ракӏ бухӏун, доб лъеберабго гӏарцул гъурущ чӏахӏиял кашишзабазухъеги чӏухӏби-хӏакимзабазухъеги нахъе кьуна. 4Гьес абуна: «Гӏайибго гьечӏеб бидул хӏакъги мунагьги ккана диде». Гьез абуна: «Нижеца щиб гьабеянха мун вугев? Дур иш буго гьеб». 5Мукъадасаб Рокъобе рехун гьеб гӏарацги тун, Ягьуда нахъе ана ва живго жинцаго гъанкъана. 6Гьеб гӏарацги кодобе босун, чӏахӏиял кашишзабаз абуна чиясул бидухъ щвараб гӏарац, Къануналда рекъон, Мукъадасаб Рукъалъе садакъаде кьезе бегьуларилан. 7Цинги гьез, цоцазда дандбан, хӏукму гьабуна гьеб гӏарцухъ «Щагӏихъанасул хур» абулеб бакӏ бичун босизе ва гьеб апарагзаби рукъизе хабалазе тезе. 8Гьединлъидал гьеб бакӏалда жакъа къоялделъагӏанги «Бидул хур» абун цӏар хутӏун буго. 9Гьедин ритӏухълъана Иеремия аварагасул гьадинал рагӏаби: «Ва гьезие щвана лъеберго гӏарцул гъурущ, гьез багьа чӏезабурасухъ кьураб мухь, гьединаб букӏана Исраилил наслуялъул цо-цо гӏадамаз гьесухъ чӏезабураб багьа. Гьеб гӏарцухъги щагӏихъанасул хур босана гьез. 10Гьедин лъазабуна дида Бетӏергьанас».
11Сардарасда цеве чӏезавуна Гӏиса. Сардарас Гӏисада гьикъана:
– Мунищха кколев жугьутӏазул Парччахӏ?
Гӏисаца жаваб кьуна:
– Дуца абулеб бугоха гьедин.
12Амма чӏахӏиял кашишзабазги чӏухӏби-хӏакимзабазги жинде гӏайиб гӏунтӏизабулеб мехалъ, Гӏисаца жаваб кьечӏо. 13Гьебмехалъ Пилатица гьесда абуна:
– Дуда рагӏулеб гьечӏищ гьаз, дуде гӏайиб гӏунтӏизабун, гьабулеб бугеб нугӏлъи?
14Цо рагӏи абунцин Гӏисаца жаваб кьечӏелъул, сардар цӏакъ гӏажаиблъун-хӏикмалъун хутӏана.
Хӏукму гьабула Барабба виччазе ва Гӏиса хъанчида вазе
15Гӏадат букӏана халкъалъе бокьарав цо туснахъ сардарас байрамалъул къоялъ къватӏиве виччалеб. 16Гьеб заманаялда туснахъалъув вукӏана Барабба абун цо цӏар рагӏарав такъсирчи. 17Халкъ бакӏарараб мехалъ Пилатица гьикъана:
– Нужехъе къватӏиве щив виччазе нужее бокьилеб: Бараббайищ яги Масихӏилан жинда абулев Гӏисайищ?
18(Пилатида лъалеб букӏиндалха жахӏда-хӏусудалъ хӏал гьабун жиндихъе кьурав чи гьев вукӏин.) 19Хӏукму къотӏизе тахида гӏодов чӏун Пилат вугеб мехалъ, чӏужуялъ чи витӏун вачӏана, нолъ Гӏисал рахъалъ бихьараб квешаб макьуялъ гӏазаб кьолеб бугин жиндие, дуца гьев щибго гӏайиб гьечӏев валиясе расги гьабугейилан абизе. 20Амма чӏахӏиял кашишзабазги чӏухӏби-хӏакимзабазги халкъ мукӏур гьабун букӏана Барабба къватӏиве виччаян ва Гӏиса чӏвазе къотӏеян гьаризе. 21Сардарас гьезда гьикъана:
– Гьел кӏиязулго кинавав къватӏиве виччазе нужее бокьилеб?
– Барабба, – ян абуна гьез.
22Цинги Пилатица гьезда гьикъана:
– Гьедин батани, Масихӏилан жинда абулев Гӏисада щибха гьабилеб?
Гьел киназго абуна:
– Хъанчида вазе ккола гьев!
23Пилатица гьебмехалъ абуна:
– Гьас гьабураб квешлъигӏаги щиб?
