Эклц 45
45
Йосип ахнр-дүүнртән бийиннь тускар илднь келнә
1Йосип бийән әмтнә хаҗуд бәрҗ чадад бәәв.
– Цугтан һартн! – гиҗ Йосип закна.
Йосипиг эврәннь ахнр-дүүнртән кен болҗ бәәсән келҗ өгхд, хаҗуднь нег чигн талын күн уга бәәҗ. 2Болв терүг дегд чаңһар уульсиг Египетин улс соңсҗ, тегәд хаана бәәшңд чигн тер зәңг күрч.
3– Би Йосипв, – гиҗ тер ахнр-дүүнртән келнә. – Мини эцк әмдий?
Теднь сүрдәд, нег чигн үг келҗ чадсн уга.
4– Эрҗәнәв тадниг, нааран өөрдтн, – гиҗ Йосип келнә.
Ах-дүүнрнь өөрднә.
– Энтн бив, Йосипв. Египетд хулдсн тана дүв. 5Бичә зовтн, терүнәс көлтә бийән бичә гемшәтн. Олна әм авртха гиһәд, намаг иигән Бурхн илгәвш. 6Хойрхн җилдән әмтн харһнҗана, бас 5 җилдән һазр хаһлҗ, тәрә хадҗ күн авшго. 7Тана тохма улс һазр деер әмд үлдтхә гиһәд, тана әмиг сүртәһәр сулдхҗ авртха гиһәд, таднас түрүлҗ намаг иигәрән Бурхн илгәв. 8Тадн биш, Бурхн намаг нааран илгәһәд, хаана хамгин ах селвгч кев. Терүнә орн-нутгин нойньв би, цуг Египетин һазрин һардач болув. 9Тадн эцк талан адһтн, терүнд иигәд келтн: «Чини көвүн Йосип иигҗ келүлв: Бурхн нанар цуг Египетин һардач кев. Бичә удадад бә, нан тал ир. 10Гошен һазрт көвүдтәһән, ачнр-зеенртәһән, цуг малтаһан, цуг эврәннь зөөртәһән нанас хол биш чи бүүрләд бәәхич. 11Тенд би чамд, чини өрк-бүлд, чини малд тетквртә бәәдл тогтанав. Өмнтн 5 җилдән харһнлһн болв чигн, тадн юуһарн чигн дутшгот», – гиҗ тер теднд келнә.
12– Хәләтн! – гиҗ Йосип хәәкрнә. – Хәлә, Бенямин, мини дү. Үнндән энтн би, би таднла күүндҗәнәв! 13Египетд би ямаран күчтә, туурмҗта болсиг эцкдм келҗ өгтн. Энд үзсән цугинь келҗ өгтн, шулуһар нааран эцким авч иртн.
14Эврәннь дү Беняминиг теврәд, Йосип уульна, тернь ахан теврәд бас уульна. 15Дәкәд уульн йовҗ Йосип наадк ахнран үмснә. Терүнә хөөн ахнр-дүүнрнь Йосипла күүндҗ чадцхав.
16Йосип тал ах-дүүнрнь ирҗ гисн зәңг хаана бәәшңд күрхлә, хан болн терүнә өөрхн улснь байрлна.
17– Элҗгнс деер буудяһан ачад, Канан тал йовтн, 18эцкән, эврәннь өрк-бүлән авч иртхә гиҗ ахнртан кел. Би теднд Египетд бәәсн хамгин сән һазр өгнәв. Мана нутгин элвг-делвг зөөрәс тедн эдлтхә, – гиҗ хан Йосипт келнә. – 19Бичкдүд, күүкд улс авч ирхин төлә, тедн Египетәс аца зөөх тергд автха. Бийләһән тедн эцкән авч иртхә. 20Үлдх эдл-ахуһин тускар зовад керг уга, яһад гихлә Египетд бәәсн юмна хамгин сәнь теднә болх.
21Израилин көвүд хаана келсәр кенә. Йосип теднд аца зөөх тергд өгнә, бас хаалһин хот, 22күн болһнд шин хувц өгнә. Зуг Беняминд тер 5 зах шин хувц, 300 төөнг цаһан мөңг#45:22 3,5 шаху кг. өгнә. 23Египетин һазрт бәәх зөөрәс 10 элҗгнд ачад, эцкдән белг тер илгәнә. Дәкәд 10 эм элҗгн деер буудя, өдмг болн нань чигн эдл-ууш ачад, бас хаалһин эдлвр гиҗ терүнд илгәв.
24– Йовтн, бичә әәтн, – гиҗ ахнр-дүүнрән үдшәһәд тер келнә.
25Египетәс һарад тедн Кананд бәәсн эцк талан хәрү ирцхәнә.
26– Йосип әмд йовна. Цуг Египетиг тер ода залҗана, – гиҗ тедн Яковд келнә.
Яковин зүркн менрҗ одна: соңссан иткҗәхш. 27Көвүднь Йосипин келсиг терүнд келҗ өгнә. Бийинь авхар Йосипин илгәсн аца зөөх тергд эврәннь нүдәрн үзхләрн, Яков ухан-седкләрн сергәд одна.
28– Болҗана! Мини көвүн Йосип әмд бәәдг чигн! Үкхиннь өмн ода би терүнлә одад харһнав! – гиҗ Израиль келнә.
Currently Selected:
Эклц 45: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
