Genesis 31
31
Hay timmayanan da Jacob
1Hi Jacob ya dingngol nan kanan nadan linalakin imbabalen Laban di “Inalan Jacob am-in nan halun ama taku ot ikadangyana.” 2Ya inilmu na bon takon hi Laban ya numbaliw te makudang moy pangapnga nan hiya an adi umat handih lappuna. 3Kanan APU DIOS ke hiyay “Kudukdulnay mibangngad kah boblen nan aammod mu ya nan tutulang mu ot wadaak an mangipaptok ke he-a.”
4Indani ya impaayag Jacob da Rachel ke Leah ot umali da nah pumpattolanah kalnero. 5Kananan diday “Magibok kun hi amayu ya numbaliw te makudang moy pangapnganan ha-oy an adi umat handih lappuna. Mu maphod ta hi Apu Dios an daydayawon ama ya nanongnan baddanganak. 6Inila yu met kattog an nahalman di nungngunuk am-in nah impangunun ama yun ha-on. 7Mu kapyanan linugilugiyak ke hiya te naminhimpulun kinudakudanganay binoklak. Mu maphod ta ugge in-abulut Apu Dios an dadagonak ke hiya. 8,9Hay kitib-anan ongal di baddang Apu Dios ke ha-on ya deket kanan ama yuy hay nungkabatokan an gulding di idat nah boklaok on nungkabatokan di iimpa da. Ya deke bot hinannotanay nomnom nat kananay hay nungkagulitan di boklaok on nungkagulitan di iimpa da. Ta hidiye nan kay hiyay nangit-an ke ha-on hanadah halun amayu.
10Handih mummaya nadan gulding ya inin-inop kun nada ken lakin gulding an munmanada ya nungkagulitan ya nungkabatokan di udum. 11Mungkali nan anghel Apu Dios ke ha-on nah in-inop ku ot kanak di ‘Deh tuwak Apu.’ 12Kananay ‘Tibom ken am-in nadan lakin gulding an munmanada ya nungkabatokan da ya nungkagulitan di udum. Iathituk te tinibok am-in nan inainat Laban ke he-a. 13Ha-oy nan Dios an numpatibon he-a ad Bethel ot duyagam hi lana nan hina-ad mun batun panginomnomnomam ke ha-on ya nunsapata kan ha-on. Ot ad uwani ya mundadaan ka ta mibangngad ka nah boblen nitungawam.’”
14Ya kanan da Rachel ke Leah di “Takon di dakami ya maid anhan di impaboltanan dakami 15ya kay kami hintaguwan hi pangat na. Kay dakami inihbut ot umahonan am-in di bayad mi. 16Hidiyen kanam an kinadangyan aman kay inalan Apu Dios ot it-anan he-a ya bagi takun am-in ke datuwen u-unga. Kinali nan kinalin Apu Dios ke he-ay un-unudom.”
17-19Ot ohan algon e nangaan hi Laban hi dutdut di kalnero na ya indadaan Jacob am-in di mahapul dah kibangngadan dad Kanaan an boblen amana. Hanadan imbabalena ya inayana ya impuntakke na didah kamel. Ot ipangulu na dida ya nadan halun da ot mange dan impakial-ala dan am-in nadan wadan didan limmu dad Padan Aram ad Mesopotamya. Ot gapu te maid hi amada ya inibtik Rachel nadan nakapyan dios amana. 20Indalunun da Jacob an immen uggeda impainilan Laban. 21Inal-alan Jacob am-in nadan wadan dida ot umagwat da nah Wangwang an Euphrates ot mumpae da nah mabilid ad Gilead.
Hay namdugan Laban ke da Jacob
22Handih mikatlun algoh timmayanan da Jacob ya waday nangipainilan Laban kediyen binumtikan da. 23-25Inamung na nadan tataguna ot unudon dah Jacob. Handih mikapitun algo ya nih-up da mo ke dida nah mabilid ad Gilead an nungkampuwan da. Nahilong kediye ya inin-inop Laban an kanan Apu Dios ke hiyay “Tibom ot ta maid di kalyom ke Jacob hi ad-adi.”
26Ot umeh Laban ke Jacob ot kananay “Tipet athinay inat mun kay mu inibtik tudan imbabalek hi gubat? 27Tipet eyu indalunun timmayan? Gulat nat impainila yun ha-oy ya wadan nundadaanak hi pun-an-anlaan takun am-in ta ahi kayu tumayan. 28Uggeyak anhan nakiap-apnga hantudah inap-apuk ya hantudah imbabalek ya timmayan kayu. Adi maphod hituwen inat mu. 29Gulat na ya takon di nganney atok ke he-a ya mabalin, mu numpain-inop nan Dios an dayawon amam handih hilong an kananay maid di kalyok ke he-ah ad-adi. 30Inilak di gapunah timmayanan yu te uma-abtu kan umanamut hi balen amam. Mu takon ot, tipet eyu impakiala nadan tinattaggun dios ku?”
