Эклц 21
21
Ицхакин төрлһн
1Деед Эзн келсәрн Саррад цаһан санаһан күртәв, Саррад өгсн үгән күцәв. 2Сарра саата болад, көгшрх наснднь, Бурхна заасн цаглань Абрахамд көвү һарһна. 3Нилх көвүндән Абрахам Ицхак гидг нер өгнә. 4Терүнә Ицхак көвүнь төрҗ һарад нәәм хонсна дару, Бурхна келсәр, Абрахам терүнд керчлһ кенә. 5Ицхак төрхд Абрахам 100 наста бәәҗ.
6– Бурхн намаг инәлһв. Энүнә тускар соңссн күн болһн намаг дахад инәх, – гиҗ Сарра келв.
7– Сарра көкәрн күүкд асрх гиҗ кен Абрахамд келх бәәсмб? Болв би терүнд көгшрх наснднь көвү һарһҗ өгүв, – гиҗ Сарра немв.
Хагар Ишмаил хойриг көөлһн
8Көвүн өснә, көкнәс һарһна. Ицхакиг көкнәс һарһсн өдрлә Абрахам ик нәр кенә. 9Болв Абрахамд Египетин Хагарин һарһҗ өгсн көвүн Ицхакиг наадлад наад бәрҗәхиг Сарра үзәд, 10залудан келнә:
– Эн зарцан Ишмаил гидг көвүтәһинь көөчк. Яһад гихлә эн зарцин көвүн мини Ицхак көвүнлә үлдл зөөр хувалцшго.
11Абрахам йир икәр һундрхна, юңгад гихлә Ишмаил терүнә көвүн болҗана. 12Болв Бурхн терүнд келнә:
– Көвүнәсн болн зарц күүкд күүнәс көлтә бичә һундрх. Сарраг соңс, терүнә келсәр ке. Чини тохм Ицхакар дамҗад тарх. 13Болв Би зарц күүкд күүнәс һарсн көвүнәс бас улс үүдәнәв. Яһад гихлә, эн чини көвүн болҗана.
14Маңһдуртнь өрүн өрлә Абрахам хотта, уста бортх авад Хагарин ээм деер тәвәд, көвүтәһинь хамднь йовулчкна. Хагар йовад, Беэр-Шева гидг көдә һазр эргәд төөрнә. 15Бортхд бәәсн усн чилхлә, көвүһән бичкн модн дор үлдәчкәд, 16саадг сумн нисәд күрх дүңгә һазрт хооран һарад сууна.
– Көвүм яһҗ үкчәхинь хәләхшв, – гиҗ экнь санна. Тенд суухларн, Хагар икәр уульна. 17Бурхн көвүнә уульсиг соңсна. Теңгрәс Бурхна элч Хагариг дуудад келнә:
– Хагар, юн болв? Бичә ә. Тенд көвүн уульҗасиг Бурхн соңсв. 18Бос, көвүг босхад, һараснь ав. Би терүнәс алдр улс үүдәнәв.
19Эн кемлә Бурхн Хагарт уста худг үзүлнә. Бортхан усар дүүргәд, экнь көвүндән ус өгнә. 20-21Көвүн өстл, Бурхн терүнлә бәәв. Көвүн Паран гидг эҗго көдәд бәәһәд, саадгар хадг күн болв. Экнь энүнд Египетәс күүк авч өгв.
Беэр-Шевад кесн бооцан
22Тер цагт Авимелех болн терүнә цергин һардач Пихол Абрахамд иигҗ келцхәнә:
– Бурхн альд чигн, ю кеҗәв чигн чамла бәәнә. 23Тегәд эн ормд, Бурхна өмн, нанд чигн, мини үрдт чигн, мини хөөт үйнрт чигн му юм үзүлшгоһан лавлҗ андһар өг. Нанд болн күүнә күн болҗ чини бәәх орн-нутгт, мини чамд өгсн хәәрлтлә әдләр, хәәрлтән күрг, – гиҗ келв.
24– Андһаран өгчәнәв, – Абрахам гив.
25Дәкәд Авимелехин зарцнр уста худг булаҗ авснд Абрахам Авимелехиг бурушав. 26Болв Авимелех иигҗ келв:
– Кен тиигсинь би медҗәхшв. Чи нанд келсн угач, би эндр өдр күртл энүнә тускар соңсад угав.
27Абрахам хөд, мал дахулҗ авч ирәд, Авимелехд өгнә. Тедн бооца кенә. 28Абрахам сүргәс 7 баахн наста хө йилһҗ һарһна.
29– Чини шишлң йилһҗ авсн 7 баахн наста хөн юн учрта болҗахмб? – гиҗ Авимелех Абрахамас сурна.
30– Тер худгиг намаг малтсиг герч кеҗ эн 7 баахн наста хө нанас ав, – гиҗ тер хәрү өгв.
31Тер учр деерәс тер һазр Беэр-Шева#21:31 Беэр-Шева – эн нерн еврей келәр «долана худг», эс гихлә «андһарин худг» гидг чинртә. гиҗ нерәдгдв. Тедн хойр тенд андһар өглә. 32Беэр-Шевад бооца кеһәд, Авимелех болн Пихол пилистмүдин һазр тал хәрү ирцхәв. 33Беэр-Шевад Абрахам тамариск модд тәрнә, тенд мөңк Бурхна, Деед Эзнә нер дуудна. 34Пилистмүдин һазрт Абрахам удандан бәәв.
Currently Selected:
Эклц 21: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
