Маркица бицараб Рохалил хабар 11

11 бетӏер

Гӏиса Иерусалим шагьаралде лъугьунев вуго

1Гьел Иерусалималде щолел рукӏана. Зайтуналъул магӏарда аскӏор ругел Бетфагиялде ва Бетаниялде гӏагарлъидал, кӏиго муридги аскӏове ахӏун, 2Гӏисаца гьезда абуна:

– Гьудуб нилъеда цебе бугеб росулъе а нуж. Росулъе лъугьаралго, цо бакӏалда бухьун батила жеги чи тӏад рекӏинчӏеб кӏудияб кӏерт. Рухьадасаги бичун, гьебги бачун рачӏа. 3Нужеца гьабулеб щибилан гьикъулев чи ккани, гьесда абе нижер Тӏадегӏанав Гӏисае къваригӏун бугин гьеб; кватӏичӏого нахъе биччазе бугиланги абе.

4-5Гьел ана. Гьениб гьезда батана къотӏноб цо чиясул кавуялда бухьараб кӏудияб кӏерт. Рухьадаса гьеб бичулел рукӏаго, гьенир рахъун чӏун рукӏарал гӏадамаз гьикъана:

– Нужеца гьабулеб щиб? Щай нужеца гьеб кӏерт рухьадаса бичулеб?

6Гӏисаца малъухъе кьуна муридаз гьезие жаваб. Цинги доз гьалги риччан тана. 7Кӏерт Гӏисахъе бачун бачӏана. Гьелъул гьодиде рехана гьез жидерго партал, ва Гӏисаги гьелда тӏад рекӏана.

8Гӏемерисез, тӏаса бахъун ретӏел букӏана нухда тӏибитӏулеб. Цогидаз абуни, магъилъ ругел гъутӏбуздаса къотӏун, гӏурччинал гӏаркьалаби рукӏана гьесда цере тӏиритӏулел. 9Гьесда цере-цере унезги хадур рачӏунезги турки ахӏулеб букӏана:

– Гьошанна! Бетӏергьанасул къудраталдалъун витӏун вачӏунев вугесда баркат лъеги! 10Тӏаде гӏунтӏулеб бугеб нилъер эмен Давудил Парччахӏлъиялда баркат лъеги! Гьошанна! Тӏадегӏанав Аллагьасе рецц!

11Иерусалималде щваравго, Гӏиса Мукъадасаб Рокъове лъугьана ва, киса-кибего бер щвезабун, хал-шал гьабуна. Маркӏачӏубер рукӏкӏинехъин букӏиндал, анцӏила кӏиявго чапарги вачун, Гӏиса Бетаниялде тӏадвуссана.

Тӏад пихъ гьечӏеб инжиралъул гъветӏ

12Нахъисеб къоялъ радакьго вахъун Бетаниялдаса вачӏунаго, Гӏиса вакъана. 13Рикӏкӏадасанго гьесда бихьана тӏад тӏамах бараб цо инжиралъул гъветӏ. Гъотӏода пихъ гьечӏодайилан аскӏове индал, тӏамах гурони, цониги инжир батичӏо: инжир барщизе заман щун букӏинчӏо жеги. 14Цинги Гӏисаца гъотӏода абуна:

– Дуда тӏад бижун пихъ тӏокӏаб лъицаниги киданиги квине хъван батугеги.

Гьеб рагӏана гьесул муридаздаги.

Гӏисаца даранчагӏи Мукъадасаб Рокъоса къватӏире гъола

15Гьале Иерусалималде щвана гьел. Мукъадасаб Рокъове лъугьун, гьенир даран-базаралда рукӏарал гӏадамал къватӏире гъезе лъугьана Гӏиса; гӏарац хисулел чагӏазул столал ва къурбаналъе хъвезе маккал ричулел чагӏи тӏад гӏодор чӏолел бакӏал кӏалагъоркье чӏвазаруна. 16Мукъадасаб Рукъалъул азбаралъусан гӏадамаз къайи баччизеги гьукъана гьес. 17Цинги Гӏисаца, гьезие малъа-хъвай гьабун, абуна:

– Тӏехьалда хъван гьечӏищ: «Гьаб Дир рукъалда цӏар букӏине буго киналго халкъазул как-диналъул рукъ», – абун. Нужецайин абуни гьаб хъачагъазул нохъоялде сверизабун буго.

