Genesis 21
21
Hay nitungowan Isaac
1Indani ya impaannung APU DIOS nan kinalinan Sarah handi. 2Ot mawadaan handih am-ama moh Abraham. Intungona nan golang handih nadatngan nan gintud Apu Dios. 3-5Ot ngadanan Abraham hidiyen imbabale da hi Isaac. Hay toon mon Abraham kediye ya hinggatut. Ya handih waluy algon Isaac ya kinugit na te hidiyey kinalin Apu Dios an atona.#21:3-5 Acts 7:8
6Immamlong hi Sarah an kananay “Indatanak ke Apu Dios hi pun-an-anlaak ya inilak ot am-in di mangngol ketuwen nun-imbabaleyak ya makian-anla dan ha-on. 7Te takon di dahdi ya inila dan adiyak pakaimbabale. Mu deyan ad uwani ya nitungo tun lalakin imbabale min Abraham yaden am-ama mo.”
Hay nangitud-akan Abraham ke da Hagar an hin-ina
8Immongngal hi Isaac ot handih naphuwana ya numpahamul hi Abraham. 9Ohan algo ya taltalanggaan Ismael an imbabalen Abraham nah iEgypt an muttatyun hi Hagar hi Isaac an imbabalen da Abraham ke Sarah. 10Tinibon Sarah diye ot kananan Abraham di “Itud-ak mu hanan himbut ya nan imbabalena te adi mabalin an e makibingay nah boltanon tun imbabalek an hi Isaac.”#21:10 Galatia 4:30 11Mabulubulun hi Abraham kediye te imbabalena damdamah Ismael. 12Mu kimmalih Apu Dios ke hiya an kananay “Adika madanagan ke Ismael ya hi inanan hi Hagar. Un-unudom di kinalin Sarah te hi Isaac di pangipaannungak nah kinalik ke he-an dumakol di holag mu.#21:12, Romans 9:7, Hebrews 11:18 13Hinaen imbabalem nah muttatyu ya idatak hi dakol an holag na te hiya ya imbabalem damdama.”
14Ot mungkabigat kediye ya indadaan Abraham di makan ya danum an ipabalunan da Hagar an hin-ina ot itud-ak na dida.
Imme da ot eda humanawwangan nah adi maboblayan ad Beersheba. 15Indani ya nap-uhan dah danum ot taynan Hagar nan imbabalena nah puun di ka-kaiw. 16Ot e umbun nah e-elena an kananay “Adiyak pakaitulid an mangang-ang hi katayan nan imbabalek.” Ya mungkokkoggan um-umbun.
17Dingngol Apu Dios di kogan nan unga ot indani ya kimmali nan anghel Apu Dios ke Hagar an kananay “Nganney kabulubulunam Hagar? Adika madanagan ot dingngol Apu Dios di kogan nan imbabalem. 18Tumaddog ka ot ta em awiton ya inal-aluk mu. Ahik pumbalinon an aman di dakol an tataguh udum hi algo.” 19Indani ya kay diniyat Apu Dios di matan Hagar ya tinibona on bubun ot humagob hi ena painum nah imbabalena.
20,21Impappaptok Apu Dios nan unga nah kiha-ha-adan da nah adi maboblayan ad Paran. Hidiy immongngalana an numbalin hi nakala-ing an mun-anup. E inhamakan inanah kaboblayanan iEgypt ot ipaahawanan hiya.
Hay nunhummanganan da Abimelek ke Abraham
22Handih immayan da Abimelek ya nan ap-apun di tindalunan hi Pikol hi kad-an Abraham ya kanan Abimelek ke hiyay “Inilak an badbaddangan dakan Apu Dios am-in nah atom. 23Ta hituwe nan makihummanganak ke he-at isapatam ke Apu Dios an adika makibuhul ke ha-on, nadah imbabalek ya inap-apuk, mu makigayyum kan dakami umat hi pangat kun he-a tuh boble min nakiboblayam.” 24Ya kanan Abraham di “Om, isapatak ke Apu Dios an athinay maat.”
25Ot ne mundiklamu poh Abraham ke Abimelek mipanggep nah bubun an pinlon nadan muttatyun Abimelek. 26Kanan Abimelek di “Uggek inilah naen naat ya uggek inila hin dahdiy nangat. Tipet uggem kinali handi?” 27Indattan Abraham hi Abimelek hi kalnero ya baka an kitib-an di nahamad an punggayyuman da. 28Immappil boh Abraham hi pitun impan di kalnero. 29Ya kanan Abimelek di “Tipe nae?” 30Ya kanan Abraham di “Alam datuwe ta kitib-anan abulutom an ha-oy di nanga-ut tuh bubun.” 31Ot ngadanan dah diyen boble hi Beersheba te hidiy naatan nan hummangan da. 32Nagibbuh diyen hummangan da ot mibangngad da Abimelek ke Pikol ad Pilistia.
33Intanom Abraham on kaiw an tamarisk hidid Beersheba ot dayawonah dih APU DIOS an wadat nangamung. 34Ot hidid Pilistia di numboblayan da Abraham hi nabayag.
Currently Selected:
Genesis 21: ifkWB
Highlight
Share
Copy
Want to have your highlights saved across all your devices? Sign up or sign in
© 2004, Wycliffe Bible Translators, Inc. All rights reserved.
