Маркица бицараб Рохалил хабар 1
1
1 бетӏер
Яхӏя авараг халкъалда цеве вахъуна
1Аллагьасул вас Гӏиса Масихӏил хӏакъалъулъ Рохалил хабар гьадин байбихьулеб буго. 2Ишая аварагасул тӏехьалда ругел Аллагьасул рагӏаби ритӏухълъана:
«Гьале, мун вачӏиналде дуе нух къачӏазе дирго илчи#1:2 Илчи – Аллагьас витӏарав чи. вуго дица цеве витӏулев»;
3«Цо ахӏи буго авлахъалда рагӏулеб:
– Бетӏергьанасе нух къачӏай, битӏизабе гьесда цебе шагьра!»
4Гьедин вачӏана Яхӏя авараг авлахъалде. Нужерго мунагьал чуризе гӏоло, кантӏун Аллагьасде руссаян ва лъадалъ ччун рахъаян лъазабулеб букӏана гьес. 5Гьесухъе бачӏунеб букӏана Ягьудиялъул улка-ракьалъулги Иерусалималъулги тӏолабго халкъ. Жидерго мунагьал рехсон хадуб, Аллагьасде руссун, гьезул мунагьал чуризе Иордан гӏурул лъадалъ ччун рахъулаан Яхӏяца гӏадамал. 6Ретӏунеб ретӏелги Яхӏял варанидул квасул букӏана, рачлихъ борчунги букӏана хьвацӏил рачел. Гьес кваналеб жоги букӏана гарцӏги гӏалхул гьоцӏоги. 7Гьес гӏадамазда лъазабулеб букӏана:
– Дида хадувго вачӏунев вуго дидаса гӏемерго къудрат цӏикӏкӏарав. Гӏодове къулун гьесул хьитил рухьен бичизецин мустахӏикъав гьечӏо дун. 8Лъадалъ ччун рахъун, рацӏцӏад гьаруна дица нуж. Гьес нуж рацӏцӏад гьарила Илагьияб Рухӏалдалъун.
Гӏиса Аллагьасул Вас вукӏин загьирлъула
9Гьел къоязда Галилеялъул Назарет шагьаралдаса гьениве вачӏарав Гӏисаги Иордан гӏурул лъадалъ ччун вахъана Яхӏяца. 10Гӏиса лъадалъа къватӏиве лъугьунаго, бихьана гьеб лахӏзаталда, зобалги кӏирикьизарун, Илагьияб Рухӏ, миккидул сураталда боржун бачӏун, гьесухъе рещтӏунеб. 11Цинги гьаракьги рагӏана зобалаздасан:
– Мун вуго дие вокьулев дир Вас! Дудаса вохун вуго дун!
Илбисалъ хӏалбихьула Гӏиса къосинавизе
12Гьебсагӏат гьеб Рухӏалъ Гӏиса гӏицӏаб авлахъалде ине гьесизавула. 13Гьеб авлахъалда кӏикъого къо бана Гӏисаца. Илбисалъги хӏалбихьана гьениб гьев къосинавизе кӏоларищали. Гьенив гӏалхул жанаваразда гьоркьовги вукӏана Гӏиса. Малаикзабиги рукӏана гьенир Гӏисае хъулухъалъе.
Гӏисал тӏоцересел муридал
14Яхӏя авараг гвандинив тӏамун хадув Галилеялде уна Гӏиса. Гьес гьениб лъазабула Аллагьасдасан Рохалил хабар. 15Гьес абулеб букӏана:
– Болжал щвана! Аллагьасул Парччахӏлъи тӏаде гӏунтӏун буго! Нуж кантӏе, Аллагьасде русса! Гьеб Рохалил хабаралде иманги лъе!
16Галилеялъул ралъдал рагӏалдасан унаго, Гӏисада рихьана ччугӏие гьин рехулел Симонги гьесулго вац Андрейги. Гьел рукӏана ччугӏихъаби.
17– Дида цадахъ рилълъа, – ян абуна гьезда Гӏисаца. – Дица нуж лъугьинарила гӏадамал кколел ччугӏихъабилъун. 18Гьенибго гьинги тун, гьебсагӏат гьел Гӏисада цадахъ уна. 19Гьениса гӏемерго рикӏкӏалъилалде, Гӏисада рихьана Зебедайил вас Якъубги гьесулго вац Иоаннги. Ччугӏа кквезе гьин къачӏалел рукӏана гьелги росода тӏад. 20Гьездеги ахӏана Гӏисаца, жинда цадахъ рилълъаян. Жидерго эмен Зебедайги гьесул хӏалтӏухъабиги росонир тун, гьев кӏиявгоги ана Гӏисада цадахъ.
Гӏисаца унтарал гӏадамал сахлъизарула
21Цинги гьел щвана Капернаум шагьаралде. Шамат къо тӏаде щварабго, синагогаялъувеги вачӏун, гьениб гӏадамазе вагӏза гьабизе лъугьана Гӏиса. 22Гӏисал вагӏзаялъ хӏикмалъизарун рукӏана гьел. Диниял гӏалимзабаз гӏадин гуреб, цо хӏалкӏолъи жиндилъ бугев чияс гӏадин малъулеб букӏана гьес.