31Kanan Jacob di “Man-uke ya umagolak an kal-ina ya iadim hantudan imbabalem. 32Mu nan kanam an nakapyan dios mu ya punhamak yu ta deket hamakon yu ya mipipate nan nangala. Ya deket waday tibom hi bagim ya ituddum ta pun-hintitib-an tun tatagun nun-ibba taku.” Athidiy nangalin Jacob te uggena inilan hi Rachel di nangala.
33Ot op-opngon Laban an hinamak nadah kampun Jacob ot ahih kampun Leah, nah kampun nan duwan muttatyu ot ahih kampun Rachel. 34Mu maid. Hi Rachel ya inhudu na nadan nakapyan dios amana nah ubunan hi puntakkayan ot ub-ubunnana.
35Kananan amanay “Adim ad-adiyon di ek adi tumaddogan te waday malpuh adol ku.” Ot maid di hinamak Laban. 36Hidiyey bimmoh-olan Jacob ot kananan Laban di “Nganney numbahulak ke he-a ta eyak inunud? 37Deyan binalukitkit mun am-in ya deket waday hinamak muh kanam hi bagim ya ibudal mut tibon tudan ibbam ya tudan ibbak ta diday mangiuh-u hin dahdi ke ditay nihalla.
38Inilam an duwampuluy toon di nungngunuwak ke he-a ot ipanaptok kuy halun mu ot deyan dimmakol. Ya takon di oha ya maid di ek kinlong ot ihdak. 39Ya wada key pinaten di layon nah halun mu on uggek impainilan he-a on hinannotak. Athidi bo nadah maakoh hilong weno mapat-al an ipahannot mun ha-on. 40Ya initpoitpol kuy potang nah mapat-al ya kotol nah hilong ya deke on matukatukalak. 41Athituy hinolholtap kuh duway pulun toon te himpulut opat di toon di namoklaak ke datuwen duwan imbabalem ya onom di toon di namoklaak ke datuwen halun ku. Mu naminhimpulun kinudangam di binoklak. 42Gulat nat uggeyak binaddangan ke Apu Dios an dayawon nadan aammod kun hi Abraham ya hi Isaac ya wadan intud-akak an ma-ma-idan di indat mu. Mu maphod ta tinibon Apu Dios di nunligatak ya hay inat kun nungngunu ot handih hilong ya kinalinan he-an maid di kalyom ke ha-on hi ad-adi.”
Hay inhummangan da Jacob ke Laban
43Ya kanan Laban di “Hantudan binabai ya imbabalek dida ya inap-apuk tudan imbabaleda. Ya takon tun halun ya nalpun ha-on. Hay kakulugana ya am-in tun matibom ya bagik. Mu gaput maid moy maat ku ya 44mahapul an munhummangan ta. Aga, umiha-ad tah batun panginomnoman ta.”
45Ot umalah Jacob hi batu ot ha-adona ta panginomnoman da kediyen ihummangan da. 46Ya kinalina nadah ibbana ot umipiggil dah batu ot mangan dan am-in hidi. 47Nginadanan Laban hidiyeh Jegar Sahadutah. Hay impungngadan damdaman Jacob ya Galeed.
48Kanan Laban ke Jacob di “Hituwen piniggil di panginomnoman tan duwa.” Kinali hay ngadan diyen boble ya Galeed. 49Mu nginadanan da boh Mispah te kanan Laban di “Hi APU DIOS di manmannibon ditan duwa ta nan inhummangan ta ya maunud takon di nundawwiyan ta. 50Adik inilaon hin iboh-ol mu tudan imbabalek weno malahin ka boh udum, mu nomnomom an wadah Apu Dios an manmannibon he-a. 51,52Hay mangipanomnom ke dita ya hituwen piniggil an batu ya nan batun hina-ad mu. Ya adi mabalin an la-uwak ta waday atok ke he-ah ad-adi ya athidi bon he-an adi mabalin an la-uwam ta waday atom ke ha-on hi ad-adi. 53Hanan Dios an dayawon din hi Abraham ya hi Nahor di nangamung an mangastigu nah mangibahho ketuwen inhummangan ta.”
Ot munsapata damdamah Jacob nah Dios an dayawon Isaac an un-unudonah tuwen inhummangan da. 54Ot iappitan Jacob hi Apu Dios nah bilid. Inayaganan am-in nadan tatagu ot mangan da. Ot mun-iyan dahdi kediyen hilong.
55Nabigat ot bumangun hi Laban ot awalona nadan inap-apuna ya imbabalena ot bendisyonana dida ot ahida umanamut hi bobleda.
Currently Selected:
Genesis 31: ifkWB
Highlight
Share
Copy
Want to have your highlights saved across all your devices? Sign up or sign in
© 2004, Wycliffe Bible Translators, Inc. All rights reserved.
