Эклц 30
30
1Рахел Яковд үрд эс һарһсндан эгчдән үлү үзнә.
– Нанд үрд өг, эс гихлә би үкнәв! – гиҗ Рахел Яковд келнә.
2– Чамд үрд эс өгх би Бурхн бишлм, – гиҗ терүнд уурлад Яков келнә.
3– Мини зарц Билха бәәнә. Терүнлә кевт, нанд күүкд һарһтха. Терүгәр дамҗад би үртә болхв, – гиҗ Рахел келнә. 4Тиигҗ тер Билхаг зарцан Яковд герг кеһәд өгнә. Яков терүнлә кевтнә. 5Билха саата болад, Яковд көвү һарһҗ өгнә. 6Тиигхлә Рахел келнә:
– Бурхн мини зарһ кев. Тер мини зальврлһ соңсад, нанд көвү өгв.
Дәкәд көвүндән Дан#30:6 Дан – энд эн нерн «тер цеврлв» гидг чинртә. гидг нер өгв. 7Билха дәкн саата болад, Яковд хойрдгч көвү һарһҗ өгнә.
8– Би эгчләһән сүркәһәр дәәлдәд диилүв, – гиҗ Рахел келнә.
Тер көвүнд Наптали#30:8 Наптали – эн нерн әәһәрн «ноолдх» гидг еврей келнә үгин бәәдлтә. гидг нер Рахел өгнә. 9Лия дәкҗ күүкд һарһдган уурсан медхләрн, эврәннь зарц Зилпаг Яковд гергн болтха гиҗ өгнә. 10Лиян зарц Зилпа Яковд көвү һарһна.
11– Ямаран күцәмҗ! – гиҗ тиигхләнь Лия келнә.
Лия тер көвүнд Гәд#30:11 Гәд – еврей келәр эн нерн «күцлт» гидг чинртә. гидг нер өгнә. 12Зилпа Яковд хойрдгч көвү һарһна.
13– Би ямаран буйн-кишгтә бәәҗв. Күүкд улс намаг кишгтә күн гиҗ келх! – гиҗ Лия келнә.
Лия терүнд Ашер#30:13 Ашер – еврей келәр эн нерн «кишгтә» гидг чинртә. гидг нер өгнә.
14Буудя хадҗах цагла Рубен урһмлын һазрт одад, тенд үрн олдхд эм-дом болҗ тусан күргдг урһмлын уңг#30:14 Урһмлын уңг – мандрагормуд. Энүгәр удһлдг бәәҗ, дәкәд эн өвснә уңгар үрн эс тогтхла эмндг бәәҗ. олҗ авад эврәннь эк Лияд авч ирнә.
– Буйн болтха, көвүнәннь авч ирсн урһмлын домта йозурас нег цөөкиг өгич, – гиҗ Рахел Лияһас сурна.
15– Мини залуг булаҗ авснчнь баһ болҗану? Ода мини көвүнә авч ирсн урһмлын йозурмуд авхар седҗәнчи? – гиҗ тернь хәрү өгнә.
– Сән. Чини көвүнә авч ирсн домта йозурин ормд, Яков эн сө чамла хонтха, – гиҗ Рахел келнә.
16Асхар Яковиг тәрәнәс ирхлә, Лия терүг һарад тосхларн иигҗ келнә:
– Чи нанла хонх йостач. Би чамла харһхин төлә Рахелд көвүнәннь авч ирсн домта йозурмуд өгүв.
Яков тер сө Лияла хонна.
17Бурхн Лияг соңсна. Лия саата болад, тавдгч көвү һарһна. 18Тиигхлә Лия иигҗ келнә:
– Эврәннь залудан зарцан өгснд Бурхн намаг ачлв.
Тер көвүндән Лия Исахар#30:18 Исахар – эн нерн әәһәрн «нәәмәдлгдсн күн» эс гихлә «ачлвр бәәнә» гисн үгмүдин бәәдлтә. гидг нер өгв. 19Лия дәкн саата болна, Яковд тер зурһадгч көвү һарһна.
20– Бурхн нанд сән белг өгв. Ода залум намаг күндлх, би терүнд яһв чигн 6 көвү һарһҗ өгвшүв, – гиҗ тер келнә.
Көвүндән тер Завулун#30:20 Завулун – эн нерн «әрүн нерн» гидг чинртә чигн болх, әәһәрн эн «белг» гидг еврей келнә үгин бәәдлтә. гидг нер өгнә.