Амма гӏадамал тӏадеги цӏакъ ахӏдезе лъугьана:
– Хъанчида вазе ккола гьев!
24Гьабизе кӏолеб жо гьечӏеблъи бихьун, хӏатта гъалмагъир ккезехъин букӏин бичӏчӏун, Пилатица, лъимги бачӏинабун, кверал чурана, гьел гӏадамазда бихьуледухъ. Цинги гьес абуна:
– Щибго гӏайиб гьечӏев гьав чиясул бидул хӏакъ дида тӏад гьечӏо. Гьаб иш нужер буго.
25Кинабго халкъалъ жаваб кьуна:
– Гьесул бидул хӏакъ нижедаги нижер лъималаздаги тӏад буго.
26Гьебмехалъ Пилатица Барабба гьезухъе виччана. Гӏиса цӏалаца вухеян ва хъанчида ваян амру гьабуна.
Багӏараб гӏабаги зазил хьухьун гьабураб тажги
27Цинги сардарасул рагъухъабаз Гӏиса вачана претория абулеб кӏалгӏаялъул азбаралъуве. Рагъухъабазул тӏубараб полк бахъинабун букӏана гьенибе. 28Тӏаса ретӏелги бахъун, бецӏбагӏараб ххамил гӏаба ххола Гӏисада тӏад. 29Зазил хьухьун гьабураб тажги лъола гьесул ботӏрода, кваранаб квералъухъе гӏансаги кьола. Цинги, гӏад-хочӏие гьавун, гьесда цере накабазда чӏола: «Жугьутӏазул парччахӏ чӏахъаги!» – ян ахӏулаго. 30Гьел Гӏисаде тударула, гӏонсоца бетӏер бухула. 31Хӏалхьезегӏан инжит-хӏакъирги гьавун, доб гӏабаги тӏаса бахъун, жиндирго ретӏел ретӏуна гьесда тӏад. Ва хъанчида вазе вачун уна.
Гӏиса хъанчида вала
32Гьев вачун унаго, хуриса вачӏунев вукӏарав Киренеялдаса цо Симон абулев чи данде ккана. Гьесда баччизабуна гьез Гӏисае гьабураб хъанч. 33Гьел щвана Голгота абулеб бакӏалде. Гьелъул магӏна ккола «Гвангвара гохӏ». 34Кьогӏлъизабураб чагъир кьуна гьесие гьекъезе. Цо кӏалдибеги босун, Гӏисаца инкар гьабуна гьелдаса. 35Гьевги хъанчида ван, можоро тӏамун гьесул ретӏел жидедаго гьоркьоб бикьана рагъухъабаз. 36Хъаравуллъи гьабун гьенирго чӏана гьел. 37«Жугьутӏазул парччахӏ Гӏиса», – абун, гьесде гӏунтӏизабураб гӏайиб тӏад хъвараб хъарщиги чӏвана гьесул бетӏералда тӏадехун.
38Кӏиго хъачагъги вукӏана гьесда цадахъ хъанчида ван: цояв кваранаб рахъалда, цояв квегӏаб рахъалда. 39Цересан унел гӏадамаз, гьев хӏакъир гьавун абулеб букӏана:
– Ле, щущазабун Мукъадасаб Рукъгун, лъабго къоялде гьеб цӏидасан балев багьадур, мунго хвасар гьаве! 40Мун Аллагьасул Вас ватани, хъанчидаса гӏодове рещтӏа!
41Гьединго чӏахӏиял кашишзабиги, диниял гӏалимзабиги ва чӏухӏби-хӏакимзабиги, гьев хӏакъир гьавун гаргадулел рукӏана:
42– Цогидал хвасар гьарилилан вукӏанин, живго хвасар гьавун бажаруларев чи. Исраилил умматалъул парччахӏила жив! Рещтӏа абе гьанже хъанчидаса гъоркье, гьебмехалъ божила нилъ гьесда. 43Аллагьасе живго аманат гьавун вукӏанин, Аллагь гьасдаса рази ватани, гьанже гьес хвасар гьавеян абе. Аллагьасул Вас вугилан гурищ гаргадилев вукӏарав?
44Гьесда цадахъ хъанчида рарал хъачагъалги рукӏана гьединго Гӏисаде хьанделел.
Гӏисал рухӏ босун уна
45Къалъул гӏужалда тӏолабго ракь бецӏлъана. Гьеб бецӏлъи тӏаса инчӏо сагӏат лъабго тӏубазегӏан. 46Сагӏат лъабго тӏубалеб мехалъ, цо гучаб гьаракь гьабун, ахӏана Гӏисаца:
– Эли, Эли! Лема шевактани! – абун. (Гьелъул магӏна букӏана: «Дир Аллагь! Дир Аллагь! Щай дуца дун рехун тарав?»)