23Синагогаялъуве лъугьун вачӏана хъубаб женалъ ккурав цо чи. Гьев ахӏдезе лъугьана:
24– Нижедасан дуе къваригӏараб щиб, Назареталдаса Гӏиса! Ниж гъуризейищ мун вачӏун вугев! Дида лъала мун щивали. Илагьияв чи вуго мун! Аллагьас витӏун вуго мун!
25Амма Гӏисаца жен чӏезабуна:
– Кӏал къай дуца! Нахъе а мун гьесул чорхолъа!
26Гьев чиясул нусабго лага сородизабуна шайтӏаналъ. Цинги гӏасияб гьаракьги гьабун, лъутун ана гьеб гьесул чорхолъа. 27Гьелда гӏажаиблъун-хӏикмалъун хутӏана гӏадамал. Гьез цоцазда гьикъулеб букӏана:
– Гьабго щиб хӏикмат? Цӏияб гӏелмуцинищ гьаб? Хъубал жундузецин амру гьабизе кӏолеб къудрат кинаб, гьесул амруялъе мутӏигӏлъулел жундулги кинал?
28Тӏолабго Галилеялда хехго тӏибитӏун ана Гӏисал хӏакъалъулъ хабар.
Гӏисаца Пётрил якьад сахлъизаюла
29Гьебсагӏат синагогаялъуса къватӏиве вахъун, цадахъ Якъубги Иоаннги рачун, гьев ана Симонилги Андрейилги бакӏалде. 30Цӏа-каналъул унтуца бусаде ккун ятана Симонил якьад. Гьебсагӏат Гӏисада бицуна гьей унтун йигилан. 31Аскӏове ун, Гӏисаца гьей, кверги ккун, йорхизаюла. Цӏа-канги ун, якьад гьазие квен-тӏехалда квалквадизе лъугьуна.
32Бакъ тӏерхьун, маркӏачӏубер рукӏкӏарабго, киналго унтаралги хъубал жундуз ккуралги рачӏана Гӏисахъе рачун. 33Тӏолабго шагьар бакӏарун букӏана гьеб сордоялъ Симонил кавудахъе. 34Гӏисаца сах гьаруна батӏи-батӏияб гӏузруялъ унтарал гӏемерал гӏадамал. Чанги чиясул чорхолъа бачахъана хъубаб жен. Гьес хъубал жундул кӏалъазе риччалароан, гьезда лъалеб букӏиндалха гьев щивали.
35Нахъисеб къоялъ хъахӏлъи барабго тӏадеги вахъун, Гӏисаца нух босана гӏадан-чи гьечӏеб бакӏалде ва гьенив Аллагьасе гьари-дугӏаялде вуссун чӏана. 36Гьесул лъалкӏда хадур рахъарал Симонидаги гьасда цадахъ рукӏараздаги ватана Гӏиса. 37Гӏисада гьез абуна киналго мун валагьулел ругилан. 38Гӏисаца гьезда абуна:
– Рилълъа сверухъ ругел росабалъе ва шагьаразде, гьенибги халкъалъе Рохалил хабар бицине ккола дица. Гьелъие гӏололъидалха дун гьаниве вачӏарав.
39Тӏолабго Галилеялъул ракьалде щун, синагогабазде ун, гӏадамазе вагӏза гьабуна гьес ва чангиязул чурхдулъа жундул рачахъана.
Гӏисаца вацӏцӏалъизавула барасалъ унтарав цо чи
40Барасалъ унтарав цо чи вачӏана Гӏисахъе ва накабазда чӏун гьардезе лъугьана:
– Дуе бокьани, дуда кӏолаха дун вацӏцӏалъизавизе!
41Гьесда гурхӏун Гӏисаца, гӏебеде битӏун квер хъвана гьесда. Цинги абуна:
– Дие бокьун буго мун вацӏцӏалъизе. Вацӏцӏалъе мун!
42Тӏад букӏараб чанхъги гъенон ун, гьебсагӏат вацӏцӏалъана гьев чи. 43-44Нахъе витӏулаго, Гӏисаца гьесда лъазабуна:
– Вореха, дуца лъиданиги бицунге гьаб хӏалтӏи! Мусал къануналда рекъон, мунго вацӏцӏалъун вукӏин гӏадамазда лъазе, кашишасухъеги ун, гьесда дурго черх бихьизабе ва мунго вацӏцӏалъаралъухъ къурбанги хъвезабе.
45Амма гьениса нахъе аравго, гьев чи лъугьана ккараб иш киназего гьурщизе. Гьединлъидал Гӏисада кӏвечӏо тӏатун шагьаралде вачӏине, гӏадан-чи гьечӏеб бакӏалда вахча-хьван чӏезе ккана. Амма киса-кисагоги гӏемераб халкъ бачӏунаан гьесухъе.
Currently Selected:
Маркица бицараб Рохалил хабар 1: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008