21Невчк бәәҗәһәд, Лия күүк һарһна. Терүндән Дина гидг нер өгнә.
22Тегәд Бурхн Рахелин тускар санна. Бурхн терүг соңсад, күүкд һарһх арһ терүнд өгнә. 23Рахел саата болад, көвү һарһна.
– Бурхн нанас му нерим авч хайв, – гиҗ тер келв.
24Көвүндән Йосип#30:24 Йосип – эн нерн әәһәрн «Тер талданиг өгх» болн «Тер авчкла» гисн үгмүдин бәәдлтә. гидг нер өгнә.
– Деед Эзн нанд бас нег көвү немҗ өгтхә, – гиҗ Рахел келнә.
Яковин мал өсчәнә
25Рахел Йосипиг һарһсна хөөн Яков Лаванд иигҗ келнә:
– Би төрскн һазртан күрхәр бәәнәв. Намаг ода сулдхтн. 26Мини гергдиг болн үрдиг өгтн, яһад гихлә теднә төлә таднд заргдлав. Би йовнав. Намаг тана төлә яһҗ икәр көдлсиг та меднәт!
27– Буйн болтха, соңс. Би белг бәрәд, Деед Эзн нанд чамас көлтә әдс өгсиг медүв, – гиҗ Лаван терүнд келнә.
28– Эврәннь үнинь кел, би мөңгинь өгнәв, – гиҗ тер немҗ келв.
29– Би таднд яһҗ заргдсиг меднәлмт, дәкәд тана мал мини килмҗәр ямаран болсиг меднәт. 30Намаг ирхәс өмн бәәсн нег цөөкн тана мал икәр өсв. Деед Эзн намаг альдаран одв чигн тадниг әдслдг билә. Би эврәннь герин төлә кергтә тоотан кезә кехмб? – гиҗ Яков терүнд хәрү өгнә.
31– Чамд ю өгхмб? – гиҗ Лаван сурна.
– Нанд юм бичә өгтн. Негхн сурврим күцәтн, би цааранднь чигн тана мал хәрүләд мансув: 32тана цуг бог малын сүргүд дунд орад һарх зөв нанд өгтн. Теднәс цуг толвта болн алг хөд, хар өңгтә хурһд болн цуг толвта алг ямад салһх зөв өгтн. Тедн мини көлснә хәрүнь болтха. 33Таниг нанд өгсән тоолхар седсн цагт, үнн седклм иргчдән мини ормд хәрү өгх. Ямаран чигн толв уга, алг биш ямад, ямаран чигн хар өңгтәһәс талдан хурһд мини мал дунд хулхалҗ авгдсна тоод орх, – гиҗ Яков хәрү өгв.
34– Болҗана, үгций. Чини келсәр болтха, – гиҗ Лаван келнә.
35Тер өдртән Лаван толвта болн алг цуг текмүдиг, алг болн толвта цуг ямадыг – цаһан толвта болн хар өңгтә цуг хурһдыг салһад, эврәннь көвүдтән хәләтхә гиһәд даалһна. 36Һурвн хонгт йовад күрх дүңгә һазрт Лаван Яковас салҗ һарна. Яков терүнә үүрмг малыг цааранднь хәләҗәв.
37Уласна, миндаль болн платан моддын бүчрмүд керчҗ авад, Яков тедн деер цаһан керчм кеһәд, көрсинь тасм-тасмар шулад, модна дотркинь һарһна. 38Мал ус уухар ирхләнь шулгдсн бүчрмүд өмннь бәәдгәр цуг тевшмүдт тер тәвв. Көг тәвх цагт үүрмг мал ус уухар ирхләрн, 39бүчрин өмн тедн ханьцад, төлнь цоохр, алг болн толвта болҗ һардг бәәҗ. 40Тер төлиг Яков салһад, Лавана цоохр болн хар өңгтә мал тал хәләһәд зогсана. Тегәд Яков эврә малта болв, теднән Лавана малас салу бәрдг болв. 41Чинәтә мал бухсхла, Яков тедниг ханьцтха гиһәд өмнк тевшднь бүчрмүд тәвдг билә. 42Кемр мал чинән уга болхла, бүчрмүд тер тәвдго билә. Тиигҗ чинән уга мал Лаванд, чинәтәнь Яковд күртәд бәәв. 43Яков йир икәр байҗв, олн сүрг малта, зарцнрта, темәдтә, элҗгнтә тер болв.
Currently Selected:
Эклц 30: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
