Маркица бицараб Рохалил хабар 8

8 бетӏер

Гӏисаца ункъазарго чи гӏорцӏизавула

1Гьел къоязда нахъеги цӏакъ гӏемераб халкъ бакӏарана Гӏисада аскӏобе. Квен-тӏехги гьечӏого гьел хутӏидал, жиндирго муридалги аскӏоре ахӏун, Гӏисаца гьезда абуна:

2– Гьал гӏадамазда гурхӏун вуго дун. Гьале лъабабго къоялъ дида аскӏор чӏун руго. Кваназе жоги хутӏун гьечӏо гьазухъ. 3Кваначӏого дица риччани, рокъоре унаго, рухӏ дагьлъун ккезе бегьула гьел, цӏакъго рикӏкӏадаса рачӏаралги ругелъул гьезда гьоркьор.

4Муридаз гьесда абуна:

– Гьаниб гӏалхуда гьазие гӏураб чед лъица балагьилеб, киса бахъилеб? – абун.

5Чан чед нужехъ бугебилан гьикъана Гӏисаца гьезда. Анкьго чед бугилан абуна гьез. 6Цинги Гӏисаца гьел гӏадамазда абуна кваназе гӏодор чӏайилан. Гьеб анкьабго чедги кодобе босун, тӏаде дугӏаги гьабун, Гӏисаца бек-бекун жиндирго муридазухъе кьуна, халкъалъе бикьейилан. Гьезги гьеб халкъалъе бикьана. 7Дагьа-макъаб ччугӏаги букӏана гьезухъ. Додинго тӏаде дугӏаги гьабун, гьебги кьуна Гӏисаца муридазухъе, халкъалъе бикьеян. 8Гӏорцӏизегӏан кванана гьел гьенир; нахъе хутӏарал чадил мочӏабазулги анкьго гьегь цӏуна. 9Гьенир кванарал гӏадамазул вукӏана ункъазаргогӏанасев чи. 10Гьелги нахъе ритӏун, Гӏиса гьебсагӏаталъ жиндирго муридалгун цадахъ, росодаги рекӏун, Далманутаялъул ракьалде ана.

Гьаб умматалъе гӏаламат букӏине гьечӏо

11Гьенир Гӏисахъе рачӏун, цо-цо фарисеял лъугьана гьевгун дагӏбадизе. Гьесул хӏалбихьизелъун, гьез тӏалаб гьабуна зодисан гӏаламат бихьизабеян. 12Угьун хӏухьелги биччан, Гӏисаца абуна:

– Щай гьаб умматалъ гӏаламат тӏалаб гьабулеб? Хӏакълъун абулеб буго дица: гьаб умматалъе гӏаламат букӏине гьечӏо.

13Гьел гӏадамалги рукӏаралъур тун, Гӏиса нахъеги росоде вахана ва ралъдал добцояб рахъалде ана.

Фарисеязулги гьеродилазулги реччеялъул хӏакъалъулъ

14Квен цадахъ босизе кӏочон тун батана муридазда; цо гурони чед батичӏо гьезухъ. 15Гӏисаца гьезда лъазабуна:

– Вореха, фарисеязулги гьеродилазулги реччеялдаса цӏунун чӏа нуж.

16Цоцазда гаргадизе лъугьана гьел:

– Нилъехъ чед гьечӏилан абураб магӏна букӏине ккола гьелъул.

17Гьезул пикру бичӏчӏун, Гӏисаца абуна:

– Чед гьечӏилан щай нуж гаргадулел? Нужго кинал гьедигӏан бичӏчӏи гьечӏел ва нахъгӏунтӏуларел? Кигӏан согӏлъун нужер ракӏал ругел? 18-19Берал ругониги бихьулареб кин? Гӏундул ругониги рагӏулареб кин? Нужеца ракӏалде щвезабе: дица щуазарго чиясе бек-бекун щуго чед кьун хадуб хутӏарал чадил мочӏабазул чан гьегь цӏураб?

Анцӏила кӏиго гьегь цӏунилан жаваб кьуна гьез.

20– Анкьго чед ункъазарго чиясе бикьараб мехалъ, хутӏарал мочӏабазул чан гьегь цӏураб?

Анкьго гьегь цӏунилан жаваб кьуна гьез.