18Гӏисал гьеб калам рагӏидал, диниял гӏалимзабиги чӏахӏиял кашишзабиги ургъизе лъугьана гьев тӏагӏинавизе рес киндай батилаян. Гьесукьа хӏинкъун рукӏана гьел, щайгурелъул Гӏисал гӏелмуялъ тӏолабго халкъ хӏикмалъизабун букӏиндал.

19Бакъ тӏерхьунеб гӏужалда шагьаралдаса къватӏире рахъана Гӏисаги муридзабиги.

Инжиралъул гъветӏ бакъван батула

20Нахъисеб къоялъ радал тӏадруссун рачӏунаго балагьидал, доб инжиралъул гъветӏ кьолболъанго бакъван бугоан. 21Гӏисаца абун рукӏарал рагӏабиги ракӏалде щун, Пётрица гьесда абуна:

– Я Мугӏалим! Балагье, сон нагӏана кьураб инжиралъул гъветӏ бакъван бугеб куц.

22Гӏисаца гьезда абуна:

– Аллагьасде божи-иман цӏуне нужеца. 23Хӏакълъун абулеб буго дица нужеда: рекӏелъе щаклъиги ккезе биччачӏого, жинца абухъе лъугьине букӏиналдаги божун, пуланав чияс гьаб мегӏералда абуни, гьаниса бахъун ун ралъдалъе кӏанцӏеян, мегӏер гьесие мутӏигӏлъизе буго. 24Гьединлъидалин дица нужеда абулеб бугеб: дугӏадулъ нужеца Аллагьасда щиб гьарулеб бугониги, нуж божа гьес нужер гьари тӏубан бугилан. Тӏубазеги бугебха гьеб! 25-26Гьари-дугӏаялъе Аллагьасда цере чӏараб мехалъ, нужер ццин бугел гӏадамал ратани, гьезда тӏасалъугьа, гьебмехалъ Зобалазда вугев нилъер Эменги лъугьине вуго нужер къосиналда тӏаса.

«Лъица дуе ихтияр кьураб?»

27Нахъеги Иерусалималде щвана гьел. Мукъадасаб Рокъов жанив тирулев Гӏиса вугеб мехалъ, гьесда аскӏоре рачӏана чӏахӏиял кашишзаби, диниял гӏалимзаби, чӏухӏби-хӏакимзаби. 28Гьез Гӏисада гьикъана:

– Гьаб хӏалтӏи гьабизе ихтияр бугебищ дур? Лъица дуе гьеб ихтияр кьураб? – абун.

29Гӏисаца гьезие жавабалъе абуна:

– Дицаги кьела нужее цо суал. Нужеца гьелъие жаваб кьуни, гьебмехалъ бицина дица нужеда лъица дие гьеб ихтияр кьурабали. 30Лъадалъ ччун рахъун гӏадамал рацӏцӏад гьаризе ихтияр Яхӏяе кисан щун букӏараб: зобалаздасанищ яги гӏадамаздасанищ? Кье дие жаваб.

31Цоцазда гьоркьоб хабар ккана гьезул. «Зобалаздасан букӏанин абуни, гьес нилъеда абилагури, гьедин батани, щайха нуж Яхӏяда божичӏелилан. 32Гӏадамаздасан букӏанин абуни...» Гьедин абизеги, халкъалъукьа хӏинкъун рукӏана гьел, киназго Яхӏя хӏакъав авараглъун рикӏкӏунев вукӏиндал. 33Жидеда лъаларилан жаваб кьола Гӏисае гьез. Гӏисаца гьездаги абула:

– Дица нужедаги бицинаро лъил ихтияралдалъун гьаб хӏалтӏи гьабулеб бугебали.

Currently Selected:

Маркица бицараб Рохалил хабар 11: AvrNT

Highlight

Copy