Эклц 20
20
Абрахам болн Авимелех
1Тендәсн Абрахам Негев гидг һазр тал һарад, Кадеш Шур хойран хоорнд бүүрлнә. Герар балһснд тер күүнә күн болҗ бәәв. 2Тенд эврәннь гергн Сарран тускар келнә: «Сарра мини дү күүкн». Герарин хан Авимелех Сарраг дуудулад, бий талан авна. 3Болв сөөһәр Авимелехин зүүднд Бурхн үзгдәд:
– Эн күүкд күүг авснас көлтә чи үкхич. Терчнь залута, – гиҗ келнә.
4Зуг Авимелех терүг көндәһәд уга билә. Тегәд тер келнә:
– Деед Эзн, намаг болн килнц уга улсиг Та алхийт? 5«Эн мини дү күүкн», гиҗ Абрахам нанд келлүс. «Эн мини ах», гиҗ күүкд күн эврән келлә. Мини санан цевр, бийдм нүл уга.
6-7– Э, э, чини санан цевр бәәсинь Би меднәв: Мини өмнәс һарһх килнцәс Би чамаг зогсавв. Тегәд Би чамар терүг көндәлһсн угав. Ода эн гергиг залуднь хәрү өг. Залунь әәлдәч. Тер чини төлә мөргх. Чи ода әмд үлдҗәнәч. Болв кемр чи гергинь хәрү эс өгхлә, эврәннь өөрхн улстаһан чи маһд уга үкхич, – гиҗ терүнд Бурхн зүүднднь келнә.
8Маңһдуртнь өрүн өрлә, Авимелех эврәннь зарцнран цуглулад, учрсн йовдлын тускар келҗ өгнә: тедн дегд икәр чочна. 9Дарунь Авимелех Абрахамиг дуудад иигҗ келнә:
– Чи мадниг яһвчи? Намаг, мини орн-нутгиг иигҗ икәр гемшәдгәр би чамд ямаран му юм үзүлүв? Чи нанла мел һарһшго юм һарһвч. 10Тиим юм һарһхларн, чи юуна тускар ухалҗалач?
11– «Эн һазрт Бурхнас әәдг улс уга, тедн намаг гергнәсм көлтә алх», – гиҗ би ухалув. 12Йосндан болхла, тертн мини дү күүкн. Мини экәс һарсн эс болв чигн, мини эцкин күүкн тертн. Тертн мини гергн болв. 13Эцкинм герәс Бурхн намаг зуульчлулад йовулхла, би терүнд иигҗ келләв: «Бидн альд одв чигн, мини тускар эн мини ах гиһәд кел гиҗ би терүг эрҗ сурлав», – гиҗ Абрахам хәрү өгнә.
14Тиигхләнь Авимелех терүнд хөд, мал, ялчнр кеҗ күүкд, залу улс өгв; Сарра гергинь хәрү өгв.
15– Мини һазр эн: дурлсндан бә, – гиҗ Авимелех терүнд келв.
16– Чини ахд би 1 000 цаһан мөңг өгчәнәв. Энүгәрн чини һундлыг хамдан бәәсн улсин нүүрт мартулхар седҗәнәв. Чи мел гем уга болҗанач, – гиҗ тер Саррад келнә.
17-18Тегәд Абрахамин гергн Сарраһас көлтә Авимелехин герт үрн олддгинь Деед Эзн зогсаҗ. Абрахам Бурхнд мөргнә. Бурхн Авимелехиг, терүнә гергиг, ялчнр күүкд улсиг эдгәнә. Тегәд теднь дәкнәс үр һарһдг болв.
Currently Selected:
Эклц 20: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