21– Гьанжеги бичӏчӏичӏебищ нужеда? – ян гьикъана Гӏисаца гьезда.

Бетсаидаялда цо бецав чиги сахлъизавула

22Цинги гьел щвана Бетсаидаялде. Вачун вачӏуна цо бецав чи. Гьесда квер хъвайилан гьарула гьез Гӏисада. 23Гӏисаца кверги ккун гьев чи росулъа къватӏиве вачана ва гьесул кӏиябго бадибеги ту-тун, беразда квералги рахъун, гьесда гьикъана щибниги бихьулеб бугищилан. 24Сверухъ хал-шалги гьабун, гьес абуна:

– Аскӏосан унел гӏадамал рихьулел руго дида гъутӏби гӏадин.

25Гӏисаца нахъеги беразда кверал рахъараб мехалъ, гьев чи цеве валагьана, – бералги сахлъун, кинабго жо баянго бихьулеб батана гьесда. 26Гӏисаца гьев гьенисанго рокъове витӏана ва гьадаб росулъан унгеянги лъазабуна.

Пётрица иман лъуна Гӏиса Масихӏ вукӏиналде

27Гьениса вахъун жиндирго муридалгун цадахъ Гӏиса ана Филиппил Къайсарият шагьаралда гӏагарлъухъ ругел росабалъе. Нухда Гӏисаца гьезда гьикъана:

– Щивлъун дун гӏадамаз рикӏкӏунев? – абун.

28Гьез жаваб кьуна:

– Цояз абулеб буго мун Яхӏя авараг вугилан, цояз абулеб буго Иляс авараг вугилан. Цогидаз абулеб буго аварагзабаздасан цояв кколилан.

29Цинги Гӏисаца гьезда гьикъана:

– Нужеца щивлъунха дун рикӏкӏунев? – абун.

Пётрица жаваб кьуна:

– Мун вуго Масихӏ.

30Лъиданиги гьеб бицунгейилан лъазабуна Гӏисаца гьезда.

Гӏисае букӏине бугеб гӏазаб-гӏакъуба

31Цинги гьес бицине байбихьана Гӏадамил Лъимаца гӏемераб гӏазаб-гӏакъуба хӏехьезе ккезе бугин, чӏухӏби-хӏакимзабазги, чӏахӏиял кашишзабазги, диниял гӏалимзабазги гьесдаса инкар гьабизе бугин, чӏвазе вугин ва лъабабилеб къоялъ хваралъуса вахъинеги вугин. 32Гьеб кинабго Гӏисаца гьезда рагьун бицана. Амма довегӏанги вачун Пётр лъугьана гьедин абугейилан гьесда дандечӏун кӏалъазе. 33Гьебмехалъ, кьурун вуссун, жиндирго муридазухъ валагьана гьев. Цинги, Пётрги вуцӏцӏинавун, абуна:

– Тӏагӏа дида аскӏоса, Илбис! Аллагьасулаб тун, инсанасулаб лъугьун буго дур рекӏелъе.

34Гьениб букӏараб халкъги жиндирго муридалги аскӏоре ахӏун, Гӏисаца абуна:

– Дида цадахъ вилълъине бокьарав чи ватани, гьес жиндирго напсалдаса инкар гьабе, жиндаго тӏаде ккараб хъанчил гӏазабги бачче ва дида хадув вачӏа. 35Щаян абуни, жиндирго гӏумру цӏунизе бокьулев чи гьелдаса махӏрумлъила, диеги Рохалил хабаралъеги гӏоло гӏумруялдаса махӏрумлъизе разилъарас гьеб хвасар гьабила. 36Жиндирго рухӏги рецӏалие кьун, тӏолабго дуниялалъул кверщел хъатикье щвеялъул щиб пайда бугеб инсанасе? 37Жиндирго рухӏалъухъ хисизе жо щиб бугеб инсанасул? 38Гьаб мунагьаб ва пасатаб умматалда цеве дунги дир рагӏабиги сан гьаричӏев чи Гӏадамил Лъимацаги сан гьавизе гьечӏо, жиндирго Инсул нуралъ гвангъун, мукъадасал малаикзабигун цадахъ гьев вачӏунеб мехалъ.

Currently Selected:

Маркица бицараб Рохалил хабар 8: AvrNT

Highlight

Copy