Эклц 39
39
Йосип Потипарин герт
1Тер хоорнд Йосипиг Египетд авч ирнә. Хаана бәәшңд маначнрин ахлач болҗасн Потипар кувцнрас Йосипиг мухла кехәр хулдҗ авна. 2Йосипт Деед Эзн дөң болҗав, тегәд кергнь күцҗ йовв. Йосип эзнәннь герт бәәв. 3Тернь Деед Эзн Йосипла бәәхиг үзнә. Яһад гихлә Йосип ю кевв чигн терүнд Деед Эзн дөңгән күргдг билә. 4Йосип эзндән таасгдад, шишлң терүнә мухла болна. Эзнь терүнд герән даалһад, бәәсн эдл-ахуһан терүнә һардврт өгнә. 5Тер цагас авн Йосипин нилчәр Египетин Потипар күүнә герт бәәсн, теегт бәәсн эдл-ахуднь Деед Эзнә евәл бууҗав. 6Бәәсн цуг эдл-ахуһан тер Йосипин һардврт орулна. Бийднь болхла, хот уухас талдан керг үлдсн уга.
Йосип сәәхн цогцта, үзмҗтә билә. 7Эзнә гергнә седклнь терүнд тусч, тегәд иигҗ келнә:
– Кевт нанла.
8Болв Йосип зөв өглго терүнд хәрү өгнә:
– Мини эзн бәәсн юман цугинь мини һардврт өгв, бийнь гертән мел юм хәләхш. 9Эн герт би терүнлә әдләр һардҗанав. Эс кех юмн уга. Зуг таниг медшгов, та терүнә гергнт. Бурхна өмн килнц һарһад, тиим му йовдл би яһҗ кехмб?
10Эн гергн терүг өдр болһн цуцрлт угаһар ээрәд бәәв, болв Йосип терүнәс усхад зулна. 11Зуг нег дәкҗ Йосип көдлмш кехәр эзнәннь герт орҗ ирхлә, тер гергнәс талдан күн уга бәәҗ. 12Эзнә гергн терүнә хувцнас татад:
– Кевт нанла, – гиҗ дәкн келнә.
Йосип терүнәс мөлтрәд, хувцан һартнь үлдәчкәд, гертәс зулад гүүнә. 13Эзнә гергн Йосипин хувциг һартан бәрәд, терүг гүүһәд йовҗ одсиг медхләрн, 14мухласан дуудад:
– Хәләтн: эн еврейиг нанар наад бәртхә гиһәд нааран авч ирсмн болҗана! Тер нааран орҗ ирәд, намаг күчәр эзлхәр седв! Болв би хәәкрүв. 15Намаг чишкәд хәәкрәд бәәхлә, тер зулад гүүв. Нам хувцан үлдәһәд гертәс һарад гүүв! – гиҗ келнә.
16Йосипин хувциг залуһан хәрҗ иртл тер бийләһән бәрв. Залуһан ирхлә, 17гергн дәкн тер кевтән давтад келнә:
– Еврей мухла нанд күч үзүлхәр ирв. Намар наад бәртхә гиҗ терүг чи авч ирвич! 18Би чишкәд хәәкрүв. Тер нам хувцан үлдән гертәс зулад гүүв!
19Гергнәннь келсиг соңссн Йосипин эзн икәр уурлна. 20Йосипиг түүрмд орултха гиҗ тер закна. Тиигҗ Йосип хаана түүрмд орулгдна.
Йосип түүрмд
21Болв Деед Эзн терүнлә бәәсндән, цаһан санаһан күртәнә: Йосип түүрмин ахлачд таасгдна. 22Түүрмин ахлач терүгәр бәрәнд бәәсн улсин һардач кенә. Йосип цугинь даана. 23Түүрмин ахлач мел юмнд зовдго болв, яһад гихлә, Деед Эзн Йосипта бәәв. Терүнд юунднь болвчн күцәмҗ өгчәв.
Currently Selected:
Эклц 39: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
