Эклц 25
25
Абрахамин үкл
1Абрахам талдан герг бийдән авна. Терүнә нерн Хетура. 2Тер Абрахамд Зимраниг, Йокшаниг, Меданыг, Мидьяниг, Ишбакиг болн Шуахиг һарһҗ өгнә. 3Шебән Дедана хойрин эцк Йокшан бәәҗ. Дедана хөөт үйнр ашурнр, летушнр болн леюмнр бәәҗ. 4Эфа, Эфер, Ханок, Авида болн Элда Мидьяна көвүд. Тедн цугтан Хетуран хөөт үйнр. 5Абрахам бийдән бәәсән цугтаһинь Ицхакд үлдәнә. 6Әмд бәәхдән Абрахам хөөт гергдиннь көвүдт белг өгәд, Ицхак көвүнәсн хольҗулад, дорд үзгин һазрур йовулҗ.
7Абрахам ут турштан 175 нас наслна. 8Түүнә наснь күцәд, икәр көгшрәд, тер сүл әмсхлән һарһад өңгрнә. Эврәннь өвкнр тал тер һарна. 9-10Терүнә Ицхак Ишмаил хойр көвүнь эцкән Махпела гидг хадын көндәд оршана. Тернь Абрахамин хетмүдәс хулдҗ авсн Мамренәс дорд үзг тал бәәсн Цохарин көвүнә Эпрона тәрәнә һазр билә. Тенд Абрахам Сарра гергнәннь хаҗуд оршагдв. 11Абрахамиг өңгрснә хөөн Бурхн тиигхд Беэр-лахай-ройин хаҗуд бәәсн терүнә көвүн Ицхакд әдс өгнә.
Ишмаилин көвүд
12Сарран зарц Египет һазра күүкд күн Хагар Абрахамд һарһҗ өгсн Абрахамин Ишмаил көвүнә тохм уңг эн. 13Ишмаилин көвүдин нерд төрсн диг-дараһарн эн: Невайот – Ишмаилин түрүңк көвүн, Кедар, Адбеел, Мивсам, 14Мишма, Дума, Масса, 15Хадад, Тема, Етур, Нафиш болн Кедма. 16Эннь Ишмаилин көвүд – 12 нойн. Цаг зуур бүүрлсн болн бәәрн һазра отгуд теднә нерд зүүнә. 17Ишмаил 137 җилд әмд бәәв. Сүл әмсхл һарһад өңгрв, эврәннь өвкнр тал һарв. 18Терүнә хөөт үйнр Ашур ордг хаалһар Египетин меҗән хаҗуд Хавилас Шур күртл бәәх һазрт бүүрлцхәв. Тедн эврәннь ахнр-дүүнртәһән өшәркҗ бәәцхәв.
Яков Эсав хойр
19Абрахамин көвүн Ицхакин уңг-тохмин туск келвр эн: Ицхак Абрахамин көвүн. 20Паддан-Арамас#25:20 Эс гихлә Месопотамийин барун ар үзг. Лавана дү күүкн болн арамей Бетүелин күүкн Ребекаг буулһҗ авхд Ицхак дөчтә билә. 21Ицхак Деед Эзиг гергнәннь төлә эрҗ сурна, яһад гихлә терүнд үрн олддго билә. Деед Эзн терүнә зальврлһиг соңсна – терүнә гергн саата болна. 22Геснд бәәх үрднь нег-негән тиирәд бәәхлә, Ребека келнә:
– Нанла яһад иим юмн учрҗахмб?
Деед Эзнәс сурхар тер йовна.
23Деед Эзн иигҗ келнә:
– Чини геснд хойр отг бәәнә,
Чамас хойр келн-улс үүдәд салх;
Негнь негнәсн күчтә болх,
Ахнь дүүдән заргдх.
24Күүкд һарһх цаг ирхлә, гергнә геснд икр көвүд бәәдг болна. 25Түрүңкнь улан махмудта һарна. Нооста махмуднь кевтән килң хувцар бүркәтә мет болна. Тегәд терүнд Эсав#25:25 Эсав – хөөннь Эсавин хөөт үйнр бәәсн Сеир гидг һазрла эн нерн ирлцҗәнә. Әәһәрн Сеир «нооста» гисн еврей келнә үгин бәәдлтә. гидг нер өгнә. 26Дарунь Эсавин дүнь терүнә тавгаснь бәрсн һарна. Тегәд дүүднь Яков#25:26 Яков – эн нерн «тавгас тер бәрҗәнә» гидг чинртә (теҗгәр келхлә «тер меклҗәнә»). гидг нер өгнә. Ребекаг тедниг һарһхд Ицхак җиртә бәәҗ.
27Көвүд өснә. Эсав мергн аңһуч, кеерин күн болна. Яков болхла тогтун, герән эргәд бәәдг күн болв. 28Ицхак зерлг аңгуд идхдән дурта болад, Эсавд икәр дурлдмн. Ребека болхла Яковд икәр дурта бәәҗ.
29Нег дәкҗ Яковиг буда чанҗахла, Эсав муурад, өлсәд кеерәс орҗ ирнә.
30– Шулуһар тер улан юмнасн нанд ас! Би харһнад үкҗәнәв! – гиҗ Яковд тер келнә. (Эн учрар терүнд Эдом#25:30 Эдом – эн нерн әәһәрн «улан» гидг еврей келнә үгин бәәдлтә. гидг нер бас өглә.)
31– Түрүләд нанд түрүлҗ төрснә зөвән хулд, – гиҗ Яков хәрү өгнә.
32– Нә сән! Би үкҗәнәв. Түрүңк болҗ һарснас нанд ямаран олз болҗана? – гиҗ Эсав келнә.
33– Түрүләд андһар өг, – гиҗ Яков келнә.
Эсав андһар өгнә. Тегәд тер түрүн болҗ һарсан Яковд хулдна. 34Терүнә хөөн Яков Эсавд өдмг болн бурцгар кесн буда өгнә. Тернь идәд, ууһад, босад йовҗ одна. Тиигҗ Эсав түрүн болҗ һарсн зөвдән оньган өгсн уга.
Currently Selected:
Эклц 25: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
