Эклц 22
22
Абрахамиг сөрлһн
1Цаг давад, Бурхн Абрахамиг сөрҗ хәләнә.
– Абрахам! – гиҗ Тер келнә.
– Би энд бәәнәв, – гиҗ Абрахам хәрү өгнә.
2– Ор һанцхн дурта Ицхак көвүһән авад, Мориа гидг һазр тал йов. Тенд уул деер көвүһәрн шаталһна тәкл тәк. Альк уулд кехинь Би чамд келҗ өгнәв, – гиҗ Бурхн келнә.
3Маңһдуртнь өрүн өрлә Абрахам босад, элҗгнән тохҗ авад, хойр зарцан болн Ицхак көвүһән дахулад, шатах мод хамхлҗ авад, Бурхна заасн һазр тал һарад йовна. 4Һурвдгч өдртән Абрахам холас тер һазриг үзнә.
5– Тадн элҗгнтәһән энд үлдтн, бидн көвүтәһән тиигәрән одад, мөргәд, дәкәд тадн тал хәрү ирнәвидн, – гиҗ Абрахам зарцнртан келнә.
6Абрахам шатах модан авад, Ицхакин нурһн деер тәвәд үүрүлнә, эврән һал, утх авна. Хоюрн тегәд йовна. 7Ицхак эврәннь эцк Абрахамд келнә:
– Эцк!
– Э, э, көвүм минь, – гиҗ Абрахам хәрү өгнә.
– Маднд һал болн модн бәәнә, зуг тәкл тәкх хурһн альд бәәхмб? – гиҗ Ицхак сурв.
8– Көвүн минь, Бурхн Эврән шаталһна тәкл тәкх хурһиг хәләх, – гиҗ Абрахам хәрү өгнә. Цаарандан эдн хоюрн йовад йовв.
9Бурхна заасн һазрт тедн күрхләрн, Абрахам тәкл тәкх бәәр белднә, терүн деер модан тәвәд, деернь эврәннь Ицхак көвүһән күләд кевтүлнә. 10Абрахам көвүһән алхар һартан утх авна. 11Болв теңгрәс Бурхна элч терүг дуудна:
– Абрахам! Абрахам!
– Би энд бәәнәв, – гиҗ тер хәрү өгнә.
12– Көвүн тал бичә һаран өрг, бичә терүг көндә. Ода чи Бурхиг икәр күндлхиг Би медҗәнәв. Яһад гихлә чи Мини төлә ор һанцхн көвүһән хармнсн угач, – гиҗ Бурхна элч келнә.
13Деегшән хәләхләрн, Абрахам нигт бура модн дотр өврәрн оралдсн хуц үзнә. Тер хуциг татҗ авад көвүнәннь ормд шатаһад, тәкл тәкнә. 14Тер ормиг Абрахам «Деед Эзн хәләх» гиҗ нерәднә. Тегәд ода күртл «Деед Эзн уул деерән хәләх» гиҗ келцхәнә.
15Деед Эзнә элч теңгрәс хойрдад Абрахамиг дуудад иигҗ келнә:
16– Деед Эзн Бийәрн андһар өгчәнәв гиҗ келҗәнә. Чи иим юм һарһад, Мини төлә ор һанцхн көвүһән хармнсн угач, 17тегәд,
Би маһд уга чамаг әдслнәв,
Чини хөөт үйнриг тооһарнь икдүлнәв:
Тедн теңгртк одд мет, теңгсин көвән элсн мет олн болх.
Чини хөөт үйнр дәәсдиннь балһсд эзлҗ авх.
18Чи Намаг соңсснас иштә,
Чини хөөт үйнрәр дамҗад, һазр деерк цуг улс әдслгдх.
19Абрахам зарцнр талан хәрү ирв. Тегәд тедн хамдан Беэр-Шева тал йовцхав. Абрахам Беэр-Шевад бәәлә.
Нахорин көвүд
20Цаг давна. Милка бас эк болв, чини ах Нахорт көвүд һарһҗ өгв, гиҗ Абрахам соңсна. 21Түрүңкнь Уц гидг нертә, терүнә дү Буз, Кемүэл (Арамин эцк), 22Кесед, Хазо, Пилдаш, Идлап болн Бетүэл.
23Ребекан эцк Бетүэл болв. Эн 8 көвүг Милка Абрахамин ах Нахорт һарһҗ өгв. 24Реума гидг нертә терүнә хөөт гергн бас көвүд һарһна. Теднә нерд: Тевах, Гахам, Тахаш болн Мааха.
Currently Selected:
Эклц 22: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
