Genesis 25
25
Hanadan udum an holag Abraham
1Hi Abraham ya numbintan ke Keturah 2ot mawadah Simran, hi Joksan, hi Medan, hi Midian, hi Isbak ya hi Suah. 3Nahlag hi Joksan ot da Seba ke Dedan. Ot muntanud hi Dedan ot nadan Assurim, Letushim ya Leummim. 4Nahlag hi Midian ot da Ephah, hi Epher, hi Hanok, hi Abida ya hi Eldaah. Datuwen am-in di holag Keturah.
5Hay nangipaboltanan Abraham am-in hi wadan hiya ya hi Isaac. 6Mu wada damdamay indat na nadah udum an imbabalena nadah udum an inayana. Ot ahina itud-ak didan e mumboble nah nangappit hi timilan di algo ta midawwi dan Isaac.
Hay natayan ya nilubukan Abraham
7,8Hay toon Abraham ya hinggatut ta napitut lima an naka-am-ama ot ahi mate ot e mid-um hanadah aammod nan nungkakate. 9,10Ot e ilubuk nadan imbabalenan hi Ismael ya hi Isaac nah ginatang Abraham ke Eplon an imbabalen nan Hittite an hi Sohar an liyang an nilubukan Sarah nah paldang nan payo ad Makpelah an nih-up ad Mamre.
11Hi Isaac an imbabalen Abraham ya binendisyonan Apu Dios. Hay numboblayana ya ad Beer Lahai Roi.
Hanadan holag Ismael
12Hi Ismael an imbabalen Abraham ke Hagar an iEgypt an muttatyun Sarah ya nahlag. 13Ot datuwey nunhahaynod an imbabalena, hi Nebayot an panguluwan, hi Kedar, hi Adbeel, hi Mibsam, 14hi Misma, hi Dumah, hi Massa, 15hi Hadad, hi Tema, hi Jetur, hi Naphis ya hi Kedemah an udidiyan. 16Datuwen himpulut duwan imbabalen Ismael ya nip-ong dan nun-ap-apu nadah himpulut duwan boblen niha-adan da an ningadanan di ngadan da. 17Hay bilang di toon Ismael ya hinggatut ta tulumpulut pitu ot ahi mate. 18Hay numboblayan nadan holag na ya nah numbattanan di Habilah ya Sur an nih-up nah poppog di Egypt nah nangappit hi timilan di algon dalanon an umed Assyria an naappil da nadah udum an imbabalen Abraham.
Hay nitungowan da Esau ke Jacob
19Hituwey na-na-at ke Isaac an imbabalen Abraham. 20Hi Isaac ya nap-at di toona handih nun-adduman dan Rebekah an tulang Laban an dida nan imbabalen Bethuel an iAramea ad Mesopotamya. 21Dumasadasal ke APU DIOS te adi pakaimbabaleh Rebekah ot indani ya dingngol APU DIOS di dasal na ot mawadaan hi Rebekah. 22Hanan imbutyug Rebekah ya nundappil ta kay da bumanultung hi putuna. Ot mundasal ke APU DIOS an kananay “Tipet athituy ma-ma-at ke ha-on?” 23Ya kanan APU DIOS ke hiyay “Hanan imbutyug mu an nundappil ya ahi mun-appil di holag dan mumboble. Hanan oha ya makodkodhol mu nan ibana. Ya nan mamangulu ya hiyay ahi pummuttatyun nan mihaynod.”#25:23 Romans 9:10-12
24Handih nuntungoh Rebekah ya makulug an duwan linalaki. 25Hanan namangulun bimmuddal ya ma-maingit ya nakabu-ukkan di adol na, kinali nginadanan dah Esau. 26Nitun-ud nan mikadwa ya inhamad nan inid-on hi mukud Esau ot ngadanan dah Jacob. Hi Isaac ya nan-om di toona handih nitungo datuwen imbabalena.
Hay nangiwalongan Esau nah kalebbenganan panguluwan
(Hebrews 12:16)
27Handih kimmat-agu da ya nalaing hi Esau an mun-anup ta nah muyung di imminghah pangapangayana. Hi ke Jacob ya hi nunhituwan day kiha-ha-adana. 28Hi Isaac ya pinpinhod nah Esau te gapu nah anuponan oggana ihda. Mu hi Rebekah ya hi Jacob di pinpinhod na.
29Ohan algon munha-ha-ang hi Jacob hi ihda ya dimmatong hi Esau an nalpuh muyung an nakaaggangan. 30Kananan Jacob di “Iyalim aga nan ma-maingit an inha-ang mun ihda ta kanok te deh tun nakaagganganak.” Ot ngadanan dah Esau hi Edom. (Hay kibalinan di Edom ya maingit.) 31Kanan Jacob ke hiyay “Damana, mu mahapul an idat mu nan kalebbengam an panguluwan.” 32Kanan Esau di “Takombo, nganney pangiatak nah kalebbengak yaden dehtun mateyak hi inagang ku.” 33Ot kanan Jacob di “Mahapul an isapatam an idat mun ha-oy nan kalebbengam ta ahik idat.”
Ot isapatan Esau an idat nan Jacob nan kalebbenganan panguluwan. 34Ot idat nuppen Jacob nan kanona. Nabhug ot ipayu na bon mange. Kediye ya impatibon Esau an adina ibilang nan kalebbenganan panguluwan.
Currently Selected:
Genesis 25: ifkWB
Highlight
Share
Copy
Want to have your highlights saved across all your devices? Sign up or sign in
© 2004, Wycliffe Bible Translators, Inc. All rights reserved.
