Эклц 47
47
Яков хаанд әдс өгнә
1-2Ах-дүүнр дундас 5 кү шүүҗ авад, хан тал дахулҗ одад, Йосип иигҗ келнә:
– Мини эцк, ахнр-дүүнрм мал-гертәһән, цуг эдл-ахутаһан Кананас ирәд, ода Гошенд бәәцхәнә.
3– Тадн ю кедвт? – гиҗ хан теднәс сурна.
– Тана зарцнр, мана эцкнрлә әдл, мал хәләдг улсвидн, – гиҗ тедн хаанд келцхәнә. – 4Бидн иигәрән бәәхәр ирвидн, яһад гихлә Канан һазрт әмтн икәр харһнҗана. Тенд тана зарцнрт малан хәрүлх арһ уга. Тегәд маднд, эврәннь зарцнртан, Гошенд бәәх зөв өгтн.
5– Чини эцк болн ах-дүүнрчнь чам тал ирцхәв. 6Египетин цуг һазр өмнчнь бәәнә. Теднән эн һазрин хамгин сән ормд бәәлһ. Гошенд бүүрләд бәәтхә. Кемр тедн дунд чадврта әмтн бәәхлә, теднәр мини шишлң мал хәләлһ, – гиҗ хан Йосипт келнә.
7Йосип эврәннь эцкән дахулҗ ирәд, хаанла таньлдулна. Яков хаанд әдс өгнә.
8– Чи кедүтәвч? – гиҗ хан терүнәс сурна.
9– Би 130 җилдән әмд йовнав. Мини җирһл һашута. Насм ик биш, тооһарн эцкнринм наснд күрәд уга, – гиҗ Яков хаанд хәрү өгнә.
10Яков хааг йовх деерән дәкн әдсләд, терүнә бәәшңгәс һарад йовна.
11Йосип эцкән, ахнр-дүүнрән Египетд, Раамсес балһсна эргнд, хамгин сән һазрт бәәлһәд, хаана келсәр терүг теднд өгнә. 12Эцкән, ах-дүүнрән, теднә герт бәәх улсиг, күүкд улсиг, бичкдүдиг Йосип тооһарнь күцц хотар теткнә.
Харһнлһна цагт Йосипин һардлһн
13Дәкәд альд чигн хот уга болв, яһад гихлә харһнлһна догшн цаг ирв. Египетд чигн, Кананд чигн харһнсндан әмтн муурцхав. 14Буудя хулдад хоршасн цуг мөңгиг Йосип Египетәс болн Кананас цуглулҗ авна. Тер мөңгән Йосип хаана хазнд бәрҗәв. 15Египетд, Кананд әмтнә мөңгн чилхлә, Египетин улс Йосип тал ирәд иигҗ келцхәнә:
– Маднд өдмг өгтн. Бидн тана хаҗуд ю хәәҗ үкхмби? Мана мөңгн чилв.
16– Тана мөңгн чилсн болхла, малан тууҗ авч иртн. Би ормднь өдмг өгнәв, – гиҗ Йосип келнә.
17Тедн Йосип тал малан авч ирнә. Мөрдиг, хөөдиг, ямадиг, үкрмүдиг, элҗгнсиг тедн буудяһас сольна. Тер җил әмтн цуг малан өдмгәс сольв.
18Җил давхла, Египетин улс Йосип тал ирәд иигҗ келцхәнә:
– Мана нойнас мөңгн чилв гиҗ бидн нуухар бәәхшвидн. Мана мал тана болв. Мана цогц-махмудас болн мана һазрас талдан нойнд өгх дүңгә юмн маднд үлдсн уга. 19Бидн эврән, мана һазр кевтән ю хәәҗ тана хаҗуд үкхмби? Мадниг, мана һазриг өдмгәс соляд, та хулдҗ автн. Бидн хаанд мухла болнавидн, мана һазр терүнә болх. Маднд әмд үлдхин төлә, дәкәд һазр хоосрашгон төлә тәрәнә эк өгтн.
20Тиим кевәр Йосип Египетд бәәсн цуг һазриг хаана төлә хулдҗ авв. Египетин күн болһн харһнлһнд даргдад, эврәннь һазран терүнд хулдв. Тиигәд тер һазр хаана зөөр болв. 21Египетин нег захас оңдан зах күртлнь цуг әмтиг Йосип мухла кев. 22Һанцхн гелңгүдин һазр тер хулдҗ авсн уга, яһад гихлә тедн даңгин эврәннь хүвән хаанас авдг билә. Хаанас авсн тер хүвнь эдлвр кехд күртәд бәәдмн. Тер учрар тедн эврәннь һазран хулдсн уга.
23– Соңстн, тадниг, тана һазриг би хаана төлә хулдҗ авув. Ода тадн эн тәрәнә эк авад, һазртан тәртн. 24Тәрәһән хадхларн, эн өдрәс авн тавн әңгин нег хүвинь хаанд тадн өгтн. Наадк дөрвн хүвинь тәрә тәрх экнд үлдәхит, эврән идхит, гертән бәәх улсан, үрдән асрхит, – гиҗ Йосип әмтнд келнә.
25– Та мадниг әмд үлдәввт. Маднд цаһан санаһан күртәввт. Бидн хаана мухлас болнавидн, – гиҗ тедн келнә.
26Тиигҗ Египетд Йосип һазрин туск зака тогтана. Тернь эндр күртл күцәгдҗәнә. Тавн әңгин нег хүвнь хаана болҗана. Болв эннь гелң улсин һазрас цуглулгдхш, яһад гихлә теднә һазр хаана зөөр биш билә.
Яковин сүүлин сурвр
27Израилин улс Египетд Гошен һазр авад, зөөрән хоршаһад, тооһарн өсчәв.
28Яков Египетд 17 җилдән бәәв. Тер 147 билә. 29Өңгрх цагнь ирхлә, Израиль Йосип көвүһән дуудад, терүнд иигҗ келнә:
– Буйн болтха, һаран мини ташад күрг, андһар өг. Мини сурвр күцә. Намаг Египетд бичә орша. 30Болв намаг өвкнр талан салад давхла, Египетәс һарһад, тедниг оршасн һазрт орша.
– Би чини келсәр кенәв, – гиҗ Йосип хәрү өгнә.
31– Андһаран өг, – гиҗ эцкнь келнә.
Йосип андһаран өгнә. Орн деерән кевтсн Израиль ханлтан өргҗ гекнә.
Currently Selected:
Эклц 47: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