47Гьенир рукӏарал цо-цояз, гьеб рагӏараб мехалъ абулеб букӏана Иляс аварагасде ахӏи балеб бугин гьесилан. 48Гьебмехалъ векерун ун гьезул цояс, цӏекӏаб чагъиралдаги ччун, чӏорто босун бачӏана ва, гӏорол тӏогьибги бухьун, бегьана гьесухъе. 49Цо-цояз абулеб букӏана: «Чӏа, гьанже бихьилин гьев хвасар гьавизе Иляс авараг вачӏунищали».
50Цоги нухалъ гучаб гьаракьги гьабун, хвана Гӏиса. 51Гьале Мукъадасаб Рокъоб хирияб бакӏалда бигъун букӏараб пардав тӏарадаса ахаде щвезегӏан кӏихӏи бихъун ана, ракь багъарана, кьураби риххун ана, 52хабал кьватӏун ана, хваралъуса чӏаголъун, гьениса къватӏире лъугьун рачӏана церего хварал гӏемерал вализаби. 53Гӏиса хваралъуса вахъараб мехалъ, гьесда цадахъ Мукъадасаб шагьаралде#27:53 Мукъадасаб шагьар, Байтулмукъадас – Иерусалим. рачӏана гьелги, ва гьенир гӏезегӏан чагӏазда рихьана гьел. 54Ракь багъариги цогидал хӏикматал ишалги рихьараб мехалъ, аскаралъул нусилбетӏерги Гӏиса цӏунун гьесда цадахъ рукӏарал рагъухъабиги цӏакъ хӏинкъана. Гьез абуна:
– Хӏакъикъаталдаги гьав чи Аллагьасул Вас вукӏун вуго.
55Галилеялдаса рахъарал гьесда цадахъ рачӏун, Гӏисае хъулухъалъе чӏарал гӏемерал руччабиги рукӏана гьенир, нахъегӏан чӏун ралагьун. Гьезда гьоркьор рукӏана: 56Магдалаялдаса Марямги, Якъубил ва Юсупил эбел Марямги, Зебедайил васазул эбелги.
Гӏиса хабалъ вукъула
57Маркӏачӏубер рукӏкӏараб мехалъ, гьениве вачӏана Ариматея шагьаралдаса Юсуп абулев цо бечедав чи. Гӏисал мурид вукӏана гьевги. 58Пилатихъе ун гьес гьарана Гӏисал жаназа букъизе кьеян. Пилатица изну кьуна. 59Юсупица Гӏисал жаназа нахъе босула, бацӏцӏадаб хӏебтил мусруги бан, 60гьеб букъула кьурулъ бикӏун жиндиего хӏадурун букӏараб хабалазул нохъода цӏияб хабалъ. Нохъодул кӏалтӏе цо кӏудияб гамачӏги гиризабун тун, гьев нахъе ана. 61Гӏиса хабалъ лъолеб мехалъ, дандритӏухъе гӏодорчӏун рукӏана Магдалаялдаса Марямги ва дойцояй Марямги.
62Гьеб букӏана рузман къо.
Гӏисал хоб цӏунизе хъаравулзаби тола
Нахъисеб къоялъ данделъун чӏахӏиял кашишзабиги фарисеялги Пилатихъе ана ва гьез абуна:
63– Я, бетӏерчӏахъад! Нижеда ракӏалде щвана гьанже: чӏаго вугеб мехалъ гьадав гьерсихъанас абулаан хун лъабго къоялдасан хваралъуса вахъине вугилан. 64Гьединлъидал лъабго къо инегӏан досул хоб цӏунизе хъаравулзаби тӏаме. Досул муридаз, бикъун гьеб жаназагун, гӏадамазда абизе бегьула Гӏиса чӏаголъун вугилан. Досулалдасаги кӏудияб гьереси букӏина гьеб. 65Пилатица гьезда абуна:
– Гьаниса рачун хъаравулзабигун, нужеего бокьухъе цӏуне гьеб хоб.
66Инеги ун, гьез хоб цӏунизе тадбир гьабуна: ганчӏида мугьру чӏвана ва гьенир хъаравулзаби тана.
Currently Selected:
Матфейица бицараб Рохалил хабар 27: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008
